Tsamaea ka Moea ’me U Phelele Boinehelo ba Hao
“Le ’ne le tsamaee ka moea ’me ho hang le ke ke la phetha takatso ea nama.”—BAGAL. 5:16.
1. Ke likolobetso life tse etsahetseng ka letsatsi la Pentekonta?
HA BALATELI ba Jesu ba ne ba bua ka maleme a fapa-fapaneng ka letsatsi la Pentekonta ea 33 C.E., e ne e le ka mor’a hore ba kolobetsoe ka moea o halalelang. Ba ile ba bontša hore ba na le neo ea mohlolo ea moea. (1 Bakor. 12:4-10) Litholoana tsa neo ee le tsa puo eo moapostola Petrose a ileng a fana ka eona e ile ea e-ba life? Batho ba bangata ba ile “ba hlabeha ho fihla lipelong.” Ka khothatso ea Petrose, ba ile ba baka ’me ba kolobetsoa. Tlaleho ea histori e re: “Ba ileng ba amohela lentsoe la hae ka pelo eohle ba kolobetsoa, ’me letsatsing leo ha eketsoa meea e ka bang likete tse tharo.” (Lik. 2:22, 36-41) Joalokaha Jesu a ne a laetse, e tlameha ebe ba ile ba kolobetsoa metsing ka lebitso la Ntate, la Mora le la moea o halalelang.—Mat. 28:19.
2, 3. (a) Hlalosa phapang pakeng tsa ho kolobetsoa ka moea o halalelang le ho kolobetsoa ka lebitso la moea o halalelang. (b) Ke hobane’ng ha ho lebeletsoe hore bohle bao e bang Bakreste ba ’nete kajeno ba kolobetsoe metsing?
2 Leha ho le joalo, na ho na le phapang pakeng tsa ho kolobetsoa ka moea o halalelang le ho kolobetsoa ka lebitso la moea o halalelang? E, e teng. Ba kolobetsoang ka moea o halalelang ba tsoaloa hape e le bara ba Molimo ba tsoetsoeng ka moea. (Joh. 3:3) Ba tlotsoa hore e tle e be marena le baprista ba tlaasana ’Musong oa Molimo o leholimong, ’me ke karolo ea ’mele oa Kreste oa moea. (1 Bakor. 12:13; Bagal. 3:27; Tšen. 20:6) Kahoo kolobetso ena—ea ho kolobetsoa ka moea o halalelang—ke eo Jehova a ileng a e etsa ka letsatsi la Pentekonta le ka mor’a lona ha a ne a khetha batho bao e neng e tla ba majalefa le Kreste. (Bar. 8:15-17) Empa ho thoe’ng ka ho kolobetsoa metsing ka lebitso la moea o halalelang, e leng seo ho tloaelehileng hore se etsoe likopanong tse khōlō le tse nyenyane tsa batho ba Jehova mehleng ea rōna?
3 Ho kolobetsoa metsing ke bohato boo Bakreste ba ’nete ba bo nkang ho bontša hore ba inehetse ka ho feletseng ho Jehova Molimo. Ho joalo ka ba amohetseng pitso ea ho ea phela leholimong. Empa ho kolobetsoa metsing ke bohato bo hlokahalang le ho banna le basali ba limilione ba mehleng ena bao hona joale ba nang le tšepo ea ho phela ka ho sa feleng lefatšeng. Ho sa tsotellehe hore na motho o na le tšepo ea ho phela hokae, ho kolobetsoa metsing ka lebitso la Ntate le la Mora le la moea o halalelang ke bohato boo ho hlokahalang hore a bo nke e le hore a amoheloe ke Molimo. Ho lebeletsoe hore Bakreste bohle ba kolobetsoang ka tsela ena ‘ba ’ne ba tsamaee ka moea.’ (Bala Bagalata 5:16.) Na u tsamaea ka moea ’me kahoo u phelela boinehelo ba hao?
‘Ho Tsamaea ka Moea’ ho Bolela’ng?
