Likopano tse Hlollang li Hōlisa Thuto ea Bomolimo
KAJENO, lefatše le latsoa ho phasalla ho hoholo ha boitsebiso. Thelevisheneng le seea-le-moeeng, libukeng kapa ka li-computer, ho batla ho e-na le phepelo ea tsebo e sa lekanyetsoang ho hoo e batlang e le tabeng e ’ngoe le e ’ngoe e ka nahanoang. Ho ntse ho le joalo, batho ba ntse ba kula le ho shoa. Tlōlo ea molao, tlala, le bofutsana li teng ho pota lefatše, le pherekano ea maikutlo e ama batho ba bangata ho feta leha e le neng pele. Tsebo eohle e teng e hlōlehile ho lokisa litaba. Hobane’ng? Hobane moloko oa motho o hlokomolohile bohlale ba Molimo.
Joale, ke ho loketseng hakaakang, hore e be “Thuto ea Bomolimo” e ne e le sehlooho se khethetsoeng likopano tsa haufinyane tsa Lipaki tsa Jehova! Lenaneo le ile la hopotsa ba neng ba le teng hore ke thuto e fumanoang feela Lentsoeng la Molimo, Bibele, e nang le molemo oa sebele o bolokang bophelo.
Kopano ea pele e ile ea qala ka Labone, June 3, Uniondale, New York, U.S.A. Ho tloha ka nako eo ho ea pele, lenaneo le ile la fanoa metseng e fapaneng linaheng ka ho latellana, ’me la qetella k’honthinenteng ea Afrika le ea Amerika Boroa.
Thapama ea Letsatsi la Pele
Letsatsi ka leng le ne le e-na le sehlooho se hatisang tšobotsi ea thuto ea bomolimo. Ka mohlala, lenaneo la letsatsi la pele le ne le thehiloe sehloohong “Ho Tseba Thuto e Tsoang ho Molimo.” (Johanne 7:17) Mohopolo ona o ile oa tšohloa haholo ha letsatsi le ntse le tsamaea.
Ka mor’a pina le thapelo, molula-setulo oa kopano o ile a bula lenaneo ka puo e nang le sehlooho se reng “Thuto ea Bomolimo e Re Bokanya Hammoho.” O ile a bontša hore batho ba Jehova ba kopantsoe ke ho ithuta litsela tsa Hae le ho tsamaea litseleng tsa Hae. (Mikea 4:1-5) Thuto ea bomolimo e matlafatsa bonngoe ba bona. Ba tlileng kopanong ba ile ba khothaletsoa ho ithabela setsoalleng sa bona se kopaneng.—Pesaleme ea 133:1-3.
Hamoraonyana thapama, ho ile ha buisanoa ka liboka tsa phutheho tsa ka mehla neheletsanong e neng e e-na le sehlooho “Liboka tse Re Rutang ka Litsela tsa Jehova.” Sebui sa pele se ile sa hopotsa ba tlileng kopanong hore ha re bokana hammoho, re tlotlisa Jehova ’me kahoo re amohela tlhohonolofatso ea Hae. Sebui se latelang se ile sa hatisa tlhokahalo ea ho nka karolo libokeng. Ka ho etsa joalo, re rorisa Jehova phatlalatsa, re bontša tumelo ea rōna, ’me re matlafatsa tumelo ea ba bang. Sebui sa boraro neheletsanong ena se ile sa bontša hore hoa hlokahala ho sebelisa seo re ithutang sona libokeng. Re lokela ho ba “baetsi ba lentsoe, e seng bautloi feela.”—Jakobo 1:22.
