Molimo oa Melisa—Na U Phetha Karolo ea Hao?

NAHANA ka pono ena. U serapeng se setle, se pota-potiloeng ke lifate tse khōlohali, lihlahla tse tlokomang le liqubu tsa lipalesa tse mebala-bala e khanyang. Mohloa o motala ba emarauda o alehile mothipoloheng ho ea fihla mabopong a hlokometsoeng hantle a molatsoana o phoroselang metsi a hloekileng joaloka kristale. Ha ho letho le senyang ponahalo ena. U hloletsoe, u botsa hore na ke mang ea entseng sebaka sena se ratehang. Mohlokomeli oa serapa seo ka boikokobetso o arabela ka hore Molimo ke eena ea melisang lintho tsohle.

Ka tlhaho, seo u ne u ntse u se tseba. Joale o hopola mantsoe ana a mohlokomeli oa serapa ha u fihla hae ’me u bona kamorao ho ntlo ea hao ho hlekemane, ho sa mele letho le khahlang mahlo, lithōle lia bokellana, hape fatše ho na le likoti tse sa bonahaleng tse tlatsitsoeng ke metsi a pula. U lakatsa ka matla ho ba le serapa se tšoanang le seo u sa tsoa se etela. Kahoo, u lumela ka tieo mantsoe ane a mohlokomeli oa serapa, u khumama ka mangole ’me u rapela Molimo ka tieo hore a etse hore lipalesa tse ntle li mele serapeng sa hao. Joale ho etsahala eng? Ho hlakile hore ha ho letho.

Ho thoe’ng ka khōlo ea moea? U ka ’na oa ba le takatso e matla ea ho bona lintho li hōla moeeng, joaloka ho bona barutuoa ba bacha ba arabela hamolemo ’neteng ea Lentsoe la Molimo kapa tsoelo-peleng ea hao ea moea. ’Me u ka ’na oa rapela ka tieo hore Jehova a hlahise khōlo e joalo, ka kholiseho e tebileng ea hore o na le matla a ho etsa joalo. Empa na takatso ea hao e matla, thapelo ea hao e tiileng, le kholiseho ka matla a Molimo ka botsona li ka hlahisa khōlo?

Molimo oa Melisa

Mohlomong u ikutloa e ka karolo ea hao ho hlahiseng khōlo hase ea bohlokoa, e bile ha e-na moelelo. Na moapostola Pauluse ha a ka a hlahisa see ho 1 Ba-Korinthe 3:5-7? (BPN) O ngotse: ‘Hantle-ntle Apollose ke eng? Pauluse eena ke eng? Ke basebeletsi feela bao le lumetseng ka baka la bona, ba sebelitseng ho ea kamoo Morena a abetseng e mong le e mong oa bona kateng. ’Na ke ile ka lema, Apollose eena a noesetsa, empa ke Molimo ea melisitseng. Ka hona ea lemang hase letho, le ea noesetsang hase letho, empa eo e leng letho ke Molimo ea melisang.’

Ka nepo Pauluse oa lumela hore ha lintho li mela tlotla eohle e-ea ho Molimo. Mohlokomeli oa serapa a ka ’na a lokisa mobu oa hae, a jala peō ea hae, ’me a hlokomela limela tsa hae hantle, empa qetellong ke ka lebaka la matla a makatsang a Molimo a pōpo lintho li hōlang. (Genese 1:11, 12, 29) Leha ho le joalo, Pauluse o bolela’ng ha a re “ea lemang hase letho, le ea noesetsang hase letho”? (“Hase ka ho lema ha bahlokomeli ba lirapa le ka ho noesetsa ha bona hoo e leng taba,” The New English Bible.) Na o khella fatše karolo e phethoang ke mosebeletsi ka mong ho etseng barutuoa ba bacha, a hlahisa hore qetellong ha ho etse phapang ea letho hore na re etsa tšebeletso ea rōna joang?

