‘Ipholose Hammoho le ba U Mamelang’
“Ikele hloko ka mehla le thuto ea hao. . . . Ka ho etsa sena u tla ipholosa hammoho le ba u mamelang.”—1 TIMOTHEA 4:16.
1, 2. Ke eng se susumetsang Bakreste ba ’nete hore ba tsoele pele mosebetsing oa bona o pholosang bophelo?
MOTSENG o mong o thōko oa Thailand e ka leboea, banyalani ba bang ba Lipaki tsa Jehova ba leka tsebo ea bona ea puo e ncha ho litho tsa morabe o lulang leralleng le leng. E le hore ba abele batho ba motse oo litaba tse molemo tsa ’Muso oa Molimo, banyalani bana ba sa tsoa qala ho ithuta puo ea Selahu.
2 Monna oa hlalosa: “Ho thata ho hlalosa thabo le khotsofalo tseo re nang le tsona, ha re sebetsa har’a batho bana ba thahasellisang. Ka sebele re ikutloa re kentse letsoho phethahatsong ea Tšenolo 14:6, 7, re bolela litaba tse nyakallisang ho ‘sechaba se seng le se seng le moloko o mong le o mong le leleme le leng le le leng.’ Ho setse masimo a macha a ’maloa moo litaba tse molemo li sa finyellang, ’me ena ke e ’ngoe ea oona. Lithuto tsa Bibele tseo re nang le tsona li re tletse matsoho.” Ho totobetse hore banyalani bana ba na le tšepo ea ho ipholosa hammoho le ba ba mamelang. Joaloka Bakreste, na bohle ha re na tšepo ea ho etsa se tšoanang?
“Ikele Hloko ka Mehla”
3. E le hore re pholose ba bang, re lokela ho qala ka ho etsa’ng?
3 Moapostola Pauluse o ile a eletsa Timothea, “Ikele hloko ka mehla le thuto ea hao,” ’me keletso ena e sebetsa ho Bakreste bohle. (1 Timothea 4:16) Ka sebele, e le hore re thuse ba bang hore ba bolokehe, re lokela ho qala ka ho ikela hloko. See re ka se etsa joang? Taba ea pele, re lokela ho lula re falimehetse linako tseo re phelang ho tsona. Jesu o fane ka pontšo e nang le likarolo tse ngata e le hore balateli ba hae ba tle ba tsebe ha “qetello ea tsamaiso ea lintho” e fihlile. Leha ho le joalo, Jesu o ile a boela a bolela hore re ne re sa tl’o tseba ka ho toba hore na bofelo bo tla tla neng. (Matheu 24:3, 36) Re lokela ho etsa joang ka ntlha eo?
4. (a) Re lokela ho hlaolela maikutlo afe mabapi le nako e saletseng tsamaiso ee? (b) Re lokela ho qoba maikutlo afe?
4 E mong le e mong oa rōna a ka ’na a botsa, ‘Na ke sebelisa nako leha e le efe e saletseng tsamaiso ee hore ke ipholose hammoho le ba ’mamelang? Kapa kea nahana, “Kaha ha re tsebe hantle hore na bofelo bo tla tla neng, ha ke na ho itšoenya ka bona”?’ Maikutlo ana a ho qetela a kotsi. A hanana ka ho toba le khothatso ea Jesu e reng: “Ipakeng le le ba itokisitseng, hobane ka hora eo le sa nahaneng hore ke eona, Mora oa motho oa tla.” (Matheu 24:44) Ka sebele nako ena hase ea ho felloa ke cheseho tšebeletsong ea Jehova kapa ho batla thuso lefatšeng bakeng sa tšireletseho le khotsofalo.—Luka 21:34-36.
