Na Ehlile ke Bosholu?

ABIODUN e ne e le mookameli oa basebetsi ba phaposing ea ho jela hoteleng e khōlō ea Nigeria. Ha a notlela holo ea mekete mantsiboeeng a mang, o ile a fumana mokotla oa chelete o tšetseng chelete e lekanang le R6 066. Ntle ho tšenyo ea nako o ile a isa chelete eo ho ba ikarabellang, hamorao mong’a eona o ile a e batla, e ne e le moeti hoteleng. Batsamaisi ba hotele ba ile ba putsa Abiodun ka ho mo nyollela boemong bo ka holimo ’me ba mo neha khau ea “mosebetsi ea molemo ka ho fetisisa oa selemo.” Le mong’a chelete o ile a mo putsa.

Quality, makasine oa sebakeng seo, o ile oa ba le sehlooho se seholo se buang ka ketsahalo ena, oa bitsa Abiodun “Mosamaria ea Molemo.” Ha a botsoa ke Quality hore na ha a ka a khalla ho ipolokela chelete, Abiodun o ile a re: ‘Ke e mong oa Lipaki tsa Jehova. Kahoo ha ke fumana ntho eo e seng ea ka, ke e khutlisetsa ho mong’a eona.’

Ba bangata motseng ba ile ba makatsoa ke pontšo ea Abiodun ea botšepehi. Lipaki-’moho le Abiodun li ile tsa thabisoa ke se etsahetseng, empa li ne li sa makala. Lefatšeng lohle Lipaki tsa Jehova li tsebahala ka melao-motheo ea tsona e phahameng. Har’a tsona botšepehi hase ntho e etsoang seoelo; ke molao, karolo ea bohlokoa ea Bokreste ba ’nete.

Leha ho le joalo, ka linako tse ling ho bonahala maemo a etsa hore ho be thata ho fumana phapang pakeng tsa se bontšang botšepehi le se sa bontšeng botšepehi. Nahana ka boemo bona. Festus, ea neng a hlokomela menehelo le tlaleho ea lichelete ea phutheho ea Lipaki tsa Jehova Afrika Bophirimela, o ne a hloka chelete ka potlako.a Ho ne ho hlokahala hore mosali oa hae a buuoe ka ho tebileng hoo lingaka tsa hae li ileng tsa re ho lokela ho etsoa ntle ho tšenyo ea nako. Sepetlele se ne se batla halofo ea chelete esale pele.

Festus o ne a se na chelete. Ha a ea ho batho ba bangata hore ba mo alime chelete, ba ile ba hana. Joale o ile a nahana ka chelete e tlhokomelong ea hae ’me a beha mabaka, ‘Na ho loketse hore ke tlohelle mosali oa ka hore a shoe empa nka etsa ho hong ho thibela seo? Ke hobane’ng ke sa “alime” cheleteng ea phutheho? Ke tla e khutlisa ha batho ba bang ba ntefa.’

Festus o ile a sebelisa chelete eo eseng ea hae ho lefa sepetlele. Na mokhoa oa hae oa ho beha mabaka o ne o nepahetse? Na ketso ea hae e ne e lokafatsoa ke boemo ba qomatsi boo a neng a tobane le bona?

Ke Chelete ea Mang?

Ha re hlahloba lipotso tsena, a re ikhopotseng ka bokhutšoaane lintlha tse ’maloa tse amang mohloli le morero oa chelete e tšoanang le eo Festus a ileng a e nka. Chelete ena e bile teng ka menehelo ea boithatelo e entsoeng ke litho tsa phutheho tse batlang ho ntšetsa pele borapeli bo hloekileng ba Jehova. (2 Ba-Korinthe 9:7) Ha e sebelisetsoe ho lefa meputso, kaha ha ho ba lefshoang bakeng sa seo ba se etsang ka phuthehong. Ho fapana le hoo, chelete ea monehelo e sebelisoa haholo-holo bakeng sa ho fumana le ho hlokomela sebaka seo ho kopaneloang ho sona, hangata Holo ea ’Muso. E etsa hore ho be le sebaka se loketseng le se khotsofatsang moo batho—ba bacha le ba baholo, barui le mafutsana—ba ka kopanang ho sona bakeng sa ho fumana thuto ea Bibele.