“Ea Lemang Hase Letho”

Hopola hore karolong ena ea lengolo la hae, Pauluse ha a buoe ka tšebeletso ea Bokreste empa o bua ka booatla ba ho latela batho ho e-na le Jesu Kreste. Ba bang Korinthe ba ne ba sa nke bahlanka ba hlahelletseng ba Jehova joaloka Pauluse le Apollose e le ba bohlokoa. Ba bang ba ne ba hōlisa mokha oa bokhelohi le ho phahamisa banna bao ba neng ba nahana hore ba phahametse baena ba bona ba Bakreste.—1 Ba-Korinthe 4:6-8; 2 Ba-Korinthe 11:4, 5, 13.

Ho tlotlisa batho ka tsela ena ha ho hotle. Ke monahano oa nama, ’me o hlahisa mōna le liphapang. (1 Ba-Korinthe 3:3, 4) Pauluse o bontša liphello tsa monahano o joalo. O re: “Likhang li teng har’a lōna. Ke lekanya joalo, kahobane e mong le e mong ho lōna o re: ’Na, ke oa Pauluse!—’na, ke oa Apollose!—’na, ke oa Kefase!—’na he, ke oa Kreste!”—1 Ba-Korinthe 1:11, 12.

Kahoo, ha a ngola, “molemi le monoesetsi hase letho” (Phillips), moapostola o loantša monahano o joalo oa nama, a hatisa tlhokahalo ea ho talima ho Jesu Kreste e le Moeta-pele le ho lumela hore tlotla eohle bakeng sa khōlo ka phuthehong e leba ho Molimo. Baapostola le baholo ba bang e mpa feela e le bahlanka ba phutheho. Ba ne ba sa lokeloa ke ho phahamisoa leha e le hore bona ka bobona ba ne ba ka leka ho iphumanela botumo kapa bophahamo. (1 Ba-Korinthe 3:18-23) Kahoo Pauluse o re molemi le monoesetsi hase letho, “ha ba bapisoa le ea fanang ka bophelo ho peō.”—1 Ba-Korinthe 3:7, Phillips.

Basebetsi-’moho le Molimo

Ka hona, ka ho rialo, moapostola Pauluse o ne a sa nyenyefatse bohlokoa ba karolo ea rōna ho lemeng le ho noesetseng. O ne a sa bolele hore joale re ka qala ho nahana hore, “Molimo o tla melisa lintho ka nako ea hae,” joale e be rea kakalla ’me re emela hore Molimo a ho etse. Oa tseba hore seo re se etsang le mokhoa oo re se etsang ka oona se na le tšusumetso mokhoeng oo lintho li hōlang ka oona.

Ke ka lebaka lena Pauluse a sa kang a phetsa ho khothaletsa Bakreste hore ba sebetse ka thata tšebeletsong ea bona le ho ntlafatsa tsebo ea bona joaloka matichere. Nahana ka keletso eo a e fang mohlankana Timothea. “Itlhokomele, u hlokomele le thuto ea hao. Tiisetsa ho tsena, hobane ka ho etsa joalo u tla ipholosa, u be u pholose le ba u mamelang.” (1 Timothea 4:16, BPN) “Ke u laela ke hona haholo . . . , ke re: u bolele lentsoe, u phehelle . . . , ka mamello eohle le ka ho ruta. . . . u phethisise tšebetso ea hao.” (2 Timothea 4:1, 2, 5) Ho ne ho ke ke ha e-ba le molemo hore Timothea a sebeletse ho ntlafatsa tsebo ea hae haeba ho lema ha hae le ho noesetsa li ne li ke ke tsa e-ba le tšusumetso ho etseng hore lintho li hōle.

Joaloka Pauluse le Apollose, le uena u ka ba le tokelo e ke keng ea lekanngoa ea ho ba e mong oa basebetsi-’moho le Molimo. (1 Ba-Korinthe 3:9; 2 Ba-Korinthe 4:1; 1 Timothea 1:12, BPN) Ka booona, mosebetsi oa hao ke oa bohlokoa. Mohlokomeli oa serapa a ke ke a lebella hore ka mohlolo feela Molimo a etse hore serapa sa hae se be setle ntle le hore e be mohlokomeli o entse boiteko. Na ho lokela ho ba ka tsela e fapaneng ha ho tluoa khōlong ea moea? Le hanyenyane. Joaloka molemi “ha a ntse a lebeletse lijo tsa bohlokoa tsa lefatše,” ka mamello re tlameha hore re qale pele re leme ’me re noesetse ha re ntse re emetse hore Molimo a melise.—Jakobo 1:22; 2:26; 5:7.