Ho ile ha latela puisano e molemo mabapi le ho binela Jehova lithoriso. Pina e tlohang botebong ba pelo ke karolo ea bohlokoa ea borapeli ba rōna. Puo ena e ile ea lateloa ke nehelano ea puo ea sehlooho, “Thuto ea Bomolimo ea Hlōla.” E bile sehlooho se molemo hakaakang! Sebui se ile sa re: “Jehova ke mohloli oa thuto e molemo ka ho fetisisa eo mang kapa mang a ka e fumanang.” Joale, ka mor’a hore se tšohle ka bokhutšoaane mohlolo oa boko ba motho, se ile sa re: “Re lokela ho sebelisa matla a rōna a ho nahana haholo-holo bakeng sa ho fumana thuto ea bomolimo. Ke eona feela e fellang ka bohlale ba ’nete.” Ke ’nete hakaakang!
Hoseng ha Letsatsi la Bobeli
“Le ’Ne le Khabise Thuto ea Mopholosi oa Rōna, Molimo” e ne e le sehlooho sa letsatsi la bobeli la kopano. (Tite 2:10, NW) Molao-motheo ona o ile oa hlahella puong “Thuto ea Bomolimo Khahlanong le Lithuto tsa Bademona.” E, bademona ba na le lithuto tsa bona. (1 Timothea 4:1) Joalokaha sebui se ile sa hlalosa, thuto ea bomolimo e hlōla “bohlale” ba Satane ka ho pepesa lithuto tsa bohata le litsela tse mano tsa Diabolose. Ka lebaka la sena, Bakreste ba ka bang 4 500 000 ba lipelo li lokileng ha esale makhoba lefifing la Satane.—Johanne 8:32.
Ho ntse ho le joalo, re lokela hore re ’ne re hanele Satane. Sena se ile sa hatisoa ke puo “Na U Hana Moea oa Lefatše?” Moea oa lefatše lena oa bolaea. O khothaletsa boitšoaro bo hlephileng, pono ea ho fetohela ba boholong, le takatso e meharo ea lintho tse bonahalang. Mokreste o tlameha ho itlhahloba ka mehla. Na o sa ntse a e-na le litekanyetso tse phahameng mabapi le seo a se shebellang, seo a se mamelang, kapa seo a se balang? Ka tsela e khothatsang, sebui se ile sa re: “Rea le babatsa baena, bo-khaitseli, le lōna ba banyenyane, bakeng sa boiteko bo tiileng boo le seng le ntse le bo etsa tabeng ena.”—1 Johanne 2:15-17.
Ho na le lebaka le etsang hore ho be thata ho hanela moea oa lefatše. Ke lefe? Kaofela ha rōna ha rea phethahala. Ke ’nete, Jesu o shoetse libe tsa rōna, empa ho ntse ho le joalo re lokela ho loantša tšekamelo ea ho etsa sebe. Sena se ile sa nahanisisoa puong “Ho Loantša ho Khomarela ha Sebe Nameng ea Boetsalibe.” Har’a tse ling, sebui se ile sa re re ka hlōla sebe ntoeng ea rōna haeba re apara botho bo bocha ’me re qoba ntho leha e le efe e batlang hore re khotsofatse litšekamelo tsa rōna tsa boetsalibe.
“Etsa Thuto e Phelisang Tsela ea Hao ea Bophelo” e ne e le sehlooho sa puo e latelang. Ba bang ba amehile ka bophelo ba bona ba nama ka ho tlōlisang. Leha ho le joalo, ho bua ’nete, bophelo ba moea bo molemo ka ho fetisisa. Sebui se ile sa hatisa tlhokahalo ea ho nka boikarabelo ba rōna ka ho teba tabeng ena, ’me se ne se e-na le mantsoe a khothatsang haholo-holo bakeng sa basali ba Bakreste. Se ile sa re: “Re ananela haholo bo-khaitseli ba hōlileng ’moho le ba bacha ba leka-lekaneng hantle chesehong ea bona bakeng sa tšebeletso le ho hlokomeleng boikarabelo ba bona ba botho.” E, le rōna bohle re leboha Jehova bakeng sa thuto e phelisang e re arolang ho batho ba lefatše.