5. Lipaki tsa Jehova tsa pele ho Bokreste li ile tsa beha mohlala ofe?
5 Tsela e ’ngoe eo ka eona re ka bontšang hore re ikela hloko ke ka ho mamella ka botšepehi joaloka Bakreste. Nakong e fetileng bahlanka ba Molimo ba ile ba lula ba mameletse, ho sa tsotellehe hore na ba ne ba lebelletse ho lopolloa ka potlako kapa che. Ka mor’a ho bolela mehlala ea lipaki tsa pele ho Bokreste tse kang Abele, Enoke, Noe, Abrahama le Sara, Pauluse o ile a lemoha: ‘Ha baa ka ba fumana phethahatso ea litšepiso, empa ba ile ba li bonela hōle ’me ba li amohela ka mofuthu ’me ba bolela phatlalatsa hore e ne e le basele le baahi ba nakoana naheng eo.’ Ha baa ka ba inehela litakatsong leha e le life tsa bophelo ba boiketlo, leha e le hore ba ile ba sekisetsa likhatellong tsa boitšoaro bo bobe bo ba potolohileng, empa ka cheseho ba ile ba lebella “phethahatso ea litšepiso.”—Baheberu 11:13; 12:1.
6. Pono ea Bakreste ba lekholo la pele la lilemo mabapi le poloko e ile ea ama tsela ea bona ea bophelo joang?
6 Bakreste ba lekholo la pele la lilemo le bona ba ipone e le “bajaki” lefatšeng lena. (1 Petrose 2:11) Esita le ka mor’a ho pholosoa timetsong ea Jerusalema ka 70 C.E., Bakreste ba ’nete ha baa ka ba khaotsa ho bolela leha e le hona ho boela tseleng ea bophelo ea lefatše. Ba ne ba tseba hore ba tšepahalang kamehla ba letetsoe ke poloko e babatsehang. Ha e le hantle, morao haholo hoo e ka bang ka 98 C.E., moapostola Johanne o ile a ngola: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.”—1 Johanne 2:17, 28.
7. Lipaki tsa Jehova li bontšitse mamello joang mehleng ea kajeno?
7 Mehleng ea kajeno Lipaki tsa Jehova le tsona li mamelletse mosebetsing oa Bokreste, le hoja li ’nile tsa hlorisoa ka sehlōhō. Na mamello ea tsona ebile ea lefeela? Ka sebele ha ho joalo hobane Jesu oa re tiisetsa: “Ea mameletseng ho isa bofelong ke eena ea tla pholoha,” ho sa tsotellehe hore na e tla be e le bofelo ba tsamaiso ena ea khale kapa ba bophelo ba motho ba hona joale. Tsohong, Jehova o tla hopola le ho putsa bahlanka bohle ba tšepahalang ba hae ba shoeleng.—Matheu 24:13; Baheberu 6:10.
8. Re ka bontša joang hore re ananela mamello ea Bakreste ba nako e fetileng?
8 Ho feta moo, re thabela hore Bakreste ba tšepahalang ba nakong e fetileng ba ne ba sa ameha feela ka poloko ea bona ba le bang. Ke ’nete hore rōna ba ithutileng ka ’Muso oa Molimo ka boiteko ba bona re leboha hore ba ile ba mamella hore ba phethe thōmo ena ea Jesu e reng: “E-eang ’me le etse batho ba lichaba tsohle barutuoa, . . . le ba ruta ho boloka lintho tsohle tseo ke le laetseng tsona.” (Matheu 28:19, 20) Hafeela monyetla o sa re bulehetse, re ka bontša teboho ea rōna ka ho bolella ba bang ba e-song ho utloe litaba tse molemo. Leha ho le joalo, boboleli ke bohato ba pele feela bo isang ho etseng barutuoa.
