Sebaka se Loketseng Borapeli ba Jehova Bophelong ba Rōna
“Ke tla u boka ka matsatsi ’ohle, ke rorise lebitso la hao ka mehla le mehla, le ka ho sa feleng.”—PESALEME EA 145:2.
1. Mabapi le borapeli, Jehova o lebeletse eng?
“’NA Jehova, Molimo oa hao, ke Molimo o boulelang [ea batlang borapeli bo khethehileng, NW].” (Exoda 20:5) Moshe o ile a utloa polelo eo ho Jehova, ’me hamorao o ile a e pheta ha a bua le sechaba sa Iseraele. (Deuteronoma 5:9) Kelellong ea Moshe ho ne ho se pelaelo hore Jehova Molimo o ne a lebeletse hore bahlanka ba Hae ba Mo rapele ka tsela e khethehileng.
2, 3. (a) Ke’ng se ileng sa hatisa ka ho Baiseraele hore se neng se etsahala Thabeng ea Sinai e ne e le se sa tloaelehang? (b) Re tla hlahloba lipotso life ka borapeli ba Baiseraele le ba bahlanka ba Molimo kajeno?
2 Ha ba ne ba hlomme litente tsa bona pel’a Thaba ea Sinai, Baiseraele le “letšoele le kopakaneng” le neng le tlohile le bona Egepeta ba ile ba bona ntho e sa tloaelehang ka mahlo. (Exoda 12:38) E ne e sa tšoane le borapeli ba melimo ea Egepeta, eo ka nako eo e neng e tlotlolotsoe ke litlokotsi, kapa likotlo tse leshome. Ha Jehova a ne a senolela Moshe hore o teng, mehlolo e susumetsang tšabo e ile ea etsahala: sealuma, lehalima, le molumo o moholo oa terompeta o ileng oa etsa hore batho bohle ba leng kampong ba thothomele. Ho ile ha latela mollo le mosi ha thaba eohle e ne e reketla. (Exoda 19:16-20; Ba-Heberu 12:18-21) Haeba Moiseraele leha e le ofe a ne a hloka bopaki bo eketsehileng ba hore se neng se etsahala e ne e le se sa tloaelehang, bo ne bo le haufi le ho hlaha. Kapele Moshe o ile a theoha thabeng ka mor’a ho amohela kopi ea bobeli ea melao ea Molimo. Ho latela tlaleho e bululetsoeng, ‘letlalo la sefahleho sa [Moshe] le ne le khanya, ’me [batho] ba ne ba tšaba ho mo atamela.’ Phihlelo e ke keng ea lebaleha, e phahametseng kutloisiso ea motho ruri!—Exoda 34:30.
3 Ho sechaba seo ka ho khetheha e leng sa Molimo, ho ne ho se pelaelo mabapi le hore na borapeli ba Jehova bo nka sebaka sefe. E ne e le Molopolli oa bona. Ba ne ba mo kolota bophelo boo e leng ba bona ka sebele. Hape e ne e le Monehi-molao oa bona. Empa na ba ile ba beha borapeli ba Jehova sebakeng sa pele? ’Me ho thoe’ng ka bahlanka ba Molimo ba kajeno? Borapeli ba Jehova bo nka sebaka sefe bophelong ba bona?—Ba-Roma 15:4.
Borapeli ba Jehova ba Baiseraele
4. Kampo ea Iseraele e ne e hlophisoa joang bolulong ba bona ba nakoana lefeelleng, ’me ke’ng se neng se le bohareng ba kampo?
4 Haeba u ne u ka bona Iseraele e hlomme litente lefeelleng kamoo nonyana e fofang e neng e ka e bona kateng, u ka be u ile ua bona eng? Litente tse ngata, empa li hlonngoe ka mokhoa o hlophisehileng tseo ho tsona mohlomong ho lulang batho ba limilione li tharo kapa ho feta, li hlophisitsoe ka lihlopha tsa meloko e meraro ka leboea, boroa, bochabela le bophirimela. Ha u nyarela haufinyane, u ne u tla boela u bone tlhophiso e ’ngoe haufi le karolo e hare ea kampo. Litenteng tsena tse arotsoeng ka lihlopha tse ’nè tse nyenyane ho ne ho lula malapa a leloko la Levi. Bohareng ba kampo ena, sebakeng se arotsoeng ka lesela, ho ne ho e-na le mohaho o ikhethang. E ne e le “tente ea pōkano,” kapa tabernakele, eo Baiseraele “ba masene” ba neng ba e hahile ho latela polane ea Jehova.—Numere 1:52, 53; 2:3, 10, 17, 18, 25; Exoda 35:10.
