Kopano ea Setereke ea 1997 ea “Tumelo Lentsoeng la Molimo”
1 Moapostola Pauluse o ile a hopotsa Timothea hore “Lengolo lohle le bululetsoe ke Molimo.” (2 Tim. 3:16) Kaha Lentsoe la Molimo le bululetsoe, re na le mabaka ’ohle a ho bontša tumelo ho lona. Sehlooho sa kopano ea setereke ea selemong sena ke “Tumelo Lentsoeng la Molimo.” Lenaneo le tla matlafatsa tumelo ea rōna Bibeleng, ebang re tsebile ’nete ka lilemo tse ngata kapa ebang re sa tsoa kopanela le mokhatlo o hlophisitsoeng oa Jehova. Kaofela ha rōna re lokela ho lokisetsa ho ba teng lenaneong lohle. E tla ba ho matlafatsang hakaakang haeba batho ba sa tsoa thahasella, haholo-holo bao re ithutang Bibele le bona, ba ka ba teng hammoho le rōna!
2 Kopano ea Matsatsi a Mararo: Selemong sena ho lokiselitsoe kopano ea setereke ea matsatsi a mararo molemong oa rōna. Hona joale le se le tsebisitsoe kopano eo phutheho ea lōna e abetsoeng ho eona, ’me u lokela hore ebe u se u entse litokisetso tse tiileng tsa ho ba teng matsatsing ’ohle a mararo a lenaneo. Na u se u buisane le mohiri oa hao ho kōpa nako ea ho se be teng mosebetsing? Haeba u e-na le bana ba kenang sekolo ’me kopano e tla tšoaroa pele likolo li koaloa, na ka mosa u tsebisitse matichere a bona hore ba tla ba sieo sekolong ka Labohlano leo bakeng sa karolo ena ea bohlokoa ea koetliso ea bona ea bolumeli?—Deut. 31:12.
3 Leqepheng la 9 la kenyelletso ena ho thathamisitsoe matsatsi le libaka tsa likopano tse tlang. Ho phaella kopanong ea Senyesemane, ho tla ba le likopano tsa Seafrikanse, Sekwanyama, Sepedi, Sepotoketsi, Sesotho, Setsonga, Setswana, Sevenda, Sexhosa, Sezulu esita le tsa Puo ea Matsoho libakeng tse tharo. Letsatsi ka leng lenaneo le tla qala ka 9:30 hoseng ’me le fele ka Sontaha hoo e ka bang ka 3:20 thapama.
4 Etsa Hantle ka ho Mamela ka Hloko: Moapostola Petrose o ile a hopotsa Bakreste ba lekholong la pele la lilemo hore ba tla be ba etsa hantle ha ba ela hloko lentsoe la boprofeta le tšoanang le lebone le khanyang sebakeng se lefifi. (2 Pet. 1:19) Ke ’nete le ka rōna. Ho phela lefatšeng lena la khale le tlas’a taolo ea Satane ho tšoana le ho ba sebakeng se lefifi. Re leboha hore ebe re ntšitsoe lefifing la moea. (Bakol. 1:13; 1 Pet. 2:9; 1 Joh. 5:19) Hore re lule leseling leo, ho hlokahala hore re boloke tumelo ea rōna e le matla ka ho ela hloko Lentsoe la Jehova le bululetsoeng. Kopano ea rōna ea setereke lehlabuleng lena e tla re khothalletsa ho etsa joalo.
5 Ho ka ’na ha hlokahala boiteko ho rōna haeba re tla tsitsisa mohopolo lenaneong, empa ka sebele re tla hlohonolofatsoa ha re etsa joalo. Re lokela ho etsa boiteko ba ho tla sebakeng sa kopano re phomotse hantle e le hore re ka lula re falimehile nakong ea mananeo. Etsa bonnete ba hore u fihla pele ho nako sebakeng sa kopano letsatsi le letsatsi hore u be litulong pele lenaneo le qala. Joale kopanela pineng e bulang le thapelong qalong ea lenaneo la letsatsi ka leng. Batho ba baholo ba lokela ho beha mohlala, ’me batsoali ba lokela ho koetlisa bana ba bona.—Baef. 6:4.
