Ho Ikemisetsa ho Latela Tsela ea Molimo ea bophelo
Likopano tsa “Tsela ea Molimo ea Bophelo” li ne li e-na le ho hongata hoo li fanang ka hona ho ba batlang ho sebe- letsa Molimo! E mong ea tlileng kopanong o ile a hlalosa kopano e le “nako e ikhethang ea thupelo, khothatso le ho hlahisoa leseling.”
E MONG hape ea tlileng kopanong o ile a re “ho ne ho e-na le ho hongata haholo ho ka thabeloang, hoo ho ka nahanisisoang ka hona, ho ka ithutoang.” Joale a re hlahlobeng lenaneo ka bolona.
Jesu Kreste—Tsela, ’Nete le Bophelo
Sena e ne e le sehlooho sa letsatsi la pele la kopano. (Johanne 14:6) Puo ea pele e ile ea hlalosa morero oa ho bokana ha rōna hammoho kopanong: ho rutoa ka ho eketsehileng ka tsela e molemohali ea bophelo, tsela ea Molimo ea bophelo. Jehova o ruta batho ba hae kamoo ba lokelang ho tsamaea litseleng tsa hae kateng. O etsa sena ka Bibele, “lekhoba le tšepahalang le le masene” le moea o halalelang. (Matheu 24:45-47; Luka 4:1; 2 Timothea 3:16) Ho rutoa ke ’Musi oa bokahohle ke tokelo e kaakang!
Tumellanong le sehlooho sa letsatsi leo, puo ea sehlooho e ne e re, “Thekollo ea Kreste—Tsela ea Molimo ea Poloko.” Ha re fetoha hore re lumellane le tsela ea Molimo ea bophelo, ke habohlokoa hore re hlokomele karolo ea Jesu Kreste morerong oa Jehova. Sebui se ile sa re: “Kantle ho sehlabelo sa thekollo sa Jesu Kreste, ha ho motho, ho sa tsotellehe litumelo tsa hae kapa mesebetsi, ea neng a ka fumana bophelo bo sa feleng ho Molimo.” Eaba se qotsa Johanne 3:16, e reng: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea sebelisang tumelo ho eena a se ke a timetsoa empa a be le bophelo bo sa feleng.” E le hore re ka sebelisa tumelo sehlabelong sa thekollo sa Kreste ho hlokahala hore re be le tsebo e nepahetseng ea ’nete. Ho boetse ho akarelletsa ho nehela bophelo ba rōna ho Jehova, ho tšoantšetsa sena ka kolobetso ea metsing, le ho phela tumellanong le mohlala oo Jesu Kreste a o behileng.—1 Petrose 2:21.
Lenaneo la motšehare oa mantsiboea le ile la qala ka puo eo sehlooho sa eona se reng, “Tsela ea Lerato ha e Fele le ka Mohla.” Sena se ne se akarelletsa puisano ea temana ka temana ea tlhaloso ea Pauluse e susumetsang ea lerato, e tlalehiloeng ho 1 Bakorinthe 13:4-8. Bamameli ba ile ba hopotsoa hore lerato le bontšang boitelo ke tšobotsi ea Bokreste e khethollang le hore ho rata Molimo le moahelani ke litšobotsi tse hlokahalang tsa borapeli boo Jehova a bo amohelang.
Ho ile ha latela neheletsano e likarolo li tharo eo sehlooho sa eona se reng, “Batsoali—Rutang Bana ba Lōna Tsela ea Molimo.” Batsoali ba ka thusa bana ba bona ho sebeletsa Molimo ka ho beha mohlala o motle oa ho bala le ho ithuta Lentsoe la hae. Ba ka ruta bana ba bona ’nete ka thuto ea lelapa ea kamehla, ba etsa hore e lumellane le litlhoko tsa lelapa. Hape, ke habohlokoa ho thusa bana hore ba kopanele mesebetsing ea phutheho le tšebeletsong ea tšimo. Le hoja e le phephetso ho hōlisa bana ba tšabang Molimo lefatšeng lena le khopo, ho etsa joalo ho tlisa meputso e meholo.