Phetha Karolo ea Hao

Joalokaha moapostola Pauluse a bolela, kaha “e mong le e mong o tla amohela moputso ho ea ka mosebetsi oa hae,” ke hantle ha re ipotsa hore na e be re ntse re sebetsa joang.—1 Ba-Korinthe 3:8, BPN.

Setsebi sa tlhokomelo ea lirapa Geoffrey Smith se re: “Ha ho na litšoaneleho tse khethehileng tse hlokahalang hore motho e be mohlokomeli oa serapa, ho hlokahala feela thahasello limeleng.” (Shrubs & Small Trees) Ka ho tšoanang, ha ho litšoaneleho tse khethehileng tse bōpelletsoeng le rōna tse hlokahalang e le hore re ka ba basebetsi-’moho le Molimo, ho hlokahala feela thahasello ea sebele ho batho le ho rata ho sebelisoa ke Molimo.—2 Ba-Korinthe 2:16, 17; 3:4-6, NW; Ba-Filippi 2:13.

Nahana ka e ’ngoe ea likeletso tse ntle tse ileng tsa fanoa ke bahlokomeli ba lirapa ba nang le tsebo. Joalokaha mohloli o mong oa boitsebiso o bolela, haeba mohlokomeli oa lirapa ea se nang phihlelo a rata ho mamela ba seng ba e-na le phihlelo e ngata ho mo feta, “seithuti sena e ka e-ba setsebi ka pele.” ’Me, oona mohloli ona o re “ka mehla setsebi se ntse se fumana ho hocha hoo se ithutang hona.” (The Encyclopedia of Gardening) Na ka boithatelo u amohela thuso le koetliso tseo Jehova a fanang ka tsona e le hore u ka lema le ho noesetsa ka mokhoa o atlehileng? Haeba u etsa joalo, ebang u mocha mosebetsing ona kapa u se u e-na le phihlelo ho oona, o ka hōlisa tsebo e tsoelang pele u le mosebetsi-’moho le Molimo ’me ka hona oa ba ea “tšoanelehang ka ho lekaneng bakeng sa ho ruta ba bang.”—2 Timothea 2:2, NW.

Haeba a ikemiselitse ho mamela le ho ithuta, Geoffrey Smith o re, “ea qalang o tla qoba malumela a kotsi.” Haeba re mamela tataiso eo Jehova a fanang ka eona ka Lentsoe la hae le mokhatlo oa hae o hlophisitsoeng, re tla etsa lintho ka tsela ea hae. Ka mohlala, joale re tla qoba malumela a kang ho phehisana ka booatla le bao ba batlang feela ho etsa khang kapa ho loana ka mantsoe.—Liproverbia 17:14; Ba-Kolosse 4:6; 2 Timothea 2:23-26.

Tlhahiso e ’ngoe e ntle mabapi le tlhokomelo ea serapa ke ho nahana lintho ka hloko pele u potlakela ho phethola mobu. The Encyclopedia of Gardening e re, “pele u qala ho lema qeta nako u iketlile u lekanyetsa [litebello tsa hao] ka hloko.” Na u oela lerabeng la ho potlakela tšebeletsong ea Bokreste ka ntle le hore pele u nahanisise ka hloko le ka thapelo seo u batlang ho se phetha le hore na u ka se etsa joang hamolemohali? Lipakane tsa hao li lokela ho hlaka pele u qala. Ka mohlala, nahana ka mofuta oa batho bao u ka ’nang oa kopana le bona le mathata ao u ka ’nang oa thulana le oona, ’me u itokisetse ho sebetsana le oona. Sena se tla u nolofaletsa hore u ‘rue batho ba bangata [ha u] e-ba lintho tsohle ho batho ba mefuta eohle.’—1 Ba-Korinthe 9:19-23, NW.