Lenaneo la hoseng le ile la qetella ka puo “Thuto ea Bomolimo e Senola Morero oa Bophelo.” Sebui se ile sa re: “Ka nako e ’ngoe, hoo e ka bang e mong le e mong oa ipotsa, ‘Morero oa bophelo ke eng?’” Ka mabaka a matla, se ile sa paka hore ke Bibele feela e fanang ka karabo ea sebele potsong eo. Joale, sebui se ile sa bontša hore litšepiso tsa Molimo tse babatsehang ka ho atlehileng li re fa morero bophelong. Mohlomong, ba bangata har’a bamameli ba ne ba ntse ba nahana, ‘Sena ke sona hantle seo batho ba tšimong ea heso ba hlokang ho se utloa.’ Sehlopha se Busang se ne se e-na le maikutlo a tšoanang. Bukana e ncha e lekanang le makasine, e nang le sehlooho Morero oa Bophelo ke Eng? e ile ea lokolloa qetellong ea puo ena. Bohle ba ne ba thabile hakaakang! Khefu ea motšehare e ile ea fana ka monyetla oa ho lekola khatiso ena e ncha.
Thapama ea Letsatsi la Bobeli
Puo ea pele thapama e ne e e-na le sehlooho se tšelisang “Lahlela Matšoenyeho ’Ohle a Hao ho Jehova.” Ho na le lintho tse ngata tse bakang ho tšoenyeha; leha ho le joalo, Lentsoe la Molimo le re re lokela ho lahlela matšoenyeho ’ohle a rōna ho eena. (1 Petrose 5:6, 7) Ke ’nete, mathata a mang aa phehella, ’me mabapi le sena sebui se ile sa phehella: ‘E-ba le mamello. Letela Jehova. Lumela ka tieo hore ka mehla ho latela Bibele ke sona se molemohali. Haeba re beha lipelo tsa rōna ho Jehova, re tla thabela “khotso ea Molimo” e fetang mohopolo ’ohle.’—Ba-Filippi 4:6, 7.
Lipuo tse ’nè tse latelang li ile tsa bontša hore thuto ea bomolimo e sebetsa bophelong ba lelapa. Ea pele, “Ho Etsa Hore Lenyalo e be Kopano e Tšoarellang,” e ile ea hopotsa ba tlileng kopanong hore mahlong a Jehova lenyalo ha lea lokela ho talingoa e le tokisetso e ka lahloang, joalokaha ba bangata ba le talima joalo lefatšeng. Leha ho le joalo, hore re atlehise lenyalo, re lokela ho latela tataiso ea Jehova. O re bōpile. Ka hona, Lentsoe la hae le bululetsoeng le na le keletso e molemohali e fumanehang mabapi le lenyalo.
Puo “Sebetsa ka Thata Bakeng sa Polokeho ea Lelapa la Hao” e ile ea tšohla liphephetso tsa ho hlokomela lelapa linakong tsena tse thata. (2 Timothea 3:1) Batsoali ba ruta bana ba bona bohloeki, mekhoa e metle, mokhoa oa ho sebetsa, le mokhoa oa ho fana le ho tsotella ba bang. Habohlokoa le ho feta, ba tlameha ho ruta bana ba bona ho ba bahlanka ba inehetseng ba Jehova.—Liproverbia 22:6.
Puisanong e latelang, “Batsoali, Bana ba Lōna ba Hloka Tlhokomelo e Khethehileng,” sebui se ile sa hopotsa ba tlileng kopanong ka tlhokahalo ea ho babatsa bana, ha ka nako e tšoanang ba ntse ba sa iphoufaletse bofokoli ba bona. Batsoali ba tlameha hore ka ho khethehileng ba falimehele litšekamelo tsa ho se tšepahale, ho rata lintho tse bonahalang, kapa boithati.
Ka ho khetheha ba banyenyane ba tlileng kopanong ba ile ba mamela ka hloko puo “Bacha—Le Mamela Lithuto tsa Mang?” Lintho li boima ho Bakreste ba banyenyane kajeno. Ho bonolo ho khema le lefatše, empa sena se lebisa lefung. Le hoja ho khetha ho itšoarella thutong ea bomolimo ho hloka sebete ho mocha, ho tlisa mahlohonolo a maholo hona joale le bophelo bo sa feleng bo tlang.—1 Timothea 4:8, NW.