Puo e reng, “Lumella Jehova Hore a U Koetlisetse ho U Sebelisetsa Morero o Hlomphehang” e ile ea latela neheletsano ena. Joalokaha sebōpi se bōpa pitsa ea letsopa, ka tsela e tšoanang Molimo o bōpa ba ratang ho mo sebeletsa. (Baroma 9:20, 21) O etsa sena ka ho fana ka keletso Lentsoeng la hae le ka mokhatlo oa hae o hlophisitsoeng. Jehova o tla re thusa ho sebelisa matla a rōna ka ho feletseng haeba re fumaneha, re arabela menyetleng re bile re ikemiselitse ho mo lumella hore a tsamaise mehato ea rōna.
Joale ho ile ha latela karolo e thabisang ea lenaneo lena—“Tšebeletso Tšimong ea Boromuoa.” Hona joale basebeletsi ba Bakreste ba 2 390 ba nkoang ba le boemong ba boromuoa ba sebeletsa linaheng tse 148 ho pholletsa le lefatše. Ba beha mohlala o motle haholo oa botšepehi bo sa sekisetseng le cheseho ’me ba tletse teboho e tebileng bakeng sa tokelo ea bona ea ho sebeletsa masimong a linaha lisele. Nakong ea karolo ena ea lenaneo likopanong tsa machaba, baromuoa ba ile ba bua ka liphephetso le thabo tsa bophelo ba boromuoa.
Puo ea ho qetela letsatsing la pele e ne e e-na le sehlooho se reng, “Na ho na le Bophelo ka Mor’a Lefu?” Potso ena e tsielitse moloko oa batho ka lilemo tse likete. Batho ba lichaba tsohle ba ’nile ba sekaseka taba ena. Likarabo tse inahaneloang ha li fele. Li fapane joaloka litloaelo le malumeli a ba fanang ka tsona. Empa ho hlokahala hore batho ba ithute ’nete.
Ka lebaka leo, sebui se ile sa tsebisa ka ho lokolloa ha bukana e maqephe a 32 e mebala-bala e reng, Ho Etsahala’ng ka Rōna ha re E-shoa? Bukana ena e hlalosa tšimoloho ea thuto ea ho se shoe ha moea ’me e bontša kamoo khopolo ena e fetohileng ea bohlokoa hoo e ka bang malumeling ’ohle a lefatše kajeno. Ka tsela e hlakileng le e ipiletsang, e hlahloba seo Bibele e se buang ka moea, lebaka leo re shoang ka lona, le se etsahalang ka rōna lefung. Bukana ena e boetse e hlalosa hore na ho na le tšepo efe bakeng sa bafu le ba phelang. Sengoliloeng see e tla ba tlhohonolofatso e kaakang ho ba batlang ’nete libakeng tsohle!
Lulang le Lebetse ka Tieo Kamoo le Tsamaeang Kateng
Sena e ne e le sehlooho se loketseng hakaakang bakeng sa letsatsi la bobeli la kopano! (Baefese 5:15) Lenaneo la hoseng le ne le lebisitse tlhokomelo mosebetsing oa ho bolela le ho etsa barutuoa. Ka mor’a puisano ea temana ea letsatsi, lenaneo le ile la tsoela pele ka puo e reng, “Ho Thusa Batho ho Kena Tseleng e Isang Bophelong.” Ha re etsa mosebetsi ona o potlakileng, ke habohlokoa ho ba le boikutlo bo nepahetseng, re hlokomela hore ho abela ba bang ’nete ke tokelo ebile ke boikarabelo. Lekholong la pele la lilemo C.E., batho ba bangata ba ne ba hana Lentsoe la Molimo. Leha ho le joalo, ho sa tsotellehe khanyetso, ho ne ho e-na le ‘ba neng ba e-na le tšekamelo e nepahetseng bakeng sa bophelo bo sa feleng ’me e ile ea e-ba balumeli.’ (Liketso 13:48, 50; 14:1-5) Boemo ba kajeno bo tšoana le boo. Le hoja ba bangata ba hana ’nete ea Bibele, re tsoela pele ho batla ba tla arabela hamolemo.—Matheu 10:11-13.
Puo e latelang e ne e bua ka phephetso ea ho finyella ba bang ka molaetsa oa bophelo. Kaha hona joale ho thata haholoanyane ho fumana batho hae, ho hlokahala hore re etse mosebetsi o tsoileng matsoho hape re khone ho sebetsana le maemo ka katleho e le hore re ka finyella ba bangata kamoo ho ka khonehang ka molaetsa oa ’Muso. Linaheng tse ngata, bahoeletsi ba litaba tse molemo ba kotula litholoana tse molemo ka ho paka ka thelefono le ka ho bolela tšimong ea khoebo, kahoo ba finyella bao ntle le moo ho leng thata ho ba fumana.