6 Haeba re hlahloba lihlooho tsa likarolo tsa lenaneo la letsatsi pele le qala, re ka leka ho nahana ka lintlha tse tla nehelanoa lenaneong. Sena se tla hōlisa thahasello ea rōna boitsebisong nakong eo bo fanoang. Re ka ela hloko lintlha tse tlang ho re thusa ho bolella ba bang lebaka leo re lumelang ho Molimo ka lona le tšepiso ea hae e tiileng ea ho putsa bohle ba mo batlang ka tieo. (Baheb. 11:1, 6) Ho etsoa tlhahiso ea hore re ngole lintlha tse khutšoanyane tse tla re thusa ho hopola lintlha tsa sehlooho tsa lenaneo. Haeba re ngola lintlha tse ngata haholo, re ka fetoa ke lintlha tse ling tsa bohlokoa kahobane re phathahantsoe ke ho ngola.
7 Selemong se fetileng ho ile ha boela ha bonoa batho ba baholo ba bangata le bacha ba solla liphasejeng, ba nyolosa le ho theosa ka ntle, ba iqoqela ha lenaneo le ntse le tsoela pele ho e-na le ho mamela seo “lekhoba le tšepahalang le le masene” le nehelanang ka sona molemong oa rōna. Jesu o tšepisitse ho re neha lijo tsa moea ka nako e tšoanetseng. (Mat. 24:45-47) Ka lebaka leo, re lokela ho ba teng ho rua molemo lijong tseo hape re se ke ra bontša ho haelloa ke kananelo. (2 Bakor. 6:1) Ho boetse ho bonahala hore bana ba bang ha ba khathala, hangata ba kōpa ho ea ntloaneng e le lebaka la ho ema le ho solla. Hangata koetliso e loketseng lapeng e tla etsa hore ho ea ntloaneng hangata ka ho sa hlokahaleng ho fokotsehe. Ka linako tse ling, bacha ba baholoanyane ba lulella thōkoana, baa bua, baa hoeshetsa le ho ngollana melaetsa. Bacha ba rōna, ba talimaneng le likhatello tse ngata kajeno, ho hlokahala hore ba tsitsise mohopolo boitsebisong bo boleloang, ’me ba se etse lintho tse ling nakong ea lenaneo. Litakatso tsa bocha tse sa lumellaneng le melao-motheo ea Bibele li lokela ho qojoa. (Bapisa le 2 Timothea 2:22.) Ho falimeha ha bohle, batho ba baholo le bacha ho tla hlompha Jehova le ho mo thabisa.
8 Haeba ho hlokahala hore e mong oa bahlokomeli a nehe leha e le mang keletso litabeng tsena, keletso ea bona e lokela ho nkoa e le tokisetso e lerato e tsoang ho Jehova. (Bagal. 6:1) Ho hlokahala hore bohle ba hopole hore lebaka la ho ikitlaetsa ha rōna ho tla kopanong ke hore re ‘mamele le ho ithuta.’ (Deut. 31:12) Hape, “motho ea bohlale o tla mamela le ho amohela taeo e eketsehileng.” (Liprov. 1:5, NW) Nakong e setseng pele le e-ea kopanong, buisanang le le lelapa ka bohlokoa ba ho lula hammoho, ho lula nakong ea lenaneo, le ho mamela ka hloko bakeng sa ho rua molemo ka botlalo lenaneong.