4. Ha e le hantle, ‘ho tsamaea ka moea’ ho bolela’ng?
4 ‘Ho tsamaea ka moea’ ho akarelletsa ho amohela seo moea o halalelang o se etsang ho uena, e leng ho lumella moea o halalelang hore o u susumetse. Ka mantsoe a mang, ho bolela ho busoa ke moea o halalelang liketsong tsa hao tsa letsatsi le letsatsi. Bagalata khaolo ea 5 e totobatsa phapang pakeng tsa ho susumetsoa ke moea o halalelang le ho susumetsoa ke nama.—Bala Bagalata 5:17, 18.
5. Ho susumetsoa ke moea o halalelang ho akarelletsa ho qoba mesebetsi efe?
5 Haeba u susumetsoa ke moea o halalelang, u batla ho qoba mesebetsi ea nama. Mesebetsi eo e akarelletsa lintho tse kang “bohlola, ho se hloeke, boitšoaro bo hlephileng, borapeli ba litšoantšo, tšebelisano le meea, bora, ho qabana, poulelo, ho tlakoloha ka bohale, ho rata likhang, likarohano, maquloana, mohono, ho inehella botahoa, mekete e lerata.” (Bagal. 5:19-21) Ka mantsoe a mang, u “bolaea litloaelo tsa ’mele ka moea.” (Bar. 8:5, 13) O tla u thusa hore u tsepamise kelello linthong tsa moea le hore u sebelisane le tataiso ea oona, ho e-na le ho itlohella hore u laoloe ke litakatso tsa nama.
6. Etsa papiso ea hore na ke sefe se hlokahalang e le hore u bonahatse tholoana ea moea.
6 Ha moea o halalelang o ntse o sebetsa ho uena, u ba le makhabane a bontšang hore u tšaba Molimo, e leng ‘tholoana ea moea.’ (Bagal. 5:22, 23) Leha ho le joalo, ua hlokomela hore sena se hloka hore u etse boiteko. Ho etsa papiso: Molemi o lema tšimo. Ha ho pelaelo hore ho hlokahala khanya ea letsatsi le metsi; ha li le sieo, a ke ke a lebella hore o tla kotula letho. Re ka ’na ra tšoantša moea o halalelang le khanya ea letsatsi. Moea o halalelang oa hlokahala e le hore re bonahatse tholoana ea moea. Leha ho le joalo, na ho na le se ka hlahisoang ntle le hore molemi a sebetse ka thata? (Liprov. 10:4) Ka sebele, tsela eo u lokisang mobu oa pelo ea hao ka eona e etsa phapang tabeng ea hore na moea o halalelang o tla beha hakae le hona o beha tholoana ea boleng hakae ka ho uena. Kahoo ipotse, ‘Na ke lumella moea o halalelang hore o behe tholoana ea oona ka hore ke sebelisane le oona?’
7. Ke hobane’ng ha ho ithuta le ho thuisa e le habohlokoa hakaale haeba u batla ho ba le tholoana ea moea o halalelang?
7 E le hore balemi ba fumane chai, ho boetse ho hlokahala hore ba nosetse lijalo tsa bona. E le hore u be le tholoana ea moea, u hloka metsi a ’nete a ka Bibeleng, a fumanoang ka phutheho ea Bokreste kajeno. (Esa. 55:1) Mohlomong u ’nile ua bontša batho ba bangata hore Mangolo a Halalelang a hlahisitsoe ka moea o halalelang. (2 Tim. 3:16) Hape, sehlopha sa lekhoba le tšepahalang le le masene se fana ka kutloisiso e hlokahalang haholo ea metsi a hloekileng a ’nete ea Bibele. (Mat. 24:45-47) Se boleloang ke sena se hlakile. E le hore re susumetsoe ke moea o halalelang, re lokela ho bala Lentsoe la Molimo re be re thuise ka lona. Haeba u etsa joalo, u etsisa mehlala e metle ea baprofeta ba ileng “ba botsisisa ka ho khothala ’me ba batlisisa” boitsebiso bo neng bo le teng. Hoa hlolla hore ebe le mangeloi a ’nile a bontša thahasello e khōlō linneteng tsa moea tse mabapi le Peō e tšepisitsoeng hammoho le phutheho ea Bokreste ea batlotsuoa.—Bala 1 Petrose 1:10-12.
Moea o Halalelang o U Susumetsa Joang?
