Kopano ea Setereke ea “Tšabo ea Bomolimo” ea 1994
1 Banna ba tumelo ba bontšitse ho “tšaba Molimo” ho tloha mehleng ea Abele le Noe ho fihlela kajeno. (Ba-Heb. 11:4, 7) Ho bonahatsa tšabo ea bomolimo ho bolela ho bontša “tšabo le tlhompho e tebileng ho ’Mōpi le tšabo e loketseng ea ho mo utloisa bohloko.” (it-1 leq. 818) Ka December re tla bontša tlhompho ena e tebileng ka ho ba teng Kopanong ea Setereke ea “Tšabo ea Bomolimo.” Na u tla ba teng moo ho thabela lenaneo kaofela, ho tloha pineng e bulang ho fihlela thapelong ea ho qetela?
2 Selemo ka seng re atamela kopano ea setereke ka tebello e khōlō. Le hoja boiteko le litšenyehelo tse khōlō tsa botho li ka ameha, mahlohonolo a tlang ho amoheloa a mangata. Re khutlela hae re thabile, re khotsofetse ebile re hahiloe moeeng. (Bapisa le 1 Marena 8:66.) Botsoalle ke bo susumetsang, ’me kopano e fana ka phetoho lebelong la khatelo-pele. Empa hopola, re bokana bakeng sa ho rapela Jehova. O re laela ho etsa joalo. O re ruta mokhoa oa hore re itsoele molemo.—Deut. 31:12, 13; Pes. 122:1.
3 Kopano ea Matsatsi a Mararo: Lenaneo le tla nehelanoa likopanong tse 22 Afrika Boroa le linaheng tsa boahelani. Ho phaella Senyesemaneng, lenaneo le feletseng le tla nehelanoa ka Seafrikanse, Sepedi, Sepotoketsi, Sesotho, Setsonga, Setswana, Sexhosa, le Sezulu, le likarolo tse ling ka Segerike le Sevenda. Libakeng tse peli ho tla ba le ho tolokoa ha puo ea lithōlō, e leng Cape Town le Johannesburg.
4 Lenaneo le tla qala ka 10:20 hoseng Labohlano ’me le tla phethoa ka Sontaha ka hoo e ka bang 4:15 thapama. Ka Moqebelo le Sontaha, lenaneo le tla qala ka 9:30 hoseng. Mamati a tla buloa ka 7:30 hoseng. Ke ba nang le likabelo tse khethehileng tsa mesebetsi feela ba tla lumelloa ho kena pejana.
5 Tlhompho e Tebileng ho Jehova e Re Susumelletsa ho ba Teng: Pauluse o ile a eletsa Bakreste ba Baheberu ho ‘sebeletsa Molimo ka tlhompho le ka tšabo.’ (Ba-Heb. 12:28) Kopano ea rōna ea setereke selemong sena e lokiselitsoe ho re thusa hore re etse joalo feela. Ho ka ’na ha thulanoa le litšitiso tse lekang boikemisetso ba rōna ba ho ba teng. Li ka ’na tsa shebahala joaloka lithaba, empa ka thuso ea Jehova li ka hlōloa. (Matt. 17:20) Haeba u sa khone ho lokisetsa hore matsatsi a hao a phomolo a kopanyeletse kopano kaofela, Labohlano hoseng ho fihlela Sontaha thapama, na ka thapelo u se u atametse mohiri oa hao ho kōpa nako ea ho ba sieo mosebetsing?—Jak. 1:6-8.
6 Ithuise Molemo ka Letsete: Ke letsete la eng leo? Nako le boiteko tse sebelisitsoeng bakeng sa ho ba teng kopanong. E ne e tla be e le booatla ho rera ka hloko hore re be teng kopanong ea setereke e be joale ka Sontaha re khutlela hae re lahlehetsoe ke karolo e khōlō ea lenaneo. Na ka lebaka le sa utloahaleng u ne u tla siea mokete ka lehare e le hore u ka ea hlokomela litaba tse ling? Selemong se fetileng ho ile ha hlokomeloa hore ba bang ba ile ba tsamaea ka mor’a mananeo a hoseng. Leha ho le joalo, khōlo ea rōna e feletseng ea moea le tšabo ea bomolimo ha lia lokela ho re lumella ho fosoa ke ntho leha e le efe eo Jehova a re lokiselitseng eona.—Bapisa le 1 Ba-Korinthe 2:9, 10.
