U Behetse Bana ba Hao Lipakane Life?
1 Bophelong katleho e itšetlehile ka ho beha le ho finyella lipakane tse molemo. Ba phehellang lipakane tsa lefeela kapa tse sa utloahaleng ba fella ka masoabi ’me ha ba finyelle letho. Ho hlokahala bohlale bakeng sa ho lemoha lipakane tseo re lokelang ho li phehella e le hore re ka “tšoara ka tieo bophelo ba sebele.” (1 Tim. 6:19, NW) Re leboha hakaakang hore ebe Jehova, ka Lentsoe la hae le mokhatlo o hlophisitsoeng, o re bontša ka ho toba tsela eo re tlamehang ho tsamaea ka eona!—Esa. 30:21.
2 Ha a fana ka tataiso e lerato joalo, Jehova o behela batsoali mohlala o motle. Ho e-na le ho lumella bana ba bona ba hlokang phihlelo hore ba ikhethele tsela e molemohali, batsoali ba bohlale ba ba koetlisa tseleng eo ba lokelang ho e latela, ’me ha ba hōlile, “[ba] ke ke [ba] e kheloha.” (Liprov. 22:6) Batsoali ba Bakreste ba tseba ka phihlelo hore ba ke ke ba tšepa kahlōlo ea bona ka bobona; ba tlameha ho itšetleha ka Jehova. (Liprov. 3:5, 6) Ho hlokahala hore bana, ba nang le tsebo e fokolang le phihlelo ba etse sena haholoanyane.
3 Batsoali ba ka behela bana ba bona lipakane tse molemo tse tla ba thusa hore ba lebise tlhokomelo ‘litabeng tse fetisisang ka molemo.’ (Ba-Fil. 1:10) Ba ka qala thutong ea lelapa, ba khothalletsa bana ba bona hore ba ananele bohlokoa ba eona le ho ithuta ho eona. Ho molemo hore bana ba be le mokhoa oa ho ithuta esale pele bakeng sa liboka tsa phutheho le ho itokisetsa ho arabela ka mantsoe a bona. Ho kopanela kamehla mosebetsing oa boboleli ho bohlokoa. Bana ba banyenyane ba ka tlatsetsa ka ho tsamaisa lipampitšana, ho bala mangolo kapa ho buella limakasine. Ha ba khona ho bala, ho ngolisa Sekolong sa Tšebeletso sa Puso ea Molimo ho ka potlakisa khōlo ea bona ea moea. Ho tšoaneleha ho ba mohoeletsi ea sa kolobetsoang kapa ho tšoaneleha bakeng sa kolobetso ke mohato o moholo o eang pele.
4 Ha bana ba bona ba atamela lilemong tsa bocha, kapa esita le pejana ho moo, batsoali ba lokela ho buisana le bona ka ho utloahalang ka lipakane tsa mosebetsi. Baeletsi ba sekolo le liithuti-’moho le bona ba ka ba susumetsa ka bonolo hore ba khethe lipakane tsa lefatše, tsa lintho tse bonahalang. Batsoali ba lokela ho thusa bana ba bona hore ba khethe lithuto tsa sekolo tse tlang ho ba fa koetliso e sebetsang, li ba hlomelle hore ba hlokomele litlhoko tsa bona tsa lintho tse bonahalang ho sa hlokahale hore ba tele lithahasello tsa ’Muso. (1 Tim. 6:6-10) Ba ka khothalletsoa ho phehella “mpho” ea bosoha e tle ere hamorao, haeba ba rera ho kena lenyalong, ba be ba le boemong ba ho jara boikarabelo bo boima ba lenyalo. (Matt. 19:10, 11, NW; 1 Ba-Kor. 7:36-38) Ho bua hantle ka bopula-maliboho, ho sebeletsa moo tlhokahalo e leng khōloanyane, tšebeletso ea Bethele, kapa mosebetsi oa boromuoa ho ka kenya ka ho bana leha ba sa le banyenyane takatso ea ho sebelisa bophelo ba bona ka tsela e thabisang Jehova, e tsoelang ba bang molemo, le e ba tlisetsang tlhohonolofatso.
5 Hase ntho ea tšohanyetso hore ebe kajeno re na le bacha ba bangata hakana mokhatlong o hlophisitsoeng ba tšoareletseng litekanyetsong tse phahameng tsa Bokreste le ho phehella lipakane tsa puso ea Molimo. Ba bile le katleho e khōlō ka lebaka la batsoali ba lerato. Haeba u motsoali, ho bonahala bana ba hao ba lebile hokae? Na ba hatela pele bophelong bo thehiloeng lithahasellong tsa ’Muso? Hopola, e ’ngoe ea lintho tsa bohlokoa ka ho fetisisa tseo u ka li etsang ke ho kenya ’nete ka ho bana ba hao le ho bua ka eona letsatsi le leng le le leng. U ka ’na ua hlohonolofatsoa ka lelapa le sebeletsang Jehova ka botšepehi.—Deut. 6:6 7; Josh. 24:15.