Molula-Qhooa—Lijo tsa Moea ka Nako e Loketseng
1 Hoo e batlang e le ka lilemo tse 114, Molula-Qhooa o ’nile oa hlokomelisa babali ba oona ho lula ba falimehile moeeng. Makasine o tsamaeang le oona oa Tsoha! o haha tšepo tšepisong ea ’Mōpi ea ho tlisa lefatše le lecha la khotso le tšireletseho molokong oa rōna. Likhatiso tsena tse peli ebile likofuto tse tšepahalang tse khantšang tsela ea rōna lefatšeng le lefifi. (Esa. 60:2) Le ka mohla ’nete ea Lentsoe la Molimo ha e fetohe, empa kutloisiso ea rōna ka lona e hlaka haholoanyane ha Jehova a sebelisa likofuto tsena le tse ling ho re neha lijo tsa moea “ka nako e loketseng.”—Matt. 24:45, NW; Liprov. 4:18.
2 Sebelisa Limakasine Hamolemo: Re ka bontša kananelo ea rōna bakeng sa leseli la moea leo re le fumaneng ka hore ka cheseho re khothaletse batho ho bala Molula-Qhooa le Tsoha! Batho ba bangata ba amohela kopi e le ’ngoe ea limakasine ka linako tsohle ’me ho hlakile hore ba thabela ho li bala. Ke hobane’ng ha u sa ba botse hore na ba tla thabela ho amohela limakasine tsee ka mehla ka poso?
3 Re rata ho khothaletsa batho ba bangata kamoo re ka khonang ho etsa peeletso ea Molula-Qhooa le Tsoha! Le hoja ntle ho pelaelo re tla fumana lipeeletso tsa rōna tse ngata ka ntlo le ntlo, ha re rate ho lebala bao re sebetsang le bona, baahisani le beng ka rōna. Na bana ba rōna ba na le peeletso? Na re nahanne ho romela mpho ea peeletso ho motho e mong eo ka sebele re mo tsotellang? Ho thoe’ng ka bao re atisang ho khutlela ho bona kapa esita le liithuti tsa rōna tsa Bibele? Haeba batho ba hlōleha ho etsa peeletso ea selemo, ba ka etsa ea likhoeli tse tšeletseng. Moo motho a hanang mpho ea peeletso mo khothaletse ho bala limakasine tsena ka bobeli. Mohlomong sena e ka ba ho qalisa tselana e ncha ea limakasine.
4 Morao tjena re hlokometse ho theoha ha lenane la limakasine tse tsamaisoang Afrika Boroa. Ke hobane’ng ha u sa etse boiteko bo khethehileng ka April ho nehelana ka limakasine tsa rōna tse ntle ho motho e mong le e mong eo re kopanang le eena? Tokollo ka ’ngoe ea limakasine tsa rōna e ka fuoa basebetsi-’moho, bao u kenang sekolo le bona le beng ka rōna. Limakasine li ka boela tsa tsamaisoa ho balekane ba khoebo le bopaking ba seterateng.
5 Limakasine tse ncha li lokela ho nehoa bahoeletsi hang feela ha li fihla phuthehong. Ha u amohela tokollo e ncha, itloaetse eona hantle. Ke lintho life tseo batho ba amehileng ka tsona ka botebo sebakeng sa lōna? Khotso ea lefatše le tšireletseho? Moruo? ’Muso o lokileng? Tikoloho? Ka ho hlakileng, Molula-Qhooa o lebisa batho tharollong e le ’ngoe feela ea ka ho sa feleng, ’Muso oa Molimo. (Dan. 2:44; Matt. 6:10) Ka sebele ke mpho ea bohlokoa ka ho fetisisa e tsoang ho ‘Morupeli oa rōna e Moholo.’—Esa. 30:20, NW.
6April le May li fana ka menyetla e babatsehang ho sebetsa nako e eketsehileng haholoanyane tšebeletsong ea tšimo. Kaha May e na le mafelo-beke a mane, ba bangata ba tla ngolisa joaloka bo-pula-maliboho ba thusang. Kaofela ha rōna re ka ipehela pakane ea botho hona joale ea ho eketsa tšebeletso ea rōna ea tšimo likhoeling tsena tse peli le hore ka cheseho re khothaletse e mong le e mong eo re kopanang le eena ho etsa peeletso ea Molula-Qhooa le Tsoha!