9 Moaparo o Thabisang Jehova: Batho ba Jehova ba pooaneng hore lefatše lohle le ba bone. (1 Bakor. 4:9) Ka kakaretso re tsebahala ka tekanyetso ea rōna e babatsehang ea moaparo le boitlhopho. Ho sebelisa melao-motheo ea Mangolo e fumanoang ho 1 Timothea 2:9, 10 le ho 1 Petrose 3:3, 4 ho feletse ka liphetoho tse khōlō ponahalong ea ba bangata ha ho bapisoa le kamoo ba neng ba boheha kateng nakong eo ba qalang ho kopanela le phutheho ea Bokreste. Sena se fapane haholo le litekanyetso tsa moaparo le boitlhopho tseo re li bonang li ntse li theoha butle-butle lefatšeng. Re lokela ho lula re itebetse hore re se tšoane le lefatše ponahalong ea rōna—ka ho apara liaparo tse makatsang, ho ntšetsa pele lifeshene tsa lefatše tsa ho lokisa moriri kapa ho apara ka tsela e sa hlompheheng. Moaparo oa rōna le boitlhopho tseo e leng mohlala li lokela ho thusa ba bacha ba tlang kopanong ho bona kamoo Bakreste ba lokelang ho apara kateng.
10 Le hoja ka kakaretso likopano tsa selemong se fetileng li siile maikutlo a matle, moaparo oa lefatše le boitlhopho e sa ntse e le bothata bo tsoelang pele ho bara le barali babo rōna ba bang, haholo-holo linakong tsa ka mor’a mananeo. Ha re etsa litokisetso tsa ho ea kopanong, re lokela ho hlahloba moaparo oa rōna le boitlhopho. Batsoali, ka bohlale hlahlobang seo bana ba lōna ba banyenyane le bacha ba tlang ho se apara. A re etseng bonnete ba hore ha re lumelle lifeshene tsa lefatše ho ba le phello e mpe ponahalong ea rōna ea Bokreste.
11 Bolokang Boitšoaro bo Botle: Boitšoaro bo botle ke letšoao le khethollang Bakreste ba ’nete. (1 Pet. 2:12) Boitšoaro ba rōna hohle moo re leng teng—kopanong, libakeng tsa ho jela, lihoteleng esita leha re tsamaea—bo ka fana ka bopaki bo botle le ho thusa ba bang ho bona seo ho lumela ho Molimo le Lentsoe la hae ho ka se etsetsang batho. Mohlomong sena se ka ’na sa susumelletsa ba bang ho batla ho tseba Jehova. (Bapisa le 1 Petrose 3:1, 2.) Re na le tokelo ea ho tlotlisa Molimo ka boitšoaro ba rōna. Ba lefapha la tsamaiso hoteleng e ’ngoe ea Alabama, U.S.A., ba ile ba bolela hore baemeli ba rōna ba tlileng kopanong “ke sehlopha se ratehang ka ho fetisisa le se itšoereng hantle seo ba se amohelang.” Ba ile ba phaella: “E tla ba tokelo hore le khutle nakong e tlang.” Ofisi ea likopano le bohahlauli ka leboea bophirimela ho United States e ile ea ngola: “Selemo le selemo, sechaba sohle sa tikoloho ea rōna se letela ka cheseho kopano ea Mokhatlo oa Watchtower. Litho tsa lōna ke tse thabisang e le kannete; li mekhoa e metle hape li itšoara ka tlhompho e khōlō. Bo-rakhoebo ba sebakeng sena ba hlokometse sena ’me selemo le selemo ba ananela ho khutla ha ‘lelapa’ labo bona la baeti.” Hoa thabisa ho bala litlaleho tse kang tsena, na ha ho joalo? Leha ho le joalo, ho hlokahala hore re falimehele ho boloka botumo bo botle ba batho ba Jehova.
12 Hopolang hore mpho ea chelete e loketse bakeng sa tšebeletso eo u e etsetsoang, haholo-holo kaha batho ba bangata ba sebeletsang sechaba joaloka bafepi, basebeletsi lihoteleng, banna ba nkelang baeti thōtō ba itšetlehile haholo ka mpho ea chelete bakeng sa boipheliso. Joaloka Lipaki tsa Jehova, re boetse re batla ho bontša mekhoa e metle tšobotsing ena.—Bona Tsoha! (ea Senyesemane) ea June 22, 1986, leqepheng la 24-7.