‘Ela Hloko Thuto ea Hao’
9. Maikutlo a matle a ka re thusa joang ho qalisa lithuto tsa Bibele?
9 Kabelo ea rōna ha e akarelletse ho bolela feela empa e akarelletsa le ho ruta. Jesu o re romile hore re rute batho ho boloka lintho tsohle tseo a li laetseng. Ke ’nete hore masimong a mang, ke ba ’maloa bao ho bonahalang ba batla ho ithuta ka Jehova. Empa ho ba le maikutlo a seng matle ka tšimo ho ka sitisa boiteko ba rōna ba ho qalisa lithuto tsa Bibele. Pula-maliboho e mong ea bitsoang Yvette, ea sebetsang tšimong eo ba bang ba neng ba re ha e behe, o ile a hlokomela hore batho ba etelang sebakeng seo, ba e-na le maikutlo a matle, ba ne ba qalisa lithuto tsa Bibele. Ha Yvette a hlaolela pono e ntle haholoanyane, le eena o ile a fumana batho ba batlang ho ithuta Bibele.
10. Mosebetsi oa rōna o ka sehloohong re le mesuoe ea Bibele ke ofe?
10 Bakreste ba bang ba ka ’na ba tsilatsila ho kōpa ho ithuta Bibele le batho ba thahasellang hobane ba ikutloa ba ke ke ba khanna thuto. Ke ’nete hore ha re lekane ka bokhoni. Empa ha ho hlokahale hore re be le bokhoni bo phahameng hore re be mesuoe e atlehileng ea Lentsoe la Molimo. Molaetsa o hloekileng oa Bibele o matla, ’me Jesu o boletse hore ba kang linku ba tseba lentsoe la Molisa oa ’nete ha ba le utloa. Kahoo, mosebetsi oa rōna ke feela ho fetisa molaetsa oa Molisa ea Khabane, Jesu, ka mokhoa o hlakileng kahohle kamoo re ka khonang.—Johanne 10:4, 14.
11. U ka atleha haholoanyane joang ho thusa seithuti sa Bibele?
11 U ka fetisa molaetsa oa Jesu joang ka katleho e khōloanyane? Ntho ea pele, tseba hantle seo Bibele e se buang ka taba eo ho buisanoang ka eona. U lokela ho utloisisa taba ka bouena pele u ka e ruta ba bang. Hape, leka ho boloka boemo bo hlomphehang empa e le ba botsoalle nakong ea thuto. Liithuti, ho akarelletsa le tse nyenyane haholo, li ithuta hamolemo ha li phutholohile le ha mosuoe a li bontša tlhompho le mosa.—Liproverbia 16:21.
12. U ka kholiseha joang hore seithuti se utloisisa seo u se rutang sona?
12 Joaloka mosuoe, ha u batle ho beha lintlha feela hore seithuti se li phete ka hlooho feela. Se thuse ho utloisisa seo se ithutang sona. Thuto ea sekolong ea seithuti, phihlelo ea sona bophelong le tsebo ea Bibele eo se nang le eona li tla ama kutloisiso ea sona ho seo u se buang. Kahoo, u ka ’na ua ipotsa, ‘Na se utloisisa bohlokoa ba mangolo a bontšitsoeng tabeng e ithutoang?’ U ka se ntša litaba hanong ka lipotso tse hlokang ho arabeloa ka tlhaloso eseng feela ka e, kapa che. (Luka 9:18-20) Ka lehlakoreng le leng, liithuti tse ling li tsilatsila ho botsa mosuoe. Kahoo, li ka tsoela pele li sa utloisise ka ho feletseng seo li se rutoang. Khothalletsa seithuti ho botsa lipotso le hore se u bolelle ha se sa utloisise ka ho feletseng ntlheng e itseng.—Mareka 4:10; 9:32, 33.
13. U ka thusa seithuti joang hore e be mosuoe?
13 Morero oa bohlokoa oa ho khanna thuto ea Bibele ke ho thusa seithuti hore e be mosuoe. (Bagalata 6:6) E le hore ho finyelloe seo, ha le ikhopotsa seo le ithutileng sona, u ka se kōpa hore se u hlalosetse ntlha e itseng ka mantsoe a bonolo, joalokaha eka se ne se hlalosetsa motho ea qalang ho e utloa. Hamorao, ha se tšoaneleha ho kopanela tšebeletsong, u ka se mema hore se sebetse le uena tšimong. Ho ka etsahala hore se ikutloe se phutholohile ha se sebetsa le uena, ’me phihlelo eo e tla se thusa hore tšepo ea sona e hōle ho fihlela se loketse ho tsoela tšebeletsong ka bosona.
