Tokisetso ea Thuto ea Buka ea Phutheho
Karolo 1: Boikarabelo ba Mokhanni oa Thuto
1 Thuto ea Buka ea Phutheho e phetha karolo ea bohlokoa khōlong ea moea ea batho ba Jehova. Likhoeling tse tlang, re tla hlahloba litšobotsi tse fapa-fapaneng tsa tokisetso ea Thuto ea Buka ea Phutheho ’me re hlahlobe kamoo re ka ruang molemo ho eona. Tokollong ena re batla ho lebisa tlhokomelo mabapi le kamoo mokhanni oa thuto ea buka a ka etsang hore thuto e be e khothatsang le e matlafatsang tumelo.
2 E le hore mokhanni oa thuto ea buka a ka atleha mabapi le tsela eo a rutang ka eona, o lokela ho lokisetsa hantle. Joaloka seithuti se tiileng sa Lentsoe la Molimo, ha aa lokela ho tseba feela karabo ea potso ka ’ngoe empa o boetse o lokela ho utloisisa lebaka leo karabelo eo e nepahetseng ka lona. Boiteko ba hae e lokela ho ba ho thusa bohle ba leng thutong ho tseba mabaka ao likarabo li fanoang ka ’ona. (1 Pet. 3:15) Hona ho tla tebisa kananelo ea bona bakeng sa boitsebiso.
LIPAKANE TSA HO KHANNA THUTO
3 Pakane e ’ngoe ea mokhanni ke ho sebelisa boitsebiso bo ithutoang ho matlafatsa tumelo ea bohle ba leng teng le ho ba susumelletsa ho etsa thato ea Molimo ka botlalo haholoanyane. (Pes. 110:3; 2 Ba-Thess. 1:3-5) Hore a finyelle sena, mokhanni o lokela ho khefutsa libakeng tse loketseng ho ‘hlakisa’ lintlha tse hahang kholiseho e tiileng ho Jehova, Lentsoeng la hae, le mokhatlong oa hae o hlophisitsoeng. (Ba-Gal. 6:6, NW, Ref. Bi. mongolo o botlaaseng ba leqephe) Ho ka sebelisoa lipotso tse bōpuoeng ka bohlale e le hore bohle ba ka hlakisa lintlha tsena tse hahang tumelo haeba nako e lumela.
4 Pakane e ’ngoe ke ho thusa bohle ho bona kamoo ba ka sebelisang boitsebiso boo ka tsela e sebetsang. Ba ka bo sebelisa joang tšebeletsong ea tšimo? Ba ka bo sebelisa joang ho khothatsa baena haesita le ba bacha ’neteng? Ba ka bo sebelisa joang ho matlafatsa malapa a bona le bona ka bobona? Ha bakhanni ba Thuto ea Buka ea Phutheho ba lokisetsa thuto ka ’ngoe, ba lokela ho leka ho lemoha kamoo lintlha tse khethehileng thutong li ka sebelisoang ka teng ka tsela e sebetsang.
5 Boitsebiso bo itseng bo ka sebelisoa ho thusa beng ka rōna ba sa lumelang, bao re kenang sekolo le bona, kapa bao re sebetsang le bona. Boitsebiso bo bong bo ka thusa ba phelang malapeng a arohaneng kapa mohlomong ba phelang malapeng a motsoali a le mong. Mokhanni a ka thusa ba leng teng hore ba behe mabaka ka ho fana ka litlhaloso ’me ba bone kamoo ba ka sebelisang boitsebiso boo ho buisanoang ka bona ka tsela e sebetsang. Mokhanni o lokela ho loanela ho boloka thuto e thahasellisa, e se ke ea e-ba feela ho akaretsa boitsebiso ka lipotso le likarabo.—Bapisa le 1 Ba-Korinthe 14:9, 19.
BONTŠA THAHASELLO EA BOTHO
6 Ka ho bontša thahasello ea botho ho e mong le e mong sehlopheng, mokhanni a ka khothalletsa hore bohle ba kopanele ka ho felletseng ka ho fana ka litlhaloso. Ba boi ba ka ’na ba abeloa esale pele hore ba bale mangolo, kapa ba ka ’na ba fuoa potso esale pele hore ba lokisetse ho e arabela. Bohle ba lokela ho loanela ho arabela ka mantsoe a bona. Ka ho mamela likarabelo ka hloko, mokhanni a ka hlokomela haeba ba bang ba hloka thuso ea botho. A ka sebelisa ba bang ba nang le phihlelo sehlopheng ho thusa ho fana ka tlhokomelo e joalo ea botho.
7 Thuto ea Buka ea Phutheho ke tlhohonolofatso ho rōna. E re fa monyetla oa ho bokana ka lihlopha tse nyenyane le ho fumana tlhokomelo e eketsehileng ea botho. Le ka mohla ha rea lokela ho e talima e le ea bohlokoa bo fokolang ho feta liboka tse ling. Mokhanni oa Thuto ea Buka ea Phutheho ea heno o nka boikarabelo ba hae ka ho teba ba ho sebelisa thuto ka ’ngoe ho matlafatsa tumelo ea hao ho Jehova le ho haha kananelo ea hao bakeng sa litokisetso tsa Molimo tsa moea.