Lebaka Leo ka Lona Moloko oa Batho o Hlokang Mothusi

MONNA e mong ea neng a ikhohomosa a bile a le mabifi o ile a lumela sena: ‘Ke ne ke le mohlorisi oa monyelisi.’ E ne e bile monyefoli ea hlekefetsang eo ntle ho qenehelo a neng a sotla le ho hlasela balateli ba Jesu Kreste ba tšabang Molimo. Ha a leboha o ile a re: “Leha ho le joalo, ke ile ka bontšoa mohau.” Le hoja ho se bonolo ho ho lumela, mohlorisi enoa ea mabifi e ile ea e-ba moapostola Pauluse oa Mokreste ea tšepahalang.—1 Timothea 1:12-16; Liketso 9:1-19.

Hase e mong le e mong ea entseng lintho tse tšoanang le tse entsoeng ke Pauluse. Empa bohle re hlōloa ho finyella melao ea Molimo. Hobane’ng? Hobane “bohle ba entse sebe ’me ba haelloa ke khanya ea Molimo.” (Baroma 3:23) Ho feta moo, ho bonolo haholo ho hatelloa ke ho nyahama, mohlomong re ikutloa hore re babe haholo hoo Molimo a ke keng a re hauhela. Ha Pauluse a ntse a nahana ka litšekamelo tsa hae tsa boetsalibe, o ile a hooa: “Ke monna ea sōtō hakaakang! Ke mang ea tla mpholosa ’meleng ona o fetang lefung lee?” Ha a arabela potso ea hae, o ile a ngola: “A ho lebohuoe Molimo ka Jesu Kreste Morena oa rōna!”—Baroma 7:24, 25.

’Mōpi ea lokileng o ne a ka sebelisana joang le baetsalibe? (Pesaleme ea 5:4) Hlokomela hore Pauluse o itse: “A ho lebohuoe Molimo ka Jesu Kreste Morena oa rōna.” E mong ea ileng a amohela mohau oa Molimo o ile a fana ka tlhaloso ena: “Haeba mang kapa mang a fela a etsa sebe, re na le mothusi ho Ntate, Jesu Kreste, ea lokileng. ’Me ke sehlabelo sa poelano bakeng sa libe tsa rōna, empa leha ho le joalo eseng bakeng sa tsa rōna feela empa le bakeng sa tsa lefatše lohle.”—1 Johanne 2:1, 2.

Ke hobane’ng ha Jesu Kreste a bitsoa “mothusi [ea] ho Ntate”? Hona ke joang Jesu e leng “sehlabelo sa poelano” bakeng sa libe?

Lebaka Leo Mothusi a Hlokahalang ka Lona

Jesu o ile a tla lefatšeng “ho fana ka soule ea hae ho ba thekollo e le phapanyetsano bakeng sa ba bangata.” (Matheu 20:28) Thekollo ke ntho e lefuoang ho rekolla, kapa hore ho lokolloe motho ea itseng kapa ntho e itseng. Leetsi la lentsoe la Seheberu le fetoletsoeng e le “thekollo” le fana ka maikutlo a ho koahela kapa ho lefella libe. (Pesaleme ea 78:38) Lentsoe la Segerike, le tšoanang le le fumanoang ho Matheu 20:28, le ne le sebelisoa ka ho khetheha ho bolela se neng se lefuoa ho rekolla batšoaruoa ba ntoa kapa ho lokolla makhoba. E le hore ho phethoe toka, ho fanoa ka ntho e ’ngoe bakeng sa e ’ngoe e lekanang le eona ka bohlokoa.

Moloko oa batho o kene bokhobeng hobane motho oa pele a ile a fetohela Molimo. Joalokaha ho bontšitsoe ho Genese khaolo ea 3, motho eo ea phethahetseng—e leng Adama—o ile a khetha ho phehella tsela ea ho se mamele Jehova Molimo. Ka ho etsa joalo, o ile a ithekisa bokhobeng ba sebe le lefu hammoho le bana ba hae ba neng ba e-s’o tsoaloe. Ka tsela eo, Adama o ile a lahla neo ea bophelo bo phethahetseng ba motho bakeng sa hae le bana bohle ba hae.—Baroma 5:12, 18, 19; 7:14.