Puo eo sehlooho sa eona se neng se re, “Ho Ruta Barutuoa Tsohle Tseo Kreste a li Laetseng” e ile ea lebisa tlhokomelo bohlokoeng ba ho ba le tsebo tšebeletsong ea rōna. Tsebo ea rōna ea ho ruta ea ntlafala ha re ntse re ithuta ho ba bang ’me re sebelisa koetliso e ntle haholo eo re e fumanang libokeng tsa phutheho. Ha re ntse re e-ba le tsebo e eketsehileng ea ho ruta, re ba le thabo le khotsofalo tse eketsehileng mosebetsing oa rōna oa ho thusa batho ho ithuta ’nete ea Bibele.
Lenaneo la hoseng le ile la phethoa ka puo e mabapi le se boleloang ke boinehelo le kolobetso. E ’ngoe ea lintlha tseo sebui se ileng sa li hlahisa e ne e le hore haeba re tšepa Molimo ka ho feletseng ’me ka tieo re leka ka matla ho etsa thato ea hae, o tla re hlohonolofatsa le ho re tšehetsa. Monna ea bohlale o ile a ngola: “U mo kenye mererong ea hao eohle, ’me o tla u tsamaisa litseleng tsohle tsa hao.” (Liproverbia 3:6) Kolobetso e thabisang ka boeona e ne e le ntlha e ka sehloohong ea kopano e bontšang hore ba bangata ba ne ba qalisitse ho fetoha e le hore ba lumellane le tsela ea Molimo ea bophelo.
Ka mor’a khefu ea lijo tsa motšehare, lenaneo la motšehare oa mantsiboea le ile la qala ka puo e reng, “Ho Sebeletsa re E-na le Tebello ea Bophelo bo sa Feleng.” Morero oa Molimo oa hore batho ba mamelang ba mo sebeletse ka ho sa feleng lefatšeng o tla phethahala. Joale, ke ho loketseng hakaakang hore re lebise menahano, merero le litebello tsa rōna ho sebeletseng Jehova re e-na le tebello ea bosafeleng! Le hoja re batla ho hopolela haufi “letsatsi la Jehova,” ke habohlokoa ho hopola hore pakane ea rōna ke ho sebeletsa ka ho sa feleng. (2 Petrose 3:12) Ho se tsebe nako e tobileng eo ka eona Jesu a tla tlisa phetetso ea Molimo ho etsa hore re lule re falimehile ’me ho re fa menyetla ea letsatsi le letsatsi ea ho ipaka re le ba sebeletsang Jehova ka sepheo seo e seng sa boithati.
Lipuo tse peli tse ileng tsa latela li ile tsa hlahloba khaolo ea 4 ea lengolo la Pauluse le eang ho Baefese. Har’a lintho tse ileng tsa hlahlojoa e ’ngoe e ne e le tlhohonolofatso eo re e thabelang ka “limpho tseo e leng banna,” banna ba tšoanelehang moeeng ba khethiloeng ke moea o halalelang. Baholo bana ba fana ka keletso le tataiso molemong oa rōna oa moea. Lengolo la Pauluse le bululetsoeng le lona le khothalletsa Bakreste ho apara “botho bo bocha.” (Baefese 4:8, 24) Botho ba ho tšaba Molimo bo akarelletsa litšoaneleho tse kang qenehelo, mosa, ho ikokobetsa kelellong, bonolo, tiisetso le lerato.—Bakolose 3:12-14.
Ho lula re lebetse ka tieo kamoo re tsamaeang kateng ho akarelletsa ho ipoloka re se na letheba lefatšeng—e leng sehlooho sa puo e latelang. Ho hlokahala ho leka-lekana ha ho khethoa boithabiso, boikhathollo le lintho tse bonahalang tseo re li phehellang. Ka ho sebelisa keletso e ho Jakobo 1:27 ea ho ipoloka re se na letheba lefatšeng, re thabela boemo bo hloekileng ho Molimo le letsoalo le letle. Re ka boela ra phela bophelo bo nang le morero ’me re tla hlohonolofatsoa ka khotso, katleho moeeng le metsoalle e molemo ka ho fetisisa.
