Mesuoe ea Lentsoe la Molimo e Khothalletsoa ho Phetha Mosebetsi oa Eona

MESUOE e likete tse makholo e ile ea kopana hore e rutoe likhoeling tse sa tsoa feta. Ho tloha ka May selemong se fetileng, e ile ea bokana Likopanong tsa Setereke tsa Lipaki tsa Jehova tsa “Mesuoe ea Lentsoe la Molimo” tse makholo lefatšeng lohle. Ba tlileng kopanong ba ile ba khothalletsoa ho ithuta, ho tšoaneleha hamolemo le ho phetha mosebetsi oa bona e le mesuoe.

Na u bile teng ho e ’ngoe ea likopano tsee? Haeba ho joalo, ha ho pelaelo hore u ile ua ananela lijo tsa moea tse monate tse neng li fanoa lipokanong tsena tsa borapeli ba Molimo oa ’nete, Jehova. Joale a re hlahlobeng hammoho lenaneo lena la kopano le rutang.

Letsatsi la Pele—Mangolo a Bululetsoeng a Molemo Bakeng sa ho Ruta

Molula-setulo oa kopano o ile a amohela ba tlileng kopanong ka mofuthu ka puo eo sehlooho sa eona se reng “E-bang ba Rutoang, Lōna Mesuoe ea Lentsoe la Molimo.” Ka ho ithuta ho Jehova, ‘Morupeli e Moholo,’ Jesu Kreste e ile ea e-ba Mosuoe e Moholo. (Esaia 30:20; Matheu 19:16) E le hore re hatele pele re le mesuoe ea Lentsoe la Molimo, le rōna re lokela ho rutoa ke Jehova.

Ho ile ha latela puo eo sehlooho sa eona se reng “Ho Ruta ka ’Muso ho Beha Litholoana Tse Molemo.” Thabo le litlhohonolofatso tsa ho etsa barutuoa li ile tsa totobatsoa ha ho buisanoa le mesuoe ea Lentsoe la Molimo e nang le phihlelo.

Ho ile ha latela puo e susumetsang ka sehlooho se reng “Re Susumelitsoe ke ‘Lintho Tse Hlollang Tsa Molimo.’” Lekholong la pele la lilemo, “lintho tse hlollang” tse amanang le ’Muso oa Molimo li ile tsa susumelletsa batho ketsong. (Liketso 2:11) Le rōna re ka susumelletsa batho ketsong ka ho bolela “lintho tse hlollang” tse kang lithuto tsa Mangolo ka thekollo, tsoho le selekane se secha.

Puo e latelang e ile ea khothalletsa bohle ho “Thabela ho Loka ha Jehova.” (Pesaleme ea 35:27) Re thusoa ho phehella ho loka ka ho ithuta ho rata se lokileng le ho hloea se sebe, ka ho ithuta Bibele, ka hore ka mafolofolo re hanele litšusumetso tse kotsi moeeng, le ka ho hlaolela boikokobetso. Mehato e joalo e tla re sireletsa metsoalleng e mebe, litekanyetsong tsa lefatše tsa lintho tse bonahalang le boithabisong bo khothalletsang boitšoaro bo litšila le pefo.

Puo ea sehlooho, e reng “Ho Hlomelloa ka ho Feletseng re le Mesuoe ea Lentsoe la Molimo,” e ile ea re hopotsa hore Jehova o etsa hore re be basebeletsi ba hae ba tšoanelehang ka Lentsoe la hae, moea oa hae o halalelang le ka mokhatlo oa hae o hlophisitsoeng oa lefatšeng. Mabapi le tšebeliso ea Lentsoe la Molimo, sebui se ile sa re fa keletso ena: “Sepheo sa rōna ke hore molaetsa oa Bibele o ngotsoeng o phele ’me o hatisoe lipelong tsa batho ba re mamelang.”

