Hatela Pele Mohato ka Mohato—Tsoela Pele
HA U ne u qala ho ithuta ho sebelisa melao-motheo ea Bibele, mekhoa ea ho nahana e metseng ka metso, lipuo le boitšoaro li ile tsa qala ho fetoha butle-butle. Karolo e khōlō ea sena e etsahetse le pele u ngolisa Sekolong sa Tšebeletso sa Puso ea Molimo. Mohlomong hona joale u hatetse pele ho fihlela moo u nehetseng bophelo ba hao ho Jehova. Na seo se bolela hore u ka khaotsa ho hatela pele? Che ho hang. Ho kolobetsoa ha hao ke qalo feela.
Morutuoa Timothea o ne a se a ntse a sebeletsa e le moholo oa Mokreste ha Pauluse a mo bolella hore a ‘nahanisise’ ka keletso eo a e fuoang le ka litokelo tsa tšebeletso tse behiloeng tlhokomelong ea hae—hore a “ikakhele ka setotsoana” linthong tsena—e le hore ‘tsoelo-pele ea hae e ka bonahala ho batho bohle.’ (1 Tim. 4:12-15) Ho sa tsotellehe hore na u sa tsoa qala ho latela tsela ea ’nete kapa u na le phihlelo e ngata bophelong ba Bokreste, u lokela ho thahasella taba ea ho tsoela pele.
Tsebo le ho Fetoha
Ho Baefese 3:14-19, re bala hore moapostola Pauluse o ile a rapella hore balumeli-’moho le eena ba ‘khone ho utloisisa ka ho phethahetseng kelellong . . . bophara le bolelele le bophahamo le botebo’ ba ’nete. Hore a finyelle seo, Jesu o ile a fana ka limpho tsa banna bakeng sa ho ruta, ho khutlisetsa tseleng le ho haha phutheho. Ho thuisa kamehla ka Lentsoe le bululetsoeng la Molimo, hammoho le tataiso e tsoang ho mesuoe e nang le phihlelo, ho ka re thusa ho ‘hōla’ moeeng.—Baef. 4:11-15.
Khōlo eo e kopanyelletsa ho ‘nchafala matleng a susumetsang kelello ea hao.’ Sena se akarelletsa ho ba le tšekamelo e matla ea kelello e lumellanang le ea Molimo le Kreste. Se hloka hore u lule u ntse u e-na le monahano oa bona kamehla, e le hore u ‘apare botho bo bocha.’ (Baef. 4:23, 24) Ha u ithuta Likosepele, na u talima litlaleho tsee tsa bophelo ba Kreste e le mohlala oo u lokelang ho o latela? Na u batla ho tseba litšobotsi tse khethehileng tse bontšitsoeng ke Jesu ebe u etsa boiteko bo matla ba hore u li etsise bophelong ba hao?—1 Pet. 2:21.
Lintho tseo u li kenyelletsang ha u qoqa li ka bontša hore na u se u tsoetse pele ho isa bohōleng bofe. Batho ba apereng botho bo bocha ha ba inehelle puo e sa tšepahaleng, e hlapaolang, e litšila kapa e tletseng lipelaelo. Ho e-na le hoo, puo ea bona “e molemo bakeng sa ho haha . . . e le hore e ka fana ka se molemo ho ba e utloang.” (Baef. 4:25, 26, 29, 31; 5:3, 4; Juda 16) Seo ba se buang ka thōko le ha ba le libokeng tsa phutheho se bontša hore ’nete e fetola bophelo ba bona.
Haeba u se u sa hlole u ‘akhotsoa joalokaha eka u akhotsoa ke maqhubu ’me u isoa koana le koana ke moea o mong le o mong oa thuto,’ sena le sona se bontša hore u tsoetse pele. (Baef. 4:14) Ka mohlala, u itšoara joang ha lefatše le u hlasela ka likhopolo tse ncha, lithahasello kapa mefuta ea boithabiso? Na u hoheloa hore u sebelise nako ea lintho tsa moea bakeng sa ho hahamalla lintho tse joalo? Ho etsa joalo ho ka khina ho tsoela pele ha hao moeeng. Ho bohlale hakaakang ho reka nako bakeng sa mesebetsi ea moea!—Baef. 5:15, 16.