13 Ho Koahela Litšenyehelo Tsa Kopano: Kaofela ha rōna re tla ba le litšenyehelo tsa ho ea likopanong. Ho boetse ho na le litšenyehelo tse ling tseo re lokelang ho nahana ka tsona. Libaka tseo re li sebelisetsang likopano li batla chelete e ngata. Ho boetse ho na le litšenyehelo tse ling tse lokelang ho hlokomeloa. Menehelo ea rōna ea boithatelo ea seatla se bulehileng likopanong e ananeloa haholo.—Lik. 20:35; 2 Bakor. 9:7, 11, 13.
14 Litulo: Litaelo tse ’nileng tsa fanoa lilemong tse ngata li tla ’ne li tsoele pele ho sebetsa, e leng hore LITULO LI KA BOLOKELOA FEELA LITHO TSA LELAPA LA HAO TSE HAUFI-UFI LE BAFE KAPA BAFE BA TSAMAEANG LE UENA KOLOING. E bile ho thabisang ho bona ba bangata ba sebetsa tumellanong le litaelo tsena lilemong tsa morao tjena, ’me sena se matlafalitse boemo ba lerato bo renang likopanong. Libakeng tse ngata litulo tse ling li fumaneha habonolo ho feta tse ling. Ka kōpo bontšang ho nahanela, tlohellang litulo tse ka fihleloang habonolo bakeng sa bao maemo a bona a ba hlokang joalo.
15 Lik’hamera, Lik’hamera Tsa Video le Mechine e Rekotang ka Lik’hasete: Lik’hamera le thepa ea ho rekota li ka sebelisoa likopanong. Leha ho le joalo, ho li sebelisa ha rōna ha hoa lokela ho sitisa ba bang ba leng teng. Ha rea lokela ho ’na re tsamaea re nka litšoantšo nakong ea mananeo kaha seo se tla sitisa ba bang ba lekang ho tsitsisa mohopolo oa bona lenaneong. Ha ho thepa ea mofuta ofe kapa ofe ea ho rekota e lokelang ho hokelloa tsamaisong ea motlakase kapa ea molumo, leha e le hore thepa ena e lokela ho koala liphaseje, litselana kapa ho sira ba bang.
16 First Aid: Lefapha la First Aid ke la maemo a tšohanyetso feela. Le ke ke la khona ho hlokomela ba nang le maloetse a sa foleng. Ke ka lebaka leo u lokelang ho nahanela litlhoko tsa hao tsa bophelo le tsa lelapa la hao esale pele. Ka kōpo itlele le aspirin ea hao, meriana ea bothata ba mala, masela a tlamisang, lipelete le lintho tse ling tse joalo hobane li ke ke tsa e-ba teng kopanong. Batho leha e le bafe ba tsebang hore ba na le lefu la ho oa, la tsoekere, la pelo le mathata a mang, ba lokela ho nahanela litlhoko tsa bona kamoo ho ka khonehang. Ba lokela ho nka meriana e hlokahalang, ’me setho sa lelapa kapa sa phutheho se utloisisang boemo ba bona se lokela ho lula le bona ka linako tsohle bakeng sa ho fana ka thuso leha e le efe e hlokahalang. Ho ile ha hlaha mathata likopanong ha batho ba nang le maloetse a sa foleng ba setse ba le bang ’me ba kula. Tsamaiso ea kopano e ile ea tlameha ho iteanya le litšebeletso tsa tšohanyetso tsa ho ba isa sepetlele. Haeba leha e le bafe ba nang le litlhoko tse khethehileng bakeng sa maloetse a bona ba se na litho tsa lelapa tse ka ba thusang, baholo ba liphutheho tsa habo bona ba tla lokela ho tsebisoa ka boemo bona ’me ho etsoe litokisetso tse hlokahalang tsa ho ba thusa. Kopanong ho ke ke ha e-ba le tokisetso ea likamore tse khethehileng bakeng sa ba kulisoang ke lintho tse itseng.