Sehlooho sa neheletsano ea pele ea kopano se ne se re “Ho Ithuta ha re Ntse re Ruta ba Bang.” Karolo e qalang e ile ea hatisa hore re lokela ho phela ka litekanyetso tse phahameng tsa boitšoaro ba Bokreste tseo re li rutang ba bang. Karolo e latelang e ile ea re eletsa hore re ‘tšoare lentsoe la ’nete ka nepo.’ (2 Timothea 2:15) E le hore re ithute, ke habohlokoahali hore re be le thuto ea botho ea Bibele kamehla ’me re e etse ka mafolofolo, ho sa tsotellehe hore na re sebelelitse Molimo halelele hakae. Karolo ea ho qetela ea neheletsano ena e ile ea bontša hore Diabolose o re shebile, o batla lintho tse kang boikhohomoso, moea oa ho itaola, boiphahamiso, mōna, mohono, tlhonamo, lehloeo le ho nyatsa-nyatsa. Leha ho le joalo, haeba re hanyetsa Diabolose ka matla, o tla re balehela. Hore re mo hanyetse, ho hlokahala hore re atamele haufi le Molimo.—Jakobo 4:7, 8.

Puo e nakong e reng “Nyonya Seoa sa Litšoantšo Tsa Bootsoa” e ile ea re bontša hore na re ka loana ka katleho joang le tšokelo eo e litšila ea bomoea ba rōna. Moprofeta Habakuke ha a bua ka Jehova o itse: “Mahlo a hao a hloekile haholo hore u ka talima se sebe; ’me ha u khone ho talima khathatso.” (Habakuke 1:13) Re lokela ho ‘nyonya se khopo.’ (Baroma 12:9) Batsoali ba ile ba eletsoa hore ba laole bana ba bona ha ba sebelisa Internet le ha ba shebella thelevishene. Ba hoheloang ke litšoantšo tsa bootsoa, sebui se ile sa re ba lokela ho kōpa thuso ho motsoalle ea hōlileng moeeng. Hape ho ka ba molemo ho nahanisisa le ho tšoara ka hlooho mangolo a kang Pesaleme ea 97:10; Matheu 5:28; 1 Bakorinthe 9:27; Baefese 5:3, 12; Bakolose 3:5; le 1 Bathesalonika 4:4, 5.

Puo e latelang e reng, “E se Eka Khotso ea Molimo e ka le Sireletsa,” e ile ea re khothatsa ha e re tiisetsa hore ha re imetsoe ke matšoenyeho, re ka lahlela moroalo oa rōna ho Jehova. (Pesaleme ea 55:22) Ha re bua ka bolokolohi thapelong, Jehova o tla re fa “khotso ea Molimo,” e leng ho khoba matšoafo le khutso ea kelello tse tlisoang ke kamano ea rōna ea bohlokoa le eena.—Bafilipi 4:6, 7.

Letsatsi la pele le ile la fella ka thabo e khethehileng ka puo eo sehlooho sa eona se neng se re “Jehova o Khabisa Batho ba Hae ka Leseli,” ’me e ile ea hlalosa phethahatso ea Esaia khaolo ea 60. Lefifing le leng teng lefatšeng kajeno, “basele”—e leng bongata bo boholo bo ntseng bo hlaha ba ba kang linku—ba thabela leseli la Jehova hammoho le Bakreste ba tlotsitsoeng. Ha sebui se bua ka temana ea 19 le ea 20 se ile sa hlalosa sa re: “Jehova ha a na ho ‘likela’ joaloka letsatsi kapa a ‘fifale’ joaloka khoeli. O tla tsoela pele ho khabisa batho ba hae ka ho ba khantšetsa leseli. Eo ke khothatso e babatsehang hakaakang ho rōna ba phelang matsatsing aa a ho qetela a lefatše lee le lefifing!” Ha puo ena e fela, sebui se ile sa lokolla buka ea Boprofeta ba Esaia—Leseli Molokong Oohle oa Batho, Moqolo oa Bobeli. Na u se u qetile ho bala buka ee e ncha?