Eaba ho latela neheletsano ea likarolo tse tharo eo sehlooho sa eona se reng, “Bacha—Latelang Tsela ea Molimo.” Ba tseba hore Molimo oa ba rata ’me o ananela boiteko ba bona ba ho tšehetsa borapeli bo hloekileng, bacha ba lokela ho koetlisa matla a bona a temoho e le hore ba mo sebeletse ka botšepehi. Tsela e ’ngoe ea ho hōlisa matla a temoho ke ho bala Lentsoe la Molimo kamehla le ho nahanisisa ka lona. Haeba re etsa sena, re ka tseba litsela tsa Jehova. (Pesaleme ea 119:9-11) Matla a temoho a boetse a hōlisoa ka ho amohela keletso e bontšang ho hōla tsebong e tsoang ho batsoali, baholo le lingoliloeng tsa Mokhatlo. Ka ho sebelisa matla a bona a temoho ka tsela e nepahetseng, bacha ba hlōla tšekamelo ea ho ameha haholo ka lintho tse bonahalang, puo e sa hloekang le ho ikakhela ka setotsoana boikhathollong ho khethollang lefatše lena le arohileng ho Molimo. Ka ho latela tsela ea Molimo ea bophelo, ba bacha le ba hōlileng ka ho tšoanang ba ka thabela katleho ea sebele.
Puo ea ho qetela letsatsing leo e ne e re, “’Mōpi—Botho ba Hae le Litsela Tsa Hae.” Ka mor’a ho bontša hore batho ba limilione tse likete ha ba tsebe ’Mōpi, sebui se ile sa re: “Morero oa sebele bophelong o amana le ho tseba ’Mōpi, Molimo oa rōna; ho hlokomela botho ba hae; le ho tsamaisana le litsela tsa hae. . . . Ho na le linnete ka lefatše la rōna le ka rōna tseo u ka li sebelisang ho thusa batho ho amohela ’Mōpi le ho fumana morero ka eena.” Eaba sebui se bua ka bopaki bo bontšang ho ba teng ha ’Mōpi ea bohlale le ea lerato. Puo ena e ile ea fihla sehlohlolong sa eona ka ho lokolloa ha buka e ncha—Is There a Creator Who Cares About You?
“Tsela ke Eona Ena, Tsamaeang ho Eona”
Sena e ne e le sehlooho sa letsatsi la boraro la kopano. (Esaia 30:21) Lenaneo lena le ile la qala ka neheletsano e hlasimollang ea lipuo tse tharo, tse lebisang tlhokomelo ponong ea Ezekiele ea tempele. Pono ena e na le moelelo o moholo bakeng sa batho ba Molimo kajeno, kaha e amana le borapeli bo hloekileng mehleng ea rōna. Senotlolo se lebisang kutloisisong ea pono ena ke sena: Tempele ea Jehova e khōlō ea moea e emela tokisetso ea hae ea borapeli bo hloekileng. Ha ho ntse ho tšohloa litšobotsi tsa pono ena, bamameli ba ile ba nahanisisa ka tšebetso ea bona ha ba tšehetsa mosebetsi o etsoang ke balebeli ba lerato ba masala a tlotsitsoeng le ke bao ho nang le tebello ea hore e tla ba litho tsa sehlopha sa marenana.
Hamorao hoseng hoo, ho ile ha e-ba le tšoantšiso ea Bibele e thahasellisang ea batšoantšisi ba apereng liaparo tsa mehleng ea boholo-holo. Tšoantšiso ena e ne e e-na le sehlooho se reng, “Malapa—Etsang Hore ho Bala Bibele Kamehla e be Mokhoa oa Lōna oa Bophelo!” E ile ea bontša tumelo le sebete tsa Baheberu ba bararo ba ileng ba hana ho khumamela setšoantšo sa khauta se emisitsoeng ke Morena Nebukadnezare oa Babylona. Sepheo sa tšoantšiso ena e ne e le ho bontša hore Bibele hase buka ea histori ea khale feela empa keletso ea eona ka sebele e molemo ho ba bacha le ho batho ba baholo kajeno.
