Ho Sebelisana-’moho le Mokhanni oa Rōna oa Thuto ea Buka ea Phutheho
1 Thuto ea Buka ea Phutheho e phetha karolo ea bohlokoa tabeng ea ho hōlisa bokhoni ba rōna re le basebeletsi ba litaba tse molemo. Lihlopha li bolokoa li le nyenyane ho etsa hore ho be teng moea o mofuthu, o kang oa lapeng bakeng sa ha ho ithutoa Bibele le e ’ngoe ea likhatiso tsa Mokhatlo. Lihlopha tsena tse nyenyane li boetse li fana ka maemo a lakatsehang a ho re koetlisa hore re be ba atlehang haholoanyane tšebeletsong ea tšimo. Ho bonolo hore motho ka mong a fuoe khothatso ea botho le tlhokomelo ka tokisetso ea thuto ea buka ea phutheho. Re ka sebelisana-’moho joang ka botlalo le mokhanni e le hore re ka rua molemo tokisetsong ee e ntle?
2 Karolo e Mahlaha-hlaha Tšebeletsong ea Tšimo: Bo bong ba boikarabelo ba bohlokoa ka ho fetisisa ba mokhanni oa thuto ea buka ke ho thusa setho se seng le se seng sa sehlopha hore se be le karolo e mahlaha-hlaha tšebeletsong. Tabeng ena, buka Tšebeletso ea Rōna ho leqephe 44 e re hopotsa hore “haeba a tsoela tšebeletsong ea tšimo ka mehla, ka cheseho le ka thabo ho tla bonahala le ho bahoeletsi.” Ka linako tse ling mokhanni o tla kopanela tšebeletsong le litho tsa lelapa la hae, empa o tla boela a thabele ho kopanela le ba bang litšobotsing tse sa tšoaneng tsa tšebeletso ha maemo a hae a lumela. Na u ka tšehetsa liboka tsa tšebeletso ea tšimo ka mehla? Ho etsa joalo ha hao ho tla ananeloa haholo ke mokhanni oa hao oa thuto ea buka ea phutheho le ke bahoeletsi ba bang.
3 Liboka tsa tšebeletso ea tšimo li lokisetsoa hore li be libakeng tse loketseng e le hore bohle ba ka ba le karolo e mahlaha-hlaha mosebetsing oa boboleli. E le ha re nahanela maemo a leng sebakeng sa rōna, sehlopha ka seng se tla batla ho qala esale ka nako tšebeletsong. Bahoeletsi ba bangata le bo-pula-maliboho ba atleha haholo ha ba tsoela pele ka tšebeletso ka mor’a motšehare o moholo mafelo-beke.
4 Na u ka thabela ho fumana thuso tšobotsing e ’ngoe ea tšebeletso? Mohlomong mokhanni oa hao oa thuto ea buka a ka lokisetsa hore mohoeletsi ea atlehang ea leng sehlopheng sa lōna a sebetse le uena. Bofelong ba khoeli, tiisa hore u tlisa tlaleho ea hao ea tšebeletso ea tšimo hang-hang. Mokhanni oa thuto ea buka le mongoli ka ho tšoanang ba tla ananela tšebelisano-’moho ea hao ntlheng ena ea bohlokoa.—Bapisa le Luka 16:10.
5 Ha Molebeli oa Tšebeletso a Etela Sehlopha: Hangata molebeli oa tšebeletso o etela sehlopha se le seng sa thuto ea buka ka khoeli e le ho khothaletsa hore ho etsoe mosebetsi o moholoanyane le o nang le moelelo haholoanyane tšebeletsong ea tšimo. Mamelisisa ka hloko puo ea metsotso e 15 eo a tla nehelana ka eona qetellong ea thuto ea buka, kaha e tla fana ka keletso e tobileng e tla thusa sehlopha hore se ntlafatse litšobotsing tse sa tšoaneng tsa mosebetsi oa boboleli. Molebeli oa tšebeletso o boetse o thahasella ho sebetsa le litho tse sa tšoaneng tsa thuto ea buka ka mafelo-beke. Tiisa hore u sebelisa tokisetso ena e khethehileng hamolemo e le hore u ka rua molemo ho tsoa phihlelong le katlehong ea hae tšimong.
6 Mohlala oa rōna oa botho oa tšebelisano-’moho le boikemisetso ba rōna ho thusa ba nang le phihlelo e fokolang li tla thusa ho etsa hore ho be le tikoloho e mofuthu, e nang le botsoalle Thutong ea Buka ea Phutheho ha re ntse re ‘etsa bohle hantle, empa haholo ba ntlo ea tumelo.’—Ba-Gal. 6:10.