Letsatsi la Bobeli—Ho ba ba Tšoanelehang ka ho Lekaneng ho Ruta ba Bang

Ka mor’a puisano ea temana ea letsatsi letsatsing la bobeli, re ile ra mamela ka thahasello e khōlō neheletsano ea bobeli ea kopano, e reng, “Basebeletsi Bao ba Bang e Bang Balumeli ka Bona.” Sebui ka seng neheletsanong ena e likarolo li tharo se ile sa totobatsa mohato ka mong ho e meraro ea ho thusa batho ho ba balumeli—e leng ho hasa molaetsa oa ’Muso, ho hlaolela thahasello e fumanoeng le ho ruta ba thahasellang ho ela hloko seo Kreste a se laetseng. Ka lipuisano le lipontšo tse etsoang ka liphihlelo tsa sebele, re ile ra khona ho bona ka ho toba kamoo re ka rutang ba bang ho ba barutuoa kateng.

Sehlooho sa puo e latelang se ne se re “Mamellong ea Lōna le Eketse Boinehelo ba Bomolimo.” Sebui se ile sa bontša hore seo e bang sa bohlokoa qetellong ke ho ‘mamella ha rōna ho isa bofelong.’ (Matheu 24:13) Re lokela ho sebelisa litokisetso tsohle tsa Molimo—thapelo, thuto ea botho, liboka le tšebeletso—ho matlafatsa boinehelo ba bomolimo. Ho hlokahala hore re hanele litakatso tsa lefatše le mesebetsi ea lona hore li se ke tsa re nanarela kapa hona ho senya boinehelo ba rōna ba bomolimo.

Batho ba sehlang le ba imetsoeng ba ka khatholoha joang kajeno? Puo e reng “Ho Fumana Khatholoho Tlas’a Joko ea Kreste” e ile ea araba potso eo. Ka mosa Jesu o ile a memela balateli ba hae ho kena tlas’a joko ea hae le ho ithuta ho eena. (Matheu 11:28-30) Re ka kena tlas’a joko ea Jesu ka ho latela haufi-ufi mohlala oa hae oa ho phela bophelo bo bonolo, bo itekanetseng. Lintlha tse ka sehloohong tsa puo ena li ile tsa matlafatsoa ke ho buisana le ba nolofalitseng bophelo ba bona.

E ’ngoe ea liketsahalo tse hlahelletseng lipokanong tse khōlō tsa Lipaki tsa Jehova ke kolobetso ea bahlanka ba Molimo ba sa tsoa inehela. Mor’abo rōna ea neng a fana ka puo e reng “Kolobetso e Lebisa Litokelong Tse Khōloanyane Tsa ho Ruta” o ile a amohela ba eang kolobetsong ka mofuthu ’me a ba memela ho kopanela litokelong tse eketsehileng tsa tšebeletso. Mesuoe ea Lentsoe la Molimo e sa tsoa kolobetsoa e finyellang se hlokoang ke Mangolo e ka hahamalla boikarabelo bo sa tšoaneng ka phuthehong.

Sehlooho sa puo ea pele thapameng eo se ne se re “Etsisa Mosuoe e Moholo.” Ka lilemo-lemo Jesu a le leholimong, o ile a shebella Ntat’ae ka hloko ’me a mo etsisa, ka ho etsa joalo ea e-ba Mosuoe e Moholo. Ha a le lefatšeng, o ile a sebelisa mekhoa ea ho ruta e atlehang, e kang lipotso tse fatang maikutlo le lipapiso tse bonolo empa e le tse hlakileng. Jesu o ile a theha thuto ea hae Lentsoeng la Molimo ’me a bua ka cheseho, mofuthu le matla a ho laela. Na ha rea ka ra susumelletseha ho etsisa Mosuoe eo e Moholo?

