Mohlahare oa Koena

HAR’A liphoofolo tse phelang kajeno, koena ke eona eo ho fumanoeng hore e loma ka matla ho feta phoofolo leha e le efe. Ka mohlala, koena e phelang metsing a letsoai a fumanoang haufi le Australia, e loma ka matla ho feta tau kapa nkoe ka makhetlo a ka bang mararo. Leha ho le joalo, mohlahare oa koena o boetse o na le bokhoni bo ikhethang ba ho utloa se ka lehanong la eona—esita le ho feta kamoo menoana ea motho e utloang kateng. Seo se ka khoneha joang, haholo ha re nahana kamoo letlalo la koena le leng thata kateng?

Mohlahare oa koena o koahetsoe ke methapo-kutlo e likete. Ka mor’a hore a ithute ka mohlahare oa koena, mofuputsi e mong ea bitsoang Duncan Leitch o ile a re: “Karolo e ’ngoe le e ’ngoe e qetellong ea methapo-kutlo, e tsoa sekoting se lehateng.” Ka tsela eo, methapo-kutlo e mohlahareng ea sireletseha ha ka nako e tšoanang matla a eona a ho utloa a ba bohale le ho feta likarolong tse ling, hoo a ke keng a lekanngoa. Ka lebaka leo, koena e ka utloa phapang pakeng tsa lijo le mahoholi ka lehanong la eona. Ke kahoo e khonang ho kenya malinyane a eona ka lehanong empa ho sa etsahale hore e a ntše kotsi. Mohlahare oa koena o matla ka tsela e hlollang ’me ka tsela e tšoanang o na le bokhoni ba ho utloa se ka lehanong la eona.

U nahana’ng ka see? Na mohlahare oa koena o bile teng ka ho iphetola ha lintho? Kapa na o entsoe?