Liithuti tsa Gileade li Fumana ‘Thabo e Fetisang ka ho Fana’
KA SONTAHA, ka March 6, 1994, lelapa la Bethele la ntlo-khōlō ea lefatše ea Lipaki tsa Jehova le ile la bokana hammoho le baeti bakeng sa ketsahalo ea thabo—ho abeloa mangolo ha sehlopha sa bo96 sa Sekolo sa Watchtower sa Bibele sa Gileade. Litlhalosong tsa hae tse bulang, molula-setulo oa lenaneo Karl F. Klein, ea sebelelitseng le Sehlopha se Busang sa Lipaki tsa Jehova hoo e ka bang ka lilemo tse mashome a mabeli, o ile a bolella liithuti tsena tse 46: “Jesu o ile a re ho fana ho na le thabo e fetang ea ho fuoa. Ho tla ba joalo kabelong ea lōna ea boromuoa—ha le fana haholoanyane, le tla thaba haholoanyane.”—Liketso 20:35, NW.
Mantsoe a Keletso a Karohano
Ho ile ha latela letoto la lipuo tse lebisitsoeng ho liithuti. Leon Weaver, setho sa Komiti ea Lefapha la Tšebeletso, o ile a bua ka sehlooho, “Mamello e Tlotlisa Jehova.” Bohle re talimana le liteko. (2 Ba-Korinthe 6:3-5) Moena Weaver o ile a bontša hore, “Ha re le tlas’a khatello, ho bonolo haholo hore re itšepe.” Leha ho le joalo, o ile a hopotsa liithuti: “Eng kapa eng eo le tla tlameha ho talimana le eona litekong tse hlahelang batho, Jehova o na le thahasello ho eona. Le ka mohla a ke ke a lumella hore le lekoe ho feta seo le ka se jarang.”—1 Ba-Korinthe 10:13.
Sehlooho sa puo e latelang, e ileng ea fanoa ke Lyman Swingle oa Sehlopha se Busang, se ne se re: “Kamehla U Nke Kabelo ea Hao e le ea Bohlokoa.” Hase kamehla Baiseraele ba neng ba khetha hore na ba tla lula hokae le hore na ba ne ba tla etsa’ng. Moloko o mong le o mong o ne o abeloa karolo ea naha, ’me Balevi ba ne ba abetsoe mesebetsi e khethehileng hore ba e etse. Ka ho tšoanang, ba bangata ba tšebeletsong ea nako e tletseng e khethehileng kajeno—ba kang baromuoa le litho tsa lelapa la Bethele—ha ba ikhethele hore na ba tla lula hokae le hore na ba tla etsa mosebetsi ofe. Ho etsahala joang haeba motho a ikutloa a tsila-tsila ka kabelo ea hae? Moena Swingle o ile a re: “Haeba ka tieo u sheba Moemeli e Moholo oa tumelo ea rōna, Jesu, ’me u nahana ka ho feletseng ka mohlala oa hae, u ke ke ua tlohela.”—Ba-Heberu 12:2, 3, NW.
Leonard Pearson, oa Komiti ea Watchtower Farms, o ile a latela ka sehlooho se reng, “Lula U Shebile Nthong e le ’Ngoe.” O ile a re: “U ka ba le k’hamera e molemo ka ho fetisisa, ntho e ntle ka ho fetisisa eo u batlang ho e nka setšoantšo, tikoloho e ntle, empa leha ho le joalo ua nka setšoantšo se seng setle—haeba k’hamera ea hao e sa shebisoa nthong e le ’ngoe.” Ho tšoana le lense e etsang hore u bone sebaka se seholo, pono ea rōna e tlameha ho akarelletsa mosebetsi oa lefatše ka bophara o ntseng o etsoa. Le ka mohla re se ke ra lahleheloa ke pono ea setšoantšo sena se seholo. Moena Pearson o ile a re: “Ba ichebang bobona ha ba na ho thaba likabelong tsa bona. Ba shebang Jehova le mosebetsi oo a ba fileng oona hore ba o etse ba tla atleha.”