Ke chelete ea mang? Ke ea phutheho ka kakaretso. Ha ho motho ea laolang hore na e sebelisoe joang. Le hoja sehlopha sa baholo se laola ho lefshoa ha litšenyehelo tsa ka mehla tsa phutheho, ha ho hlokahala hore ho etsoe tefo e sa tloaelehang, baholo ba bolella phutheho eohle bakeng sa hore e fane ka tumello.

Ho Alima Kapa Bosholu?

Hobane a ne a rerile ho busetsa chelete hang ha ho khoneha, Festus o ile a nahana hore ketso ea hae ke ho alima. Leha ho le joalo, Webster’s New Dictionary of Synonyms e sebelisa mantsoe a mang mabapi le “ho nka le ho tlosa thepa ea motho e mong hangata e le ka sekhukhu kapa ntle ho tsebo ea hae ’me ka mehla e se ka tumello ea hae.” Mantsoe ana ke “bosholu” le “lesholu.” Ka ntle le tumello kapa ho fuoa matla, Festus o ile a nka chelete ea phutheho. Kahoo, e, o ne a le molato oa bosholu. E ne e le lesholu.

Ha e le hantle, ho na le litekanyetso tsa ho ba molato motheong oa se susumelitseng bosholu. Re ka bona sena mohlaleng oa Judase Iskariota, ea neng a tšepetsoe ho hlokomela chelete ea Jesu le baapostola ba tšepahalang. Bibele e re: “[Judase] e ne e le lesholu; ke eena ea neng a na le mokotlana oa lichelete, ’me o na a inkela se kenngoang teng.” (Johanne 12:6) A susumetsoa ke pelo e mpe le meharo e totobetseng, boitšoaro ba Judase bo ile ba hlepha haholo. Qetellong o ile a eka Mora oa Molimo—ka likotoana tse 30 tsa silevera.—Mattheu 26:14-16.

Leha ho le joalo, Festus o ne a susumetsoa ke ho ameha ka mosali oa hae ea kulang. Na hoo ho bolela hore o ne a se molato? Ho hang ha ho bolele seo. Nahana ka seo Bibele e se bolelang ka bosholu boemong bo bong bo bonahalang e le ba qomatsi: “Sholu leha le lapile, ha le tlohelloe ho utsoa, ho khorisa mpa ea lona. Empa mohla le tšoaroang, le tšoaneloa ke ho lefa hasupa, le be le hlakoloe leruo lohle la ntlo ea lona.” (Liproverbia 6:30, 31) Ka mantsoe a mang, haeba le tšoeroe, lesholu le tlameha ho tobana le kotlo e feletseng ea molao. Ho latela Molao oa Moshe, lesholu le ne le tlameha ho lefella tlōlo ea lona ea molao. Kahoo ho e-na le ho khothaletsa kapa ho lokafatsa bosholu, Bibele e lemosa hore esita le maemong a qomatsi, ho utsoa ho ka fella ka ho lahleheloa moruong, ho tlotloloha, ’me ho tebileng haholoanyane, ho lahleheloa ke kamohelo ea Molimo.

Joaloka Lipaki tsa Jehova, Bakreste bohle ba ’nete, haholo-holo ba tšepetsoeng boikarabelo ka phuthehong, ba tlameha ho beha mohlala o motle, ‘ba se nyatsehe.’ (1 Timothea 3:10, BPN) Festus haa ka a fumana chelete eo a neng a e lebeletse, ’me ka lebaka lena o ile a hlōleha ho khutlisa chelete eo a neng a e nkile. Seo a se entseng se ile sa tsebahala. Ho ile ha etsahala joang ka eena? Hoja e ne e le lesholu le sa bontšeng pako, a ka be a lelekiloe phuthehong e hloekileng ea Bokreste. (1 Petrose 4:15) Empa o ile a soaba e le kannete ’me a bontša pako. Kahoo o ne a ka lula ka phuthehong, le hoja a ile a lahleheloa ke litokelo tsa hae tsa tšebeletso.

