Thuto ea Buka ea Phutheho e Ntšetsa Pele Mesebetsi ea ho Ruta
1 Thuto ea Buka ea Phutheho e phetha karolo ea bohlokoa haholo lenaneong la mokhatlo o hlophisitsoeng oa Jehova la ho ruta. Lihlopha tsa thuto ea buka li mona le mane ho pholletsa le tšimo eohle, e leng ho etsang hore ho be bonolo hore bohle ba be teng. Kaha thuto e tšoareloa sebakeng seo ba leng ho sona, ba thahasellang ba ka amohela memo ea ho ba teng habonolo haholoanyane.
2 Ho etsoa boiteko ba ho boloka sehlopha ka seng se le senyenyane. Sena se lumella mokhanni hore a fane ka thuso ea botho ho e mong le e mong. Hase bohle ba nang le matla a lekanang a ho ithuta. Haeba leha e le mang a e-na le bothata ba ho utloisisa ntlha esita le ka mor’a ho ithuta eona esale pele, mokhanni a ka e tšohla ka ho eketsehileng ka mor’a thuto. Ho feta moo, sehlopheng se senyenyane ho na le menyetla e eketsehileng ea ho fana ka litlhaloso le ho kopanela ho baleng mangolo. Na u tlatsetsa puisanong ka ho fana ka litlhaloso kamehla? Na u leka ho araba ka mantsoe a hao? Boikemisetso ba hao ba ho nka karolo bo tla ba molemo ho uena le ho ba bang. Ha u lokisetsa, sebelisa matla a hao a ho lemoha e le hore u ka hlalohanya kamoo u ka sebelisang lintlha tse itseng tsa seo le ithutang sona.—Ba-Heb. 5:14.
3 Ka ho hlokomela mekhoa ea ho ruta e sebelisoang ke mokhanni oa thuto ea buka, u ka ithuta mokhoa oa ho khanna lithuto tsa lehae tsa Bibele ka tsela e thahasellisang le e rutang haholoanyane. Ka mor’a hore moena ea tšoanelehang a bale lirapa, ho tšohloa lipotso. Mokhanni oa thuto ea buka o khothalletsa bohle hore ba bue. Ha nako e lumela, o leka ho batla litlhaloso tsa bamameli mangolong a bontšitsoeng e le ho re thusa hore re utloisise kamoo a sebetsang kateng. (Bapisa le Nehemia 8:8.) Ka linako tse ling a ka phaella ka ho etsa tlhaloso e khutšoaane e hlakisang kapa a sebelise lipotso tse thusang bakeng sa ho ntša ntlha ea bohlokoa. Mohlala kapa papiso o ka thusa hore re bone kamoo boitsebiso bo amang bophelo ba rōna.
4 Lenane la ba bang teng libokeng tse ling tsa Thuto ea Buka ea Phutheho le batla le le tlaase. Na u ba teng kamehla? Haeba ha ho joalo, u ’nile ua fetoa ke tokisetso ea bohlokoa. Tokisetso ea thuto ea buka ke e ’ngoe ea litsela tseo Jehova a bontšang tlhokomelo ea hae ho rōna ka eona. (1 Pet. 5:7) O batla hore re hatele pele tsebong le bohlaleng e le hore re ka ba matla moeeng. Ka lehlakoreng le leng, Satane o lakatsa ho liehisa khōlo ea rōna ea moea le ho re fokolisa e le hore re ka se be le thuso e kaalo ho Jehova le mokhatlo oa Hae o hlophisitsoeng. U se ke ua lumella hore sena se etsahale! Lumella boemo bo mofuthu, bo lerato bo leng sehlopheng sena se atamelaneng bo ame pelo ea hao ’me bo u susumelletse ho tsoela pele u rorisa Jehova.—Bapisa le Pesaleme ea 111:1.
5 Liboka tsa tšebeletso tse leng moo ho leng bonolo hore bahoeletsi ba be teng li lokiselitsoe hore li tšoaroe libakeng tse ngata tsa moo ho tšoaroang thuto ea buka. Tsena e ka ba bakeng sa bopaki ba har’a beke, mafelo-beke, kapa ho paka mantsiboea. Mokhanni oa thuto ea buka o tiisa hore ho na le tšimo e lekaneng ’me ho na le motho ea tla ba teng ho etella pele tšimong. Liboka tsa tšebeletso ea tšimo li lokela hore li se nke metsotso e fetang e 10 ho ea ho e 15. Mokhanni a ka tšohla ka bokhutšoaane temana ea letsatsi haeba e ama mosebetsi oa rōna oa ho bolela ’me a fana ka tlhahiso e le ’ngoe kapa tse peli tse tobileng tsa tšebeletso ea tšimo kapa a etsa pontšo e khutšoaane ka sengoliloeng se tsamaisoang ka nako eo.
6 Ha nako e ntse e feta mokhanni o leka ho sebetsa le motho ka mong sehlopheng sa hae, a fana ka khothatso e hlokahalang le koetliso.—Bapisa le Mareka 3:14; Luka 8:1.