“Etsang Hona Hore le Tle le ’ne le Nkhopole”
1 Jesu o ile a laela balateli ba hae hore ba keteke letsatsi la lefu la hae. (Luka 22:19) Mokete ona o ne o tla sebeletsa e le khopotso ea sehlabelo se seholo seo Jesu a se entseng molemong oa batho. Selemong sena, Lipaki tsa Jehova lefatšeng ka bophara li tla keteka Sehopotso sa lefu la Kreste ka Labohlano, April 17, ka mor’a shoalane.
2 Tokisetso ea Botho: Re ka lokisetsa joang hore re tle re keteke ketsahalo ee ea bohlokoa ka ho loketseng? Tsela e ’ngoe ke ka hore re nahanisise ka thapelo ka bophelo le tšebeletso tsa Jesu ha a sa le lefatšeng. O ile a fetoha Morekolli oa batho ka ho nehelana ka bophelo ba hae bo phethahetseng ba botho e le sehlabelo. (Matt. 20:28) E le ho thusa e mong le e mong hore a ananele tokisetso ena, re khothalletsa hore ho baloe likhaolo 112 ho ea ho 116 ho Motho e Moholo ka ho Fetisisa ea Kileng a Phela.
3 ’Malo oa rōna oa Bibele pele ho Sehopotso selemong sena, joalokaha o hlaha ho Almanaka ea Lipaki tsa Jehova ea 1992, o na le litemana tse khethiloeng bukeng ea Bibele ea Mareka. ’Malo ona o khethehileng oa Bibele o lokiselitsoe bakeng sa matsatsi a tšeletseng ho tloha ka Sontaha ho ea ho Labohlano, April 12-17. Kaofela ha rōna re batla ho ipha nako e lekaneng ho thuisa ka liketsahalo tsena tse tebileng.
4 Tokisetso e Phethahetseng ea Baholo: Etsang bonnete ba hore limemo tsa Sehopotso li teng. Na ho na le litulo tse lekaneng bakeng sa bohle ba lebelletsoeng ho ba teng? Moo holo e tla sebelisoa ke liphutheho tse eketsehileng, ho hlokahala litokisetso tse hlophisehileng e le hore phutheho ka ’ngoe e ka ba le nako e lekaneng ea ho keteka Sehopotso. Ba sebeletsang e le bahlokomeli ba lokela ho bolelloa mesebetsi ea bona. Ba lokela ho nka bohato ba ho amohela batho ba tlileng. Ho tlameha ho khethoe sebui se tšoanelehang hantle, se tla nehelana ka boitsebiso ka ho hlakileng le ho tsoa Mangolong. Abelang baholo ba ikarabellang kapa bahlanka ba sebeletsang hore ba fetise litšoantšetso. Bohobe bo sa lomosoang le veine e khubelu e sa tsoakoang li lokela ho ba teng. Bakeng sa likhopotso tse eketsehileng, hlokomelang tokollo ea February 15, 1985, ea Molula-Qhooa, leqephe 17.
5 Ka ho lokisetsa ka ho felletseng esale pele, re tla bontša hore re ananela ka botlalo bohlokoa ba ketsahalo ena e khethehileng le hore re lakatsa ho keteka Sehopotso sa lefu la Kreste tumellanong le taelo ea Jesu.—1 Ba-Kor. 11:23-26.
[Lebokose le leqepheng la 3]
1. Na e mong le e mong, ho kopanyelletsa le sebui, o se a tsebisitsoe ka nako e nepahetseng le sebaka seo mokete o tla tšoareloa ho sona? Na sebui se na le sepalangoang?
2. Na ho se ho entsoe litokisetso tse tobileng bakeng sa ho ba le litšoantšetso?
3. Na ho se ho entsoe litokisetso tsa hore e mong a tle a tlise lesela le hloekileng la tafole le palo e hlokahalang ea likhalase le lipoleiti?
4. Ho entsoe litokisetso life bakeng sa ho hloekisa holo pele ho Sehopotso le bakeng sa ho e hloekisa ka mokhoa o bobebe ka mor’a sona haeba phutheho e ’ngoe e tla be e e sebelisa phirimaneng eo? Haeba ho hiruoe holo, na ho lokisitsoe lisebelisoa tsa molumo tse loketseng?
5. Na bahlokomeli le ba tla fetisa litšoantšetso ba se ba fuoe likabelo? Na ho se ho entsoe kemiso ea seboka le bona pele ho Sehopotso e le ho ba hopotsa mesebetsi ea bona? Se tla ba neng? Ho tla etsoa joang ho etsa bonnete ba hore litšoantšetso li fetisoe ho bohle ka mokhoa o loketseng?
6. Na litokisetso tsa ho thusa baena le bo-khaitseli ba hōlileng le ba kulang li se li phethiloe? Na ho entsoe litokisetso tsa ho isetsa motlotsuoa ea ka ’nang a hlōleha ho ea Holong ea ’Muso litšoantšetso?