8. Ke hobane’ng ha e le habohlokoa hore u kōpe Jehova moea oa hae?
8 Ha ho hlokahale feela hore u ithute Mangolo le ho thuisa. U lokela ho lula u kōpa thuso ea Jehova le tataiso ea hae. A ka ‘etsa ka ho fetisisang ho feta lintho tsohle tseo re li kōpang kapa re li nahanang.’ (Baef. 3:20; Luka 11:13) Leha ho le joalo, u ka araba joang haeba motho e mong a ne a ka u botsa a re, “Ke hobane’ng ha ke lokela hore ke ’ne ke kōpe haeba Molimo a se a ntse a tseba ‘lintho tseo ke li hlokang le pele ke mo kōpa’?” (Mat. 6:8) Ha e le hantle, ha u rapella moea o halalelang, u bontša hore u itšetlehile ka Jehova. Ka mohlala, haeba motho a ne a ka tla ho uena a kōpa thuso, u ne u tla etsa sohle seo u ka se khonang ho mo thusa, lebaka e le hobane o u kōpile hore u mo thuse, a bontša hore oa u tšepa. (Bapisa le Liproverbia 3:27.) Ka tsela e tšoanang, Jehova oa thaba ha u mo kōpa moea oa hae, ’me o tla u fa oona.—Liprov. 15:8.
9. Ho ba teng libokeng tsa Bokreste ho ka u thusa joang hore u susumetsoe ke moea oa Molimo?
9 Ha ho pelaelo hore tsela e ’ngoe ea ho susumetsoa ke moea oa Molimo, e akarelletsa liboka tsa rōna le likopano tsa rōna tse khōlō le tse nyenyane. Ho etsa boiteko ba ho ba teng le ho mamela lenaneo ka hloko ke habohlokoa haholo. Ho etsa joalo ho u thusa hore u utloisise “lintho tse tebileng tsa Molimo.” (1 Bakor. 2:10) Ho boetse ho na le melemo e tlisoang ke ho fana ka litlhaloso kamehla. Nahana ka liboka tseo u bileng ho tsona libekeng tse ’nè tse fetileng. U ile ua phahamisa letsoho hangata hakae, u batla ho araba, e le hore u bolele tumelo ea hao? Na u bona ho e-na le moo ho hlokahalang hore u ntlafatse teng tabeng ee? Haeba ho joalo, etsa qeto ea seo u tla se etsa libekeng tse tlang. Jehova o tla bona hore u ikemiselitse ho araba ’me o tla u fa moea oa hae o halalelang, o tlang ho u thusa hore u rue molemo le ho feta ha u le libokeng.
10. Ho tsamaea ka moea ho akarelletsa ho fa batho ba bang memo efe?
10 Ho tsamaea ka moea ho akarelletsa ho nka khato ka memo eo re e balang ho Tšenolo 22:17, e reng: “Moea le monyaluoa ba ntse ba re: ‘Tloo!’ Mang kapa mang ea utloang a ke a re: ‘Tloo!’ Mang kapa mang ea nyoriloeng a ke a tle; mang kapa mang ea lakatsang a ke a nke metsi a bophelo ntle ho tefo.” Moea o sebetsa ka sehlopha sa monyaluoa se tlotsitsoeng hore o fane ka memo ena e mabapi le metsi a bophelo. Haeba u amohetse memo e reng, “tloo!” na le uena u ikemiselitse hore u re, “Tloo!”? Ke tlotla e kaakang ho khona ho kenya letsoho mosebetsing oo o pholosang bophelo!
11, 12. Moea o halalelang o phetha karolo efe mosebetsing oa boboleli?
11 Hona joale, mosebetsi ona oa bohlokoa o finyelloa ka tataiso ea moea o halalelang. Re bala kamoo moea o halalelang o ileng oa ameha kateng lekholong la pele la lilemo ha ho ne ho buloa masimo a macha a boromuoa. Moapostola Pauluse le bao a neng a tsamaea le bona ba ile ba ‘haneloa ke moea o halalelang ho bolela lentsoe seterekeng sa Asia’; ebile ha baa ka ba lumelloa ho kena Bithynia. Ha re tsebe hantle hore na moea o ile oa ba thibela ho ea libakeng tseo joang, empa ho hlakile hore moea o ile oa tataisa Pauluse hore a ee tšimong e khōlō ea Europe. O ile a bona pono ea monna oa Macedonia ea neng a kōpa thuso.—Lik. 16:6-10.