5. Tabernakele e ne e sebeletsa morero ofe Iseraeleng?
5 Libakeng tsohle tse ka bang 40 tseo Baiseraele ba ileng ba hloma litente ho tsona nakong ea leeto la bona la lefeelleng, ba ne ba hloma tabernakele, ’me e ne e le eona setsi sa kampo ea bona. (Numere, khaolo ea 33) Ka ho loketseng Bibele e hlalosa Jehova e le ea lulang har’a batho ba hae, hantle feela bohareng ba kampo ea bona. Khanya ea hae e ne e tlala tabernakele. (Exoda 29:43-46; 40:34; Numere 5:3; 11:20; 16:3) Buka Our Living Bible ea hlalosa: “Tempelana ena e nkehang habobebe e ne e le ea bohlokoahali, kaha e ne e le moo ho tšoareloang liboka tsa borapeli teng bakeng sa meloko ena. Ka tsela eo e ile ea ba boloka ba kopane nakong ea lilemo tse telele tsa ho lelera lehoatateng ’me e ile ea etsa hore ho be bonolo ho sebetsa ka kutloano.” Ho feta moo, tabernakele e ne e sebeletsa e le khopotso ea kamehla ea hore borapeli ba Baiseraele ho ’Mōpi oa bona bo ne bo le ka sehloohong bophelong ba bona.
6, 7. Ke mohaho ofe oa borapeli o ileng oa nkela tabernakele sebaka, hona o ile oa sebeletsa sechaba sa Iseraele joang?
6 Ka mor’a hore Baiseraele ba fihle Naheng e Tšepisitsoeng, tabernakele e ile ea tsoela pele e le setsi sa borapeli ba Baiseraele. (Joshua 18:1; 1 Samuele 1:3) Ha nako e ntse e feta, Morena Davida o ile a rera ho haha mohaho o tsitsitseng. Ona e bile tempele, e ileng ea hahoa hamorao ke mor’a hae Salomone. (2 Samuele 7:1-10) Nakong eo e neng e khakoloa leru le ile la theoha ho bontša hore Jehova o amohela mohaho oo. Salomone o ile a rapela: “Ke fela ke u hahetse ntlo hore u ahe teng, nģalo ee u tla ba ho eona ka mehla.” (1 Marena 8:12, 13; 2 Likronike 6:2) Tempele e sa tsoa hahoa joale ea e-ba setsi sa boinehelo sa sechaba.
7 Baiseraele bohle ba banna ba ne ba nyolohela Jerusalema hararo ka selemo, ho ea ba teng meketeng ea thabo tempeleng ho leboha tlhohonolofatso ea Molimo. Ka ho loketseng, likopano tsena li ne li bitsoa “mekete ea Jehova,” li lebisa tlhokomelo borapeling ba Molimo. (Levitike 23:2, 4) Basali ba inehetseng ba ne ba ba teng hammoho le litho tse ling tsa malapa a bona.—1 Samuele 1:3-7; Luka 2:41-44.