17 Lijo Kopanong: Ho se be teng ha lijo likopanong ho feletse ka hore ba bangata ba lokolohe nakong ea mananeo kaofela hore ba tsitsise mohopolo oa bona lijong tsa moea. Ho amohetsoe mantsoe a mangata a kananelo ka mokhoa ona o bebofalitsoeng haesale o qala ho sebetsa. Bohle ba lokela ho lokisetsa ho itlela le lijo tsa bona tse matlafatsang bakeng sa motšehare, tse khothalelitsoeng ho kenyelletso ea Tšebeletso ea Rōna ea ’Muso ea October 1995, serapeng sa 26. Ha ho lintho tsa khalase kapa lino tse tahang tse lokelang ho tlisoa lebaleng la kopano. Li-cooler tsa lijo e lokela ho ba tse nyenyane hore li khone ho fella ka tlas’a setulo sa hao. Ba bang har’a bamameli ba ile ba bonoa ba ntse ba itjella le ho inoella nakong ea lenaneo. Ho etsa joalo ke ho bontša ho hloka tlhompho. Moo ho nang le sebaka sa khoebo se rekisang lijo, haufi le sebaka sa kopano kapa ka ntle ho sona, barab’abo rōna ba bang ba ile ba bonoa ba ntse ba ferella ho ea reka lijo nakong ea lenaneo. Mokhoa oo ha oa lokela.
18 Ka sebele re ananela mokete oa rōna oa lijo tsa moea le boemo bo khathollang le ba khotso boo re bo thabelang linakong tse khutšoanyane tsa lijo tsa motšehare. Tumellanong le morero oa tokisetso ena, ho e-na le ho tloha sebakeng sa kopano motšehare ho ea reka lijo, ka kōpo itlele le ho hong ho itseng. Ka lebaka leo, u tla ba le nako e eketsehileng ea ho thabela botsoalle le bara le barali beno.
19 Re thaba hakaakang hore Likopano tsa Setereke tsa “Tumelo Lentsoeng la Molimo” li haufi le ho qalisa! Kaofela ha rōna re batla ho tiisa hore re se re entse litokisetso tsa ho ba teng lenaneong lohle e le hore re ka thabela ka botlalo mokete oa lijo tse monate tsa moea tseo Jehova a re lokiselitseng tsona ka mokhatlo oa hae. Ka tsela eo re tla “hlomelloa ka ho feletseng bakeng sa mosebetsi o mong le o mong o molemo” matsatsing a larileng ka pele.—2 Tim. 3:17.
[Lebokose le leqepheng la 10]
Likhopotso Tsa Kopano Ea Setereke
Kolobetso: Ba eang kolobetsong ba lokela hore ba be ba lutse litulong tse khethehileng tseo ba li lokiselitsoeng pele lenaneo le qala ka moqebelo hoseng. e mong le e mong ea rerang ho kolobetsoa o lokela ho tla le liaparo tse hlomphehang tsa ho kena metsing le thaole. nakong e fetileng ba bang ba ’nile ba apara liaparo tse sa lokelang ketsahalo ena le tse tlosang seriti sa ketsahalo ena. baholo ba hlahlobang lipotso tse leng bukeng ea ho hlophisetsoa ba lokela ho tiisa hore e mong le e mong ea eang kolobetsong o utloisisa lintlha tsena. ka mor’a puo ea kolobetso le thapelo tse tlang ho etsoa ke sebui, molula-setulo oa lenaneo o tla bolela pina. ka mor’a hore ho binoe mola oa ho qetela, bahlokomeli ba tla lebisa ba eang kolobetsong sebakeng sa qoeliso. kolobetso ke pontšo ea boinehelo le taba ea botho mahareng a motho le jehova. kahoo, ha hoa lokela hore ba eang kolobetsong ba hakane kapa ba tšoarane ka matsoho nakong ea kolobetso.
