U ka Fana ka Keletso Joang?

1. Ke mang ea lokelang ho fana ka keletso, hona hobane’ng?

U IKUTLOA joang ka ho fana ka keletso? Batho ba bang ba thabela ho fana ka keletso. Ba bang bona ba lesisitheho ho fana ka keletso, ’me ba ikutloa ba sa phutholoha ha ba fana ka eona. Ho sa tsotellehe seo, kaofela ha rona nako le nako re lokela ho fana ka keletso. Hobane’ng? Hobane ke tsela e ’ngoe eo re bontšang hore re rata bara le barali ba bo rona. Jesu o ile a re balateli ba hae ba ’nete ba tla tsebahala ka ho bontšana lerato. (Joh. 13:35) Hape Lentsoe la Molimo le re ha re fana ka ‘khalemelo e se nang boikaketsi,’ re tiisa setsoalle sa rona le ba bang.—Liprov. 27:9.

2. Baholo ba lokela ho ba le bokhoni bofe, hona hobane’ng? (Sheba lebokose le reng “Ho Fana ka Keletso Libokeng Tsa Har’a Beke.”)

² Ka ho khetheha, baholo ba lokela ho ba le bokhoni ba ho fana ka keletso e molemo. Jehova, a sebelisa Jesu, o file banna bana boikarabelo ba ho lisa phutheho. (1 Pet. 5:2, 3) Tsela e ’ngoe eo ba etsang sena ka eona ke ka hore ha ba fana ka lipuo liphuthehong, ba fane ka keletso e thehiloeng Bibeleng. Ba boetse ba lokela ho fa nku e ’ngoe le e ’ngoe keletso, ho akarelletsa le tse ileng tsa kheloha mohlapeng. Ke joang baholo, ho akarelletsa le rona, ba ka fanang ka keletso e molemo?

3. (a) Re ka ithuta ho ba moeletsi ea molemo joang? (Esaia 9:6; sheba lebokose le reng “Etsisa Jesu ha u Fana ka Keletso.”) (b) Re tl’o hlahloba eng sehloohong see?

³ Re ka ithuta ho hongata ka ho ba moeletsi ea molemo mohlaleng oa batho ba hlahang ka Bibeleng, haholo-holo Jesu. E ’ngoe ea litlotla tseo a li fuoeng ke “Moeletsi ea Hlollang.” (Bala Esaia 9:6.) Sehloohong sena, re tl’o ithuta hore na re ka etsa’ng ha re koptjoa ho fana ka keletso le hore na re lokela ho etsa’ng ha re fana ka keletso le hoja re sa koptjoa. Re tla boela re hlahlobe bohlokoa ba hore re fane ka keletso ka nako e nepahetseng le ka tsela e nepahetseng.

HA RE KOPTJOA HO FANA KA KELETSO

4, 5. Ha motho a re kopa hore re mo fe keletso, re lokela ho qala pele ka ho ipotsa potso efe? Fana ka mohlala.

⁴ Ha motho a re kopa keletso, re lokela ho qala pele ka ho etsa’ng? Re ka thaba haholo ’me ra batla ho thusa hang-hang. Empa re lokela ho qala pele ka ho ipotsa, ‘Na kea tšoaneleha ho fana ka keletso boemong boo?’ Ka linako tse ling, tsela e molemo ka ho fetisisa ea ho thusa ke ea hore re mo lebise ho motho ea tšoanelehang bakeng sa hore a fane ka tataiso boemong boo, ho e-na le hore re mo fe keletso.

⁵ Nahana ka mohlala ona. A re re motsoalle oa hao ea haufi o qala ho kula haholo. O u bolella hore o qalile ho etsa lipatlisiso ka mefuta e fapaneng ea phekolo e ka mo thusang, ’me o kopa ho utloa maikutlo a hao hore na ke phekolo efe eo u nahanang hore e molemo. U ka ’na oa ba le maikutlo a matla tabeng eo, empa ha u ngaka ebile ha oa koetlisetsoa ho sebetsana le bokuli boo. Boemong boo, tsela e molemo ka ho fetisisa eo u ka thusang motsoalle oa hao ka eona, ke ho mo thusa ho fumana motho ea tšoanelehang hore a ka mo thusa.

6. Ke hobane’ng ha re ka khetha ho ema pele re fana ka keletso?

⁶ Le haeba re ikutloa eka rea tšoaneleha ho fana ka keletso mabapi le taba e itseng, re ka khetha ho ema hanyenyane pele re ka araba motho ea re kopang keletso. Hobane’ng? Bibele e re ‘motho ea lokileng oa thuisa pele a araba.’ (Liprov. 15:28, nal.) Empa ho thoe’ng haeba re nahana hore re tseba karabo? Le teng re ka nka nako e itseng re etsa lipatlisiso, re rapela le ho thuisa. Joale re ka kholiseha haholoanyane hore karabo ea rona e tumellanong le maikutlo a Jehova mabapi le taba eo. Nahana ka mohlala oa moprofeta Nathane.