8. Pesaleme ea 84:1-12 e paka bohlokoa ba borapeli ba Jehova joang?
8 Bangoli ba bululetsoeng ba lipesaleme ba ile ba hlokomela ka ho susumetsang kamoo borapeli e neng e le ba bohlokoa kateng bophelong ba bona. Bara ba Kore ba ile ba bina: “Meaho ea hao e rateha hakakang, uena, Jehova oa makhotla!” Ka sebele ba ne ba sa roke mohaho feela tjee. Ho e-na le hoo, ba ne ba phahamisa mantsoe a bona ba rorisa Jehova Molimo, ba re: “Pelo le nama ea ka li hooeletsa ho Molimo o phelang!” Tšebeletso ea Balevi e ne e ba tlisetsa thabo e khōlō. Ba ile ba re: “Ho lehlohonolo [thabile, NW] ba ahileng tlung ea hao! Ba ea ’ne ba u rorise ka mehla.” Ha e le hantle, Iseraele eohle e ne e ka bina: “Ho lehlohonolo [thabile, NW] batho bao u leng matla a bona, bao pelo tsa bona li ratang litsela tsa hao! . . . Ha ba ntse ba tsamaea, ba ekeletsoa matla, ho fihlela ba itlhahisa pel’a Molimo Sione.” Le hoja leeto la Moiseraele le eang Jerusalema e ka ’na eaba le ne le bile lelelele le bile le khathatsa, matla a hae a ne a nchafatsoa ha a fihla motse-moholo. Pelo ea hae e ne e tlala thabo ha a rorisa tokelo ea hae ea ho sebeletsa Jehova: “Hobane tsatsi le le leng le luloang mabaleng a ntlo ea hao, le fetisa matsatsi a mang a sekete a luloang hosele. Ho lula mathuleng a ntlo ea Molimo oa ka kea ho rata ho fetisa ho lula litenteng tsa ba khopo. . . . Jehova oa makhotla, ho lehlohonolo [thabile, NW] motho ea u tšepang!” Lipolelo tse joalo li senola kamoo Baiseraele bao ba neng ba etelletsa borapeli ba Jehova pele.—Pesaleme ea 84:1-12.
9. Ke’ng se ileng sa etsahalla sechaba sa Iseraele ha se hlōleha ho etelletsa borapeli ba Jehova pele?
9 Ka masoabi, Iseraele e ile ea hlōleha ho etelletsa borapeli ba ’nete pele. Ba ile ba lumella hore boinehelo ho melimo ea bohata bo fokolise cheseho ea bona ho Jehova. Ka lebaka leo, Jehova o ile a ba tlohella ho lira tsa bona, a lumella hore ba isoe botlamuoeng Babylona. Ha ba khutliselitsoe naheng ea habo bona ka mor’a lilemo tse 70, Jehova o ile a fa Baiseraele likhothatso tse hlasimollang ka baprofeta ba tšepahalang Haggai, Zakaria, le Malakia. Moprista Esdrase le ’Musi Nehemia ba ile ba susumetsa batho ba Molimo hore ba hahe tempele bocha le ho tsosolosa borapeli ba ’nete moo. Empa ha makholo a lilemo a ntse a feta, borapeli ba ’nete bo ile ba boela ba fetoha ntho e nkeloang tlaase sechabeng.
Cheseho ea Lekholo la Pele la Lilemo Bakeng sa Borapeli ba ’Nete
10, 11. Borapeli ba Jehova bo ne bo le sebakeng sefe bophelong ba ba tšepahalang ha Jesu a ne a le lefatšeng?
10 Joale, nakong eo Jehova a e behileng, Messia o ile a hlaha. Batho ka bomong ba tšepahalang ba ne ba tšepile hore Jehova o tla ba pholosa. (Luka 2:25; 3:15) Tlaleho ea Kosepele ea Luka ka ho tobileng e hlalosa Anna ea lilemo li 84 e le mohlolohali ‘ea neng a sa tlohe tempeleng, ea neng a sebeletsa Molimo ka ho itima lijo le ka ho rapela bosiu le motšehare.’—Luka 2:37.
11 Jesu o itse: “Sejo sa ka ke ho etsa thato ea ea nthomileng, le ho phetha mosebetsi oa hae.” (Johanne 4:34) Hopola kamoo Jesu a ileng a itšoara kateng ha a tobana le batho ba neng ba ananya lichelete ka tempeleng. O ile a phethola litafole tsa bona esita le libenche tsa bahoebi ba neng ba rekisa maeba. Mareka oa tlaleha: “[Jesu] o na a sa lumelle motho ho feta ka tempeleng a jere phahlo. ’Me a ruta, a re ho bona: Ha ke re, ho ngoliloe, ho thoe: Ntlo ea ka e tla bitsoa ntlo ea thapelo ea lichaba tsohle? athe lōna, le e entse lehaha la masholu!” (Mareka 11:15-17) E, Jesu ha aa ka a lumella mang kapa mang esita le ho khaoletsa le lebaleng la tempele ho isa phahlo karolong e ’ngoe ea motse. Liketso tsa Jesu li ile tsa tiisa keletso eo a ileng a fana ka eona pejana: “Le mpe le batle ’muso oa Molimo le ho loka ha oona pele.” (Mattheu 6:33) Jesu o re sietse mohlala o babatsehang ka ho nehela Jehova borapeli bo khethehileng ba hae. Ruri o ne a sebelisa seo a se rutang.—1 Petrose 2:21.
