Bopaki ba Lerato, Tumelo le ho Mamela

HO ne ho pholile hamonate le bile le sele le bohoeng ba ntja Watchtower Farms, Wallkill, New York, hoseng ka la 16 May, 2005. Joang bo kutiloeng ka makhethe le lirapa tsa lipalesa li ne li phatsima ka lebaka la pula e neng e nele pele letsatsi le chaba. Letata le nang le litsuonyana tsa lona tse robeli le ne le sesa ka khutso haufi le mathōko a letangoana. Baeti ba ne ba hloletsoe ke botle boo. Ba ne ba buela tlaase, eka ha ba rate ho senya khutso e neng e rena hoseng hoo.

Baeti bao e ne e le Lipaki Tsa Jehova tse neng li tsoa linaheng tse 48 ho pota lefatše. Empa ba ne ba sa tlela ho tla boha botle ba sebaka sena. Ba ne ba thahasella se neng se etsahala ka har’a mohaho o moholo oa setene se sekhubelu, e leng mohaho oo ka oona ho sa tsoa eketsoa mehaho ea Bethele ea United States e Wallkill. Ha ba fihla ka mohahong oo, ba ile ba hlolloa hape, le hoja ka har’a oona ho ne ho phethesela.

Baeti ba ne ba eme mokatong o phahameng oo baeti ba shebang sebaka ba le ho oona ba shebetse marangrang a mechine tlaase. Mechine e mehlano e meholohali e ne e lutse fulurung ea konkoreite e fetang mabala a robong a bolo ea maoto ka boholo. Ke hona mona moo ho hatisoang Libibele, libuka le limakasine. Lirolo tse khōlōhali tsa pampiri, tseo rolo ka ’ngoe e leng boima ba lik’hilograma tse 1 700, li bilika ka potlako joaloka mabili a teraka e mathang ka lebelo le holimo. Rolo ka ’ngoe ea pampiri eo bolelele ba eona e leng lik’hilomithara tse 23 e thatoloha ka metsotso e 25 feela mochineng o hatisang. Nakong eona eo, mochine o tlotsa enke pampiring ebe oa e omisa le ho e pholisa e le hore e menehe habonolo ho etsa limakasine. Limakasine tseo li feta ka lebelo ka mabanta a li tsamaisang a holimo ebe li kenngoa mabokoseng ’me li romeloa liphuthehong. Mechine e meng e sebetsa ka thata e hatisa maqephe a libuka. Maqephe ao a libuka a fetisetsoa kapele-pele sebakeng sa polokelo se seholohali se fihlang marulelong, ho fihlela a isoa sebakeng seo ho kopanngoang libuka ho sona. Mosebetsi ona oohle o etsoang ka nepo le ka tumellano o laoloa ka k’homphieutha.

Ha baeti ba tloha mechineng e hatisang, ba ile ba etela moo ho kopanngoang libuka teng. Mona mechine e etsa libuka tse sekoahelo se thata le Libibele tsa deluxe tse 50 000 ka letsatsi. Maqephe a libuka a bokelloa ka tatellano, ebe aa kopanngoa haesita le ho khaoloa hanyenyane mahlakoreng. Ebe joale ho kenngoa likoahelo tsa libuka. Liqubu tsa libuka tse seng li qetiloe li kenngoa ka mabokoseng. Mabokose ao a koaloa ke mochine, o a kenya lileibole ebe a pakoa phaleteng. Ho phaella moo, mochine o kopanyang libuka tsa sekoahelo sa pampiri e bonolo o kopanya libuka tse 100 000 ka letsatsi le ho li paka. Le oona ke mochine o moholohali—o nang le likarolo tse ngata tse o tsamaisang, lisebelisoa tse tsamaisang libuka, likere tse laolang lebelo la mochine, mabili a manyenyane le mabanta—kaofela li matha ka lebelo le hlollang hore li etse lingoliloeng tsa Bibele.

Mechine ena e tsoetseng pele e setsing sa khatiso e mathang ka lebelo le phahameng ke mosebetsi o tsoileng matsoho oa theknoloji ea kajeno. Joalokaha re tla bona, e boetse ke bopaki ba lerato la batho ba Molimo, tumelo ea bona le ho mamela ha bona. Empa ke hobane’ng ha tšebetso ea ho hatisa e ile ea tlosoa Brooklyn, New York, ’me ea isoa Wallkill?