Puo e ’ngoe e susumetsang e reng, “Na U Sebeletsa ba Bang ka ho Rata?,” e ile ea re khothalletsa ho etsisa mohlala oa Jesu ha re sebeletsa batho ba bang. (Johanne 13:12-15) Ka ho toba sebui se ile sa phehella banna ba tšoanelehang hore ba tšoane le Timothea ha ba sebelisa menyetla ea ho thusa ba bang. (Bafilipi 2:20, 21) Batsoali ba ile ba khothalletsoa ho etsisa Elkana le Anna ha ba thusa bana ba bona ho hahamalla tšebeletso ea nako e tletseng. Ba banyenyane ba ile ba eletsoa hore ba etsise mohlala oa Jesu Kreste le Timothea e monyenyane ka hore ba sebeletse ka ho rata. (1 Petrose 2:21) Re ile ra boela ra susumetsoa ke mantsoe a ba sebelisitseng hamolemo menyetla ea ho sebeletsa ba bang.

Sehlooho sa neheletsano ea boraro se ne se re “Rua Molemo o Feletseng Thutong ea Puso ea Molimo.” Sebui sa pele se ile sa hatisa bohlokoa ba ho ntlafatsa tsela eo ka eona re tsepamisang mohopolo tabeng. Ho finyella pakane eo, re ka qala ka mananeo a makhutšoanyane a thuto ea botho ebe re leka ho a lelefatsa. Se ile sa boela sa khothalletsa bamameli ho phetla mangolo le ho ngola lintlha nakong ea liboka. Sebui sa bobeli se ile sa etsa hore re falimehele tlhokahalo ea ho tšoara ka matla “mohlala oa mantsoe a phelisang hantle.” (2 Timothea 1:13, 14) Ho itšireletsa mekhoeng ea boitšoaro bo bobe e bontšoang ke mecha ea phatlalatso, lifilosofing tsa batho, tlhahlobisisong e phahameng ea Bibele le lithutong tsa bakoenehi, re lokela ho reka nako bakeng sa thuto ea botho le ho ea libokeng. (Baefese 5:15, 16) Sebui sa ho qetela neheletsanong ena se ile sa totobatsa bohlokoa ba ho etsa lintho tseo re ithutileng tsona e le hore re ka rua molemo o feletseng thutong ea puso ea Molimo.—Bafilipi 4:9.

Re ne re thabile hakaakang ha re mametse puo e reng “Litokisetso Tse Ncha Bakeng sa Tsoelo-pele ea Rōna ea Moea”! Re ile ra thaba ha re utloa hore haufinyane ho tla hatisoa buka e ncha eo sehlooho sa eona se reng Rua Molemo Thutong ea Sekolo sa Tšebeletso sa Puso ea Molimo. Re ne re labalabela ho ba le buka ena ha sebui se ntse se lokolisa litaba tse ka hare ho eona. Ha se bua ka karolo ea buka ena e nang le lintlha tsa keletso tse ngata, se ile sa re: “Buka ena e ncha ea ho ithuta ha e latele mokhoa oa lefatše ha e hlalosa litšobotsi tsena tse 53 tsa ho bala, ho bua le ho ruta hantle. Mokhoa oo e ngotsoeng ka oona o thehiloe melao-motheong ea Mangolo.” Buka ena e tla bontša kamoo baprofeta, Jesu le barutuoa ba hae ba ileng ba bonahatsa mekhoa e metle ea ho ruta kateng. E, buka ena le litšobotsi tse ncha tsa Sekolo sa Tšebeletso sa Puso ea Molimo ka sebele li tla re thusa ho ba mesuoe e molemo ea Lentsoe la Molimo.