7 Mohlomong boholo ba rōna re ke ke ra nahana ho tsamaea pele ho nako e tloaelehileng. Leha ho le joalo, re ntse re ka ’na ra lahleheloa ke karolo e khōlō ea lenaneo. See se ka etsahala joang? Ka ho se rere esale pele ho tiisa hore re fumana molemo o feletseng likarolong tse nehelanoang. Re batla ho qalisa letsatsi esale hoseng ka ho lekaneng e le hore re ka fumana lijo tsa hoseng tse lekaneng le ho hlokomela litaba tse ling tse hlokahalang e le hore re ka ba litulong tsa rōna pele lenaneo le qala. Ho fumana boroko bo lekaneng bosiu ho boetse ke habohlokoa e le hore re ka falimeha ’me re khone ho tsepamisa mohopolo lenaneong lohle la letsatsi.
8 Mokhoa o pakiloeng oa ho rua molemo ka ho feletseng lenaneong ke ho nka lintlha tse itekanetseng. Ho nka lintlha ke habohlokoa ho ba banyenyane joalokaha ho le bohlokoa le ho ba baholo. Mohoeletsi e mong ea lilemo li 16 o re: “Ke ngola mangolo a boletsoeng nakong ea puo. Joale nka khona ho hlahloba puo eo lapeng.” Mocha e mong ea lilemo li 16 oa phaella: “Ke ngola lintlha tsa sehlooho. Ho boloka kelello ea ka mocheng.” Ka tloaelo sohle seo u hlileng u se hlokang bakeng sa lenaneo ke Bibele ea hao, buka ea lipina, buka ea ho ngolla lintlha e lekaneng, le pene kapa pentšele. Ho hlakile hore batsoali ba nang le bana ba banyenyane ba tlameha ho hlokomela litlhoko tsa bona, empa ke habohlokoahali hore re se ke ra itšitisa le ho sitisa ba bang ka li-cooler tse khōlō le lintho tse ngata haholo tsa botho.
9 Baena ba bang ba rekota lenaneo, ba sebelisa thepa ea ho rekota ea lik’hasete tsa audio kapa k’hamera ea video, bakeng sa hore ba e bapale hape hamorao lapeng. Hore na motho o etsa sena kapa che ke taba ea botho, empa phihlelo ea ba bang ke hore hang ha ba khutlela mokhoeng o tloaelehileng oa bophelo ba bona, ha ho na nako bakeng sa ho bapala ntho e rekotiloeng. Ho phaella moo, lintlha tsa bohlokoa puong li ka ’na tsa lahlehela motho ha a ntse a lokisa thepa eo ea ho rekota.
10 Re lokela ho etsa boiteko bo tiileng ba ho ba litulong tsa rōna pele lenaneo le qala. Le hoja re ka ’na ra be re le bohareng ba ho phetelana liphihlelo tse thabisang le metsoalle ea khale ha molula-setulo a tsebisa hore lenaneo le mothating oa ho qala, ke ho bontša tlhompho ho ba lenaneong, le ho baena ba rōna ka kakaretso, haeba kapele-pele re ka khaotsa moqoqo oa rōna ’me ra lula litulong tsa rōna.
11 Kamehla likopano tsa setereke ke liketsahalo tse thabisang ka lebaka la tlhohonolofatso e khaphatsehang ea Jehova. Re fumana melemo ea moea hammoho le ea nama. Ho tlameha ho hopoloe hore ho ameha litšenyehelo tse khōlō ho hira libaka tsa kopano. Litšenyehelo tsee le tse ling kaofela li koaheloa joang? Ka menehelo ea rōna ea boithatelo, ebang ke ka chelete ka ho toba kapa ka cheke e ngotsoeng hore e lefuoe “Watch Tower Convention.” Sena se tumellanong le moea oa Pesaleme ea 96:8, e re khothaletsang ho ‘busetsa ho Jehova khanya e tšoanelang lebitso la hae; [le ho] tlisa linyehelo mabaleng a hae!’
