Hōlisa Thahasello ’Musong oa Molimo oa Khotso
1 Khoeling ea February, re tla nehelana ka buka U ka Phela ka ho sa Feleng Paradeiseng Lefatšeng. Boikemisetso ba rōna e lokela ho ba ho thusa batho ba lipelo li tšepahalang ho hōlisa kananelo ’Musong oa Molimo le seo a tla se finyella. Lipotso tse fatang maikutlo li ka re thusa ho finyella sena.
2 Pampitšana “Bophelo Lefatšeng le Lecha la Khotso” e ka sebelisoa ho kenyeletsa mpho. Ka mor’a tumeliso e nang le botsoalle, mohlomong re ka re:
◼ “Ho etsahala liphetoho tse tšosang ’musong lefatšeng ka bophara, ’me hangata ho boleloa pakane ea khotso. Na u lumela hore khotso ea ’nete e tla ke e finyelloe? [Emela tlhaloso.] Le hoja ba bangata ba talima baeta-pele ba batho ka tšepo ho tlisa khotso, hlokomela kamoo Molimo a tšepisang ho tlisa khotso joalokaha ho boleloa ho Pesaleme ea 46:9. [E bale.] U nahana hore ke liphetoho life tse tla etsahala lefatšeng ha Molimo a nka khato? [Mamela karabo ea mong’a ntlo, ebe joale u ’montša pampitšana Bophelo Lefatšeng le Lecha la Khotso.] Na u hlokomela se bontšitsoeng setšoantšong see?” Bua ka boitsebiso bo leng tlas’a sehloohoana “Bophelo Lefatšeng le Lecha la Molimo.” Haeba boemo bo lumela, lebisa tlhokomelo ea mong’a ntlo boitsebisong bo leng maqepheng 156-62 bukeng Phela ka ho sa Feleng. Nehelana ka buka ka monehelo oa R9,00. Siela mong’a ntlo pampitšana, ebang o amohela buka kapa che. Re ka phethela puisano ea rōna ka ho botsa: “Na ua lumela hore ’muso oa Molimo o tla tlisa liphetoho tsee?” Etsa tokisetso ea ho khutlela le ho ntšetsa puisano pele.
3 Kapa mohlomong re ka re:
◼ “Ho na le kameho e khōlō ka mathata a tšoenyang ao kaofela ha rōna re lokelang ho sebetsana le ’ona letsatsi le letsatsi. Na u nahana hore ho na le tšepo leha e le efe ea ho lokoloha mathateng aa? [Emela tlhaloso.] Ba bang ba ka ’na ba ikutloa hore Molimo o iphapanyetsa tlokotsi ea rōna. Leha ho le joalo, hlokomela seo a se tšepisang ho Tšenolo 21:3, 4.” Bala litemana tsena. Ntlheng ena lebisa tlhokomelo ea mong’a ntlo bukeng Phela ka ho sa Feleng. Mohlomong u ka rata ho botsa potso ena: “Ke hobane’ng ha Molimo o lumelletse bokhopo?” Supa khaolo 11 bukeng Phela ka ho sa Feleng. Haeba nako e lumela, mohlomong ka bokhutšoaane u ka rata ho lebisa tlhokomelo ea mong’a ntlo lirapeng 1 le 2 leqepheng 99. Nehelana ka buka ’me u tsebise mong’a ntlo hore u tla thabela ho ntšetsa puisano ena pele ketelong e tlang.
4 Haeba mong’a ntlo a se a e-na le buka kapa a sa thahaselle ho amohela mpho ka mabaka a itseng, joale nehelana ka limakasine tsa morao-rao ka ho bua ka ntlha e khethehileng sehloohong seo u se khethileng.
Mohlomong u ka rata ho kenyeletsa makasine ka ho re:
◼ “Sehlooho sena se fana ka makolopetso a eketsehileng ka taba ena. [Bala polelo e le ’ngoe kapa tse peli tseo u li khethileng esale pele.] Sehlooho sena se fana ka likhopolo tse eketsehileng tse tla khothatsa uena le lelapa la hao. Kaha ho bonahala u thahasella taba ena, re tla thabela ho u siela tokollo ena le makasine o tsamaisanang le eona ka monehelo oa R1,60.”
5 Kajeno batho ba ferekane ha ho tluoa tabeng ea ho batla likarabo mathateng ao moloko oa batho o talimaneng le ’ona. Re na le tokelo ea ho arolelana le bona tšepo e hlakileng ea nako e tlang. (Lik. 17:27) E se eka ka mafolo-folo re ka lebisa tlhokomelo ea batho ’Musong oa Molimo, mohloli oa ’nete oa khotso.