Letsatsi la Boraro—Le be Mesuoe ka Lebaka la Nako

Ka mor’a puisano ea temana ea letsatsi letsatsing la ho qetela, bohle ba ile ba bontša thahasello e khōlō neheletsanong ea ho qetela ea kopano e reng, “Boprofeta ba Malakia bo re Hlomella Bakeng sa Letsatsi la Jehova.” Malakia o ile a profeta hoo e ka bang lilemo tse lekholo ka mor’a hore Bajuda ba khutle Babylona. Ba ne ba boetse ba hoholehetse bokoenehing le bokhopong, ba hlompholla lebitso la Jehova ka ho hlokomoloha melao ea hae e lokileng le ka ho tlisa liphoofolo tse foufetseng, tse holofetseng le tse kulang bakeng sa sehlabelo. Ho feta moo, ba ne ba hlala basali ba bocha ba bona, mohlomong e le hore ba nyale basali ba bahetene.

Khaolo ea pele ea boprofeta ba Malakia e re kholisa hore Jehova o rata batho ba hae. E totobatsa hore ho hlokahala hore re tšabe Molimo ka tsela e nang le tlhompho re be re ananele lintho tse halalelang. Jehova o lebeletse hore re mo fe se molemohali seo re nang le sona, re mo rapele ka lerato le se nang boithati. Tšebeletso ea rōna e halalelang ha ea lokela ho ba mokhoa feela tjee, ’me re lokela ho ikarabella ho Molimo.

Ha sebui sa bobeli neheletsanong ena se bontša kamoo khaolo ea bobeli ea Malakia e sebetsang kateng mehleng ea rōna se ile sa botsa: “Na re hlokolosi hore ‘ho se loke ho se ke ha fumanoa melomong ea rōna’?” (Malakia 2:6) Ba etellang pele ho ruteng ba lokela ho tiisa hore seo ba se buang se thehiloe ka ho feletseng Lentsoeng la Molimo. Re lokela ho hloea bolotsana bo kang ho hlala molekane ho sa lokelang.—Malakia 2:14-16.

Ha sebui sa ho qetela sa neheletsano ena se buella sehlooho se reng “Ke Mang ea Tla Pholoha Letsatsi la Jehova?” se ile sa re thusa hore re itokisetse letsatsi la Jehova. Sebui sena se ile sa re: “Ke ho khothatsang hakaakang ho bahlanka ba Jehova ho tseba hore ho phethahala ho hoholo ha Malakia khaolo ea boraro, temana ea 17, ho etsahala ho bona! E re: ‘Ka sebele e tla ba ba ka,’ ho boletse Jehova oa mabotho, ‘ka letsatsi la ha ke hlahisa thepa e khethehileng. Ke tla ba bontša qenehelo, feela joalokaha motho a bontša qenehelo ho mora oa hae ea mo sebeletsang.’”

Ketsahalo e ’ngoe e hlahelletseng ea kopano ena e bile tšoantšiso e aparetsoeng ka ho feletseng, e neng e re “Hlompha Bolaoli ba Jehova,” e neng e hlahisa karolo ea bara ba Kora. Ho sa tsotellehe maikutlo a borabele a ntat’a bona ho Moshe le Arone, ba ile ba lula ba tšepahala ho Jehova le ho baemeli ba hae. Le hoja Kora le balateli ba hae ba ile ba timela, bara ba Kora ba ile ba pholoha. Puo e latelang e reng, “Ikokobeletse Bolaoli ba Molimo ka Botšepehi,” e ile ea bontša kamoo se fuperoeng ke tšoantšiso ena se sebetsang kateng ho rōna kaofela. Sebui sena se ile sa lemosa ka likarolo tse tšeletseng tseo ho tsona Kora le balateli ba hae ba ileng ba hlōleha e leng: ho se tšehetse bolaoli ba Jehova ka botšepehi; ho lumella boikhohomoso, takatso e matla ea bophahamo le mōna hore li ba hlōle; ho lebisa tlhokomelo mefokolong ea ba khethiloeng ke Jehova; ho hlaolela moea oa ho belaela; ho se khotsofalle litokelo tsa bona tsa tšebeletso le ho lumella setsoalle le kamano ea lelapa hore li tle pele ho botšepehi ho Jehova.