12 Na Boitšoaro ba Hao bo Tla Tlisa Thoriso? Selemo ka seng ka mosa re hopotsoa ka bohlokoa ba boitšoaro bo botle ha re le kopanong. Ka ho hlakileng kamehla boitšoaro ba rōna bo lokela ho beha mohlala, empa ha re bokane ka bongata, ka tloaelo ba seng ’neteng ba a re hlahlobisisa. Boitšoaro ba rōna, ebang ke bo botle kapa bo bobe, bo ka bua haholoanyane ho feta boboleli ba rōna. Re batla hore Jehova a rorisoe ka seo re se buang le seo re se etsang.—Liprov. 27:2; 1 Pet. 2:12.
13 Ka mor’a Kopano ea Setereke ea “Thuto ea Bomolimo” ea selemong se fetileng, molebeli oa tšireletso o ile a hlokomela: “Sena ke sehlopha se setle ka ho fetisisa sa bana bao ke ileng ka tlameha ho ba lebela nako e telele.” Joale, ka mor’a ho hlalosa ka mekhoa e mebe le ho senyeha ha lihlopha tse ling tsa bacha, o ile a phaella tjena ka bana ba Lipaki: “Ba itšoere hantle ’me boteng ba bona ke bo thabisang. Ke lakatsa eka likopano tse ling tse tšoareloang mona li ne li ka ba joaloka ena.”
14 Mongoli e mong oa koranta o boletse sena mabapi le seo a se hlokometseng kopanong: “Basali le banana ba ne ba apere mese e metle, ’me banna le bashemane ba ne ba apere libaki ebile ba fasitse lithae. Ba ne ba nka lintlha ka khothalo ha ba ntse ba mametse libui ka matsatsi a mane. ’Me haeba bohloeki bo haufi le bomolimo, joale, Lipaki tsa Jehova li utloisisa khopolo eo ka tsela e phahameng.” Leha ho le joalo hase litlaleho tsohle tse bileng ntle joalo.
15 Likopanong tse ling ho ile ha tlalehoa hore ho ne ho e-na le lihlopha tse ngata tse ntseng li e-ea holimo le tlaase nakong ea mananeo, tseo boholo ba tsona e neng e le bacha, e leng ho bontšang hore ho hlokahala hore batsoali ba fane ka koetliso le kaloso tse eketsehileng. Lihlopha tse ntseng li e-ea holimo le tlaase li baka lerata le feteletseng le sitisang ba lekang ho mamela. Ba ’maloa ba na le lintho tse hlokahalang tseo ba lokelang ho li hlokomela nakong ea lenaneo, empa na rōna bohle ha rea lokela hore re be litulong tsa rōna, le ho mamela ka tsebe e lethoethoe?
16 Batsoali ba bangata ba bontša ho tiea baneng ba bona mabapi le ho ba teng libokeng tsa phutheho beke le beke. Na ka ho tšoanang ha baa lokela hore ba bontše ho tiea mabapi le ho etsa bonnete ba hore bana ba bona ba lutse pel’a bona ’me ha ba phaqole nakong ea lenaneo? Sebaka sa kopano se fetoloa Holo ea ’Muso e khōlō, empa tsamaiso ena ke ea Satane, ’me ho ka ba bonolo ho batho ba bolotsana ho kena mohahong oo ka merero e mebe. KA LINAKO TSOHLE HO HLOKAHALA HORE U TSEBE MOO BANA BA HAO BA LENG TENG LE SEO BA NTSENG BA SE ETSA.
17 Moaparo le Boitlhopho: Re phela mehleng eo ho shebahala u apere feela tjee, esita le ka mokhoa oa ho se tsotelle, ho talingoang ho amoheleha. Batho ba bangata ba ea kerekeng le likonsareteng kapa ba jella libakeng tsa ho ja ba apere ka tsela e sa hlophisoang ka ho feteletseng. Tlhaloso e qotsitsoeng serapeng sa 14 e bontša hore ho na le ba ntseng ba khahloa ke moaparo o hlomphehang, haholo-holo mabapi le borapeli bo hlophisitsoeng. Ho apara feela tjee ka mokhoa o sa tsotelleng, le ho itlhopha ka tsela e sa lokelang ho bolela ho hoholo ka rōna. Le ka mohla u se ke ua lebala hore sebaka sa kopano ha e sa le lebala la lipapali. Ke Holo ea ’Muso e atolositsoeng. Ba bang ba apara ka tsela e hlomphehang bakeng sa kopano empa ka mor’a mananeo ba ea libakeng tsa ho jela tse haufi le libakeng tse ling ba apere ka tsela e sa lokelang kapa e sa itekanelang.