Lenaneo la motšehare oa mantsiboea e ne e le nako ea puo ea phatlalatsa e reng, “Tsela e le ’Ngoe Feela e Isang Bophelong bo sa Feleng.” Ka mor’a ho lokolisa histori ea ho oela ha moloko oa batho sebeng le lefung, sebui se ile sa phetha ka mantsoe ana a susumelletsang motho ho nahana ka ho teba: “Temana ea Bibele ea sehlooho letsatsing lena la kopano ke Esaia khaolo ea 30, temana ea 21, e reng: ‘Litsebe tsa hao li tla utloa lentsoe ka mor’a hao le reng: Tsela ke eona ena, tsamaeang ho eona, e se re la ea ka ho le letona, kapa ka ho le letšehali.’ Lentsoe lee re le utloa joang? Ka ho mamela Lentsoe la Molimo, e leng Bibele e Halalelang le ka ho latela tataiso eo Morupeli oa rōna e Moholo, Jehova Molimo, a fanang ka eona ka lona le ka mokhatlo oa hae o hlophisitsoeng oa Bokreste oa kajeno. Ka sebele, ho etsa joalo ke eona tsela e le ’ngoe feela e isang bophelong bo sa feleng.”
Ka mor’a kakaretso ea sehlooho sa thuto ea Molula-Qhooa sa beke eo ho ile ha latela puo ea ho qetela, eo sehlooho sa eona se reng, “Tsoelang Pele le Tsamaea Tseleng ea Jehova.” E ile ea hlahloba karolo e itseng ea lintlha tsa sehlooho tsa lenaneo. Joale sebui se ile sa lebisa tlhokomelo qetong e bontšang boikemisetso ba ho tsoela pele ho phela ka tsela ea Molimo.
Qeto ena e ile ea qetella ka mantsoe ana a susumetsang: “Re kholisehile hore ho phela ka litekanyetso, keletso le temoso tsa Mangolo ke tsela e molemohali ea bophelo kajeno ’me ho rala motheo o motle bakeng sa nako e tlang, e le hore re ka tšoara ka tieo bophelo ba sebele. Ka holim’a tsohle, re etsa qeto ena hobane re rata Jehova Molimo ka lipelo tsohle tsa rōna, meea eohle ea rōna, likelello tsohle tsa rōna le matla ’ohle a rōna!” Bohle ba neng ba le teng ba ile ba bontša hore baa lumela ka e, e utloahalang!
Na ho na le ’Mōpi ea U Tsotellang?
Buka e ncha e nang le sehlooho se reng, Is There a Creator Who Cares About You? e fana ka bopaki bo kholisang ba boteng ba ’Mōpi, Jehova, ’me e bua ka litšoaneleho tsa hae. E entsoe ka ho khetheha bakeng sa ba rutehileng litabeng tsa lefatše empa ba sa lumele ho Molimo. Buka ena e maqephe a 192 e tla boela e eketse tumelo ea batho ba seng ba ntse ba lumela ho Molimo, e hahe kananelo bakeng sa botho ba hae le litsela tsa hae.
Buka ea Is There a Creator Who Cares About You? ha e nke hore ’mali o lumela ho Molimo. Ho e-na le hoo, e bolela kamoo se fumanoeng ke saense morao tjena le likhopolo tsa eona li pakang ho ba teng ha ’Mōpi. Har’a likhaolo tsa eona ho na le tse nang le lihlooho tse reng, “Ke Eng e ka Etsang Hore Bophelo ba Hao bo be le Morero?,” “Bokahohle ba Rōna bo Bile Teng Joang?—Phehisano” le “Kamoo U Ikhethang Kateng!” Likhaolo tse ling li bua ka lebaka leo ka lona re ka tiisehang hore Bibele e bululetsoe ke Molimo. Buka ena e ncha e boetse e fana ka pono e akaretsang ea Bibele, e senolang botho ba ’Mōpi le litsela tsa hae. Buka ena ha e bue feela ka lebaka leo ka lona Molimo a lumeletseng mahlomola a mangata hakana empa e boetse e hlalosa kamoo a tla a felisa ka ho sa feleng.
[Litšoantšo tse leqepheng la 7]
Ba bangata ba ile ba kolobetsoa
[Litšoantšo tse leqepheng la 7]
Bukana e ncha e ile ea lokolloa ke A. D. Schroeder, setho sa Sehlopha se Busang sa Lipaki tsa Jehova
[Litšoantšo tse leqepheng la 8, 9]
Tšoantšiso e hlasimollang e ile ea khothalletsa ho bala Bibele kamehla