Iseraeleng ea boholo-holo, Molimo o ne a lokiselitse hore mahlabelo a liphoofolo a lefelle kapa a koahele libe tsa batho. (Levitike 1:4; 4:20, 35) Ha e le hantle, ho ne ho fanoa ka bophelo ba phoofolo ea sehlabelo bakeng sa bophelo ba moetsalibe. (Levitike 17:11) Ka lebaka leo, “letsatsi la lipheko” le ka ’na la boela la bitsoa “letsatsi la thekollo.”—Levitike 23:26-28.

Leha ho le joalo, kaha liphoofolo li tlaase ha li bapisoa le motho, ho ne “ho ke ke ha khoneha hore mali a lipoho le a lipōli a tlose libe [ka ho feletseng].” (Baheberu 10:1-4) Hore sehlabelo se be le matla a lekaneng a ho lefella, kapa ho tlosa libe ka ho sa feleng, se ne se tla tlameha hore matla a sona a ho reka a lekane le seo Adama a se lahlileng. Sekala sa toka se ne se hloka hore motho ea phethahetseng (Jesu Kreste) a se tsitsise ka se lekanang le seo motho ea phethahetseng (Adama) a se lahlileng. Ke feela bophelo bo phethahetseng ba motho bo neng bo ka rekolla bana ba Adama bokhobeng boo ntat’a bona oa pele a neng a ba rekisitse ho bona. “Bophelo ka bophelo” ke eona ntho e neng e tla finyella litlhoko tsa toka ea ’nete.—Exoda 21:23-25.

Ha Adama a ne a etsa sebe ’me a ahloleloa lefu, bana ba hae bao e neng e le hona ba tla tsoaloa ba ne ba sa ntsane ba le lethekeng la hae, kahoo ba ile ba shoa le eena. E bile ka boithatelo hore ebe Jesu, motho ea phethahetseng, “Adama oa ho qetela,” ha aa ka a ba le bana. (1 Bakorinthe 15:45) O ne a e-na le bana ba sa tsoaloang lethekeng la hae ha a e-shoa e le sehlabelo se phethahetseng sa motho. Ka lebaka leo, ho ka ’na ha thoe moloko oa batho o neng o ka ’na oa hlaha lethekeng la hae o ile oa shoa le eena. Jesu o ile a nka lelapa la Adama la baetsalibe, ba shoang a le etsa la hae. O ile a tela tokelo ea hore a be le lelapa leo e leng la hae. Ka ho tela bophelo ba hae bo phethahetseng e le motho, Jesu o ile a rekolla moloko oohle oa batho o tsoileng ho Adama e le hore o ka fetoha lelapa la Hae, e leng ho ileng ha Mo etsa “Ra-bo-sa-feleng” oa oona.—Esaia 9:6, 7.

Sehlabelo sa thekollo sa Jesu se ile sa bulela moloko oa batho o mamelang tsela ea ho fumana mohau oa Molimo le bophelo bo sa feleng. Ka lebaka leo, moapostola Pauluse o ile a ngola: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” (Baroma 6:23) Re susumelletseha ho rorisa Jehova ka lerato le qenehelo tse amanang le thekollo, tse lokiselitsoeng ka tahlehelo e khōlō ho eena le ho Mora ea ratoang oa hae. (Johanne 3:16) Jesu o bontšitse e le kannete hore ke “mothusi [ea] ho Ntate” ha a ne a tsosetsoa bophelong ba leholimo ’me a hlahisa molemo oa sehlabelo sa hae sa thekollo ho Molimo maholimong.a (Baheberu 9:11, 12, 24; 1 Petrose 3:18) Empa hona joale Jesu Kreste o bontša joang hore ke mothusi oa rōna ea leholimong?

[Mongolo o botlaaseng ba leqephe]

[Setšoantšo se leqepheng la 4]

Bophelo bo phethahetseng ba motho ba Jesu ke bona bo ileng ba rekolla bana ba Adama