12. Barutuoa ba Jesu ba ile ba bontša joang hore ba etelletsa borapeli ba Jehova pele?
12 Hape Jesu o ile a behela barutuoa ba hae mohlala oo ba ka o latelang ka tsela eo ka eona a neng a phetha thōmo ea hae ea ho lokolla Bajode ba hateletsoeng, empa e le ba tšepahalang, meroalong ea litšebeletso tsa bolumeli ba bohata. (Luka 4:18) Ka ho mamela taelo ea Jesu ea ho etsa barutuoa le ho ba kolobetsa, Bakreste ba pele ka sebete ba ile ba bolela thato ea Jehova mabapi le Morena oa bona ea tsositsoeng. Jehova o ile a thaba haholo ha ba etelletsa borapeli ba Hae pele. Ka hona, lengeloi la Molimo ka mohlolo le ile la lokolla baapostola Petrose le Johanne litlamong ’me la ba laela: “E-eang, le eme tempeleng, le bolelle sechaba litaba tsohle tsa bophelo bona.” Ba matlafalitsoe bocha, ba ile ba mamela. Letsatsi le leng le le leng, tempeleng ea Jerusalema le ka ntlo le ntlo “ha ba ka ba phetsa . . . ho ruta le ho bolela . . . hore Jesu ke Kreste.”—Liketso 1:8; 4:29, 30; 5:20, 42; Mattheu 28:19, 20.
13, 14. (a) Ho tloha mehleng ea pele ea Bokreste, Satane o lekile ho etsa eng ho bahlanka ba Molimo? (b) Bahlanka ba Molimo ba tšepahalang ba ile ba tsoela pele ho etsa’ng?
13 Ha khanyetso mabapi le boboleli ba bona e ntse e hōla, Molimo o ile a tataisa bahlanka ba hae ba tšepahalang hore ba ngole keletso e nakong. Petrose o ile a ngola kamoraonyana ho 60 C.E.: “Lahlelang lipelaelo tsohle tsa lōna holim’a [Jehova]; hobane oa le hlokomela. Le tsohe masene, le falimehe; hobane Diabolose, e leng sera sa lōna, o ntse a lika-lika joalo ka tau e purumang, e batlang eo e ka mo jang. Hanang ho eena ka ho tiea tumelong, le ntse le tseba hobane lihloreho li le ling le tsena li ntse li hlahela banab’abo lōna ba lefatšeng.” Ka sebele Bakreste ba pele ba ile ba fumana kholiseho mantsoeng ao. Ba ne ba tseba hore ka mor’a hore ba utloe bohloko ka nako e seng kae, Molimo o ne a tla ba etsa ba phethehileng. (1 Petrose 5:7-10) Mehleng eo ea qetello ea tsamaiso ea lintho ea Sejode, Bakreste ba ’nete ba ile ba phahamisetsa borapeli ba Jehova bo bonahatsang lerato bophahamong bo bocha ka ho mo rorisa.—Ba-Kolosse 1:23.
14 Joalokaha moapostola Pauluse a ne a boletse esale pele, bokoenehi, e leng ho furalla borapeli ba ’nete, bo ile ba hlaha. (Liketso 20:29, 30; 2 Ba-Thessalonika 2:3) Bopaki bo tsoang mashomeng a lilemo a qetellang a lekholo la pele la lilemo bo ile ba phaella boitsebiso ba qeto ena. (1 Johanne 2:18, 19) Satane o ile a jala Bakreste ba maiketsetso ka katleho har’a ba ’nete, a etsa hore ho be thata ho khetholla “mofoka” ona ho Bakreste ba kang koro. Leha ho le joalo, ho pholletsa le makholo a lilemo, batho ka bomong ba ile ba etelletsa borapeli ba Molimo pele, esita leha bophelo ba bona bo le kotsing. Empa ha ea ka ea e-ba ho fihlela mashomeng a lilemo a qetellang a “mehla ea lichaba” ha Molimo a boela a bokella bahlanka ba hae e le hore ba phahamise borapeli ba ’nete.—Mattheu 13:24-30, 36-43; Luka 21:24.
