“Lilemo Tsa Sekete se Secha—Li U Tšoaretse Bokamoso Bofe?”
1 Batho ba bangata lefatšeng ho pota ba ’nile ba nahana ka potso ena. Le hoja moloko oa batho o finyeletse ho hoholo ka makholo a lilemo, batho ba ferekane kaha mathata ao e leng khale a hlasetse batho likete-kete tsa lilemo a ntse a le teng. (Jobo 14:1; Pes. 90:10) Moloko oa batho o ka fumana thuso hokae?
2 Likhoeling tsa October le November, re tla ba le monyetla o khethehileng oa ho fa baahelani ba rōna karabo potsong eo. Joang? Ka ho aba Kingdom News No. 36. E na le sehlooho se reng “Lilemo Tsa Sekete se Secha—Li U Tšoaretse Bokamoso Bofe?” Halofong e qalang ea October, re tla nehelana ka limakasine tsa Molula-Qhooa le Tsoha! Joale ho tloha ka Mantaha oa la 16 October ho ea ho Labohlano la la 17 November, re tla tšoareha ho abeng Kingdom News No. 36 ka matla. Nakong ea phutuho ena, re tla ameha haholo ka ho nehelana ka Kingdom News No. 36 har’a beke. Mafelong a beke, re tla nehelana ka eona hammoho le limakasine tsa morao-rao.
3 Na U Tla Kopanela ka Botlalo? Baholo, bahlanka ba sebeletsang le bo-pula-maliboho ba tšoanela ho etella pele phutuhong ena, kaha ba ka pele-pele mosebetsing ona. Bahoeletsi ba bangata ba khonne ho lokisa maemo a bona hore e be bo-pula-maliboho ba thusang khoeling e le ’ngoe kapa tse peli tsa kabo eo. Ba bang ba rera ho qeta nako e eketsehileng ho feta e tloaelehileng tšebeletsong.
4 Bakhanni ba Thuto ea Buka ea Phutheho ba ka sebetsa ho khothalletsa setho se seng le se seng sa sehlopha sa bona hore se kopanele ka botlalo kabong ea Kingdom News No. 36. E ka ’na eaba ho na le bahoeletsi ba seng ba sa kopanele kamehla mosebetsing oa ho bolela. Baholo ba lokela ho ba etela ho bona se ka etsoang ho ba thusa. Mohlomong ho ka etsoa litokisetso tsa hore likhoeling tsena mohoeletsi ea nang le phihlelo a ee tšimong le motho ea seng a sa kopanele tšebeletsong. Nehelano e bonolo ea Kingdom News No. 36 e ka ba sona se hlokahalang feela ho tsosolosa bahoeletsi bao.
5 Ona e tla boela e e-ba monyetla o motle ho liithuti tsa Bibele tse seng li le haufi le ho qeta buka ea Tsebo ’me li tšoaneleha ho ba bahoeletsi ba sa kolobetsoang hore li qale ho kopanela tšebeletsong. Esita le ba banyenyane ba ka kopanela hantle mosebetsing ona o thabisang.
6 Ho hlokahala feela nehelano e bonolo. U ka ’na ua re:
◼ “Ke ithaopetse ho sebelisa nako ea ka ho thusa ho aba molaetsa ona oa bohlokoahali lelapeng le leng le le leng mona [bolela lebitso la motse kapa toropo]. Ena ke kopi ea hao. Ke kōpa hore u e bale.” Ho ka ’na ha e-ba molemo ho se nke mokotlana oa tšimo ha ho abjoa Kingdom News No. 36.
7 Liboka Tse Hlophisitsoeng Hantle Tsa Tšebeletso ea Tšimo: Baholo ba tlameha ho bona hore litokisetso tsa ho paka ke tse loketseng le tse sebetsang. Molebeli oa tšebeletso haholo-holo, o lokela ho etsa bonnete ba hore ho tla be ho e-na le tšimo e ngata ea ntlo le ntlo le ea khoebo e le hore e mong le e mong a ka kopanela ka botlalo mosebetsing ona. Moo ho khonehang, liboka tsa tšebeletso li lokela ho hlophisoa bakeng sa letsatsi le leng le le leng la har’a beke, bakeng sa mafelo-beke le mantsiboea. Ho ka etsoa litokisetso tsa ho kopana motšehare oa mantsiboea molemong oa barutoana ba sekolo, ba sebetsang bosiu, le ba bang.
8 Se ka Etsoang ka ba Sieo Malapeng: Pakane ea rōna ke ho bua le beng ba matlo ba bangata kamoo ho ka khonehang. Haeba ho se na batho nakong eo u ba etelang, ngola aterese ’me u ba etele ka nako e sa tšoaneng ea letsatsi. Haeba bekeng ea ho qetela ea phutuho ena u e-s’o atlehe ho kopana le beng ba ntlo eo, u ka ’na ua ba siela kopi ea Kingdom News No. 36 sebakeng seo batho ba fetang ka tsela ba sa e boneng. Baholo ba sebaka ka seng ba ka laela phutheho ho siea kopi ea Kingdom News No. 36 malapeng ao ba a etelang ka lekhetlo la pele ha ho sebetsoa tšimo e sa abuoang kapa ea libakeng tsa mahaeng, le libakeng tseo ho nang le tšimo e khōlō ho feta e ka koaheloang nakong ea phutuho.
9 A re Tšoareheng! Liphutheho li lokela ho ikemisetsa ho koahela tšimo ea tsona pele phutuho eo e fela ka la 17 November. Haeba tšimo ea lōna e le khōlō haholo, bahoeletsi ba bang ba ka sebetsa ba le bang moo ho loketseng ebile ho sireletsehile. Tokisetso ena e tla etsa hore ho be bonolo ho finyella batho ba tšoanelehang ba bangata kamoo ho ka khonehang. Etsang bonnete ba ho boloka tlaleho e ntle ea bohle ba thahasellang ba fumanoeng.
10 Baholo ba lokela ho nahanela hore na phutheho e tla hloka limakasine tse ngata hakae tse eketsehileng ’me ebe baa li odara. Bo-pula-maliboho ba khethehileng, ba kamehla le ba thusang e mong le e mong o tla amohela likopi tse 250 tsa Kingdom News No. 36 hore a li abe, ha bahoeletsi ba phutheho ba tla fuoa likopi tse 50 a le mong. Kahoo na u loketse ho tšoareha ka mafolofolo tšebetsong ee e khethehileng? Re na le tokelo e kaakang ea hore re tsebise baahelani bohle ba rōna ka seo Molimo a se tšepisitseng nakong e tlang!