Moea o Halalelang ke Eng?

JESU o kile a botsa barutuoa ba hae a re: “Ke ntate ofe har’a lōna eo, haeba mora oa hae a kōpa tlhapi, mohlomong a ka mo nehang noha ho e-na le tlhapi? Kapa haeba a boetse a kōpa lehe, a tla mo neha phepheng?” (Luka 11:11, 12) Bana ba Galilea ba ne ba rata ho ja mahe le tlhapi; ba ne ba tseba hore na ba batla ho ja eng.

Jesu o ile a re re lokela ho phehella ho kōpa moea o halalelang joaloka ngoana ea lapileng ha a kōpa lijo. (Luka 11:9, 13) Haeba re utloisisa hantle hore na moea o halalelang ke eng, seo se tla etsa hore re utloisise hore na ke oa bohlokoa hakae bophelong ba rōna. Ka hona, a re qaleng ka ho hlahloba hore na Bibele e re ruta’ng ka moea o halalelang.

“Matla a Ea Phahameng ka ho Fetisisa”

Mangolo a hlalosa ka ho hlaka hore moea o halalelang ke matla ao Molimo a a sebelisang ho phetha thato ea hae. Ha lengeloi Gabriele le ne le bolella Maria hore o tla ba le mora le hoja e ne e le moroetsana, lengeloi leo le ile la re ho eena: “Moea o halalelang o tla theohela holim’a hao, ’me matla a Ea Phahameng ka ho Fetisisa a tla u koahela. Ka lebaka leo le se tsoetsoeng se tla bitsoa se halalelang, Mor’a Molimo.” (Luka 1:35) Ho latela mantsoe a Gabriele, ho na le kamano pakeng tsa moea o halalelang le “matla a Ea Phahameng ka ho Fetisisa.”

Litemana tse ling tsa Bibele le tsona li bua ka kamano e joalo. Moprofeta Mikea o itse: “Ke tletse matla, ka moea oa Jehova.” (Mikea 3:8) Jesu o ile a tšepisa barutuoa ba hae: “Le tla amohela matla ha moea o halalelang o fihla holim’a lōna.” (Liketso 1:8) Moapostola Pauluse le eena o ile a bua ka “matla a moea o halalelang.”—Baroma 15:13, 19.

Kahoo, ho latela se boletsoeng ka holimo, re ka fihlela qeto efe? Ho na le tšebelisano e haufi pakeng tsa moea o halalelang le matla a Molimo. Jehova o sebelisa Moea o Halalelang e le matla a hae. Ka mantsoe a bonolo feela, moea o halalelang ke matla ao Molimo a a sebelisang. Ka sebele ke matla a hlollang hakaakang! Re ke ke ra utloisisa hore na ebe ke matla a maholo hakae a neng a hlokahala hore ho etsoe leholimo le lefatše. A sebelisa moprofeta Esaia, Jehova o ile a re khothalletsa hore re nahanisise ka sena ha a re: “Phahamisetsang mahlo holimo ’me le bone. Ke mang ea bōpileng lintho tsee? Ke Ea hlahisang lekhotla la tsona ka palo, e ’ngoe le e ’ngoe o e bitsa le ka lebitso. Ka lebaka la bonatla ba hae bo boholo, kaha o boetse o na le matla a maholo, ha ho le e ’ngoe ea tsona e haellang.”—Esaia 40:26.

Ka hona, Bibele e bontša hore tsela e laolehileng eo lefatše le leholimo li sebetsang ka eona e teng ka lebaka la “matla a feletseng” a Molimo ea Matla ’Ohle. Ho hlakile hore matla a sebetsang a Molimo a maholo haholo ’me hore ebe re teng ke ka lebaka la ’ona.—Sheba lebokose le reng “Mesebetsi ea Moea o Halalelang.”

Jehova a ka sebelisa moea oa hae o halalelang linthong tse khōlō haholo, joalokaha a ne a bōpa leholimo le lefatše. Empa a ka boela a o sebelisa molemong oa batho. Bibele e na le mehlala e mengata e bontšang hore na bahlanka ba Molimo ba ile ba fumana matla joang ka thuso ea matla a sebetsang a Molimo.