Lebaka le ka sehloohong e ne e le ho nolofatsa mosebetsi oa ho hatisa le oa ho romela thepa ka ho etsa hore mosebetsi oo o etsetsoe sebakeng se le seng. Ka lilemo tse ngata, libuka li ne li hatisoa Brooklyn li bile li romeloa libakeng tse ling li tsoa moo, athe limakasine tsona li ne li hatisoa Wallkill li bile li romeloa libakeng tse ling li tsoa moo. Ho kopanya mesebetsi eo ho ne ho tla fokotsa basebetsi ’me ho etse hore menehelo e fanoeng bakeng sa tšebeletso ea Molimo e sebelisoe hantle. Ho feta moo, kaha mechine ea khatiso e Brooklyn e ne e se e tsofala, ho ile ha odaroa mechine e ’meli e mecha ea khatiso ea MAN Roland Lithoman, Jeremane. Mechine ena e ne e ke ke ea fella ka setsing sa khatiso se Brooklyn kaha e ne e le meholo haholo.

Jehova o Tšehetsa Mosebetsi

Haesale sepheo sa ho hatisa lingoliloeng e le ho ntšetsa pele litaba tse molemo tsa ’Muso oa Molimo. Ho tloha qalong feela, ho ’nile ha totobala hore Jehova o hlohonolofatsa mosebetsi oa khatiso. Ho tloha ka 1879 ho fihlela ka 1922, libuka li ne li hatisoa ke lik’hamphani tse hoebang ka ho hatisa. Ka 1922, ho ile ha hiroa mohaho o 18 Concord Street, Brooklyn ’me ha rekoa thepa ea ho hatisa libuka. Nakong eo, ba bang ba ne ba belaela hore na ebe barab’abo rōna ba ne ba tla khona ho etsa mosebetsi oo.

E mong oa ba neng ba belaela e ne e le mopresidente oa k’hamphani e neng e hatisitse boholo ba libuka tsa rōna. Ha a ne a etetse Concord Street, o ile a re: “Joale le na le thepa ea ho hatisa ea boemo bo phahameng ka ho fetisisa, empa ha ho motho ea tsebang hore na e sebetsa joang. Pele ho feta likhoeli tse tšeletseng, e tla be e robehile; ’me le tla bona hore batho bao esaleng ba le hatisetsa [lingoliloeng], bao mosebetsi oa ho hatisa e leng khoebo ea bona, ke bona ba loketseng ho le hatisetsa tsona.”

Robert J. Martin, eo e neng e le molebeli oa setsi sa khatiso nakong eo o ile a re: “Seo [monna eo] a neng a se bua se ne se utloahala, empa o ile a lebala hore Morena o teng; ’me haesale a e-na le rōna. . . . Nakoana ka mor’a moo, re ne re hatisa libuka.” Lilemong tse 80 tse ileng tse latela, Lipaki Tsa Jehova li ile tsa hatisa lingoliloeng tse libilione ka mechine ea tsona ea khatiso.

Joale, ka la 5 October, 2002, sebokeng sa selemo le selemo sa Watch Tower Bible and Tract Society of Pennsylvania, ho ile ha tsebisoa hore Sehlopha se Busang se lumetse hore tšebetso ea ho hatisa lingoliloeng ea lekala la United States e isoe Wallkill. Ho ne ho odariloe mechine e mecha ea khatiso, e neng e tla fihla ka February 2004. Pele ho feta likhoeli tse 15, barab’abo rōna ba ne ba tla lokela ho rala le ho atolosa setsi sa khatiso e le hore se be se loketse ho amohela mechine eo e mecha ea khatiso. Joale, ka likhoeli tse robong tse latelang, ho ne ho tla lokela hore ho be ho kentsoe mochine o mocha o kopanyang libuka ebile setsi sa ho romella lingoliloeng se se se sebetsa. E ka ’na eaba ba bang ba ile ba belaela ha ba utloa nako e behiloeng ea hore ho phethoe mosebetsi oo—o ne o bonahala e le mosebetsi o ke keng oa khoneha. Leha ho le joalo, barab’abo rōna ba ne ba tseba hore o ne o ka etsoa ka tlhohonolofatso ea Jehova.