12 Ka tsela e tšoanang, kajeno le teng moea oa Jehova o tsamaisa boboleli bo etsoang lefatšeng lohle. Ha ho na lipono tsa mohlolo tse sebelisetsoang ho fana ka tataiso; ho e-na le hoo, Jehova o tataisa batlotsuoa ka moea o halalelang. Ho feta moo, moea o susumetsa bara le barali babo rōna hore ba etse sohle seo ba ka se khonang mosebetsing oa ho bolela le oa ho ruta. Ha ho pelaelo hore u ’nile ua kenya letsoho mosebetsing ona oa bohlokoa. Na u ka eketsa thabo ea hao mosebetsing oo o thabisang?
13. U ka ikokobelletsa tataiso ea moea o halalelang joang? Bontša.
13 U ka ikokobelletsa tataiso ea moea o halalelang ka hore u sebelise boitsebiso bo fuoang batho ba Molimo. Nahana ka Mihoko e monyenyane oa Japane. Kaha e ne e le pula-maliboho e ncha, o ne a ikutloa a sa tšoanelehe ho etsa maeto a ho boela; a ikutloa eka ha a tsebe ho bua ka tsela e ka khahlang beng ba matlo. Hoo e ka bang ka eona nako eo, Tšebeletso ea Rōna ea ’Muso e ile ea fana ka litlhahiso tsa kamoo ho ka etsoang maeto a ho boela a makhutšoanyane kateng. Ka mor’a moo, ho ile ha hatisoa bukana e nang le sehlooho se reng, A Satisfying Life—How to Attain It. E ile ea thusa haholo tšimong ea Sejapane. Mihoko o ile a sebelisa litlhahiso tsa hore na bukana eo e ka sebelisoa joang, haholo-holo mabapi le ho etsa maeto a ho boela a makhutšoanyane. Kapele feela o ile a qalisa lithuto tsa Bibele le batho bao pele ho moo ba neng ba ka ’na ba hana ho ithuta. O re, “Ke ne ke e-na le lithuto tse ngata haholo—tse ka bang 12 ka nako e le ’ngoe—’me ke ile ka tlameha ho beha ba bang lethathamong la ba letetseng ho khanneloa thuto!” Ka sebele, ha u tsamaea ka moea ’me u sebelisa tataiso e fuoang bahlanka ba Jehova, u ka kotula haholo.
Itšetlehe ka Moea oa Molimo
14, 15. (a) Batho ba sa phethahalang ba ka phelela boinehelo ba bona joang? (b) U ka fumana metsoalle e molemo ka ho fetisisa joang?
14 Kaha u mosebeletsi ea hlomamisitsoeng, u na le tšebeletso eo u lokelang ho e phetha. (Bar. 10:14) U ka ’na ua ikutloa eka ha u tšoanelehe hantle hore u ka jara boikarabelo bona. Empa, joaloka tabeng ea batlotsuoa, ke Molimo ea etsang hore u tšoanelehe. (Bala 2 Bakorinthe 3:5.) U ka phelela boinehelo ba hao ka hore u etse sohle seo u ka se khonang le ka hore u itšetlehe ka moea oa Molimo.
15 Ke ’nete hore kaha re batho ba sa phethahalang, ha ho bonolo hore re phelele boinehelo ba rōna ho Molimo oa rōna ea phethahetseng, Jehova. Bothata bo bong ke hore ba bang bao u kileng ua tloaelana le bona, ba ka ’na ba makatsoa ke tsela e ncha eo u phelang ka eona ’me ba ka ’na ba u “nyefola.” (1 Pet. 4:4) Leha ho le joalo, u se ke ua hlokomoloha ’nete ea hore hona joale u se u e-na le metsoalle e mecha, ’me ea bohlokoa ka ho fetisisa ke Jehova le Jesu Kreste. (Bala Jakobo 2:21-23.) E boetse ke habohlokoa hore u tsebe bara le barali beno phuthehong ea heno, bao e leng karolo ea “mokhatlo oohle oa barab’abo rōna” lefatšeng lohle. (1 Pet. 2:17; Liprov. 17:17) Jehova o tla u thusa ka moea oa hae hore u be le metsoalle e tla tsoela pele ho u susumetsa hore u etse lintho tse ntle.
