Na U ka Ikitlaelletsa ho Lemosa ba Bang?

Filimi e khahlang e se nang mantsoe e bitsoang A Trip Down Market Street e hapa maikutlo a babohi ka tsela eo e bontšang lintho tse neng li etsahala bophelong ba letsatsi le letsatsi San Francisco, U.S.A., mathoasong a lekholo la bo20 la lilemo. Bahlahisi ba lifilimi ba ne ba faselelitse k’hamera e nyenyane ka pele ho koloeana e tsamaisoang ka lithapo, ’me ba e shebisitse ’mileng o moholo o phetheselang. Filimi eo e bontša likariki tse huloang ke lipere, likoloi tsa moetso oa khale, bareki le bashanyana ba rekisang likoranta ba ntse ba etsa mesebetsi ea bona ea letsatsi le letsatsi.

Ntho e bohloko ka filimi eo ke hore e ka ’na eaba e hatisitsoe ka April 1906, pelenyana ho tšisinyeho ea lefatše le mollo tse ileng tsa etsahala ka li 18 tsa April ’me tsa bolaea batho ba likete tsa ba tsa batla li senya toropo eo. Mohlomong ba bang ba batho ba hlahang filiming eo ba ne ba saletsoe ke matsatsi a seng makae feela ba phela. Scott Miles, setloholo sa e mong oa bahlahisi ba filimi eo o re: “Ke bona batho ba sa tsebeng se tl’o ba hlahela. ’Me ha ho seo motho a ka se etsang haese ho ba utloela bohloko feela.”

Ha re bapisa se etsahetseng ka nako eo le se ka ’nang sa etsahala mehleng ea rōna, seo se etsa hore re nahane ka ho teba. Le rōna ha ho letho leo re ka le etsang molemong oa baahelani ba rōna, haese ho ba utloela bohloko feela. Ba iketsetsa mabaka a bona a letsatsi le letsatsi ba sa lemohe tlokotsi e tla ba oela haufinyane—e leng timetso ea tsamaiso ena ea lintho le mokhoa oa bona oa bophelo. Leha ho le joalo, ho fapana le tšisinyeho ea lefatše e ke keng ea lemohuoa esale pele, ho na le monyetla o mokhutšoanyane o setseng oa hore re lemose baahelani ba rōna ka letsatsi la Jehova la kahlolo. Ho ka etsahala hore u na le nako eo u e beheletseng ka thōko beke e ’ngoe le e ’ngoe hore u kopanele mosebetsing oa ho bolela ka ntlo le ntlo, empa na u ka ikitlaelletsa ho lemosa ba bang?

JESU O NE A LULA A LE MALALA-A-LAOTSOE

Mohlala oa Jesu ke oa bohlokoa kaha kamehla o ne a lula a le malala-a-laotsoe. O ne a bolella motho e mong le e mong eo a neng a kopana le eena molaetsa oa ’Muso, ho akarelletsa ’mokelli oa lekhetho eo a kopaneng le eena tseleng le mosali eo a ileng a kopana le eena selibeng nakong ea phomolo ea motšehare. (Luka 19:1-5; Joh. 4:5-10, 21-24) Esita leha a ne a beheletse nako ka thōko hore a phomole, ka lerato Jesu o ne a tlohela ho phomola e le hore a ka ruta batho. Kutloelo-bohloko eo a neng a e-na le eona ho baahelani ba hae e ne e mo susumetsa hore a etse sohle seo a ka se khonang ho ba ruta. (Mar. 6:30-34) Kajeno, bahoeletsi ba etsisa Jesu joang tabeng ea ho lula ba le malala-a-laotsoe ho ruta molaetsa o potlakileng?

BA SEBELISA MONYETLA O MONG LE O MONG

Melika o lula foleteng e sirelelitsoeng ka thata. Bongata ba baahelani ba hae ke liithuti tse tsoang linaheng tse ling ’me li sebelisa liselefouno tse sa ngolisoang ebile mabitso a tsona ha a hlahe bukeng e bontšang linomoro tsa founo tsa batho ba lulang foleteng eo. O thabela ho sebelisa monyetla o mong le o mong oo a bang le oona ho buisana le batho ba hirileng moo ka Bibele ha a le phasejeng le ka lifting. O re, “Ke nka hore ena ke tšimo ea ka.” Melika o nka lingoliloeng ka lipuo tse ’maloa, ’me batho ba bangata ba amohela lipampitšana le limakasine. O boetse o ba bontša Websaete ea rōna ea jw.org. O se a qalile lithuto tsa Bibele tse ’maloa.

Sonia le eena o lula a le malala-a-laotsoe ho pakela motho e mong le e mong eo a ka khonang ho mo pakela. O sebetsa tleliniking, ’me o ikemiselitse ho pakela basebetsi-’moho le eena bohle ka botlalo. O ile a qala ka ho ithuta lintho tseo ba li hlokang ba bileng ba li thahasellang. Ka mor’a moo, o ile a sebelisa nako ea khefu ea lijo tsa motšehare ho qalisa moqoqo oa Bibele le bona ka bomong. Kahoo, Sonia o khonne ho qalisa lithuto tsa Bibele tse peli. O boetse o ikemiselitse ho sebelisa nako e ’ngoe ea khefu ho buisana le batho ba ntseng ba emetse ho bona ngaka.

SEBELISA MONYETLA O MONG LE O MONG O HLAHANG

Lehlatsipa le leng la tšisinyeho eo ea lefatše e etsahetseng ka 1906, le ile la e bitsa “koluoa e mpe ka ho fetisisa e kileng ea etsahala naheng kapa motseng leha e le ofe.” Leha ho le joalo, likoluoa tsohle e tla ba linyane ha li bapisoa le letsatsi la phetetso le tla tlela bohle “ba sa tsebeng Molimo.” (2 Bathes. 1:8) Ruri Jehova o labalabela hore batho ba fetole menahano le lipelo tsa bona ’me ba ele hloko molaetsa oa temoso o fanoang ke Lipaki tsa hae.—2 Pet. 3:9; Tšen. 14:6, 7.

U na le tlotla ea ho thusa batho hore ba utloisise hore re phela linakong tse thata. Kahoo, ba lokela ho khaotsa ho ameha ka litlhoko tsa bona feela empa ba qale ho sebeletsa Jehova. (Sof. 2:2, 3) Na u ka sebelisa monyetla o mong le o mong o hlahang ho pakela basebetsi-’moho le uena, baahelani le batho ba bang bao u kopanang le bona ha u ntse u etsa mesebetsi ea hao ea letsatsi le letsatsi? Na u tla ikitlaelletsa ho lemosa ba bang?