Letsatsi la bobeli le ile la phethoa ka tšoantšiso e futhumatsang pelo Bacha ba Hopolang ’Mōpi oa Bona Hona Joale. Kenyeletsong, motsamaisi o ile a bitsa bacha ba ka mokhatlong o hlophisitsoeng oa Molimo “lebotho la puso ea Molimo le tšoarehileng ka botšepehi tšebeletsong ea boinehelo ho Jehova Molimo le Morena oa hae ea khethiloeng oa leholimo, Kreste Jesu.” O ile a phaella: “Ka sebele bacha ba rōna ba finyella ho hong ho molemo!” Tšoantšiso eo e ile ea bontša ka ho hlakileng hore haeba motsoali a koetlisa ngoana hantle, hoo ho tla ba molemo haholo bakeng sa ngoana ha a hōla ’me a sebeletsa Jehova ka boeena.
Hoseng ha Letsatsi la Boraro
Sehlooho sa letsatsi la boraro e ne e le “Tsoelang Pele ho Ruta Batho ba Lichaba Tsohle.” (Mattheu 28:19, 20) Ha ho pelaelo hore ba tlileng kopanong ba ne ba lebeletse keletso e nakong mabapi le mosebetsi oa boboleli, ’me ha baa ka ba soetsoa. Neheletsano e nang le sehlooho “Ho Phethahatsa Thōmo ea Rōna ea ho Bolela le ho Ruta ka Thabo” e ile ea matlafatsa boikemisetso ba bona ba ho kopanela mosebetsing oa ho paka. Puong e qalang ho ile ha buuoa ka maeto a ho ea ka ntlo le ntlo; puong ea bobeli, maeto a ho boela; ’me ea boraro, lithuto tsa Bibele. Baromuoa lefatšeng lohle ba ile ba mengoa ho khutlela hahabo bona e le hore ba ka ba teng kopanong hammoho le malapa a bo bona le metsoalle. Libakeng tse ling, baromuoa ba ile ba kopanela karolong ena ea lenaneo. E ne e le ho thabisang ho fumana temoho e itseng ka katleho eo ba bang le eona likabelong tsa bona. Puong e latelang, “Ho Finyella E Mong le E Mong ka Litaba tse Molemo” ho ile ha nahanisisoa ka matla a bopaki bo sa reroang.
Hoseng hoo ho ile ha phethoa ka puo ea kolobetso, eo ka mehla e leng karolo ea bohlokoahali lipokanong tse khōlō tsa Lipaki tsa Jehova. Likopanong ka ho latellana, lihlopha tse khōlō tsa ba sa tsoa inehela bocha li ile tsa ema ka pele ho matšoele a khobokaneng ’me ka kholiseho tsa arabela lipotso tse peli tse neng li tobisitsoe ho tsona ka e. Joale tsa nt’o kolobetsoa phatlalatsa. Ke bopaki bo matla hakaakang ba phello e khōlō ea thuto ea bomolimo!
Thapama ea Letsatsi la Boraro
Lenaneo la thapama le ile la qala ka puisano e tebileng ea Mangolo. Lipaki tsa Jehova li tloaelane le mantsoe a Mattheu khaolo ea 24 le Luka khaolo ea 21. Na ba bang ba ne ba nahana hore ha ho letho le lecha le ka buuoang ka likhaolo tsee tsa Bibele? Ba ne ba fositse hakaakang! Lipuo “Pontšo ea ho ba Teng ha Hao e Tla ba Efe?” le “Re Bolelle, Lintho Tsee li Tla Etsahala Neng?” li ile tsa lebisa ba tlileng kopanong puisanong e hapang thahasello likarolong tsa likhaolo tseo tse peli ’me tsa fana ka litlhaloso tsa morao-rao tsa litemana tse ling. Ho ile ha e-ba le lipuisano tse hlasimollang ka mor’a lenaneo ha ba neng ba tlile kopanong ba ne ba bapisa lintlha tseo ba li ngotseng e le ho bona hore na ba li utloisisitse. Ha ho pelaelo hore lipotso tse ngata li tla arabeloa ha boitsebiso bona bo hatisoa ho Molula-Qhooa.