Sehlooho sa puo e latelang, e ileng ea fanoa ke John E. Barr, setho se seng sa Sehlopha se Busang, se ne se re, “Ho Hongata ho ka Lebohuoang.” Moena Barr o ile a eletsa liithuti, “Le ka mohla le se ke la lahleheloa ke boikutlo ba ho leboha Jehova. Ke o mong oa mehloli e meholo ka ho fetisisa ea khotsofalo, ho sa tsotellehe hore na kabelo ea hao ke efe.” Boikutlo ba teboho bo ile ba qobella Davida hore a ngole: “Ke neiloe kabelo ea ka nģalong tse ntle, le lefa la ka linaheng tse khahlehang.” (Pesaleme ea 16:6) Moena Barr o ile a re, “Le na le letlotlo la bohlokoa haholo ka ho ikutloa le le haufi le Jehova bophelong ba lōna ba letsatsi le letsatsi. Le ka mohla Jehova a ke ke a le amoha kamano eo hafeela le ntse le e nka e le ntho e thabisang haholo eo le e lebohang.”
Sebui se latelang e bile morupeli oa Gileade Jack Redford, ka sehlooho, “U Tla Sebelisa Leleme la Hao Joang?” Ha motho a bua a sa nahane ho ka baka tšenyo e kaakang! (Liproverbia 18:21) Leleme le ka laoloa joang? Moena Redford o ile a araba: “U tlameha ho qala ka ho koetlisa kelello ea hao hobane leleme le bontša se ka kelellong le ka pelong.” (Mattheu 12:34-37) Jesu o ile a fana ka mohlala o ikhethang; o ile a sebelisa leleme la hae hore a hōlise lebitso la Jehova. Moena Redford o ile a bolella sehlopha sena, “Kajeno ho na le tlala ea ho utloa mantsoe a Jehova. Mantsoe ao lea a tseba. Le na le ‘leleme la ba rutehileng.’ Kahoo kamehla le lumelle maleme a lōna a tataisoe ke kelello le pelo tse inehetseng ka ho feletseng ho Jehova.”—Esaia 50:4.
Bohlokoa ba thapelo bo ile ba hatisoa puong “Na U Tsamaea Joalokaha Eka U Moo Jehova a Leng Teng?” Ulysses Glass, mongolisi oa liithuti oa sekolo, o ile a bontša: “Haeba ntate a ne a ka sebetsa ka thata ho hlokomela ba lelapa la hae empa ho se mohla a ba buisang hape ho se mohla a etsang lipontšo tsa lerato, lelapa la hae le ka ’na la etsa qeto ea hore ho sebetsa ha hae e ne e le mokhoka-khoale, e le ho sa susumetsoeng ke lerato. Ho joalo le ka rōna. Re ka ’na ra ba mahlaha-hlaha tšebeletsong ea Molimo. Empa haeba re sa rapele, re mpa re inehetse mosebetsing eseng ho Ntate oa leholimo ea lerato.”
Theodore Jaracz, oa Sehlopha se Busang, o ile a bua ka sehlooho “Lebaka la Hore Matšoele a Kopanele le Batho ba Molimo.” Selemo le selemo makholo a likete a phallela mokhatlong o hlophisitsoeng oa Jehova. (Zakaria 8:23) Ke eng se khethollang Lipaki tsa Jehova e le batho ba Molimo? Ntho ea pele, li amohela Bibele eohle e le Lentsoe la Molimo. (2 Timothea 3:16) Ntho ea bobeli, ha li nke lehlakore lipolotiking. (Johanne 17:16) Ntho ea boraro, li paka ka lebitso la Molimo. (Johanne 17:26) Ntho ea bone, li bontša lerato le nang le boitelo. (Johanne 13:35; 15:13) Ka bopaki bona, ka sebete re ka ‘bolela lithoko tsa ea re bitsitseng lefifing ho re kenya leseling la hae le hlollang.’—1 Petrose 2:9.
Ka mor’a lipuo tsena tse susumetsang, liithuti tsohle tse 46 li ile tsa amohela mangolo a tsona. Li abetsoe ho ea linaheng tse 16 ho pota lefatše.