Ho Tšepa Molimo

Moapostola Pauluse o ile a lemosa hore bosholu bo etsoang ke motho ea ipolelang hore o sebeletsa Jehova bo ka tlisetsa lebitso la Molimo le batho ba lebitso la Hae thohako. Pauluse o ngotse: “Uena ea rutang ba bang, hle uena ha u ithute! Uena ea bolelang hore ho se ke ha utsuoa, ua utsoa! Hobane lebitso la Molimo le nyefoloa ka baka la lōna har’a bahetene.”—Ba-Roma 2:21, 24.

Agure, monna ea bohlale oa mehleng ea khale, o ile a bua se tšoanang. Thapelong ea hae o ile a kōpa hore e se re “mohlomong ha [a] fumanehile, [a] utsoa, ’me [a] tlaela ka lebitso la Molimo oa [hae].” (Liproverbia 30:9) Hlokomela hore monna ea bohlale o ile a lumela hore bofumanehi bo ka tlisa maemo a ka lekang esita le motho ea lokileng hore a utsoe. E, linako tse thata li ka leka tumelo ea Mokreste tabeng ea matla a Jehova a ho hlokomela litlhoko tsa batho ba hae.

Leha ho le joalo, Lipaki tsa Jehova tse tšepahalang, ho kopanyeletsa le tse futsanehileng, li na le tumelo hore Molimo ke “moputsi oa ba o batlang.” (Ba-Heberu 11:6) Lia tseba hore Jehova o putsa batho ba hae ba tšepahalang ka ho ba thusa ho hlokomela litlhoko tsa bona. Jesu o ile a hlakisa sena Thutong ea hae ea Thabeng, a re: “Le se ke la belaela ka ho re: Re tla ja’ng? kapa, re tla noa’ng? kapa, re tla ikapesa ka’ng? . . . Ntat’a lōna ea maholimong o tseba hoba le hloka lintho tseo tsohle. Le mpe le batle ’muso oa Molimo le ho loka ha oona pele; ’me lintho tseo tsohle le tla li ekeletsoa.”—Mattheu 6:31-33.

Molimo o hlokomela ba hlokang ka phuthehong ea Bokreste joang? Ka litsela tse ngata. E ’ngoe ke ka balumeli-’moho. Batho ba Molimo ba bonahatsa lerato la sebele e mong ho e mong. Ba nka ka ho teba keletso ea Bibele: “Motho ha a na le lintho tsa bophelo ba lefatše, ’me a bona ngoan’abo a hloka, ’me a mo koalla pelo ea hae, lerato la Molimo le lutse joang ho eena? Bana ba ka, re se ke ra rata ka lipolelo le ka leleme, e mpe e be ka ketso le ka ’nete.”—1 Johanne 3:17, 18.

Lefatšeng lohle, liphuthehong tse fetang 73 000, Lipaki tsa Jehova tse fetang limilione tse ’nè le halofo ka mafolo-folo li loanela ho sebeletsa Molimo ho latela melao-motheo ea hae e lokileng. Lia tseba hore le ka mohla Molimo a ke ke a lahla batho ba hae ba tšepahalang. Ba sebelelitseng Jehova ka lilemo tse ngata ba phahamisa mantsoe a bona tumellanong le Morena Davida, ea ileng a ngola: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.”—Pesaleme ea 37:25.

Ho molemo hakaakang ho beha tumelo ho Molimo ea bululetseng mantsoe ao, ho e-na le ho itumella hore re lekoe hore re utsoe ’me ho etsahale hore re lahleheloe ke kamohelo ea Molimo ka ho sa feleng!—1 Ba-Korinthe 6:9, 10.

[Mongolo o botlaaseng ba leqephe]