Sehlooho sa thuto ea Bibele se ile sa ntšetsoa pele puong “Likarabo tse Rutang Lipotsong tsa Hao tsa Bibele.” Joale ho ile ha fetoloa maoa lenaneong. Selemo sa 1993 se ile sa tšoaea selemo sa bo50 sa Sekolo sa Bibele sa Watchtower sa Gileade. Puo “Lilemo tse Mashome a Mahlano tsa Koetliso le Tšebeletso ea Boromuoa ea Gileade” e ile ea bontša ba tlileng kopanong hore na ke’ng se ’nileng sa finyelloa nakong eo. Haeba ho ne ho e-na le baromuoa leha e le bafe ba teng nakong ea puo “Se Finyeletsoeng ke Boevangeli Tšimong ea Lefatše Lohle,” ba ile ba memeloa ho arolelana tse ling tsa liphihlelo tsa bona le bamameli. E ne e le ho hlollang ho utloa litlaleho tsa baromuoa!
Puo e latelang, “Lebaka Leo Lipaki tsa Jehova li Lulang li Falimehile,” e bile thuto e ’ngoe ea histori. E ile ea bontša hore Bakreste ba ile ba lula ba falimehile ho tloha lekholong la pele la lilemo C.E. ho tla fihlela hona joale. Seo se ile sa lebisa ketsong e ’ngoe e makatsang. Qalong ea puo e latelang, e nang le sehlooho “Baboleli ba ’Muso ba Mafolo-folo Lefatšeng Lohle,” sebui se ile sa phahamisa moqolo o moholo (haeba o ne o se o ntse o fumaneha ka puo ea sebakeng seo) ’me sa re: “Ke thabo ho tsebisa mona kajeno ho lokolloa ha buka ena e ncha, e nang le sehlooho se reng Lipaki tsa Jehova—Baboleli ba ’Muso oa Molimo.” Buka ena e na le tlaleho e nang le boitsebiso ba histori ea mehla ea kajeno ea Lipaki tsa Jehova. E pheta pale e hlollang ea mamello, boikemisetso, le katleho, le ho fana ka bopaki bo matla ba ho sebetsa ha moea oa Jehova ho bahlanka ba hae.
Hoseng ha Letsatsi la Bone
E ne e se e le letsatsi la ho qetela la kopano. Sehlooho sa letsatsi leo, “Ho Ithuisa Molemo ka Thuto ea Bomolimo,” se ile sa fana ka tebello ea tlhōrō e molemohali ea lenaneo. (Esaia 48:17, NW) Hoseng tlhokomelo ea ba tlileng kopanong e ile ea hokelloa neheletsanong ea lipuo tse tharo tse matla. E neng e e-na le sehlooho se reng “Molaetsa oa Jeremia o Bululetsoeng oa Temoso—Bakeng sa Nako e Fetileng le Hona Joale,” neheletsano eo e ne e tšoere puisano ea temana ka temana likhaolong tsa 23, 24 le 25 ho Jeremia. Likhaolo tsee li na le molaetsa o matla hakaakang! Baiseraele ba sa tšepahaleng ba mehleng ea Jeremia ba tlameha ba ile ba tlakasela ka lebaka la litemoso tsa hae tse tobileng, tse bululetsoeng ke Molimo. Lefatše lohle le ile la tlakasela le ho feta ha litemoso tseo li phethahala. Na lintho li fapane kajeno? Le hanyenyane. Ka sebete Lipaki tsa Jehova li bolela melaetsa ea Molimo ea kahlolo. Qetellong, tsamaiso ena eohle ea lintho e tla lokela ho talimana le kahlolo ea sebele ea Jehova. Seo se tla bolela thipitlo e feletseng ea lefatše la Satane.