Tsela eo u sebelisanang le batho ba bang ka eona le eona e ka bontša ho tsoela pele moeeng. Na u ithutile ho ba le ‘qenehelo e bonolo, hore ka bolokolohi u tšoarele’ bara le barali beno?—Baef. 4:32.
Ho hatela pele ha hao ho etseng lintho ka tsela ea Jehova ho lokela ho bonahala ka phuthehong le ka lelapeng. Hape ho lokela ho bonahala sekolong, libakeng tsa batho bohle le mosebetsing oa hao oa boipheliso. (Baef. 5:21–6:9) Haeba maemong ao kaofela, u bontša litšoaneleho tsa bomolimo ka ho feletseng, joale ho tsoela pele ha hao hoa bonahala.
Sebelisa Mpho ea Hao
Jehova o file e mong le e mong oa rōna bokhoni le litalenta. O lebeletse hore re sebelise lintho tsena molemong oa ba bang e le hore a ka bontša mosa oa hae o sa tšoanelang ka rōna. Mabapi le sena moapostola Petrose o ile a ngola: “Ka tekanyo eo e mong le e mong a amohetseng mpho ka eona, le e sebelise ho sebeletsaneng joaloka batsamaisi ba khabane ba mosa o sa tšoanelang oa Molimo.” (1 Pet. 4:10) U tšoere botsamaisi ba hao joang?
Petrose o tsoela pele: “Haeba leha e le mang a bua, a ke a bue joalokaha eka ke liphatlalatso tse halalelang tsa Molimo.” (1 Pet. 4:11) Temana ena e hatisa boikarabelo ba ho bua se lumellanang ka ho feletseng le Lentsoe la Molimo, e le hore ho ka tlotlisoa Molimo. Mokhoa oo motho a buang ka oona le oona o lokela ho tlotlisa Jehova. Koetliso e fanoang Sekolong sa Tšebeletso sa Puso ea Molimo e ka u thusa ho sebelisa mpho ea hao ka tsela eo—ho tlotlisa Molimo ka tsela eo u thusang ba bang ka eona. U e-na le sepheo se joalo, u ka lekanyetsa joang ho hatela pele ha hao sekolong see?
Ho e-na le ho nahana ka hore na u akarelitse lintlha tse kae foromong ea hao ea keletso ea puo kapa hore na u filoe likabelo tsa mofuta ofe, nahanisisa ka hore na koetliso eo e ntlafalitse boleng ba sehlabelo sa hao sa thoriso ho fihlela bohōleng bofe. Sekolo se re hlomella hore re atlehe haholoanyane tšebeletsong ea tšimo. Kahoo ipotse: ‘Na ke hlile ke lokisetsa seo ke tla se bua tšebeletsong ea tšimo? Na ke ithutile ho bontša thahasello ho bao ke ba pakelang? Na ke rala motheo bakeng sa maeto a ho boela ka ho siea batho ka potso eo ke tla e tšohla nakong e tlang? Haeba ke ithuta Bibele le motho e mong, na ke sebeletsa ho ntlafatsa joaloka mosuoe ea finyellang pelo?’
U se ke ua talima ho hatela pele motheong feela oa hore na u filoe litokelo life tsa tšebeletso. Ho tsoela pele ha hao ha ho bonahale ka hore na u na le kabelo efe, empa ho bonahala ka hore na u etsa’ng ka eona. Haeba u filoe kabelo ea ho ruta, ipotse: ‘Na ka sebele ke sebelisitse tsebo ea ho ruta? Na ke fane ka boitsebiso ka tsela e entseng phapang e khōlō bophelong ba ba e utloileng?’