Thusa Seithuti ho ba Motsoalle oa Jehova
14. Pakane e ka sehloohong ea hao joaloka mosuoe ke efe, ’me ke eng e tla kolekela hore u atlehe ho e finyella?
14 Pakane e ka sehloohong ea mosuoe e mong le e mong oa Mokreste ke ho thusa seithuti hore se fumane botsoalle ba Jehova. Sena u ke ke ua se finyella feela ka lipolelo tsa hao empa u tla se finyella le ka mohlala oa hao. Ho ruta ka mohlala ho na le phello e matla lipelong tsa liithuti. Ka sebele liketso li bua ho feta lipolelo, haholo-holo ha ho kenngoa ka botebo litšoaneleho tsa boitšoaro le ha ho susumelletsoa seithuti ho cheseha. Haeba se bona hore lipolelo le liketso tsa hao li susumelletsoa ke kamano e ntle le Jehova, se ka ’na sa susumelletseha haholo ho hlaolela kamano e joalo.
15. (a) Ke hobane’ng ha e le habohlokoa hore seithuti se hlaolele sepheo se nepahetseng sa ho sebeletsa Jehova? (b) U ka thusa seithuti joang hore se ’ne se hatele pele moeeng?
15 U batla hore seithuti se sebeletse Jehova hobane se mo rata, eseng feela hobane se sa batle ho timetsoa ka Armagedone. Ka ho se thusa hore se hlaolele sepheo se setle joalo, u tla be u haha ka thepa e sa cheng e tla pholoha liteko tsa tumelo ea sona. (1 Bakorinthe 3:10-15) Sepheo se sa nepahalang, se kang takatso e feteletseng ea ho u etsisa kapa ho etsisa motho leha e le ofe e mong, se ke ke sa se fa matla a ho hanela litšusumetso tseo e seng tsa Bokreste kapa hona ho se fa sebete sa ho etsa se nepahetseng. Hopola, u ke ke ua se ruta ka ho sa feleng. Ha u sa na le monyetla, u ka se khothaletsa ho atamela haholoanyane ho Jehova ka ho bala Lentsoe la Molimo kamehla le ho nahana ka lona. Ka tsela ena, le ka mor’a nako e telele thuto ea lōna e khaolitse, se tla tsoela pele ho amohela “mohlala oa mantsoe a phelisang” a tsoang ka Bibeleng le ho lingoliloeng tse thehiloeng Bibeleng.—2 Timothea 1:13.
16. U ka ruta seithuti joang hore se rapele ho tsoa pelong?
16 U ka boetse ua thusa seithuti hore se atamele haufi le Jehova ka ho se ruta ho rapela ho tsoa pelong. See u ka se etsa joang? Mohlomong u ka se lebisa thapelong ea mohlala ea Jesu, hammoho le lithapelong tse ling tsa pelo eohle tse tlalehiloeng ka Bibeleng, tse kang tse lipesalemeng. (Pesaleme ea 17, 86, 143; Matheu 6:9, 10) Ho phaella moo, ha seithuti sa hao se utloa u rapela ha le qalisa le ha le koala thuto, se tla utloa hore na u ikutloa joang ka Jehova. Kahoo, kamehla lithapelo tsa hao li lokela ho utloahala e le tse etsoang ka tieo le ka ho phetla sefuba, hammoho le teka-tekano moeeng le maikutlong.