18 Ho hlokahala hore ba eang kolobetsong ba hopotsoe hore liaparo tse itseng tsa ho tola ha lia lokela bakeng sa ketsahalo ena. Liaparo e lokela ho ba tse itekanetseng le tse khahlehang. Ke mang ea lokelang ho lekanyetsa see? Baholo baa ikarabella ho bona hore mang le mang ea kolobetsoang ea tsoang phuthehong ea habo bona ha a kholokhothehise ba bang ka tsela leha e le efe. (2 Ba-Kor. 6:3, 4) Sena se qhelela ka thōko liaparo tsa ho sesa tse bonaletsang le likipa tse nang le mapetjo a lefatše kapa phatlalatso. E tla ba ho loketseng hore baholo ba tšohle taba ena le motho ea eang kolobetsong ha ho hlahlojoa lipotso bukeng ea Tšebeletso ea Rōna.
19 Lihotele: Ho hlokahala hore re bontše litholoana tsa moea ka linako tsohle empa ka ho khethehileng ha re sebetsana le bahiruoa lihoteleng le libakeng tsa ho jela.
20 Thepa ea ho Rekota: Joalokaha ho boletsoe pejana, ho sebelisoa ha thepa e rekotang, ’me haholo-holo thepa ea ho rekota ea lik’hasete tsa video, ke qeto ea botho. Haeba u etsa qeto ea ho rekota, ka kōpo bontša ho nahanela ba pel’a hao. E ka ’na ea e-ba ho sitisang esita le haeba motho a rekota a ntse a le setulong sa hae. Ha ho motho ea lokelang ho sira ba tlileng kopanong hammoho le eena ha a theipa. Ho feta moo, ha ho thepa leha e le efe ea ho rekota e lokelang ho hokahanngoa tsamaisong ea motlakase kapa ea molumo, kapa hona ho koala litselana tsa holo kapa libaka tseo batho ba fetang ho tsona.
21 Litulo: Mathata a amanang le ho bolokoa ha litulo a ntse a lokeloa ho hlokomeloa. Re boetse re rata ho hopotsa e mong le e mong: LITULO LI KA BOLOKELOA FEELA LITHO TSE HAUFI TSA LELAPA LA HAO LE MOTHO LEHA E LE OFE EO U TSAMAEANG LE EENA KOLOING EA HAO. Likopanong tse ling ha mamati a buloa ka 7:30 hoseng ho hong le ho hong, baena le bo-khaitseli ba bangata ba ile ba mathela ka hare ho ea boloka likarolo tse khōlō tsa litulo ’me bongata ba litulo tseo ba neng ba li bolokile li ne li se na batho. Mekhoa ena ea ho se nahanele e bonahala e ntse e phehella ho sa tsotellehe likhopotso tsa kamehla. Na ha rea lokela ho hlahloba lipelo tsa rōna tabeng ena ’me re thuise ka melao-motheo e ho Ba-Filippi 2:3, 4?
22 Kopano ka ’ngoe e etsa litokisetso bakeng sa ba nang le litlhoko tse khethehileng, joaloka ba hōlileng le ba holofetseng ’meleng. Ka kōpo etsa bonnete ba hore ha u lule litulong tse likarolong tsena haeba u sa tšoanelehe. Hape, falimehela ho thusa ba nang le litlhoko tse khethehileng hore ba fumane litulo haeba ba sa tsamaee le motho e mong ea ikarabellang bakeng sa ho ba hlokomela.
23 Tšebeletso ea Lijo: Tšebeletso ea lijo e tla boela e e-ba teng hape likopanong tsohle. Re khothatsa bohle ba tlileng likopanong ho tšehetsa tokisetso ena.
