Rera Esale Joale Hore U Atolose Tšebeletso ea Hao
1. Nako ea Sehopotso e ikhetha ka eng, hona re ka itokisetsa eona joang?
1 Selemo le selemo, ka nako ea Sehopotso re ba le menyetla e mecha ea ho “roka Jehova haholo.” (Pes. 109:30) Na u tla atolosa tšebeletso ea hao ka March e le tsela e ’ngoe ea ho bontša hore u ananela seo Molimo a se entseng ka ho lokisetsa thekollo? Joale ke nako ea hore re qalelle ho rera seo re tla se etsa.—Liprov. 21:5.
2. Uena le ba bang, le ile la ikutloa joang ka tokisetso ea ho fokoletsoa lihora tse hlokahalang tsa ho ba pula-maliboho ea thusang selemong se fetileng ka April?
2 Bopula-maliboho bo Thusang: Selemong se fetileng re ile ra thaba haholo liphuthehong ha re utloa ka tokisetso ea ho nka bopula-maliboho bo thusang ka April, re fokolelitsoe lihora tse hlokahalang. Mora e mong oabo rōna o ile a ngola, a re: “Kaha ke ntse ke le sekolong se phahameng, ha ke e-s’o fumane monyetla oa ho ba pula-maliboho oa kamehla. Empa ka khoeli ea April, ke tl’o etsa kōpo ea ho qeta lihora tse 30 ebe ke ikitlaelletsa ho qeta tse 50.” Morali e mong oabo rōna ea sebetsang ka linako tsohle, o ile a re: “Ka sebele motho a ka khona ho finyella lihora tse 30!” Ha ho ne ho etsoa tsebiso ena, morali’abo rōna e mong eo e kileng ea e-ba pula-maliboho, eo hona joale a nang le lilemo tse ka holimo ho 80, o ile a re: “Ena ke eona ntho eo e leng khale ke e emetse! Jehova o ne a tseba hore ho bula maliboho ke nako ea bohlokoa ka ho fetisisa bophelong ba ka!” Ba bang ba sa kang ba khona ho nka bopula-maliboho bo thusang, ba ile ba ipehela pakane ea ho ikitlaetsa haholoanyane tšebeletsong ea bona.
3. Ke mabaka afe a etsang hore re nahane ka ho nka bopula-maliboho bo thusang ka March, April le May?
3 Khoeli ea March e tla ba e loketseng haholo bakeng sa ho nka bopula-maliboho bo thusang kahobane re tla boela re be le monyetla oa ho qeta lihora tse 30 kapa tse 50 ka khoeli re le bo-pula-maliboho ba thusang. Ho phaella moo, ho qala ka Moqebelo oa la 17 March, re tla kena letšolong le khethehileng la ho memela batho ho tla ba le rōna Sehopotsong ka la 5 April. Ba bangata ba tla thabela ho atolosa tšebeletso ea bona hoo ba tla rata hore e be bo-pula-maliboho ba thusang le ka April le May, ba qeta lihora tse 50 tse hlokahalang.
4. Re ka atolosa seo re se etsang tšebeletsong joang, hona re tla fumana litholoana life?
4 Lekhetlong le latelang ha le tšoara Borapeli ba lōna ba Lelapa ba mantsiboea, e ka ba hantle hore le buisane ka hore na e mong le e mong ka lapeng a ka atolosa tšebeletso ea hae joang nakong ea Sehopotso. (Liprov. 15:22) Kōpang Jehova hore a hlohonolofatse boiteko ba lōna. (1 Joh. 3:22) Ha le ntse le atolosa seo le se etsang tšebeletsong, hase feela hore le tla ba le seabo tabeng ea ho rorisa Jehova empa le tla boela le eketse thabo ea lōna.—2 Bakor. 9:6.