Ho Sebeletsa ho Pholosa Bana ba Hao
17. Batsoali ba ka thusa bana ba bona joang ho lula tseleng ea poloko?
17 Ha e le hantle, har’a bao re batlang ho ba pholosa, ke litho tsa malapa a rōna. Palo e khōlō ea bana ba batsoali ba Bakreste ea tšepahala ’me e “tiile tumelong.” Leha ho le joalo, ho ka etsahala hore ebe mohlomong ’nete ha ea teba lipelong tsa ba bang. (1 Petrose 5:9; Baefese 3:17; Bakolose 2:7) Boholo ba bacha bana ba tlohela tsela ea Bokreste ha ba atamela kapa ha ba kena lilemong tsa ho ba batho ba baholo. Haeba u motsoali, u ka etsa’ng hore phello e joalo e se ke ea e-ba le monyetla o moholo? Ntho ea pele, u ka sebeletsa hore ho be le moea o hahang ka lelapeng. Bophelo bo botle ba lelapa ke motheo oa ho ba le pono e ntle ka ba nang le matla a ho laela, kananelo bakeng sa boitšoaro bo loketseng le kamano e thabisang le ba bang. (Baheberu 12:9) Kahoo, maqhama a tiileng ka lelapeng a ka etsa hore lelapa e be sebaka seo setsoalle sa ngoana le Jehova se ka hōlelang ho sona. (Pesaleme ea 22:10) Malapa a matla a etsa lintho a ipōpile hammoho—esita le haeba batsoali ba lokela ho tela nako eo ba ka beng ba e sebelisetsa mabaka a botho. Ka tsela ena, ka mohlala u ka ruta bana ba hao ho etsa liqeto tse nepahetseng bophelong. Batsoali, ntho eo bana ba lōna ba e hlokang haholo ho lōna, hase melemo ea lintho tse bonahalang empa ba hloka lōna—nako ea lōna, matla a lōna le lerato la lōna. Na le fa bana ba lōna lintho tsee?
18. Batsoali ba lokela ho thusa bana ba bona ho araba lipotso tsa mofuta ofe?
18 Batsoali ba Bakreste ha baa lokela ho nahana hore bana ba bona e tla ba Bakreste ka mohlolo feela tjee. Daniel, e le moholo ebile e le ntate oa bana ba bahlano, o re: “Batsoali ba lokela ho ipha nako ho thusa ho ntša lipelaelo tseo bana ba bona ba li fumanang ka mokhoa o ke keng oa qojoa sekolong le libakeng tse ling. Ba tlameha ho se fele pelo ha ba thusa bana ba bona ho fumana likarabo tsa lipotso tse kang: ‘Na re hlile re phela mehleng ea bofelo? Na kannete ho na le bolumeli bo le bong feela ba ’nete? Ke hobane’ng ha ngoana e mong ea itseng eo ke kenang sekolo le eena ea bonahalang a lokile e se motsoalle ea molemo? Na ke kamehla ho leng phoso ho kopanela liphate pele ho lenyalo?’” Batsoali, le ka tšepa hore Jehova o tla hlohonolofatsa boiteko ba lōna, hobane le eena o thahasella boiketlo ba bana ba lōna.
19. Ke hobane’ng ha ho le molemo ka ho fetisisa hore batsoali ka bobona ba ithute le bana ba bona?
19 Batsoali ba bang ba ka ’na ba ikutloa ba sa tšoanelehe tabeng ea ho ithuta le bana ba bona. Leha ho le joalo, ha ho hlokahale hore le ikutloe ka tsela ena, hobane ha ho motho ea ka rutang bana ba lōna hamolemo ho le feta. (Baefese 6:4) Ho ithuta le bana ba lōna ho tla le fa monyetla oa hore le tsebe hore na ke eng se ka lipelong le likelellong tsa bona. Na seo ba se buang se tsoa pelong kapa ba se bua feela ka tloaelo? Na ba hlile ba lumela seo ba ithutang sona? Na Jehova ke oa sebele ho bona? Le ka fumana likarabo tsa tsona le tsa lipotso tse ling tsa bohlokoa hafeela lōna ka bolona le ithuta le bana ba lōna.—2 Timothea 1:5.
