“A re Eeng ka Tlung ea Jehova”

¹ Davida o ile a arabela ka thahasello memong ena: “A re eeng ka tlung ea Jehova.” (Pes. 122:1) ‘Ntlo’ ea Jehova e ne e emeloa ke tempele, e ne e le moo ba nang le takatso ea ho rapela Molimo oa ’nete ba bōkanang teng. E ne e le sehalalelo sa tšireletseho le khotso. Kajeno, phutheho ea Bakreste ea lefatše lohle ke ‘ntlo’ ea Molimo, “tšiea le motheo oa ’nete.” (1 Tim. 3:15) Litokisetso tsohle bakeng sa poloko li fumaneha ka mocha ona. Ka lebaka leo, ‘lichaba tsohle li lokela ho phallela ho eona’ haeba li rata ho thabela litlhohonolofatso tse tšepisitsoeng tlas’a puso ea ’Muso oa Molimo.—Esa. 2:2.

² ‘Ntlo’ ena e entsoe ka liphutheho tse fetang 69-000 linaheng tse 229. Menyako ea Liholo tsa ’Muso lefatšeng lohle e butsoe, li na le basebetsi ba chesehang ba fetang limillione tse ’nè ba etsang memo ena: “Tlo! . . . Le ea ratang, a nke feela metsi a bophelo.” (Tšen. 22:17) Ba bangata ba utloile molaetsa ona ’me ba arabela ka kananelo. Ba bang ba ile ba ameha empa ha ba s’o tle ntlong ea Jehova ka ho kopanela le phutheho ea Bakreste. Ba joalo ba na le ‘tlhoko ea moea’ e ka khotsofatsoang ka litokisetso tse fumanoang ka phuthehong feela. (Matt. 5:3, NW) Re phela linakong tse mahlonoko, ’me bofelo ba tsamaiso ena bo atamela ka potlako. Boikutlo ba ho iphapanya kapa ba ho qea-qea bo ka lebisa tiehong e fellang ka lefu. Ho potlakile hore batho ba ‘atamele Molimo’ ka ho ba haufinyane le phutheho ea hae. (Jak. 4:8) Re ka ba thusa joang?

³ Lebisa Tlhokomelo ea Bona Mokhatlong o Hlophisitsoeng: Ho tloha ha re qala ho kopana le batho ba thahasellang, re lokela ho lebisa tlhokomelo ea bona mokhatlong o hlophisitsoeng. Le hoja ka bomong re ka khona ho fumana mangolo le ho hlalosa lithuto tsa motheo, ha re mohloli oa tsebo e joalo. Sohle seo re ithutileng sona se tsoa mokhatlong o hlophisitsoeng, se fetisetsoa ho rōna ka sehlopha sa lekhoba se fanang ka ‘lijo ka nako e loketseng.’ (Matt. 24:45-47, NW) Ho tloha qalong, ho hlokahala hore ba bacha ba hlokomele hore borapeli bo hloekileng bo akareletsa ba bangata ho feta rōna kapa phutheho ea habo rōna; ho na le mokhatlo o hlophisitsoeng, oa puso ea Molimo, oa lefatše lohle o sebetsang tlas’a tataiso ea Jehova.

⁴ Tataiso eo re e fumanang e tsoa ho Jehova, ea tšepisitseng hore o tla re tataisa le ho re ruta. (Pes. 32:8; Esa. 54:13) Taeo ena e fetisoa haholo-holo ka lingoliloeng tsa rōna. Haeba re ka thusa ba thahasellang hore ba lebise tlhokomelo e khōlō ho lingoliloeng tsa rōna, ba li hlokomele e le mohloli oa taeo e bolokang bophelo, ho na le monyetla o moholoanyane oa hore ba li bale le ho sebelisa molaetsa oa tsona ho e-na le ho li lahla kapele. Re lokela hore ka mehla re fane ka lingoliloeng tsena re be re li sebelise ka tsela e tla hlaolela tlhompho bakeng sa tsona. Sena se ruta ba bacha ho ananela mokhatlo o hlophisitsoeng le ho tšepela litokisetsong tsa oona.

⁵ Etsa hore ba khahlehang ba tsebe hore ho na le setsi seo ho kopaneloang ho sona sebakeng seo moo taeo e fanoang ka mehla. Ba fe aterese ea Holo ea ’Muso le linako tsa liboka. Hlalosa phapang pakeng tsa liboka tsa rōna le lipokano tsa bolumeli tseo e ka ’nang eaba ba bile ho tsona. E mong le e mong oa amoheloa; ha ho likoleke ’me ha ho kōpuoe chelete ho batho ka bomong. Le hoja basebeletsi ba khethiloeng ba tsamaisa lenaneo, e mong le e mong o na le monyetla oa ho kopanela ka ho hlalosa le ho kopanela likarolong tsa lenaneo. Malapa aa amoheloa; bana baa akareletsoa lipuisanong tsa rōna tsa Bibele. Basebeletsi ba rōna ha ba apare liaparo tse khethehileng. Holo ea ’Muso e khabisitsoe ka tsela e itekanetseng ’me ha e na likerese, liemahale, kapa litšoantšo. Bongata ba ba kopanelang ho eona ke baahi ba sebaka seo.