7. U ithuta eng mohlaleng oa moprofeta Nathane?

⁷ Ha Morena Davida a bua le moprofeta Nathane, o ile a re o batla ho hahela Jehova tempele. Hang-hang, Nathane o ile a mo eletsa hore a etse joalo. Empa Nathane a ka be a ile a ema hanyenyane pele e le hore a ka botsa Jehova. Hobane’ng? Hobane Jehova o ne a sa batle hore Davida a hahe tempele. (1 Likron. 17:1-4) Joalokaha mohlala ona o bontša, ha re koptjoa ho fana ka keletso, re tla be re bontša hore re bohlale haeba re ‘lieha ho bua’ e leng hore re nahanisise pele re ka fana ka keletso.—Jak. 1:19.

8. Ke lebaka lefe le leng leo ka lona re lokelang ho ba hlokolosi ha re fana ka keletso?

⁸ Nahana ka lebaka le leng leo ka lona re lokelang ho ba hlokolosi ha re fa motho keletso. Haeba re fa motho keletso e tla mo susumetsa hore a etse qeto e fosahetseng e ka tlisang litla-morao tse bohloko, le rona re ka ikarabella ka tsela e itseng. Kannete re na le lebaka la bohlokoa haholo la hore re nahane ka hloko pele re fana ka keletso.

HA RE LOKELA HO FANA KA KELETSO LE HOJA RE SA KOPTJOA

9. Pele baholo ba fana ka keletso, ba lokela ho kholiseha ka eng? (Bagalata 6:1)

⁹ Nako le nako, baholo ba lokela ho nka khato ho fa mora kapa morali oa bo rona keletso haeba a entse “ntho e fosahetseng.” (Bala Bagalata 6:1.) Motho a ka ’na a etsa liqeto tse seng bohlale, tseo hamorao li ka etsang hore a qetelle a entse sebe se tebileng. Sepheo sa baholo ke ho thusa motho eo hore a lule a le tseleng e isang bophelong bo sa feleng. (Jak. 5:19, 20) Leha ho le joalo, baholo ba lokela ho qala pele ka ho etsa bonnete ba hore motho eo o entse ntho e fosahetseng, e le hore keletso ea bona e atlehe. Jehova o re lumella hore re etse liqeto re itšetlehile ka matsoalo a rona. (Bar. 14:1-4) Joale ho thoe’ng haeba kannete mor’abo rona a entse ntho e fosahetseng, ’me baholo ba etsa qeto ea hore ba lokela ho nka khato ho fa motho eo keletso?

10-12. Baholo ba lokela ho etsa’ng ha ba fana ka keletso e sa koptjoang? Fana ka mohlala. (Sheba litšoantšo.)

¹⁰ Ha ho bonolo hore baholo ba fane ka keletso eo motho a sa e kopang. Hobane’ng? Moapostola Pauluse o ile a re motho a ka etsa ntho e fosahetseng a sa hlokomele. Kahoo, ha baholo ba mo fa keletso a ka ’na a se ke a utloisisa hore na ke hobane’ng ha ba mo fa keletso eo. Ka hona, ba lokela ho qala pele ka ho thapisa pelo ea motho eo e le hore a amohele keletso.

¹¹ Ho fana ka keletso e sa koptjoang ho ka tšoana le ho leka ho holisa limela mobung o thata. Pele sehoai se jala, se phethola mobu. Sena se nolofatsa le ho lokisa mobu. Joale ebe ka mor’a moo se jala peo. Qetellong, sea e nosetsa hore e hole. Ka tsela e tšoanang, pele moholo a fana ka keletso e sa koptjoang, o tla be a etsa hantle ha ka tsela ea tšoantšetso a qala pele ka ho lokisa mobu. Ka mohlala, ka nako e loketseng hore ba bue, o kholisa mor’abo rona hore o fela a mo batlela se molemo. Haeba motho ea fanang ka keletso a tsebahala a le mosa a bile a le lerato, ho tla ba bonolo hore ba bang ba mamele keletso ea hae.

¹² Nakong eo ba ntseng ba buisana, moholo a ka tsoela pele a nolofatsa mobu ka hore a hlokomelise motho eo a buang le eena hore kaofela ha rona re etsa liphoso, ’me nako le nako re hloka ho eletsoa. (Bar. 3:23) Moholo o mo bontša ka ho hlaka ntho e fosahetseng eo a e entseng, a sebelisa Mangolo le ho bua le eena ka lentsoe le bonolo le ka ho mo hlompha haholo. Hang ha mor’abo rona a hlokomela hore o entse phoso, moholo o “jala peo” ka hore a mo hlalosetse ka mantsoe a bonolo seo a lokelang ho se etsa e le hore a lokise phoso ea hae. Qetellong, moholo o “nosetsa” peo ka hore a babatse mor’abo rona ho tsoa pelong le ho rapela le eena.—Jak. 5:15.