Lenaneo le Fapaneng la Motšehare oa Mantsiboea
Motšehare oa mantsiboea Donald Krebs oa Komiti ea Bethele o ile a tšoara Thuto ea Molula-Qhooa e khutsufalitsoeng. Eaba liithuti li tekela bamameli lenaneo le reng “Bohlale bo Tlerola ka Lentsoe le Leholo Mapatlelong.” (Liproverbia 1:20) Li ile tsa pheta liphihlelo tse putsang tseo li neng li bile le tsona bopaking ba seterateng le ba libakeng tsa khoebo. Kannete, Jehova o hlohonolofatsa ba iphang sebete hore ba bolele ka mokhoa o sa reroang. Seithuti se seng se ile sa re: “Ke rata ho nahana ka rōna re le lisekele matsohong a bakotuli ba mangeloi. Ha re khona ho sebelisa tsebo ea rōna ka bohlale bo boholoanyane, mangeloi ao a ka re sebelisa hore re etse mosebetsi o moholoanyane.” (Bapisa le Tšenolo 14:6.) Lenaneo la liithuti le ile la boela la akarelletsa pontšo ea liselaete e ileng ea nkisa bamameli leeto la thuto la ho ea Bolivia, Malta, le Taiwan—linaha tse tharo ho tseo liithuti tsa sehlopha sena li rometsoeng ho tsona.
Se latelang, Wallace le Jane Liverance—bao e bileng baromuoa ka lilemo tse 17—ba ile ba botsoa lipotso. Ka October 1993 ba ile ba memeloa Watchtower Farms, moo hona joale Moena Liverance a sebeletsang e le e mong oa barupeli ba Gileade.
Ho ile ha latela nehelano ea likarolo tse ’nè, e reng “Ho Hlompha ba Tšoanelehang ba Lilemong tsa Bona tsa Botsofali.” Ha batho ba tsofala, ba keneloa ke tšabo ea ho hloka kholiseho ea botho, ba nka hore e tla ba ba se nang thuso ’me ba lahloe. (Pesaleme ea 71:9) Nehelano ena e amang pelo e ile ea bontša kamoo bohle ka phuthehong ba ka tšehetsang ba joalo ba hōlileng ba tšepahalang.
Ka mor’a pina e koalang le thapelo, bohle ba 6 220 ba neng ba le teng Holong ea Kopano ea Jersey City le liholo tse haufi ba ile ba ikutloa ba khatholohile. Re na le liithuti ka lithapelo tsa rōna likabelong tsa tsona tse ncha. E se eka li ka tsoela pele ho latsoa thabo e kholoanyane e tlisoang ke ho fana.
[Lebokose le leqepheng la 26]
Lipalo tse Amang Sehlopha
Lenane la linaha tse emetsoeng: 9
Lenane la linaha tseo li abetsoeng ho ea ho tsona: 16
Lenane la liithuti: 46
Karolelano ea lilemo: 33,85
Karolelano ea lilemo ’neteng: 16,6
Karolelano ea lilemo tšebeletsong ea nako e tletseng: 12,2
[Lebokose le leqepheng la 27]
Tlhokomelo e Khethehileng e Lebisoa Malta
BOKRESTE-’MŌTOANA bo ile ba bipetsa ’nete ea Bibele ka lilemo tse ngata Malta. Baromuoa ba ho qetela ba Gileade ba ileng ba romeloa teng, Frederick Smedley le Peter Bridle, ba ile ba fumana mangolo a bona sehlopheng sa borobeli khale ka 1947. Leha ho le joalo, ba ile ba tšoaroa ba ba ba lelekoa Malta nakoana ka mor’a ho fihla teng. Ho 1948 Yearbook of Jehovah’s Witnesses ho tlalehiloe: “Nako eo baromuoa bana ba babeli ba e sebelisitseng makhotleng le ho ba boholong naheng ena e lekana le eo ba e sebelisitseng ho etsa mesebetsi ea bona ea bosebeletsi, feela ka lebaka la khanyetso ea Sehlopha se Phahameng se Busang sa Bolumeli sa Roma e K’hatholike. Baprista ba bolela hore Malta ke ea Mak’hatholike le hore bohle bao e seng ’ona ba tlameha ho tsoa.” Hona joale, hoo e ka bang lilemo tse 45 hamorao, baromuoa ba bane ba sehlopha sa bo96 sa Gileade ba abetsoe Malta.
[Setšoantšo se leqepheng la 26]
Sehlopha sa Bo96 se Abeloang Mangolo a Sekolo sa Watchtower sa Bibele sa Gileade
Lethathamong le ka tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.