Baboleli ba ’Muso Baa Tlaleha
Litaba Tse Molemo Tsa ’Muso Tse Tsoang Tlaase-tlaase
JOALOKA linaheng tse ling tse 211, litaba tse molemo tsa ’Muso li ntse li boleloa ka cheseho ke Lipaki tsa Jehova tlaase-tlaase Australia. Lipaki tse fetang 49 000 moo li thabela mahlohonolo a enneng. Batho ba bangata ba lichaba tse fapaneng ba ile ba fallela moo ho theosa le lilemo, hoo hona joale liphutheho tse 58 tsa merabe li tlalehang tšebeletso ea tšimo. Liphihlelo tse khothatsang li phetoa ke ofisi ea lekala ea Mokhatlo oa Watch Tower.
Motšabeli oa Vietnam
Motšabeli oa Vietnam, eo hona joale a phelang Australia, o hōtse ka ho rapela baholo-holo, Boconfucius, le Bobuddha, ’moho le filosofi ea Bochabela le Bophirimela. Ho fihlela ka 1975 e ne e le lesole lebothong la Vietnam le ka Boroa. Ka 1979 o ile a tlameha hore sephaka sa hae sa letsoho le letšehali se khaoloe ka baka la hlala e letsohong la hae. A laba-labela tokoloho, o ile a baleha Vietnam ka 1983, hammoho le batho ba bang ba 24, ka seketsoana se senyenyane. Ka mor’a ho teana ho tšosang le masholu a maoatleng, seketsoana sa bona sa hoholehela Leoatleng la China Boroa e se ka morero ka matsatsi a tšeletseng a chesang, ho fihlela qetellong ba fihla Malaysia. Ka mor’a ho qeta likhoeli tse hlano kampong ea batšabeli, o ile a lumelloa ho kena Australia. Likhoeli tse tharo hamorao o ile a teana le ’nete. Mantsoe a Jesu ho Johanne 8:32 a ile a arabela taba-tabelo ea hae e tebileng bakeng sa tokoloho: “Le tla tseba ’nete, ’me ’nete e tla le lokolla.” Baena ba ile ba mo bontša lerato le leholo. Kajeno ke Paki ea Jehova ’me o sebelisetsoa ho thusa batho ba bang ba bangata ba buang Sevietnam ho ithuta ’nete e lokollang motho.
Motala oa Australia o Arabela ’Neteng
Ka Leboea bophirimela ho Australia moena e mocha oa pula-maliboho le ea tsamaeang le eena ba ile ba etela mosali oa Motala oa Australia sebakeng sa morabe oo se bitsoang sekiring. Hoba a utloe lebaka la ho mo etela ha bona, mosali a ntša senotlolo molaleng oa hae ’me a notlolla lekase la tšepe le leholo. Ba maketse haholo, ba bona ka hare har’a lintho tsa hae tse ’maloa libukana tse peli tsa Watch Tower tse boholo ba makasine le kopi ea khale ea Bibele. Ba lutse fatše, ba ile ba khona ho qalisa thuto ba sebelisa e ’ngoe ea libukana tse boholo ba makasine. Le hoja mosali eo a sa tsebe ho bala le ho ngola, kannete o ile a nka libukana tseo a neng a li fumane pejana e le tsa bohlokoa. Ho thabeng ha hae, hona joale thuto ea ka mehla e-ea khannoa.
Ho Letsetsa Nomoro ea Fono-fono ka Tšohanyetso
Motseng oa Sydney, ka palo ea baahi ba limillione tse tharo, ngoanana e monyenyane ea lilemo li tharo o ne a ntse a bapala ka fono-fono ’me ka tšohanyetso a letsetsa nomorong e ’ngoe. Ha etsahala hore nomoro eo e be ke ea Paki. Khaitseli o ile a arabela, ’me pele o ile a nahana hore motho ea letsitseng ke setloholo sa hae. Eaba o utloa lentsoe la motho e moholo. E ne e le ’mè oa ngoanana e monyenyane, ea ileng a kōpela morali oa hae tšoarelo. Puisano e ile ea latela, e leng nakong eo khaitseli oa rōna a ileng a fana ka bopaki. Mosali eo a re: “Ke ne ke tšepile hore Lipaki li tla boela li tla ha ka hape. Ke batla ho ba e mong oa Lipaki tsa Jehova!” O ile a tsoela pele ho bolela hore likhoeling tse peli feela pejana, o ne a ile a etela Peru ’me a makatsoa ke rakhali oa hae le lelapa bao hona joale e leng Lipaki tsa Jehova. A re: “Bana ba beng ka ’na e ne e le bo-diabolose ba banyenyane, empa hona joale ke mangeloi a manyenyane!” Litokisetso li ile tsa etsoa bakeng sa thuto ea Bibele, ’me mosali ea thahasellang o tsoela pele hantle—sohle ka baka la ho letsa ka tšohanyetso ha ngoanana oa hae e monyenyane.