“Moea oa Jehova o Holim’a Ka”

Seo Jesu a se entseng ha a le lefatšeng se re bontša hanyenyane feela ka tsela e hlollang hore na moea o halalelang oa Molimo o ka matlafatsa batho ba mo sebeletsang joang. Jesu o ile a bolella batho ba Nazaretha a re: “Moea oa Jehova o holim’a ka.” (Luka 4:18) Jesu o ile a khona ho etsa eng ka “matla a moea”? (Luka 4:14) O ile a folisa mafu a mefuta eohle, a kokobetsa maqhubu a leoatle le befileng, a fepa batho ba likete ka mahobe a ’maloa le litlhapi tse seng kae, a ba a tsosa bafu. Moapostola Petrose o ile a hlalosa Jesu e le “monna eo Molimo a mo bonahalitseng phatlalatsa . . . ka mesebetsi e matla le limakatso le lipontšo tseo Molimo a li entseng ka eena.”—Liketso 2:22.

Kajeno moea o halalelang ha o etse mehlolo e joalo. Leha ho le joalo, o ntse o ka re etsetsa lintho tse babatsehang. Ka boithatelo, Jehova o fa barapeli ba hae moea oa hae o halalelang, joalokaha Jesu a ile a ba tiisetsa hore ho tla ba joalo. (Luka 11:13) Ke kahoo moapostola Pauluse a neng a ka re: “Bakeng sa lintho tsohle ke na le matla ka lebaka la ea mphang bonatla.” (Bafilipi 4:13) Na moea o halalelang o ka u ama joalo bophelong? Sehlooho se latelang se tla araba potso ena.

[Lebokose/Setšoantšo se leqepheng la 5]

Ke Hobane’ng ha Moea o Halalelang e se Motho?

Bibele e bapisa moea o halalelang le metsi. Ha Molimo a ne a tšepisa batho ba hae hore o tla ba hlohonolofatsa nakong e tlang, o ile a re: “Ke tla tšela ea nyoriloeng ka metsi, le sebaka se omileng ka melapo e phallang. Ke tla tšollela moea oa ka holim’a peō ea hao, le tlhohonolofatso ea ka holim’a litloholo tsa hao.”—Esaia 44:3.

Ha Molimo a tšollela moea oa hae ho bahlanka ba hae, ba ile ba “tlala moea o halalelang.” Jesu, Johanne Mokolobetsi, Petrose, Pauluse, Barnabase le barutuoa ba neng ba bokane hammoho ka letsatsi la Pentekonta ea 33 C.E., kaofela ho hlalosoa hore ba ile ba tlala moea o halalelang.—Luka 1:15; 4:1; Liketso 4:8; 9:17; 11:22, 24; 13:9.

Ak’u nahane ka sena: Na motho a ka ‘tšolleloa’ bathong ba bangata? Na u ka bolela hore motho a ka ‘tlala’ ka har’a batho kaofela sehlopheng? Eo ke ntho e sa utloahaleng. Bibele e bua ka batho ba ileng ba tlala bohlale, kutloisiso hammoho le tsebo e nepahetseng empa ha ho moo e buang ka motho ea ileng a tlala ka har’a e mong.—Exoda 28:3; 1 Marena 7:14; Luka 2:40; Bakolose 1:9.

Lentsoe la Segerike le fetoletsoeng e le “moea” ke pneuʹma, eo hape e ka bolelang matla a sa bonahaleng. Ho latela Vine’s Expository Dictionary of New Testament Words, lentsoe pneuʹma “ha e le hantle le bolela moea o fokang, . . . hape le bolela phefumoloho; empa ka ho khetheha le bolela moea [spirit], oo joaloka moea o fokang, e leng o sa bonahaleng, o sa tšoareheng, o bileng o leng matla.”

Ka hona, ho hlakile hore moea o halalelang hase motho.a

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng]

Photodisc/SuperStock