Borapeli ba Jehova bo Phahamisitsoe Kajeno
15. Ho tloha ka 1919, boprofeta ba Esaia 2:2-4 le Mikea 4:1-4 bo ile ba phethahatsoa joang?
15 Ka 1919, Jehova o ile a fa masala a batlotsuoa matla a ho qalisa phutuho ea lefatše lohle ea ho paka ho etsoang ka sebete ho phahamisitseng borapeli ba Molimo oa ’nete. Ka lebaka la ho subuhlellana ha “linku tse ling” tsa tšoantšetso ho tloha ka 1935 ho fihlela hona joale, ho phalla ha batho bao ka puo ea moea ba nyolohelang ‘thabeng ea ntlo ea Jehova’ ho ntse ho eketseha. Selemong sa tšebeletso sa 1993, Lipaki tsa Jehova tse 4 709 889 li ile tsa mo rorisa ka ho mema ba bang ho kopanela le tsona borapeling ba hae bo phahameng. Boemo ba tsona bo fapane hakaakang le ba ho silafala moeeng ba “maralla” a lihlotšoana tsa bokhelohi tsa ’muso oa lefatše oa bolumeli ba bohata, bo bonahalang ka ho khetheha ho Bokreste-’mōtoana!—Johanne 10:16; Esaia 2:2-4; Mikea 4:1-4.
16. Ho hlokahala hore bahlanka bohle ba Molimo ba etse eng mabapi le se boletsoeng esale pele ho Esaia 2:10-22?
16 Ba khomarelang bolumeli ba bohata ba talima likereke le li-cathedral tsa bona esita le baruti ba bona e le ba “phahameng,” ba ba neha litlotla le mabitso a phahameng. Empa hlokomela seo Esaia a ileng a se bolela esale pele: “Mahlo a ikhantšang a batho a tla kokobetsoa, boikhohomoso joa ba baholo bo nyenyefatsoe; ka letsatsi leo ho tla holisoa Jehova a ’notši.” See se tla etsahala neng? Nakong ea mahlomola a maholo a atamelang ka potlako ha “litšoantšo li tla fella ruri.” Ha ho talingoa bohaufi ba nako eo e susumetsang tšabo, ho hlokahala hore bahlanka bohle ba Molimo ba hlahlobe ka botebo hore na borapeli ba Jehova bo sebakeng sefe bophelong ba bona.—Esaia 2:10-22.
17. Bahlanka ba Jehova kajeno ba bontša joang hore ba etelletsa borapeli ba Jehova pele?
17 E le baena ba machaba, Lipaki tsa Jehova li tsebahala haholo ka ho chesehela boboleli ba ’Muso. Borapeli ba tsona hase feela tšebeletso ea ho itlosa molato, e etsoang ka nako e behiloeng e ka etsang hora e le ’ngoe ka beke. Che, ke tsela eohle ea tsona ea bophelo. (Pesaleme ea 145:2) Ka sebele, selemong se fetileng Lipaki tse fetang 620 000 li ile tsa lokisa maemo a tsona e le hore li ka kopanela tšebeletsong ea Bokreste ka nako e tletseng. Ruri tse ling ha lia hlokomoloha borapeli ba Jehova. Bo hlahella e le ba bohlokoa meqoqong ea tsona ea letsatsi le letsatsi le boboleling ba tsona ba phatlalatsa, esita le haeba mesebetsi ea lelapa eo li tlamehang ho e etsa e hloka hore li sebetse ka thata mosebetsing oa boipheliso.
18, 19. Bolela mehlala ea khothatso eo e ka ’nang eaba u e fumane ka ho bala lipale tsa bophelo tsa Lipaki.