“Moea o Motle oa Tšebelisano”

Ka ho tseba hore batho ba Jehova ba ne ba tla itlhahisa ka ho rata, barab’abo rōna ba ile ba qalella ka mosebetsi. (Pesaleme ea 110:3) Ka lebaka la boholo ba oona, ho ne ho hlokahala basebetsi ba bangata ho feta ba neng ba le teng mafapheng a kaho a Bethele. Bara le barali babo rōna ba fetang 1 000 ba United States le Canada, ba nang le tsebo e khethehileng ea kaho, ba ile ba ithaopela ho sebetsa ho tloha ka beke e le ’ngoe ho isa likhoeling tse tharo e le baithaopi ba nakoana. Ba bang bao e leng bahlanka ba machaba ba sebeletsang linaheng tse ling le baithaopi, ba ile ba memeloa ho tla ba le seabo mosebetsing oo. Likomiti Tsa Kaho Tsa Libaka le tsona li ile tsa tlatsetsa haholo.

Ho ba bangata, ho ithaopela ho sebetsa Wallkill ho ile ha hloka hore ba kene litšenyehelong tse khōlō tsa ho tsamaea le ho nka nako e telele ba se mesebetsing ea bona ea boipheliso. Leha ho le joalo, ba ile ba thabela ho etsa boitelo bo joalo. Ho lokisetsa baithaopi bana ba bangata bolulo le ho ba fepa ho ile ha bulela lelapa la Bethele menyetla ea ho ikakhela ka setotsoana mosebetsing oo. Litho tsa lelapa la Bethele tse fetang 535 tsa Brooklyn, Patterson le Wallkill li ile tsa ithaopela ho sebetsa mohahong ka Meqebelo, ho phaella likabelong tsa tsona tse tloaelehileng tsa har’a beke. Tsela e hlollang eo ka eona batho ba Molimo ba ileng ba tšehetsa mosebetsi ona o etsang pale e ile ea khoneha feela hobane Jehova a ne a tšehelitse mosebetsi ona.

Ba bang ba ile ba fana ka chelete. Ka mohlala, barab’abo rōna ba ile ba fumana lengolo le tsoang ho Abby ea lilemo li robong. O ile a ngola a re: “Ke le leboha haholo ka mosebetsi oohle oo le o etsang—oa ho etsa libuka tsohle tse ntle. Nka ’na ka le etela haufinyane. Ntate o re re tla le etela lemong se tlang! Ke tla qhoaela beche e le hore le mpone. Lidolara tse 20 ke tseo bakeng sa mochine o mocha o hatisang! Ke chelete ea ka ea ho ithekela lintho tseo ke li ratang, empa ke rata ho le fa eona barab’eso.”

Morali e mong oabo rōna o ile a ngola a re: “Ke kōpa le amohele mpho ea ka ea likatiba tseo ke li entseng ka matsohonyana ana a ka a sa reng letho. Nka rata hore likatiba tsena li fuoe batho ba sebetsang mohahong oa Wallkill. Almanaka e bontša hore mariheng ana ho tl’o bata haholo. Hore na bahatisi ba eona ba nepile kapa che, ha ke tsebe. Empa hoo ke ho tsebang ke hore boholo ba mosebetsi o etsoang Wallkill o tla be o etsetsoa ka ntle, ’me ke batla ho etsa bonnete ba hore lihlooho tsa bara le barali beso lia futhumala. Ha ke na tsebo e khethehileng eo barab’eso ba e batlang, empa ke tseba ho loha, kahoo ke entse qeto ea ho sebelisa tsebo ena hore ke tlatsetse ka seo nka se khonang.” O ne a rometse likatiba tse lohiloeng tse 106!

Setsi seo sa khatiso se ile sa qetoa ka nako. John Larson, eo e leng molebeli oa setsi sa khatiso o ile a re: “Ho ne ho e-na le moea o motle haholo oa tšebelisano. Ebe ke mang ea neng a ka belaela hore Jehova o hlohonolofatsa mosebetsi oo? Mosebetsi oo o ile oa tsoela pele ka potlako. Ke sa hopola ha ke ne ke eme seretseng ka May 2003 ke shebeletse barab’abo rōna ha ba rala motheo oa mohaho ona. Hamorao pele ho feta selemo, ke ne ke eme hona sebakeng seo ke shebeletse ha mochine o hatisang o roropa.”

