PHELA JOALOKA MOKRESTE

**Na Ho Hlahlobisisa Mangolo Kamehla ho U Tsoela Molemo?**

Na lintho tseo u li etsang letsatsi le letsatsi e le hore u atamele haufi le Jehova li akarelletsa ho bala temana ea letsatsi le tlhaloso ea eona? Mohlomong u ka itloaetsa ho e bala haeba ha se ntho eo u e etsang. Batho ba bangata ba bala temana ea letsatsi hoseng e le hore ha ba ntse ba etsa mesebetsi ea bona ba lule ba nahana ka eona. (Jos 1:8; Pes 119:97) U ka rua molemo haholoanyane joang ha u bala temana ea letsatsi? Bala litemana tse potolohileng temana eo e le hore u e utloisise. Leka ho nahana ka mohlala o ka Bibeleng o buang ka temana eo. Sebelisa lintho tseo u ithutileng tsona ha u ntse u bala. U tla fumana melemo haeba u lumella Lentsoe la Molimo hore le u tataise ha u etsa liqeto.—Pes 119:105.

Malapa a Bethele lefatšeng ho pota, a bala temana ea letsatsi nakong ea lijo tsa hoseng. Morao tjena, mananeo ana a temana ea letsatsi a se behoa ho Khaso ea JW tlas’a MANANEO A KHETHEHILENG. U qetetse neng ho shebella mananeo aa? A mang a mananeo ana a bua ka lintho tse u amang ka ho toba. Mohlala, tlaleho e buang ka Lota e ka u thusa joang ha u etsa liqeto?

SHEBELLANG VIDEO EA LE SE KE LA RATA LEFATŠE (1JO 2:15), EBE LE ARABELA LIPOTSO TSE LATELANG:

Temana ee ea letsatsi e thehiloe molao-motheong ofe oa Bibele?
Tlaleho ea Lota e re ruta’ng mabapi le likotsi tse ka bang teng haeba motho a rata lefatše kapa lintho tse ho lona? —Gen 13:12; 14:12; 19:3, 12, 13, 24-26
Re ka bontša joang hore re rata Jehova eseng lefatše le lintho tse ho lona?

Mor’abo rona o ntse a nahanisisa ka temana ea letsatsi le ka tlhaloso ea eona. 1. Ha a ntse a bala, o iketsetsa setšoantšo sa ha lengeloi le ntša Lota le lelapa la hae Sodoma. 2. Ha a ntse a e-ja mosebetsing, o nahanisisa ka temana ea letsatsi eo a e balileng hoseng. 3. Mantsiboea ha a le hae a ntse a mena liphahlo, o nahanisisa ka seo a se balileng hoseng. — Nka bontša joang hore ke nka Lentsoe la Molimo e le la bohlokoa ka linako tsohle?