“Le Fetotse Maikutlo ao ke Neng ke E-na le ’Ona ka Lipaki Tsa Jehova”
KE KAMOO ofisiri e ’ngoe ea chankana ea Poland e ileng ea arabela kateng sehloohong se neng se bua ka mosebetsi oa Lipaki tsa Jehova, joalokaha o tlalehiloe tokollong ea rōna ea October 15, 1998. Sehlooho se reng, “Ha Lipelo Tse Thatafetseng li Arabela,” se ne se ngotse ka katleho eo Lipaki tsa Jehova li ’nileng tsa e-ba le eona ha li ntse li tšoarehile ka batšoaruoa ba Wołów, Poland.
Pele babali ba lokolleloa makasine ea Molula-Qhooa e boletsoeng ka holimo, ho ile ha lokisetsoa seboka se khethehileng hore e tle e fuoe batšoaruoa ka la 13 September, 1998, chankaneng ea linokoane tse kotsi ea Wołów. Ba neng ba menngoe ba ne ba akarelletsa Lipaki tsa moo, batšoaruoa ba kolobelitsoeng le ba bang ba thahasellang, le liofisiri tse ’maloa tsa chankana. Lintlha tse latelang ke tse ling tsa tse ileng tsa hlokomeloa ke ba neng ba le teng moo.
Jerzy, e mong oa Lipaki tsa Jehova ea ileng a kolobelletsoa chankaneng moo lilemong tse fetang tse hlano tse fetileng, o ile a re: “Ke thabile haholo, ha kajeno ke bala ka boiteko bo matla boo barab’abo rōna ba liphutheho tse haufinyane ba bo entseng ho re thusa.” A phaella ka ho re: “Ha ke phetse ho loanela ho ntlafatsa botho ba ka, ’me ke bona kamoo Jehova a ’nileng a mpōpa kateng.”
Motšoaruoa e mong, ea bitsoang Zdzisław, o ile a bua sena mabapi le mosebetsi oa ho paka chankaneng eo: “Hona joale, batšoaruoa ba bane ba itokiselletsa kolobetso, ’me ba sa tsoa thahasella ba tsoela pele ho ba teng libokeng holong ea rōna. Sehlooho sena ke tšusumetso e matla ea hore re sebetse tšimo ena haholoanyane.” Boikutlo boo bo botle hakaakang ha ho nahaneloa hore Zdzisław o sa ntsane a saletsoe ke lilemo tse 19 chankaneng!
Ofisiri e ’ngoe ea chankana ka mor’a hore e bale sehlooho sena se buang ka chankana ea linokoane tse kotsi ea Wołów e ile ea re: “Re hlomphuoe ka ho khetheha. Ha ho mohla nkileng ka nahana hore chankana ena e ne e ka phatlalatsoa ka mokhoa o motle hakana ka lipuo tse 130 lefatšeng. Kea le rata, ’me lebitsong la batšoaruoa ke ananela boiteko ba lōna.” Ofisiri e ’ngoe e ile ea phaella: “Le fetotse maikutlo ao ke neng ke e-na le ’ona ka Lipaki tsa Jehova. Pele, ke ne ke nka hore le hlanyetsa bolumeli. Joale kea bona hore le batho ba phelang ka melao-motheo.”
Mookameli oa chankana ea Wołów, Marek Gajos, o ile a bososela ’me a re: “Qalong re ne re nahana hore ha le na ho atleha hakaalo. Re ile ra nahana hore le mpa le le bolumeli bo bong feela bo nang le tšepo e matla ea ho thusa batšoaruoa ka Bibele hore ba fetole mekhoa ea bona. Leha ho le joalo, ha re bona litholoana tsa mosebetsi oa lōna oa mathomo, re ile ra etsa qeto ea ho tšoarana le lōna ka matsoho. E se e le lilemo tse robong joale le ntse le e-tla mona le sa khathale, ’me ke ananela haholo seo le se entseng ho fihlela joale.”
Leha ho le joalo, batšoaruoa ba chankana ea Wołów ka kakaretso ba ile ba amohela sehlooho seo joang? Batšoaruoa ba ile ba se thahasella hoo Lipaki tse chankaneng li ileng tsa felloa ke limakasine tsa tsona. Liofisiri tsa chankana le tsona li ile tsa bontša thahasello ka ho kōpa likopi tse ling tse 40. Hore ho fumanoe limakasine tse ling tse batloang, liphutheho tsa moo li ile tsa thusa ’me tsa fa barab’abo rōna ba chankaneng likopi tse ling tse 100. Ka nako eona eo, ba bang teng libokeng chankaneng ba ile ba eketseha.
Piotr Choduń, ofisiri e ’ngoe ea chankana, e tšoaraneng ka matsoho le Lipaki tsa Jehova, e ile ea re: “Re entse qeto ea hore sehlooho sena se behoe moo ho behoang lipontšuoa tsohle tsa rōna tsa chankana. Re tšepa hore batšoaruoa bohle ba e-s’o ithute Bibele le lōna ba tla bala makasine ena.”
Mohlala o motle oa Lipaki le boikemisetso ba tsona ba ho bolela, li tsoela pele ho beha litholoana. Ntle ho batšoaruoa ba 15 ba tsoetseng pele hoo ba seng ba kolobelitsoe, liofisiri tse 2 tsa chankana li se li nehetse bophelo ba tsona ho Jehova, ’me ofisiri e ’ngoe ea chankana e kōpile thuto ea Bibele. Ha e le hantle, barab’abo rōna ba bolelang chankaneng ea Wołów ba isa tlotla eohle ho Jehova Molimo ka katleho eo ba e finyeletseng.—Bapisa le 1 Bakorinthe 3:6, 7.
[Setšoantšo se leqepheng la 28]
Lipaki tse tharo le motšoaruoa nakong eo ho neng ho nehelanoa ka limakasine ka holong ea chankana ea thupelo