Lenaneo la Nehelo

Lenaneo la ho nehela setsi seo se secha sa khatiso, hammoho le mehaho e meraro ea bolulo, le ile la tšoareloa Wallkill, ka Mantaha oa la 16 May, 2005. Mehaho ea Bethele e Patterson le Brooklyn, hammoho le ea Bethele ea Canada, e ne e hoketsoe ka video. Ka kakaretso, batho ba 6 049 ba ile ba thabela lenaneo. Theodore Jaracz, eo e leng setho sa Sehlopha se Busang sa Lipaki Tsa Jehova, e ne e le molula-setulo ’me o ile a akaretsa hakhutšoanyane histori ea mosebetsi oa ho hatisa. Ka lipuisano le ka ho bontša video, litho tsa Komiti ea Lekala, e leng John Larson le John Kikot li ile tsa akaretsa histori ea mosebetsi oo oa kaho le ea mosebetsi oa khatiso United States. John Barr oa Sehlopha se Busang o ile a fana ka puo ea ho qetela, ’me a nehela setsi seo se secha sa khatiso le mehaho e meraro ea bolulo ho Jehova Molimo.

Bekeng e latelang, basebeletsi ba Bethele ba tsoang Patterson le Brooklyn ba ile ba fuoa monyetla oa ho tla bona mehaho eo e mecha. Nakong eo, ka kakaretso batho ba 5 920 ba ile ba etela moo.

Re Talima Setsi See sa Khatiso Joang?

Puong ea nehelo, Mor’abo rōna Barr o ile a hopotsa bamameli hore le hoja setsi seo sa khatiso e le se tsotehang, hase mechine e ka har’a sona e etsang hore ebe sa bohlokoa. Empa batho ke bona ba etsang hore e be sa bohlokoa. Lingoliloeng tseo re li hatisang li ama bophelo ba batho ka ho teba.

Mochine ka mong ho ena e mecha o ka hatisa lipampitšana tse milione ka nako e batlang e feta hora! Empa pampitšana e le ’ngoe feela e ka ama bophelo ba motho ka tsela e tebileng haholo. Ka mohlala, ka 1921 sehlopha sa banna ba lokisang seporo Afrika Boroa se ne se ntse se sebetsa seporong se selelele sa terene. E mong oa bona, e leng Christiaan, o ile a hlokomela sekhechana sa pampiri se tšoasehile tlas’a seporo. E ne e le e ’ngoe ea lipampitšana tsa rōna. Christiaan o ile a e bala ka thahasello e khōlō. O ile a mathela ho mokhoenyana’e eaba o re ho eena a thabile: “Kajeno ke fumane ’nete!” Nakoana ka mor’a moo, ba ile ba ngolla lekaleng ba kōpa boitsebiso bo eketsehileng. Lekala la Afrika Boroa le ile la ba romella lingoliloeng tsa Bibele tse eketsehileng. Banna bao ba babeli ba ile ba ithuta, ba kolobetsoa ’me ba bolella ba bang ’nete ea Bibele. Ka lebaka leo, batho ba bangata ba ile ba amohela ’nete. Ha e le hantle, mathoasong a bo-1990, litloholo tsa bona tse fetang lekholo e ne e le Lipaki Tsa Jehova—sena sohle e le ka lebaka la pampitšana e le ’ngoe eo motho a le mong a ileng a e fumana seporong!

Mor’abo rōna Barr o ile a bolela hore lingoliloeng tseo re li hatisang li kenya batho ’neteng, li ba boloka ba le ’neteng, li ba susumetsa hore ba chesehe haholo, ebile li momahanya mokhatlo oa rōna oa bara ba motho. Empa habohlokoa haholo, lingoliloeng tseo kaofela ha rōna re bang le seabo hore li ajoe, li tlotlisa Jehova, Molimo oa rōna!

Jehova o Talima Setsi See sa Khatiso Joang?