Sehlooho sa puo ea phatlalatsa se ne se re “Ke Bo-mang ba Rutang Lichaba Tsohle ’Nete?” Ha hoa ka ha buuoa ka ’nete e akaretsang, empa ho ile ha buuoa ka ’nete e mabapi le morero oa Jehova oo Jesu Kreste a ileng a beha bopaki ka oona. Sebui se ile sa hlahloba ’nete e mabapi le litumelo, mokhoa oa ho rapela le boitšoaro ba motho ka mong. Ka ho bapisa Bakreste ba lekholong la pele la lilemo le Lipaki tsa Jehova kajeno, kholiseho ea rōna ea hore ‘Molimo o har’a rōna’ ka sebele e ile ea matlafatsoa.—1 Bakorinthe 14:25.

Ka mor’a kakaretso ea thuto ea Molula-Qhooa ea beke eo, mesuoe eohle ea lentsoe la Molimo e ile ea susumelletsoa ho nka bohato ka puo ea ho qetela e neng e re, “Ho Etsa Mosebetsi oa Rōna oa ho Ruta ka Potlako.” Kakaretso e khutšoanyane ea lenaneo e ile ea totobatsa bohlokoa ba ho sebelisa Mangolo ha re ruta, mekhoa eo ka eona re ka bang mesuoe e tšoanelehang le bohlokoa ba ho kholiseha ka ’nete eo re e rutang ba bang. Sebui se ile sa re eletsa hore re etse hore ‘tsoelo-pele ea rōna e bonahale’ ’me re ‘ikele hloko kamehla ’me re ele hloko le ho ruta ha rōna.’—1 Timothea 4:15, 16.

Re ile ra thabela mokete o mokaakang oa lijo tsa moea Kopanong ea Setereke ea “Mesuoe ea Lentsoe la Molimo”! E se eka re ka etsisa Morupeli oa rōna e Moholo, Jehova le Mosuoe oa rōna e Moholo, Jesu Kreste, ha re ruta ba bang lentsoe la Molimo.

[Lebokose/Litšoantšo tse leqepheng la 28]

Lingoliloeng Tse Ncha Tse Tla Finyella Litlhoko Tse Khethehileng

Ba neng ba le teng Kopanong ea Setereke ea “Mesuoe ea Lentsoe la Molimo” ka thahasello ba ile ba amohela lingoliloeng tse lokelang ho ba thusa haholo ha ba ruta batho ba likarolong tse itseng tsa lefatše ’nete ea Mangolo. Pampitšana eo sehlooho sa eona se reng, Na U na le Moea o sa Shoeng? e tla ba kofuto e molemo ea ho qalisa moqoqo le batho ba linaheng tseo lipuo tsa tsona li sebelisang lentsoe le le leng bakeng sa moea (soul) le moea (spirit). Pampitšana ena e ncha e bontša hore moea oo e leng matla a sebetsang o fapane le sebōpuoa sa moea le hore batho ha ba fetohe libōpuoa tsa moea ha ba e-shoa.

Bukana eo sehlooho sa eona se reng A Satisfying Life—How to Attain It e ile ea lokolloa bofelong ba letsatsi la bobeli la kopano. Bukana ena e hatisitsoe ka morero oa ho qalisa lithuto tsa Bibele le ba sa lumeleng ho ’Mōpi ea nang le litšobotsi tsa motho le bukeng e bululetsoeng ke Molimo. Na u se u khonne ho sebelisa lingoliloeng tsee tse ncha tšebeletsong ea hao?

[Litšoantšo tse leqepheng la 26]

Ho ile ha kolobetsoa ba makholo Milan, Italy le likopanong tse bileng teng lefatšeng lohle

[Litšoantšo tse leqepheng la 29]

Bamameli ba ile ba susumetsoa ke tšoantšiso e reng “Hlompha Bolaoli ba Jehova”