20. Batsoali ba ka etsa joang hore thuto ea lelapa e be e thabisang le e molemo?
20 Le ka tsoela pele joang ka lenaneo la thuto ea lelapa ha le se le le qalile? Joseph, e le moholo ebile e le ntate oa mora le morali ba banyenyane, o re: “Joaloka lithuto tsohle tsa Bibele, thuto ea lelapa e lokela ho ba e thabisang, e be ntho eo e mong le e mong a e lebellang ka thabo. E le hore re finyelle sena ka lapeng la rōna, ha re be thata haholo ka nako. Thuto ea rōna e ka nka hora, empa le haeba ka linako tse ling re nka metsotso e leshome feela, re ntse re ithuta. Ntho e ’ngoe e etsang hore bekeng thuto ea rōna e be e thahasellisang ka ho fetisisa ho bana, ke hobane re tšoantšisa lipono tsa Buka ea ka ea Lipale tsa Bibele.a Ho teba ha taba maikutlong le kutloisiso e hlahisoang ke seo ke tsa bohlokoa ho feta hore na re akaretsa lirapa tse ngata hakae.”
21. Batsoali ba ka ruta bana ba bona neng?
21 Ha e le hantle, ho ruta bana ba hao ha hoa lekanyetsoa feela linakong tsa thuto e hlophisitsoeng. (Deuteronoma 6:5-7) Paki ea Thailand e boletsoeng qalong e re: “Ke hopola hantle kamoo Ntate a neng a tsamaea le ’na kateng ha a e-ea mosebetsing oa boboleli, re tsamaea ka libaesekele tsa rōna, re e-ea lipheletsong tsa tšimo ea phutheho ea rōna. Ha ho pelaelo hore ke mohlala o motle oa batsoali ba rōna le ho re ruta ha bona tlas’a maemo ’ohle ho ileng ha re thusa hore re etse qeto ea ho kenela tšebeletso ea nako e tletseng. ’Me thuto eo e sa ntse e sebetsa. Le joale ke ntse ke sebetsa lipheletsong tsa tšimo!”
22. Phello ea ho ‘ikela hloko hammoho le thuto ea hao’ e tla ba efe?
22 Ka letsatsi le leng haufinyane, ka nako ea teng e loketseng, Jesu o tla tlela ho phethahatsa kahlolo ea Molimo tsamaisong ena. Ketsahalo eo ea bohlokoa joale e tla kena historing ea bokahohle, empa bahlanka ba tšepahalang ba Jehova ba tla tsoela pele ho mo sebeletsa ka tebello ea poloko ea ka ho sa feleng. Na u na le tšepo ea ho ba har’a bona, hammoho le bana ba hao le liithuti tsa hao tsa Bibele? Joale hopola: “Ikele hloko ka mehla le thuto ea hao. Lula linthong tsena, kaha ka ho etsa sena u tla ipholosa hammoho le ba u mamelang.”—1 Timothea 4:16.
[Mongolo o botlaaseng ba leqephe]
a E hatisitsoe ke Watchtower Bible and Tract Society of New York, Inc.
Na U ka Hlalosa?
• Maikutlo a rōna e lokela ho ba afe, kaha ha re tsebe nako e tobileng ea kahlolo ea Molimo?
• Re ka ‘ela hloko thuto ea rōna’ ka litsela life?
• U ka thusa seithuti joang hore e be motsoalle oa Jehova?
• Ke hobane’ng ha e le ha bohlokoa hore batsoali ba iphe nako ea ho ruta bana ba bona?
[Setšoantšo se leqepheng la 15]
Moea o hlomphehang le oa botsoalle o kolekela ho ithuteng
[Setšoantšo se leqepheng la 18]
Ho tšoantšisa lipale tsa Bibele, tse kang ha Solomone a ahlola liotsoa tse peli, ho etsa hore thuto ea lelapa e be e thabisang