Mor’abo rōna Barr o ile a boela a kōpa bamameli hore ba ke ba nahane hore na ebe Jehova o talima setsi seo sa khatiso joang. Ho hang ha aa itšetleha ka sona. O ne a ka etsa hore majoe a bolele litaba tse molemo! (Luka 19:40) Ho feta moo, ho eena ho rarahana ha mechine eo, boholo ba eona, lebelo la eona kapa seo e khonang ho se etsa, hase letho. Ha e le hantle, ke eena ea bōpileng bokahohle kaofela! (Pesaleme ea 147:10, 11) Jehova o tseba litsela tse tsoetseng pele haholo tsa ho hlahisa lingoliloeng, litsela tseo ho seng batho ba kileng ba li qapa kapa hona hore ba nahane ka tsona. Kahoo, ke’ng eo Jehova a e bonang eo ruri a e nkang e le ea bohlokoa? Ha ho pelaelo hore setsing sena sa khatiso o bona litšobotsi tsa bohlokoahali tsa batho ba hae—e leng lerato la bona, tumelo ea bona le ho mamela ha bona.

Mor’abo rōna Barr o ile a etsa papiso ho bontša kamoo lerato le amehang kateng. Ngoananyana o bakela batsoali ba hae kuku. Mohlomong batsoali ba hae ba tla khahloa ke seo. Ho sa tsotellehe hore na kuku eo e tsoa e le joang, se amang lipelo tsa batsoali ke lerato la ngoan’a bona, le bontšoang ka ketso eo ea ho fana ka seatla se bulehileng. Ka ho tšoanang, ha Jehova a talima setsi sena se secha sa khatiso, ha a shebe mohaho le mechine feela. Haholo-holo, o se talima e le bopaki ba hore re rata lebitso la hae.—Baheberu 6:10.

Ho feta moo, feela joalokaha Jehova a ne a talima areka e le bopaki ba tumelo ea Noe, o talima setsi sena e le bopaki bo bonahalang ba tumelo ea rōna. Tumelo ea eng? Noe o ne a e-na le tumelo ea hore seo Jehova a neng a se boletse esale pele se ne se tla phethahala. Re na le tumelo ea hore re phela matsatsing a ho qetela, hore litaba tse molemo ke molaetsa oa bohlokoa ka ho fetisisa o boleloang lefatšeng le hore ke habohlokoa haholo hore batho ba o utloe. Rea tseba hore molaetsa oa Bibele o ka pholosa bophelo.—Baroma 10:13, 14.

Ha ho pelaelo hore setsing sena sa khatiso, Jehova o boetse o bona bopaki ba hore rea mamela. Joalokaha re tseba, thato ea hae ke hore litaba tse molemo li boleloe lefatšeng ka bophara pele bofelo bo fihla. (Matheu 24:14) Setsi sena sa khatiso, hammoho le tse likarolong tse ling tsa lefatše, se tla phetha karolo ea bohlokoa hore thōmo eo e phethahatsoe.

Ruri lerato, tumelo le ho mamela tse bonahalitsoeng ka ho fana ka lichelete, ka ho haha le ka ho sebelisoa ha mehaho ena li boetse li bonahatsoa ka cheseho ea batho ba Jehova libakeng tsohle ha ba ntse ba tsoela pele ho phatlalatsa ’nete ho batho bohle ba ikemiselitseng ho mamela.

[Lebokose/Litšoantšo tse leqepheng la 11]

MOSEBETSI OA KHATISO OA ATOLOSOA UNITED STATES

Ka 1920: Limakasine li ile tsa hatisoa ka mochine oa pele oa rotary 35 Myrtle Avenue, Brooklyn.

Ka 1922: Setsi sa khatiso se ile sa isoa mohahong oa mekato e tšeletseng o 18 Concord Street. Joale libuka tsa qala ho hatisoa.

Ka 1927: Setsi sa khatiso se ile sa isoa mohahong o 117 Adams Street.

Ka 1949: Ho ile ha eketsoa mekato e meng e robong setsing sa khatiso, ’me sa feta sa pele habeli ka boholo.

Ka 1956: Setsi sa khatiso se Adams Street se ile sa eketsoa ka makhetlo a mabeli hape, ha ho etsoa mohaho o mocha 77 Sands Street.

Ka 1967: Ho ile ha etsoa mohaho oa mekato e leshome, ka tsela eo ha etsoa hore setsi sa khatiso se hokahantsoeng se be seholo ka makhetlo a leshome ho feta sa pele.

Ka 1973: Ho ile ha hahuoa setsi sa khatiso sa tlatsetso Wallkill, haholo-holo bakeng sa ho hatisa limakasine.

Ka 2004: Tšebetso eohle ea ho hatisa, ea ho kopanya libuka le ea thomello United States e ile ea isoa sebakeng se le seng, Wallkill.