24 Boholo ba Likopano tsa Setereke tsa “Tšabo ea Bomolimo” li tla tšoaroa ka December. Na u se u phethile litokisetso tsa hao, ’me hona joale u se u itokiselitse ho thabela matsatsi a mararo a botsoalle bo nyakallisang le lintho tse molemo tsa moea? Ke thapelo ea rōna e tiileng hore Jehova o tla hlohonolofatsa boiteko ba hao ba hore re kopane lehlabuleng lena le ho feptjoa tafoleng ea Jehova ea lintho tse molemo Kopanong ea Setereke ea “Tšabo ea Bomolimo.”
[Lebokose le leqepheng la 10]
Likhopotso Bakeng sa Kopano ea Setereke
Kolobetso: Ba eang kolobetsong ba lokela ho lula litulong tse khethehileng tseo ba li lokiselitsoeng pele lenaneo le qala ka Moqebelo hoseng. Ho hlokometsoe hore ba bang ba apara liaparo tse se nang seriti le tse hlomphollang ketsahalo eo. E mong le e mong ea rerang ho kolobetsoa o lokela ho tla le liaparo tse hlomphehang tsa ho sesa le thaole. Ka mor’a puo ea kolobetso le thapelo tse tla etsoa ke sebui, molula-setulo oa lenaneo o tla fana ka litaelo tse khutšoanyane ho ba eang kolobetsong ebe joale o bolela pina. Ka mor’a hore ho binoe mola oa ho qetela, bahlokomeli ba tla lebisa ba eang kolobetsong sebakeng sa qoeliso. Kaha kolobetso pontšong ea boinehelo ba motho ke taba ea lekunutu le ea botho pakeng tsa motho ka mong le Jehova, ha ho na tokisetso ea ho bitsoang likolobetso tsa balekane tseo ho tsona ba babeli ba eang kolobetsong ba hakanang kapa ba tšoaranang ka matsoho nakong eo ba kolobetsoang.
Libeche: Ka kōpo qhoaela beche ea 1994 kopanong le ha u e-ea kapa u khutla sebakeng sa kopano. Hangata sena se re nolofaletsa ho fana ka bopaki bo botle ha re ntse re tsamaea. Sena e bile ’nete ka tsela e totobetseng selemong se fetileng mabapi le likopano tse neng li tšoaretsoe Moscow le Kiev. U lokela ho iphumanela libeche le likoahelo ka phutheho ea heno, kaha li ke ke tsa fumaneha kopanong. Hopola ho nka karete ea hao ea Medical Directive e nakong. Litho tsa lelapa la Bethele le bo-pula-maliboho le bona ba lokela ho nka likarete tsa bona tsa boitsebahatso.
Tokisetso ea Marobalo: Re boetse re kōpa tšebelisano-’moho ea e mong le e mong ka ho sebelisa tokisetso ea bolulo e entsoeng ke kopano. Bangoli ba phutheho ba lokela ho tiisa hore Liforomo tsa Kōpo ea Kamore li romeloa kapele atereseng e loketseng ea kopano eseng ho Mokhatlo. Haeba u tlameha ho hlakola tokisetso ea bolulo e entsoeng, u lokela hore hang-hang u tsebise mong’a ntlo kapa hotele le ba Lefapha la Tokisetso ea Marobalo la kopano e le hore kamore e ka abeloa motho e mong. Likopanong tse ling ho ntse ho e-ba thata ka ho eketsehileng ho fumana bolulo bakeng sa baeti ba bangata ba tlileng kopanong. E le ho hlōla bothata bona likomiti tsa kopano li tla lokisetsa ho hira likolo le lidometeri tse haufi le sebaka sa kopano joalokaha ho ’nile ha etsoa nakong e fetileng. Leha ho le joalo ka lebaka la keketseho lenaneng la ba hlokang marobalo a mofuta ona re ntse re tla ’ne re sebelise seo ho thoeng ke “tokisetso ea dometeri.” Ka mantsoe a mang, bo-khaitseli le baena ba tla robala liphaposing tse arohaneng. Kahoo, ho ke ke ha hlola ho khoneha hore malapa a robale hammoho ka phaposing e le ’ngoe. (Ka kōpo bona setšoantšo se ho Tsoha! ea January 8, 1992, leqephe 29.) Sena se ka ’na sa ipaka se sitisa ho ba bang empa re kholisehile hore bohle ba tla utloisisa lebaka la sena. Tokisetso ena e se e kile ea sebelisoa likopanong tse ling ’me ea atleha haholo.