⁶ Lebisa Thahasello e Tsoelang Pele Lithutong tsa Bibele: Morero o ka sehloohong oa thuto ea Bibele ke ho ruta ’nete ea Lentsoe la Molimo. Hape e lokela ho haha ka hare ho seithuti kananelo bakeng sa mokhatlo o hlophisitsoeng oa Jehova le ho etsa hore se hlokomele hore ke habohlokoa hore e be karolo ea oona. Mosebetsi o moholo oo Jesu le barutuoa ba hae ba ileng ba o etsa lekholong la pele la lilemo o ile oa hohela ba nang le thahasello ea sebele ’me oa ba kopanya le sehlopha se busang bakeng sa ho etsa mosebetsi. Lichabeng tseo ho tsona karabelo e bileng molemo, liphutheho li ile tsa thehoa bakeng sa ho fana ka koetliso ea ka mehla le taeo. Ba kopanelang ba ile ba matlafatsoa moeeng, ba thusoa ho mamella linako tsa mahloriso. (Ba-Heb. 10:24, 25; 1 Pet. 5:8-10) Mehleng ea rōna morero oa Jehova ke ‘ho bokella tsohle ho Kreste.’ (Ba-Ef. 1:9, 10) Phello ke hore re na le ‘mokhatlo oa baena’ lefatšeng lohle.—1 Pet. 2:17, NW.

⁷ Thuto ea Bibele ea beke le beke e lokela ho akareletsa taeo e tla thusa liithuti ho ananela mokhatlo o hlophisitsoeng le ho rua molemo litokisetsong tsa poloko ea tsona. Nka metsotso e seng mekae beke ka ’ngoe o pheta kapa u hlalosa ntho e itseng ka mokhatlo o hlophisitsoeng le kamoo o sebetsang ka teng. U ka fumana lintlha tse thusang tsa puisano ho Molula-Qhooa oa November 1, 1984. Libukana tse lekanang le makasine Lipaki tsa Jehova Lekholong la Mashome a Mabeli la Lilemo le Lipaki tsa Jehova—Li Etsa Thato ea Molimo li Kopane Lefatšeng Lohle li bua ka likarolo tsa bohlokoa tsa mokhatlo o hlophisitsoeng le kamoo li ka re tsoelang molemo. Ho lokisetsa hore liithuti tsa Bibele li shebelle video ea Jehovah’s Witnesses—The Organization Behind the Name ho tla etsa hore li bone hore na mokhatlo o finyella eng. Litlaleho tse khethiloeng le liphihlelo tse tsoang ho Yearbook li ka bontša katleho ea mosebetsi linaheng le litsong tseo e seng tsa rōna. Lingoliloeng tse ling le tsona li ka sebelisoa. Ka nako e itseng, mohato ka mohato hlalosa lintho tse joaloka lebaka la ho ea ka ntlo le ntlo, morero oa liboka tsa rōna, tsela eo re tšehetsang mosebetsi oa rōna ka chelete le tekanyo ea mosebetsi oa rōna lefatšeng lohle.

⁸ Ho tloaelana le Lipaki tse ling ho ka ba le phello e hlasimollang ho ba bacha, ho atolosa kutloisiso ea bona ea phutheho. E le hore u ka finyella seo, mema bahoeletsi ba bang hore ba be teng thutong nako le nako. E mong ka phuthehong ea nang le semelo kapa lithahasello tse tšoanang le tsa seithuti a ka ’na a atolosa pono ea seithuti sa hao. Mohlomong moholo a ka ea le uena e le hore feela se mo tloaele. Ho lokisetsa hore molebeli oa potoloho kapa mosali oa hae a etele thuto ena ho ka ipaka e le tlhohonolofatso ea sebele. Haeba ho na le Lipaki tse lulang haufinyane, ho etsa hore li tloaelane le seithuti sa Bibele ho ka ’na ha se fa khothatso e eketsehileng ea hore se kopanele libokeng tsa phutheho.

⁹ Khothaletsa ba Bacha ho Tla Libokeng: Ho hlokahala hore ba bacha ba hlokomele hore na ke habohlokoa hakae hore ba tle libokeng. Leka ho hōlisa thahasello ea bona. Bua ka lihlooho tse tla ithutoa thutong ea Molula-Qhooa. Bua ka lihlooho tsa lipuo tsa phatlalatsa tse tla fanoa nakong e tlang. Bua ka lintlha tse khōlō tsa taba e lokelang ho koaheloa Sekolong sa Tšebeletso sa Puso ea Molimo le Thutong ea Buka ea Phutheho. Hlalosa maikutlo a hao ka seo u ithutang sona libokeng tsena le lebaka leo ka lona o ikutloang hore ho hlokahala hore u kopanele ho tsona. Haeba u khona, lokisetsa sepalangoang. Ho se letsetsa pele ho seboka ho ka ’na ha se khothatsa haholoanyane hore se tle libokeng.