Libeche: Ka kōpo qhoaela beche ea 1997 ka linako tsohle ha u le sebakeng sa kopano ha u e-ea leha u khutla. Hangata sena se re fa menyetla ea ho fana ka bopaki bo botle. U lokela ho iphumanela libeche le likoahelo ka phutheho ea heno kaha li ke ke tsa fumaneha kopanong. U se eme ho fihlela matsatsing a ’maloa pele ho kopano ebe hona u batlang libeche bakeng sa hao le lelapa la hao. Hopola ho nka karete ea hao ea Advance Medical Directive/Release e nakong.
Marobalo: Re kōpa hore e mong le e mong a tšoarisane le Lefapha la Marobalo. Bangoli ba phutheho ba lokela ho tiisa hore Liforomo tsa Kōpo ea Kamore li romeloa kapele-pele atereseng e loketseng ea kopano. Haeba u ke ke ua hlola u sebelisa tokisetso ea bolulo e entsoeng ke Lefapha la Marobalo, u lokela hore hang-hang u tsebise mong’a ntlo kapa hotele le ba Lefapha la Marobalo la kopano e le hore kamore eo e ka abeloa motho e mong.
Lipina: Kaha ho bina ke karolo ea borapeli ba rōna, re khothalletsa bohle ho itlhakisa ka lipina tse latelang tseo e tlang ho ba karolo ea lenaneo: 155, 46, 138, 183, 43, 180, 156, 130, 13, 98, 164, 160, 195, 144, 77, 4, 191 le 10.
Likoloeana Tsa Bana: Lefapha la Mollo le khothalletsa hore likoloeana tsena li se kene ka holong le ho behoa liphasejeng le litselaneng tsa holo kapa pakeng tsa mela ea litulo. Kaha letšoele le leholo la batho le ka baka tšubuhlellano, likoloeana tsena li ka ba kotsi ho ngoana le ho motho leha e le ofe eo li ka mo khopang. Ka lebaka leo, ka kōpo le se ke la kena le tsona ka holong. Leha ho le joalo, litulo tsa masea kapa tseo a behoang ho tsona ka koloing li lumeletsoe kaha li ka faselletsoa litulong haufi le batsoali. Tšebelisano-’moho ea lōna ke ea bohlokoa ’me ea ananeloa.
Tšebeletso ea Boithaopo: Na u ka behella nako e itseng ka thōko kopanong bakeng sa ho thusa ho le leng la mafapha? Ho sebeletsa barab’abo rōna, esita le haeba e le ka lihora tse seng kae feela, e ka ba thuso e khōlō ’me ho tla u khotsofatsa haholo. Haeba u ka khona ho thusa, ka kōpo itlhahise Lefapheng la Tšebeletso ea Boithaopo kopanong. Bana ba lilemo tse ka tlaase ho 16 le bona ba ka fana ka thuso e molemo ka ho sebetsa tlas’a tataiso ea motsoali kapa motho e mong e moholo ea ikarabellang.
Tlhokomeliso: Lula u falimehetse mathata a ka ’nang a hlaha bakeng sa ho qoba bothata bo sa hlokahaleng. Hangata masholu le litsotsi a senyetsa batho bao e leng baeti ba tsoang libakeng tse ling. Tiisa hore koloi ea hao e notletsoe ka linako tsohle, ’me le ka mohla u se siee letho le bonahalang le ka lekang motho hore a thuhe le ho kena. Masholu le bak’hothotsi ba rata lipokano tse khōlō. E ke ke ea e-ba ntho e bohlale ho siea lintho leha e le life tsa bohlokoa setulong sa hao. U ke ke ua tiisa hore e mong le e mong ea leng pel’a hao ke Mokreste. Ke hobane’ng ha u ka ba hohela ka ntho leha e le efe? Ho amohetsoe litlaleho tsa batho ba ka ntle ba ileng ba leka ho hohella bana hore ba tlohe sebakeng sa kopano. LULA U HLOKOMETSE BANA BA HAO KA LINAKO TSOHLE.