Khothatso ea hore u sebelise mpho ea hao e bolela ho nka bohato ba pele. Na u nka bohato ba pele ho sebetsa le ba bang tšebeletsong ea tšimo? Na u batla menyetla ea ho thusa litho tsa phutheho ea heno tse sa tsoa kopanela, tse nyenyane kapa tse kulang? Na u ithaopela ho hloekisa Holo ea ’Muso kapa ho thusa ka litsela tse sa tšoaneng likopanong tse khōlō le tse nyenyane? Na u ka ngolisetsa bopula-maliboho bo thusang nako le nako? Na u ka khona ho sebeletsa joaloka pula-maliboho oa kamehla kapa ho thusa phuthehong e nang le tlhokahalo e khōlō? Haeba u mor’abo rōna, na u hahamalla ho finyella litšoaneleho tsa Mangolo bakeng sa bahlanka ba sebeletsang le baholo? Ho ithaopela ha hao ho thusa le ho amohela boikarabelo ho bontša hore u tsoela pele.—Pes. 110:3.
Seo Phihlelo e se Etsang
Haeba u ikutloa u fokola ka lebaka la ho hloka phihlelo bophelong ba Bokreste, khothala. Lentsoe la Molimo le khona ho “hlalefisa ea se nang phihlelo.” (Pes. 19:7; 119:130; Liprov. 1:1-4) Ho sebelisa keletso ea Bibele ho etsa hore re rue molemo bohlaleng bo phethahetseng ba Jehova, boo e leng ba bohlokoa ho feta thuto leha e le efe eo re ka e fumanang ka phihlelo feela. Leha ho le joalo, ha re ntse re tsoela pele tšebeletsong ea rōna ho Jehova, re fumana phihlelo ea bohlokoa. Re ka e sebelisa joang hamolemo?
Ha motho a se a ile a feta maemong a sa tšoaneng bophelong, a ka ’na a lekeha hore a re: ‘Nkile ka feta boemong bo kang bona. Ke tseba seo ke lokelang ho se etsa.’ Na ee e ka ba tsela e bohlale? Liproverbia 3:7 ea lemosa: “U se ke ua ipona bohlale.” Ka sebele phihlelo e lokela ho atolosa pono ea rōna ka lintho tseo re lokelang ho li nahana ha re sebetsana le maemo a itseng bophelong. Empa ha re ntse re tsoela pele moeeng, phihlelo ea rōna e boetse e lokela ho hatisa ka likelellong le lipelong tsa rōna hore re hloka tlhohonolofatso ea Jehova hore re atlehe. Kahoo ho tsoela pele ha rōna ho bonahala ka ho ikemisetsa ha rōna ho retelehela ho Jehova hore a re tataise bophelong ba rōna, eseng ka ho thulana ha rōna le maemo ka ho itšepa ka kholiseho. Ho bonahala ka ho kholiseha ha rōna hore ha ho letho le ka etsahalang a sa le lumella le ka ho ba le kamano e tšepahalang le e mofuthu le Ntat’a rōna oa leholimo.
U ’Ne U Hahamalle Pele
Le hoja moapostola Pauluse e ne e le Mokreste ea tlotsitsoeng ea hōlileng moeeng, o ile a bona bohlokoa ba ho ’na a ‘hahamalla pele’ ho finyella pakane ea bophelo. (Bafil. 3:13-16) Na u na le pono e joalo?
U se u hatetse pele ho fihlela bohōleng bofe? Lekanya khōlo ea hao ka hore na u se u apere botho bo bocha ka ho feletseng hakae, le ka hore na u se u ikokobelelitse bobusi ba Jehova ka ho feletseng hakae le ka hore na u sebelisa limpho tsa hao ka mafolofolo hakae bakeng sa ho hlompha Jehova. Ha u ntse u rua molemo thutong ea Sekolo sa Tšebeletso sa Puso ea Molimo, litšoaneleho tse hatisitsoeng Lentsoeng la Molimo li lokela ho bonahala mohato ka mohato mokhoeng oa hao oa ho bua le oa ho ruta. Boloka lintlha tsena tsa khōlo ea hao li ntse li hlakile ka kelellong. E, li thabele ’me ho tsoela pele ha hao ho tla bonahala habonolo.
LIPAKANE TSA HAO TSA MOEA KE LIFE?
Ke lipakane life tsa sebele tseo u nang le tsona tseo u lokelang ho li finyella selemong se tlang?
1. ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
2. ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
Ke lipakane life tsa nako e telele tseo e leng tsa bohlokoa haholo ho uena tseo u ikemiselitseng ho sebeletsa ho tsona ho fihlela u li finyella?
1. ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
2. ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
3. ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․