16. Joaloka Pauluse, ke hobane’ng ha u ka “khahlisoa ke mefokolo”?
16 Esita le haeba u e-na le metsoalle e u thusang ka phuthehong, u ka ’na ua fumana ho le thata hore u atlehe ho loana le mathata ao u thulanang le ’ona letsatsi le letsatsi. Ka linako tse ling lintho tseo u thulanang le tsona li ka ’na tsa etsa hore u utloe eka u lahlehile, joalokaha eka u phopholetsa lefifing le letšo. Nakong ena, ke hona ha ho hlile ho hlokahala hore u rapele Jehova, u kōpe moea oa hae o halalelang. Moapostola Pauluse o ile a ngola a re: “Ha ke fokola, joale ke ha ke le matla.” (Bala 2 Bakorinthe 4:7-10; 12:10.) Pauluse o ne a tseba hore moea oa Molimo o ka thusa batho mefokolong ea bona, ho sa tsotellehe hore na ke ea mofuta ofe. Kahoo, matla a sebetsang a Molimo a ka u matlafatsa neng le neng ha u ikutloa u fokola ’me u hloka thuso. Pauluse o ile a ngola hore o ne a “khahlisoa ke mefokolo.” E ne e le ha a fokola moo a neng a utloa hore moea o halalelang oa sebetsa ho eena. Le uena u ka ikutloa ka tsela e tšoanang!—Bar. 15:13.
17. Moea o halalelang o ka u thusa joang ha u ntse u habile moo u eang teng?
17 Re hloka moea oa Molimo e le hore re ka phela ka tsela e bontšang hore re inehetse ho eena. Nka hore u motsamaisi oa seketsoana se tsamaisoang ka seile. Sepheo sa hao ke ho sebeletsa Jehova ka ho sa feleng. Moea o halalelang o tšoana le moea oo u batlang ho o kha e le hore u fihle moo u eang teng u sireletsehile. Ha u batle ho isoa koana le koana ke moea oa lefatše la Satane. (1 Bakor. 2:12) Ka tsela ea tšoantšetso, u lokela ho hlokomela moea o nepahetseng ebe ua o kha. Moea oo ke o halalelang. Moea o halalelang o tla u lebisa nģeng e nepahetseng ka Lentsoe la Molimo le ka mokhatlo oa hae o tsamaisoang ke moea.
18. U ikemiselitse ho etsa’ng hona joale, hona e le ka lebaka lefe?
18 Haeba u ’nile ua ithuta le Lipaki Tsa Jehova, ua thabela setsoalle sa moea le tsona, empa u e-s’o nke bohato ba bohlokoa ba boinehelo le kolobetso, ipotse, ‘Ke hobane’ng ha ke tsilatsila?’ Haeba u hlokomela karolo e phethoang ke moea o halalelang mabapi le hore thato ea Jehova e phethahale kajeno, u bile u ananela mosebetsi oa oona, nka mehato eo u ithutileng hore e nepahetse. Jehova o tla u hlohonolofatsa haholo. Ka mosa o tla u fa moea oa hae o halalelang. Haeba u kolobelitsoe lilemong tse ’maloa kapa tse mashome tse fetileng, ha ho pelaelo hore u utloile tšusumetso ea moea o halalelang. U bone ebile u utloile kamoo Molimo a ka u matlafatsang kateng ka moea oa hae o halalelang. Lintho li ka tsoela pele ka tsela eo—ha e le hantle, li ka tsoela pele joalo ho fihlela nakong e tlang e sa feleng. Kahoo, ikemisetse ho tsoela pele u tsamaea ka moea o halalelang.
Na U sa Hopola?
• ‘Ho tsamaea ka moea’ ho bolela’ng?
• U ka thusoa ke eng hore ‘u ’ne u tsamaee ka moea’?
• U ka phelela boinehelo ba hao joang?
[Setšoantšo se leqepheng la 15]
Ho hlokahala hore u etse boiteko e le hore u lokise mobu oa pelo ea hao
[Litšoantšo tse leqepheng la 16, 17]
Na u susumetsoa ke moea oa Molimo?