Lenaneo la Kopano e Khethehileng ea Letsatsi ea 2010
1. (a) Ke lihlooho life tse thehiloeng Mangolong tse ’nileng tsa tšohloa likopanong tsa rōna tse khethehileng tsa letsatsi lilemong tsa morao tjee? (b) Na ho na le lintlha tseo u ileng ua li fumana likopanong tse fetileng tse khethehileng tsa letsatsi tse ileng tsa u thusa tšebeletsong?
1 “Ho Nepisisa Lintho Tsa Bohlokoa bo Boholo,” “Re Ema re Tiile re le Mohlape o le Mong,” “Le ’Ne le Pakele ’Nete,” le “Re Letsopa—Jehova ke Sebōpi sa Rōna.” (Bafil. 1:9, 10, 27; Joh. 18:37; Esa. 64:8) Tsena ke tse ling tsa lihlooho tse seng kae tse ileng tsa tšohloa likopanong tse fetileng tse khethehileng tsa letsatsi. Na u labalabela ho ea kopanong e khethehileng ea letsatsi ea selemo sa tšebeletso sa 2010? Sehlooho sa eona se re: “Nako e Setseng e Fokotsehile,” ’me se nkiloe ho 1 Bakorinthe 7:29.
2. Ke’ng seo le ka se etsang hore le chesehele kopano ee?
2 Hang feela ha ho etsoa tsebiso ea kopano ea lōna e khethehileng ea letsatsi, lula u ikhopotsa eona ka cheseho. Batsoali ba bang ba thusa bana ba bona ho lebella kopano ka thabo ka ho tšoaea letsatsi leo e tla ba ka lona k’halendareng, ’me ba ngole lethathamo la lintho tse hlokahalang, ebe ba qala ho bala matsatsi a setseng pele e fihla. Mantsiboeeng a Borapeli ba Lelapa, le ka ’na la ikhopotsa lintlha tsa kopano e fetileng e khethehileng ea letsatsi. U ka boela ua lokisa pelo ea hao bakeng sa ketsahalo ena ka ho bala buka ea Rua Molemo Thutong ea Sekolo sa Tšebeletso sa Puso ea Molimo, leqepheng la 13-16, e le hore uena le lelapa la hao le “ele hloko kamoo le mamelang kateng.”—Luka 8:18.
3. Ke’ng se tla re thusa hore re rue molemo ho seo re tla ithuta sona kopanong?
3 Sebelisa Seo U Ithutang Sona: Ha kopano e fela, hangata batho ba rata ho re, “Ruri kopano ena e bile monate.” Ba tiisitse, etsoe kopano ena ke e ’ngoe feela ea litokisetso tse ngata tse enneng tsa moea tse tsoang ho Jehova. (Liprov. 10:22) E le hore seo u ithutileng sona se behe litholoana, u lokela ho thuisa ka sona ’me u se boloke. (Luka 8:15) Ha le le tseleng e tsoang kopanong, iphe nako ea ho tšohla lenaneo le lelapa la hao kapa le bao u tsamaeang le bona ka koloing. Bolellanang hore na le ikemiselitse ho etsa’ng le be le bolele lintlha tse tla le thusa tšebeletsong. Haeba le etsa joalo, kopano e tla le ruisa molemo leha ho se ho fetile nako e telele.—Jak. 1:25.
4. Ke hobane’ng ha kopano ee e tla ba e khethehileng ho rōna?
4 Kamehla rea thaba ha re fuoa mpho e re tsoelang molemo ea ntho eo re ntseng re e batla. Na ha re labalabele ho fumana seo Jehova a re lokiselitseng sona kopanong e tlang e khethehileng ea letsatsi? Re kholisehile hore e tla ba molemo ka hohle-hohle. Re lebeletse hore Ntate oa rōna ea leholimong, Jehova, a re fe sona seo re se hlokang hantle, e leng, ho re khothatsa le ho re koetlisa hore re phethe mosebetsi oo a re fileng oona.—2 Tim. 4:2; Jak. 1:17.