Hoseng ha Sontaha ho ile ha phethoa ka tšoantšiso ea bobeli, U se ke Ua Thetsoa Kapa Ua Soma Molimo. Ka tsela e hlakileng, e ile ea bontša kamoo thuto ea bomolimo e ka re sireletsang ho susumetsoeng ke li-video le ’mino o hlephisang boitšoaro le tloaelong ea ho jala phapang har’a Bakreste-’moho. Qetellong ea tšoantšiso eo, molula-setulo o ile a qotsa mantsoe a susumetsang mohopolo a se seng sa libapali: “Ha rea sireletsoa khahlanong le tšusumetso ea lefatše. Haeba re sa le hanele, ka ho poteletseng lefatše le ka bolisa mehopolo ea rōna. ’Me hore na re lula re tšepahala kapa che ho tla itšetleha ka seo re ’nileng ra se jala.” Hoo ke ’nete hakaakang!
Thapama ea Letsatsi la ho Qetela
Ka potlako kopano e ne e se e atamela bofelong ba eona ha sebui se e-ea sethaleng ho ea fana ka puo ea phatlalatsa, e nang le sehlooho se reng “Thuto e Molemo Bakeng sa Mehla ea Rōna e Bohloko.” Ka tsela e hlakileng le e utloahalang, se ile sa tsebahatsa mathata a sehlooho a re amang kajeno ’me sa supa litsela tse ling tseo ka tsona thuto ea bomolimo e ka re thusang ho thabela bophelo bo molemonyana. Se ile sa re haeba re latela thuto ea Mangolo hona joale, re tla khona ho e latela ka ho sa feleng lefatšeng le lecha la Jehova.
Ka mor’a kakaretso ea thuto ea beke le beke ea Molula-Qhooa, e ne e le nako ea puo ea ho qetela. Sebui se ile sa pholletsa ka potlako lintlheng tse khōlō tsa lenaneo la matsatsi a mane ’me sa hopotsa ba tlileng kopanong ka likhatiso tse ncha. Se ile sa boela sa tsebisa hore k’hasete ea bobeli ea video letotong la The Bible—A Book of Fact and Prophecy e tla lokolloa haufinyane. Ha e le hantle, k’hasete eo ea video, e nang le sehlooho se reng The Bible—Mankind’s Oldest Modern Book, ea fumaneha hona joale ka Senyesemane. Ho ile ha baloa litlaleho tse amang pelo tse tsoang libakeng tse nang le maemo a hlobaetsang haholo, joaloka Bosnia le Herzegovina. Sephethong, sebui se ile sa bala mantsoe a Moeklesia 12:13: “Bofello ba taba tseo kaofela ke jona: Tšaba Molimo, u boloke litaelo tsa oona, hobane, ke eona tšoanelo eohle ea motho.”
Ke khopotso e molemo hakaakang! A re pheleleng ho bona letsatsi la ha moloko oohle oa motho o tla rorisa Morupeli oa rōna e Moholo, Jehova, le ho mamela thuto ea hae ea bomolimo.
[Litšoantšo tse leqepheng la 24, 25]
Likopano tsa “Thuto ea Bomolimo” Moscow le Kiev li qeteletse ka thabo e khōlō
[Litšoantšo tse leqepheng la 26, 27]
1. Ba bangata ba ile ba tšoantšetsa boinehelo ba bona ho Molimo, ka ho kolobetsoa
2. Motho ea lilemo li 100 ea neng a tlile kopanong o ne a hloletsoe ke ho amohela tokollo e ncha
3, 4. Litšoantšiso tse susumetsang mohopolo li ile tsa ananeloa haholo
5. Baromuoa bao ho ileng ha buisanoa le bona likopanong ba ile ba totobatsa melemo ea thuto ea bomolimo