Nehelana ka Limakasine tse Molemo ka ho Fetisisa Lefatšeng
1 Ho ngotsoe hore morero oa Molula-Qhooa ke “ho phahamisa Jehova Molimo e le Morena ’Musi oa bokahohle.” Tsoha! ke “e behang lelapa lohle leseling. . . . Makasine ona o etsa hore batho ba tšepe litšepiso tsa ’Mōpi mabapi le tsamaiso e ncha ea khotso le tšireletseho.” Mantsoe ana a qotsitsoe limakasineng tsena ka ho toba. Ho hahamalla lipakane tsena ho li entse hore e be mohloli oa matšeliso ho babali ba limilione.
2 Re tla buella likoranta tsena tšebeletsong ea rōna ka April le May. E le hore re atlehe, ho hlokahala hore re tloaelane hantle le litaba tsa tsona tse ka hare. Bala tokollo ka ’ngoe, u hlokomele lintlha tseo u ka khonang ho li sebelisa ha u nehelana ka tsona. Nahana ka se amang batho. Ke litaba life tsa bophelo, lelapa, kapa tse amang maikutlo tse laolang monahano oa baahisani ba hao ba bangata? Leka ho nahana ka seo u tla se bua se tla ama lipelo tsa bona ’me se susumetse takatso ea hore ba ithute ho eketsehileng.
3 Ho Lebisa Tlhokomelo ho Molula-Qhooa oa April 1: Batho ba bangata ba laba-labela lefatše le molemo, le se nang mathata ao hona joale hangata a ba amohang thabo.
Ka mor’a ho ipolela hore na u mang, u ka re:
◼ “Ke rata ho u bontša tlhaloso e thahasellisang e entsoeng sehloohong sena se reng ‘Lefatše le Molemo—Na ke Toro Feela?’ E re: ‘Lefatše lena, e leng lefatše la rōna, ha e le hantle hase sebaka se phethahetseng. . . . Ho bonahala lethathamo la lintho tse etsahalang hona joale tse bakang bomalimabe le sa fele.’ Boemo bona bo etsa hore ho be thata ho ba le boikutlo bo botle ka bokamoso, na ha ho joalo? Leha ho le joalo, e re ke bontše seo Pesaleme ea 37:11 e se bolelang ka bokamoso.” Ka mor’a ho bala temana, botsa mong’a ntlo kamoo a ikutloang kateng ka tšepiso ena. Haeba a arabela hantle, phetla sehlooho “Lefatše le Molemo—Le Haufi!,” leqephe 4, ’me u re: “Ho qotsitsoe Mangolo a mangata, ho kopanyeletsa le leo re qetang ho le bala ho Pesaleme ea 37:11. Kea tšepa u tla thabela ho bala lihlooho tsena le ho phetla litšupiso Bibeleng ea hao. Nka thabela ho lokisetsa hore u amohele makasine ona ka poso e le peeletso ea R19,00 bakeng sa selemo.” Moo ho hanoang mpho ea peeletso, nehelana ka limakasine tse peli ka monehelo oa R1,60.
4 Ho Lebisa Tlhokomelo ho Molula-Qhooa oa April 15: Sehlooho se leng leqepheng la 4 sea botsa: “U ka Fumana Tataiso e Tšepahalang Hokae?”
Ka mor’a ho ipolela hore na u mang, u ka re:
◼ “Ho na le mathata a mangata haholo lefatšeng kajeno, a kang [bolela ntho e ’ngoe eo hona joale e tšoenyang batho kapa bua ka sehlooho sa litaba]. Sena se etsa hore re ipotse hore na ho ka etsahala hore leha e le mang a fumane mokhoa oa ho tsoa qhafutsong ena. Ho thabisang ke hore 2 Timothea 3:16, 17 e re tiisetsa hore Bibele ke tataiso e lebisang bophelong bo thabileng le bo sireletsehileng.” Ka mor’a ho bala litemana tsena, bontša kamoo Molula-Qhooa o re thusang kateng hore re utloisise lebaka la hore ebe Bibele ke tataiso e tšepahalang. Nehelana ka peeletso joalokaha ho entsoe tlhahiso ea ho etsa seo ho serapa 3.
5 Haeba u khetha ho buella Tsoha!, u ka sebelisa tokollo ea May 8 le sehlooho “Tšepo ea Sebele Bakeng sa Bana.” Mohlomong u tla fumana hore batsoali ba angoa habohloko ke litlhoko tsa bana ’me ba batla ho tseba hore na ke eng se ka etsoang ho ba thusa. Ikutloe u lokolohile ho nehelana ka peeletso bakeng sa limakasine ka bobeli ka monehelo oa R28,50.
6 Haeba re le mafolo-folo ka limakasine tsa rōna, tse molemo ka ho fetisisa lefatšeng, re tla laba-labela ho li tsamaisa ho ba bang e le hore le bona ba ka amohela tšepo ea ’Muso ’me ba kopanela ho phahamiseng Jehova e le ’Musi Morena oa bokahohle.—Pes. 83:18.