‘U se ke oa Phutha Matsoho a Hao’

Haeba re ananela tokelo ea ho sebetsa re le basebetsi-’moho le Molimo, re ke ke ra khaotsa ho ba le karolo mosebetsing ona o kopanetsoeng. “Peō ea hao u e jale e sa le hoseng, ho fihlela mantsiboea matsoho a hao u se a phuthe, hobane ha u tsebe e tla atleha, kapa bobeli li tla mela hantle.” (Moeklesia 11:6, BPN) Litholoana tsa ho qetela li matsohong a Jehova, empa re tla kotula ha feela re qalile ka ho etsa boikitlaetso ba ho jala.—Moeklesia 11:4.

Ha ho mohla ho kileng ha e-ba le serapa se entsoeng botle ka hore ho etsoe mabalankoe le moritaoke ha ho lenngoa le ho hasa peō. Ka ho tšoanang, ho hlokahala ho hongata tšebeletsong ea Bokreste ho feta feela ho nka karolo ho abeng libuka tsa Bibele ka tsela ea ho intša molatong. Re le basebetsi-’moho le Molimo, ho hlokahala hore ka cheseho le ka botlalo re phatlalatse litaba tse molemo tsa ’Muso oa Molimo, re batle ba nang le tšekamelo e nepahetseng. (Liketso 13:48, NW) Hopola molao-motheo o mantsoeng a moapostola Pauluse ho 2 Ba-Korinthe 9:6: “Ea jalang hanyenyane o tla kotula hanyenyane; ’me ea jalang haholo le hona o tla kotula haholo.”

Joaloka bahlokomeli bohle ba batle ba lirapa, re leka ho lema mobung o motle. Leha ho le joalo, hang ha ho e-na le ho hong ho lenngoeng mobung o motle, hoo hase qetello ea taba. Geoffrey Smith o re: “Hona ha ho bolele hore hang ha u se u lemme ha ho sa hlokahala letho ho motho ea ikarabellang le hore joale a ka itjella monakalali oa keboleloa.” Che, hore lintho li hōle, ho hlokahala boiteko ba ho noesetsa le ho sireletsa limela.—Bapisa le Liproverbia 6:10, 11.

Ha e le hantle, tšebeletso ea Bokreste e ka ’na ea bolela nako e telele ea ho sebetsa ka thata ha ho bonahala eka ha ho letho le etsahalang. Empa ka tšohanyetso, ’me ka nako tse ling ho bile ho sa lebelloa, ho ka ’na ha hlaha liphello tse hlollang. Geoffrey Smith o re: “Ho hlokomela serapa ho tsamaisana le linako tsa ho sehla ka thata tse sa feto-fetoheng tse tsamaisanang le linako tsa botle bo hlollang hoo ho lema, ho hlaola le matšoenyeho ao ho fetiloeng ho ’ona li lebaloang.” Le uena ka ho tšoanang u ka ba le linako tsa khotsofalo e hlollang ha ba lipelo li ananelang ba arabela molaetseng oa ’nete—ebang u utloisisa ho qala ka ho lema, ho jala, ho hlaola, le ho noesetsa.—Bapisa le Liproverbia 20:4.

Pauluse le Apollose ba ne ba tseba hore mosebetsi oa bona oa ho bolela ka ’Muso le ho etsa barutuoa o ne o sa ba fe bophahamo phuthehong ea Bokreste. Ba ne ba utloisisa hore ke Molimo ea melisang. Ho ntse ho le joalo, ba ile ba ’na ba lema le ho noesetsa—ka thata. E se eka re ka latela mohlala oa bona ’me ra iketsa ba fumanehang ho Molimo joaloka “basebeletsi feela bao [ba bang] ba lumetseng ka baka la bona.”—1 Ba-Korinthe 3:5, 6.

[Setšoantšo se leqepheng la 23]

Molimo o melisa tsohle—empa mohlokomeli oa serapa le eena o phetha karolo ea hae