Tokisetso ea Thuto ea Buka ea Phutheho

Karolo 3: Setsi sa Tšebeletso ea Tšimo

¹ Ho phaella ho faneng ka sebaka sa sehlopha sa thuto ea buka, sebaka seo ho tšoareloang Thuto ea Buka ea Phutheho ho sona ho ka kopaneloa ho sona bakeng sa tšebeletso ea tšimo. Nako e behiloeng bakeng sa liboka tse joalo e lokela ho ba e loketseng bakeng sa bahoeletsi ba bangata, ’me liboka li lokela ho fana ka thuso e sebetsang mabapi le ho hlophisa bahoeletsi bakeng sa tšebeletso ea tšimo.

² Lihlopha tse hlophisitsoeng hantle bakeng sa thuto le tšebeletso lia matlafala moeeng. Ke mang ea e-s’o rue molemo khothatsong kapa litlhahisong tse mabapi le kamoo ho ka sebetsanoang le likhanyetso, kamoo ho ka qalisoang puisano, kamoo ho ka nehelanoang ka thuto ea Bibele, kapa seo re ka se buang leetong la ho boela? Bahoeletsi le bo-pula-maliboho ba bang ba kopanelang sebakeng seo ho tšoareloang thuto ea buka ho sona ba fana ka thuso e joalo.—Ba-Gal. 6:9, 10.

³ Karolo ea Mokhanni: Mokhanni oa Thuto ea Buka ea Phutheho o etella pele ’me ke eena ea ikarabellang bakeng sa ho hlophisa mosebetsi oa sehlopha. Nako le nako o sebetsa le bahoeletsi tšimong. (1 Pet. 5:2, 3) Liboka tsa tšebeletso tse lokiselitsoeng hantle li fana ka thuto ea Mangolo le e sebetsang ho hlomella sehlopha bakeng sa tšimo. Hangata, ho ka ba molemo ha sehlopha ka seng sa thuto ea buka se ka ba le seboka sa sona sa tšebeletso ea tšimo ho fapana le hore lihlopha tsohle li kopane sebakeng se le seng. Leha ho le joalo, haeba ho hlokahala lihlopha tse peli tse nyenyane li ka kopanngoa. Ha tšebeletso ea tšimo e etsoa ka mor’a Thuto ea Molula-Qhooa, seboka sa tšebeletso ea tšimo e lokela ho ba se sekhutšoaane. Ka mor’a moo, mokhanni e mong le e mong oa thuto ea buka o tla hlokomela sehlopha sa hae.

⁴ Litokisetso tse tsitsitseng tsa tšebeletso ea tšimo li khothalletsa bohle ho kopanela ka mehla tšebeletsong. Haeba liboka tsa tšebeletso li tšoaroa ka nako e lokiselitsoeng le sebakeng se lokiselitsoeng, bahoeletsi ba tla etsa litokisetso tse loketseng, ba tla khothatsoa ke ho tseba hore ho na le tšimo e tla sebetsoa le hore ho na le ba bang bao ba tla sebetsa le bona. (Bapisa le Luka 10:1.) Esita le haeba mokhanni oa thuto ea buka a ke ke a ba teng, o fana ka tšimo ’me o etsa litokisetso bakeng sa sehlopha. (omSU maq. 44-5) Haeba moena ea tšoanelehang ea ka khannang seboka sa tšebeletso a le sieo, mokhanni a ka ’na a abela khaitseli hore a se khanne. (omSU maq. 77-8; kmSU 3/88 leq. 3) Ho ka qojoa pherekano ha sehlopha se kopana ka mehla ka nako e tloaelehileng le sebakeng se tloaelehileng bakeng sa tšebeletso. Haeba ho khoneha, liphetoho leha e le life tsa nakoana li lokela ho phatlalatsoa beke esale pele.

⁵ Ho Hlokahala Tšebelisano-’moho: Bo- hle ba lokela ho loanela ho kopanela ka mafolo-folo litšobotsing tse sa tšoaneng tsa tšebeletso ea tšimo. Bahoeletsi ba ka ikemisetsa ho lokisetsa mananeo a ho ikoetlisa hammoho, ba sebelisa likhanyetso tsa sebele le maemo a sebele a ka ’nang a hlaha tšimong ea bona.—Liprov. 27:17.

⁶ Na u rata hore mohoeletsi ea nang le phihlelo a u thuse ho ba hloahloa haholoanyane mosebetsing oa ho etsa barutuoa? Haeba ho joalo, bua le mokhanni oa Thuto ea Buka ea Phutheho ea heno. Mohlomong a ka khona ho lokisetsa hore mohoeletsi ea tšoanelehang a u thuse. Hore u rue molemo ho sena, sebelisa ka khothalo litlhahiso tseo u li fumaneng ’me u boloke litokisetso tseo u li entseng tsa ho kopana le batho.

⁷ Bao mokhanni oa thuto ea buka a ba abetseng hore ba thuse ba bang ba lokela ho fana ka thuso ’me ba se ke ba lebella mohlolo. Phihlelo e bontšitse hore ba nang le pono e kholisehileng le e leka-lekaneng ka tšebeletso ea tšimo le ba sebelisang katamelo e sebetsang ba tšoaneleha hamolemo bakeng sa ho koetlisa ba bang. (kmSU 8/79 maq. 1, 4; kmSU 10/79 leq. 3) Pabatso e lokela ho fanoa ka linako tsohle ha ho na le khatelo-pele. Joale ho ka behoa lipakane tse ling.—Bapisa le Luka 19:17-19.

⁸ Re batla ho thusana ho atleha boboleling ba litaba tse molemo le ho etseng barutuoa. Maemo a lefatše a ntseng a mpefala a paka hore mosebetsi ona o potlakile. Bophelo bo tsietsing, ’me Jehova o ntse a potlakisa ho bokelloa ha batho. (Esa. 60:22) Ha re ntse re hopola tšebeletso eo re e fuoeng, re tla sebetsa haufi-ufi le sehlopha sa Thuto ea Buka ea Phutheho bakeng sa ho phethahatsa kabelo ea rōna ka botlalo ha re ntse re tšehetsana le ho khothatsana.—Ba-Roma 12:6-8; 2 Tim. 4:1, 2, 5.