“Ho Jala Peō ea ’Muso” ka Litselana Tsa Limakasine

¹ Pina ea 133 ho Binelang Jehova Lithoriso (ea Senyesemane) e na le sehlooho se reng “Ho Jala Peō ea ’Muso.” E thehiloe setšoantšong sa Jesu moo a tšoantšang mosebetsi oa ho etsa barutuoa le ho jala peō. (Mat. 13:4-8, 19-23) Mantsoe a pina eo a baleha tjena: “Hore na ke tse kae tsa lihlaku tsa hao tse oelang mobung o motle/Hangata ho ka itšetleha ka uena.” Re ka eketsa katleho ea rōna joang tšebeletsong ea rōna? Tsela e ’ngoe ke ka ho qalisa tselana ea limakasine le ho e boloka.

² Ho ka finyelloa lipakane tse ngata ka tselana ea limakasine. (1) Maeto a kamehla ka mor’a libeke tse ling le tse ling tse peli a u nolofalletsa ho theha kamano e nang le botsoalle le motho ea thahasellang. (2) Kamehla u fa motho eo boitsebiso bo bolokang bophelo bo fuperoeng ke Molula-Qhooa le Tsoha! (3) Ka ho ’na u buisana le motho eo u ka mo thusa hore a labalabele ’nete ea Mangolo, e leng ho ka lebisang thutong ea Bibele.—1 Pet. 2:2.

³ Mokhoa oa ho Qalisa Tselana ea Limakasine: Neng le neng ha motho a bontša thahasello limakasineng, mo hlalosetse hore lihlooho tse hapang thahasello li hlaha tokollong e ’ngoe le e ’ngoe le hore u ka thabela ho mo tlisetsa tsona ka mor’a libeke tse ling le tse ling tse peli. Ha u qeta ho tloha, ngola lebitso la motho eo le aterese ea hae, letsatsi la ketelo, hore na litokollo tse siiloeng ke tsa neng, sehlooho se buelletsoeng le lihlooho tse ileng tsa thahasellisa motho eo ka ho khetheha.

⁴ U ka qalisa tselana ea limakasine ka batho ba seng bakae feela. Ebe u sebeletsa ho e atolosa ka ho kenyelletsa ba bang bao u ba sielang limakasine. Ha tselana ea hao ea limakasine e ntse e atoloha, u ka e hlophisa ho ea ka libaka e le hore ho tle ho be bonolo ho e akaretsa. Boloka tlaleho e hlakileng ea litokollo tse siiloeng ketelong ka ’ngoe le hore na e ne e le neng. Kenyelletsa lintlha tseo le buisaneng ka tsona le kamoo u ka tsoelang pele ho hlaolela thahasello ea motho eo ’neteng kateng ha u mo etela lekhetlong le latelang.

⁵ Kenyelletsa Batho ba Khoebo le Litsebi: Phihlelo e bontšitse hore ho ka etsahala hore bo-ramabenkele ba bang le litsebi tse ling ba amohele limakasine tsa rōna kamehla. Moholo e mong o bile a etsa tselana ea limakasine ho ramotse oa motse oa habo. Mohoeletsi e mong o ile a qalisa thuto le mong’a k’hamphani e ’ngoe e rekisang thepa ea mohaho ea lilemo li 80 ka mor’a ho mo isetsa limakasine ka lilemo tse leshome tse latellanang!

⁶ Morali’abo rōna e mong oa pula-maliboho o ile a kena lebenkeleng le leng ’me a kopana le banyalani ba bang ba sa kang ba mo amohela ka mofuthu hakaalo. Leha ho le joalo, kaha ba ile ba amohela limakasine, o ile a etsa qeto ea ho kenyelletsa banyalani bao tselaneng ea hae ea limakasine. Ha nako e ntse e feta, morali’abo rōna o ne a batla ho khaotsa ho ba etela kaha ba ne ba se na botsoalle ’me ba bile ba sa bue hakaalo, esita leha a ba botsa potso e batlang maikutlo. Empa morali’abo rōna o ile a rapela ka taba ena ’me qetellong a siela banyalani bana buka ea Phela ka ho sa Feleng. Ka mor’a ho e bala, mosali o ile a khotsa: “Qetellong, ke fumane ’nete!” Thuto ea Bibele e ile ea qalisoa, ’me hamorao banyalani bao ba kolobetsoa. Ka sebele mamello ea pula-maliboho eo e ile ea beha litholoana tse ntle.

⁷ Ho Etsa Maeto a ho Boela: Ha u fumana makasine e ncha, bala lihlooho tsohle. Sheba lintlha tse tla ipiletsa ho motho ka mong tselaneng ea hao ea limakasine. Joale ha u boela, u ka re: “Ha ke ntse ke bala sehlooho sena, ke ile ka nahana ka uena le kamoo se ka ’nang sa u thahasellisa kateng.” Bahoeletsi ba lilemo tsohle ba ka thabela ho ba le tselana ea limakasine. Esita le ngoana e monyenyane a ka re: “Ke thabela ho u bona hape. Likopi tsa hao tsa morao-rao tsa Molula-Qhooa le Tsoha! li fihlile. Ke nahana hore u tla thabela sehlooho sena se reng . . . ”

⁸ Tsosa thahasello lihloohong tse tlang ka ho lebisa tlhokomelo lebokoseng le nang le sehlooho se reng, “Tokollong ea Rōna e Tlang.” Ha lihlooho li hlaha e le letoto, hlokomelisa ’mali sena ’me u mo khothalletse hore a se fosoe ke karolo leha e le efe ea lona. U se ke ua lebala hore nako le nako ha u isa limakasine ho motho ea tselaneng ea hao ea limakasine, hoo ho ka baloa e le leeto la ho boela. ’Me ka holimo ho tsohle, hopola hore pakane ea rōna ke ho ntšetsa pele maeto ana hore e be lithuto tsa Bibele.

⁹ Etela Batho ba Tselaneng ea Hao ea Limakasine Kamehla: U ka akaretsa tselana ea hao ea limakasine ka nako leha e le efe e loketseng—har’a beke hoseng, motšehare oa mantsiboea, ka shoalane, kapa mafelong a beke ka mor’a ho qeta nako e itseng mosebetsing oa ntlo le ntlo. Haeba u sa khone ho akaretsa tselana ea hao ea limakasine ka lebaka la ho kula kapa ho ea matsatsing a phomolo, kōpa mohoeletsi e mong ka lapeng kapa ka phuthehong ho u isetsa limakasine tseo. Ka tsela eo, batho ba tselaneng ea hao ea limakasine ba ke ke ba sitoa ho fumana limakasine tsa bona ka nako.

¹⁰ Tsela e ’ngoe ea ho jala peō ea ’Muso ke ho isa Molula-Qhooa le Tsoha! kamehla ho bohle ba tselaneng ea hao ea limakasine. Ha u ntse u ba ruta ’nete ea Mangolo, mohlomong ba tla utloisisa moelelo oa lentsoe la ’Muso ’me qetellong ba behe litholoana tsa ’Muso hammoho le uena.—Mat. 13:8, 23.