18 Lipale tsa bophelo tsa Lipaki tse hatisitsoeng makasineng ea Molula-Qhooa li fana ka temohisiso mabapi le litsela tseo ka tsona baena le bo-khaitseli ba fapaneng ba etelelitseng borapeli ba Jehova pele bophelong ba bona. Khaitseli e mong e monyenyane ea ileng a nehela bophelo ba hae ho Jehova ha a le lilemo li tšeletseng o ile a beha tšebeletso ea boromuoa e le pakane ea hae. Lōna baena le bo-khaitseli ba bacha, le ka ikhethela pakane efe e tla le thusa ho etelletsa borapeli ba Jehova ka pele-pele bophelong ba lōna?—Bona sehlooho “Ho Hahamalla Pakane eo ke Ipehetseng Eona ha ke ne ke le Lilemo li Tšeletseng,” tokollong ea Molula-Qhooa oa March 1, 1992, maqepheng a 26-30.
19 Khaitseli e mong oa mohlolohali ea hōlileng o beha mohlala o mong o motle oa ho beha borapeli ba Jehova sebakeng sa bona se nepahetseng. O ile a fumana khothatso e khōlō ea ho mamella ho bao a neng a ile a ba thusa ho ithuta ’nete. E ne e le “lelapa” la hae. (Mareka 3:31-35) Haeba u iphumana u le boemong bo tšoanang le boo, na u tla amohela tšehetso le thuso ea ba banyenyane ka phuthehong? (Ka kōpo hlokomela kamoo Khaitseli Winifred Remmie a ileng a itlhalosa sehloohong se reng “Ke ile ka Arabela Nakong ea Kotulo,” se hatisitsoeng tokollong ea Molula-Qhooa oa July 1, 1992, maqepheng a 21-3.) Lōna basebeletsi ba nako e tletseng, bontšang hore ruri borapeli ba Jehova bo tla pele bophelong ba lōna ka hore ka boikokobetso le sebeletse kabelong eo le e filoeng, ka boithatelo le ikokobeletse tataiso ea puso ea bomolimo. (Ka kōpo hlokomelang mohlala oa Moena Roy Ryan, joalokaha phihlelo ea hae e phetiloe sehloohong se reng “Ho Khomarela Haufi Mokhatlo o Hlophisitsoeng oa Molimo,” tokollong ea Molula-Qhooa oa December 1, 1991, maqepheng a 24-7.) Hopolang hore ha re etelletsa borapeli ba Jehova pele, rea kholiseha hore o tla re hlokomela. Ha ho hlokahale hore re tšoenyehe ka hore na seo re se hlokang bophelong re tla se fumana hokae. Liphihlelo tsa Bo-khaitseli Olive le Sonia Springate li bontša sena.—Bona sehlooho “Re ile ra Batla ’Muso Pele,” tokollong ea Molula-Qhooa oa February 1, 1994, maqepheng a 20-5.
20. Joale re lokela ho ipotsa lipotso life tse loketseng?
20 Joale, ka bomong na ha rea tšoanela ho ipotsa lipotso tse fatang maikutlo? Borapeli ba Jehova bo nka sebaka sefe bophelong ba ka? Na ke phethahatsa boinehelo ba ka ba ho etsa thato ea Molimo ho fihlela moo matla a ka a fellang? Ke lokela ho ntlafatsa libakeng life tsa bophelo? Ho hlahloba sehlooho se latelang ka hloko ho tla re fa monyetla oa ho nahana kamoo re sebelisang matlotlo a rōna tumellanong le seo re se khethileng e le sona se tlang pele bophelong—borapeli ba Morena ’Musi Jehova, Ntate oa rōna ea lerato.—Moeklesia 12:13; 2 Ba-Korinthe 13:5.
Tlhahlobo
◻ Mabapi le borapeli, Jehova o lebeletse eng?
◻ Tabernakele e ile ea sebeletsa e le khopotso ea eng?
◻ Lekholong la pele la lilemo C.E., ke bo-mang bao e neng e le mehlala e hlaheletseng ea ho chesehela borapeli ba ’nete, ’me e le ka tsela efe?
◻ Ho tloha ka 1919, borapeli ba Jehova bo ’nile ba phahamisoa joang?