SEHLOOHO SE KANTLE | NA MANGELOI A HLILE A TENG?
Bibele e re Mangeloi ke Bo-mang?
Mohlomong u ee u ipotse hore na mangeloi a tsoa hokae le hore na mosebetsi oa ’ona ke ofe. Ke Bibele feela e ka arabang lipotso tseo. (2 Timothea 3:16) Sehloohong sena re tl’o ithuta hore na e re’ng ha e bua ka mangeloi.
Mangeloi a tšoana le Molimo kaha Molimo ke moea o se nang “nama le masapo.” Mangeloi a tšepahalang a lula leholimong le Molimo.—Luka 24:39; Matheu 18:10; Johanne 4:24.
Ka linako tse ling mangeloi a ne a ee a hlahe eka ke batho ebe ka mor’a hore a phethe seo a se rometsoeng a khutlela sebopehong sa ’ona.—Baahloli 6:11-23; 13:15-20.
Bibele e bua ka ’ona a le matona empa ha e le hantle ha a na litho tsa botona kapa tsa botšehali. Ha a nyale ebile ha a na mokhoa oa ho ikatisa. Jehova o bopile mangeloi le batho kahoo ha batho ba hlokahala ha ba fetohe mangeloi. Ebile ha Bibele e bua ka mangeloi e re ke “bara ba Molimo oa ’nete.”—Jobo 1:6; Pesaleme ea 148:2, 5.
Bibele e bua ka “maleme a batho le a mangeloi” ho paka hore mangeloi a khona ho bua. Molimo ha a batle ha batho ba rapela mangeloi le hoja a ne a a sebelisa ho bua le batho.—1 Bakorinthe 13:1; Tšenolo 22:8, 9.
Ho na le mangeloi a mangata haholo, a limiriade tse imenneng ka makhetlo a limiriade.a—Daniele 7:10; Tšenolo 5:11.
Mangeloi a matla a bile a bohlale haholo ho feta batho. A khona ho fofa ka lebelo le fetang leo motho a ka le nahanang, a ka fihla moo a eang ka ho panya ha leihlo.—Pesaleme ea 103:20; Daniele 9:20-23.
Ke ’nete hore mangeloi a matla a bile a bohlale haholo empa ho ntse ho e-na le lintho tseo a sa li tsebeng.—Matheu 24:36; 1 Petrose 1:12.
A bopiloe a tšoana le Molimo a bile a e-na le bolokolohi ba ho khetha hore na a batla ho etsa’ng. A mang a ile a ba a khetha ho khopisa Molimo.—Juda 6
a Miriade e le ’ngoe ke likete tse leshome, miriade e le ’ngoe ka makhetlo a miriade ke limilione tse lekholo. Lengolo la Tšenolo le bua ka mangeloi a “limiriade tsa limiriade,” e leng se bolelang hore a mangata haholo hoo palo ea ’ona e ka fihlang libilioneng.