Likoloeana tsa Bana (Prams): Lefapha la Mollo le khothaletsa hore likoloeana tsena li se ke tsa kena ka holong ea kopano ebe li behoa liphasejeng le litselaneng tsa holo kapa pakeng tsa mela ea litulo. Kaha letšoele le leholo la batho le ka baka tšubuhlellano, likoloeana tsa bana li ka ba kotsi eseng feela ho bana empa le ho motho ofe le ofe eo li ka mo khopang. Kahoo ka kōpo se keng la kena le tsona ka holong ea kopano. Leha ho le joalo, litulo tsa masea kapa tseo a behoang ho tsona ka koloing li lumeletsoe, kaha li ka sireletsoa litulong tse pel’a batsoali. Tšebelisano-’moho ea hao tabeng ena ea ananeloa.
Tšebeletso ea Boithaopo: Na u ka behella nako e itseng ka thōko kopanong bakeng sa ho thusa lefapheng le leng? Ho sebeletsa baena ba rōna, esita le haeba e le ka lihora tse seng kae feela, e ka ba ho thusang haholo le ho tlisang khotsofalo e khōlō. Haeba u ka khona ho thusa, ka kōpo itlhahise Lefapheng la Tšebeletso ea Boithaopo kopanong. Bana ba lilemo tse ka tlaase ho 16 le bona ba ka etsa tlatsetso e ntle ka ho sebetsa tlas’a tataiso ea motsoali kapa motho e mong e moholo ea nang le boikarabelo.
Lipina: Kaha ho bina ke karolo ea borapeli ba rōna re khothaletsa bohle ho ithuta lipina tse latelang tseo e tlang ho ba karolo ea lenaneo: 53, 175, 85, 79, 187, 155, 19, 13, 47, 180, 177, 113, 143, 191, 33, 114, le 222. (Re khothaletsa hore liphutheho li qale ho ithuta bonyane pina e le ’ngoe ka mor’a seboka ka seng.)
Seboka sa Bethele: Ho tla ba le seboka letsatsing la bobeli la kopano bakeng sa bahoeletsi leha e le bafe ba inehetseng ba pakeng tsa lilemo tse 19 le 35 ba ka ratang ho kenela tšebeletso ea Bethele. Ho tla etsoa litsebiso kopanong mabapi le nako le sebaka seo seboka sena se tlang ho tšoareloa ho sona.
Tlhokomeliso: Ka ho falimehela mathata a ka ’nang a hlaha, re ka ipoloka mathateng a sa hlokahaleng. Hangata masholu le batho ba bolotsana ba tla senyetsa batho ba hōle le tikoloho ea lehae la bona. Tiiseha hore koloi ea hao e notletsoe ka linako tsohle, ’me le ka mohla u se siee letho le bonahalang le ka lekang motho hore a thuhe le ho kena. Masholu le litsotsi ba khona ho k’hothotsa haholo lipokanong tse khōlō. E ke ke ea e-ba bohlale ho siea lintho tsa hao leha e le life tsa bohlokoa setulong. U ke ke ua kholiseha hore e mong le e mong ea pel’a hao ke Mokreste. Ke hobane’ng ha u ka ba hohela ka ntho leha e le efe? Ho amohetsoe litlaleho tsa batho ba kantle ba ileng ba leka ho hohella bana hore ba tlohe sebakeng sa kopano. LULA U BONA BANA BA HAO KA LINAKO TSOHLE.
Ho tlalehiloe hore lihotele tse ling habonolo feela li fana ka tumello ea ho shebella libaesekopo tsa thelevishene tse nang le boitšoaro bo bobe kapa esita le litšoantšo tsa bootsoa. Sena se totobatsa tlhokahalo ea ho thibela bana ho shebella TV ba sa behoa leihlo libakeng tsena tsa ho robala.
Ka kōpo u se ke ua letsetsa batsamaisi ba mehaho ea kopano u batla boitsebiso mabapi le litaba leha e le life tsa kopano. Haeba boitsebiso bo sa fumanehe ho baholo, joale ngolla Komiti ea Kopano ka mor’a ho fumana aterese ho mongoli oa phutheho.