13. Baholo ba etsa’ng ho netefatsa hore motho ea fuoang keletso oa e utloisisa?

¹³ Ka linako tse ling, ho ka etsahala hore seo motho ea fanang ka keletso a se buang se fapane hole le seo motho ea fuoang keletso a se utloang. Baholo ba ka etsa’ng ho qoba hore see se etsahale? Ba ka etsa hore motho eo a utloisise lintlha tsa bohlokoa ka hore ba mo botse lipotso ka bohlale le ka tlhompho. (Moek. 12:11) Likarabo tsa motho ea fuoang keletso li tla thusa motho ea fanang ka keletso hore a etse bonnete ba hore motho enoa o utloisisa keletso eo a e fuoang.

HO FANA KA KELETSO KA NAKO E NEPAHETSENG LE KA TSELA E NEPAHETSENG

14. Ke hobane’ng ha re sa lokela ho fana ka keletso ha re halefile?

¹⁴ Kaofela ha rona ha rea phethahala, kahoo re tla bua le ho etsa lintho tse tla utloisa batho ba bang bohloko. (Bakol. 3:13) Lentsoe la Molimo le re bolella hore ka linako tse ling re ka ’na ra halefisa batho ba bang. (Baef. 4:26) Empa re lokela ho qoba boikutlo ba ho batla ho fana ka keletso ha re halefile. Hobane’ng? “Hobane ha motho a halefile ha a etse lintho tse lokileng mahlong a Molimo.” (Jak. 1:20) Haeba re fana ka keletso nakong eo re halefileng, re ka ’na ra mpefatsa boemo le ho feta. Empa sena ha se bolele hore ha rea lokela ho bolella motho ea re halefisitseng tsela eo re ikutloang ka eona. Leha ho le joalo, re tla khona ho bua le motho enoa ka tsela e atlehileng haeba re emela hore maikutlo a rona a theohe. Hlokomela mohlala o motle oa moeletsi ea tšepahalang oa Jobo, e leng Elihu.

15. Re ithuta eng mohlaleng oa Elihu? (Sheba setšoantšo.)

¹⁵ Elihu o ile a qeta matsatsi a mametse Jobo ha a ntse a ipuella liqosong tsa metsoalle ea hae ea bohata. Elihu o ile a qenehela Jobo. Empa o ile a boela a loloma ke bohale hobane Jobo o ne a inahanne boeena feela a bile a buile lintho tseo eseng ’nete ka Jehova. Leha ho le joalo, Elihu o ile a emela nako ea hae ea ho bua ’me o ile a bua ka tsela e bonolo le e hlomphang haholo ha a eletsa Jobo. (Jobo 32:2; 33:1-7) Mohlala oa Elihu o re ruta thuto ea bohlokoa ea hore ho molemo ho fana ka keletso ka nako e nepahetseng le ka tsela e nepahetseng ebile e le ka tlhompho le lerato.—Moek. 3:1, 7.

TSOELA PELE HO FANA KA KELETSO LE HO E AMOHELA

16. Ke thuto efe eo u ithutang eona ho Pesaleme ea 32:8?

¹⁶ Lengolo la sehlooho sehloohong sena le re ‘Jehova o tla re eletsa a re behile leihlo.’ (Bala Pesaleme ea 32:8.) Sena se bolela hore o tla tsoela pele a re tšehetsa. Ha a fane ka keletso feela empa o boetse oa re thusa hore na re e sebelise joang. Kannete ona ke mohlala o motle oo re lokelang ho o etsisa! Ha re e-na le monyetla oa ho eletsa batho ba bang, e se eka re ka etsisa Jehova ka ho lula re ba khothatsa le ho ba tšehetsa kahohle kamoo re ka khonang kateng hore ba atlehe.

17. Ha baholo ba fana ka keletso e tobileng le e thehiloeng Bibeleng, ba tšoana le eng? Hlalosa. (Esaia 32:1, 2)

¹⁷ Hona joale ho feta leha e le neng pele, re hloka ho fana le ho amohela keletso e molemo. (2 Tim. 3:1) Baholo ba fanang ka keletso e tobileng, e thehiloeng Bibeleng ba “joaloka melapo ea metsi naheng e se nang metsi.” (Bala Esaia 32:1, 2.) Metsoalle e tsebang seo re batlang ho se utloa empa e re bolella seo re hlokang ho se utloa ke limpho tsa bohlokoa “joaloka liapole tsa khauta ka lijaneng tsa silevera.” (Liprov. 25:11) E se eka kaofela ha rona re ka tsoela pele re ithuta hore na ke joang re ka fanang le ho amohela keletso e molemo.