¹⁰ Ha seithuti sa Bibele se tla libokeng, etsa hore se ikutloe se amohelehile. Se tsebise ba bang, ho akareletsa le baholo. Haeba se tlile puong ea phatlalatsa, se tsebise sebui. Se bontše Holo ea ’Muso. Hlalosa morero oa lefapha la libuka le limakasine, mabokose a menehelo, laebrari le temana ea selemo. Se tsebise hore holo hase ntlo ea borapeli feela empa hape ke setsi seo mosebetsi oa boboleli o hlophisoang ho sona sebakeng seo.

¹¹ Hlalosa tsela eo liboka tsa rōna li tsamaisoang ka eona. Bontša seithuti libuka tseo re li sebelisang. Se bontše hore Bibele ke buka ea rōna ea motheo. E mong le e mong a ka nka karolo ho akareletsa le bana. Hlalosa hore ’mino oohle o leng bukeng ea rōna ea lipina le mantsoe a oona o qapiloe ke Lipaki tsa Jehova bakeng sa hore o sebelisoe borapeling ba rōna. Lebisa tlhokomelo ea sona tabeng ea ho se tšoane ha limelo tsa ba kopanelang. Etsa litlhaloso tse molemo ka moea oa botsoalle le oa ho amohela baeti ka mofuthu. Thahasello ena e mosa le ea sebele e ka ’na eaba le leng la mabaka a susumetsang seithuti ho tla hape.

¹² Lebaka Leo ka Lona ba Bang ba sa Tleng Libokeng: Hangata, ho sa tsotellehe sohle seo u se etsang, ba bang ba lesisitheho ho atamela haufinyane le mokhatlo o hlophisitsoeng. U se ke ua tela ka potlako. Leka ho ipeha boemong ba bona. Ho fihlela nakong ena, ho ka etsahala hore ebe ha ba s’o ka ba utloa ho na le tlhokahalo ea ho kopanela litšebeletsong tsa bolumeli ka ntle le liketsahalong tse khethehileng. E ka ’na eaba litho tsa lelapa kapa metsoalle e haufinyane ea ba hatella. Ba ka ’na ba tšosoa ke lipolelo tse nyelisang tsa baahelani. ’Me ho hlakile hore ba ka ’na ba ba le litšitiso tse sa tšoaneng tse amanang le mesebetsi ea boikhathollo le ’moka ea botsoalle. Ba ka ’na ba talima lintho tsena e le litšitiso tse ke keng tsa hlōloa; ho hlokahala hore u ba thuse hore ba bone lintho ka tsela e nepahetseng le ho “lemoha litaba tse fetisang ka molemo.”—Ba-Fil. 1:10.

¹³ Fana ka mabaka a Mangolo a ho phehella. Hatisa taba ea hore kaofela ha rōna re hloka khothatso e potlakileng le ho hahuoa moeeng hoo re ho fumanang ha re kopane hammoho. (Ba-Roma 1:11, 12) Jesu o ile a hlakisa hore khanyetso ea lelapa hase lebaka le utloahalang le ka re sitisang. (Matt. 10:34-39) Pauluse o ile a re phehella hore re se be lihlong ho itsebahatsa phatlalatsa re le barutuoa ba Jesu. (2 Tim. 1:8, 12-14) Mesebetsi ea botho le litšitiso li lokela ho laoloa; ho seng joalo, li ka fetoha leraba. (Luka 21:34-36) Ba tšoaneloang ke tlhohonolofatso ea Jehova ba lokela ho ba le pelo e feletseng, le ka mohla ba se be pelo e sa fellang. (Ba-Kol. 3:23, 24) Ho hlaolela kananelo bakeng sa melao-motheo ea Bibele e joalo ho ka li bulela tsela ea ho tsoela pele moeeng.

¹⁴ Menyako e Butsoe: Ntlo ea Jehova ea borapeli ba ’nete e phahamiselitsoe ka holim’a a mang ’ohle. Linaheng tse 229 lefatšeng lohle ho etsoa memo ena: “Tlong, re nyoloheleng thabeng ea Jehova, . . . ’me o tla re ruta litsela tsa hae, ’me re tla tsamaea litseleng tsa hae.” (Esa. 2:3, NW) Karabelo e molemo ea ba bacha e ka boloka bophelo ba bona. Ho lebisa thahasello ea bona mokhatlong o hlophisitsoeng oa Jehova ke e ’ngoe ea litsela tse molemohali tseo re ka ba thusang ka tsona.