Qoba ho Phehella “Lintho Tsa Lefeela”
1 Mokhoa o tloaelehileng oa puisano kajeno ke E-mail. Le hoja ho loketse ho phetela litho tsa lelapa le metsoalle liphihlelo le mehopolo e itseng ka mocha ona, ke ‘lintho life tsa lefeela’ tse ka amahanngoang le tšebeliso e sa laoleheng ea E-mail?—Liprov. 12:11.
2 Temoso Mabapi le E-Mail: Ba bang ba bolela hore ba ikutloa ba atametse haufi le mokhatlo o hlophisitsoeng oa Jehova ha ba amohela boitsebiso ba E-mail boo ba nkang hore bo bocha. Bo ka ’na ba akarelletsa liphihlelo, liketsahalo tsa Bethele, litlaleho tsa likoluoa kapa mahloriso esita le boitsebiso ba lekunutu bo fanoeng Likolong tsa Tšebeletso tsa ’Muso. Ba bang ba bonahala ba chesehela ho romela melaetsa e joalo, ka tšepo ea hore e tla ba bona ba pele ba ho bolella metsoalle ea bona litaba.
3 Ka nako e ’ngoe boitsebiso le liphihlelo li sothiloe kapa li fetelelitsoe. Mohlomong e le ka morero oa hore batho ba thahaselle litaba tsa bona, ba bang ba fane ka maikutlo a fosahetseng. Hangata ba lepotlapotla ho bolela litaba tse joalo ha ba tsebe makolopetso ’ohle. (Liprov. 29:20) Maemong a mang, le haeba taba e makatsa, e phetoa feela hobane e thahasellisa. Ha e le hantle litlaleho tse joalo tse fosahetseng le tse khelosang ke “lipale tsa bohata,” tse sa khothaletseng boinehelo ba sebele ba bomolimo.—1 Tim. 4:6, 7.
4 Haeba u fetisa boitsebiso ba bohata, u ikarabella bakeng sa masoabi le pherekano eo bo e bakang. Ha Davida a ne a amohela tlaleho e fetelelitsoeng ea hore bara ba hae bohle ba bolailoe, o ile a “hahola liaparo tsa hae” a ferekane. Leha ho le joalo, ’nete ke hore ke mora oa hae a le mong feela ea neng a shoele. Ho ne ho sithabetsa hore ebe ho shoele mora oa hae a le mong, empa ho fetelletsa litaba ka tsela ena ho ile ha sithabetsa Davida le ho feta. (2 Sam. 13:30-33) Ka sebele re ke ke ra rata ho etsa eng kapa eng e ka thetsang kapa ea nyahamisa barab’abo rōna.
5 Mocha oa Molimo o Khethiloeng: Hopola hore Ntate oa rōna oa leholimo o na le mocha oa puisano oo a o khethileng, e leng “lekhoba le tšepahalang le le masene.” “Lekhoba” leo ke lona le nang le boikarabelo ba ho rera hore na ke boitsebiso bofe bo lokelang ho fuoa ba ntlo ea tumelo, esita le “nako e tšoanetseng” ea ho fana ka bona. Lijo tsena tsa moea li fumaneha feela mokhatlong o hlophisitsoeng oa puso ea Molimo. Kamehla re lokela ho retelehela mocheng o khethiloeng ke Molimo bakeng sa boitsebiso bo tšepahalang, eseng sehlopheng sa batho ba sebelisang Internet.—Mat. 24:45.
6 Liaterese Tsa Internet: Re na le aterese ea Internet: www.watchtower.org. Aterese ena e na le boitsebiso bo lekaneng boo e ka bo fang sechaba. Ha ho hlokahale hore motho, komiti, kapa phutheho e lokisetse boitsebiso ba Internet bo buang ka Lipaki tsa Jehova. Ba bang ba lokiselitse boitsebiso ba lingoliloeng tsa rōna bo nang le mangolo ’ohle le litšupiso esita le ho tšepisa boitsebiso ba kopano ka monehelo o itseng. Ebang motho o fumana phaello kapa che, tloaelo ea ho hlahisa le ho aba lingoliloeng tsa Lipaki tsa Jehova ka mokhoa oa elektronike ke tlōlo ea molao oa litokelo tsa bongoli. Le hoja ba bang ba nka hore ke ho tsoela barab’abo rōna molemo, ha hoa lumelloa ebile ho lokela ho khaotsoa.
7 Ho ba le kahlolo e molemo le ho hlaphoheloa kelellong ha re sebelisa mecha ea puisano ea elektronike ho tla tiisa hore likelello tsa rōna li tlala “lintho tsohle tsa bohlokoa le tse khahlisang tsa bohlokoa.”—Liprov. 24:4.