Ipoloke Leratong la Molimo!
“Baratuoa, . . . le ipoloke leratong la Molimo, . . . ka tebello ea bophelo bo sa feleng.”—JUDA 20, 21.
1, 2. Ke joang u ka lulang leratong la Molimo?
JEHOVA o rata lefatše la moloko oa batho haholo hoo a ileng a fana ka Mora oa hae ea tsoetsoeng a ’notši e le hore e mong le e mong ea bontšang tumelo ho eena a ka fumana bophelo bo sa feleng. (Johanne 3:16) Ho thabisa hakaakang ho fumana lerato le joalo! Haeba u mohlanka oa Jehova, ka sebele u batla ho fumana lerato leo ka ho sa feleng.
2 Morutuoa Juda o ile a bontša kamoo u ka lulang leratong la Molimo kateng. Juda o ile a ngola a re: “Ka ho ikaha tumelong ea lōna e halalelang ka ho fetisisa, le ho rapela ka moea o halalelang, le ipoloke leratong la Molimo, ha le ntse le letetse mohau oa Morena oa rōna Jesu Kreste ka tebello ea bophelo bo sa feleng.” (Juda 20, 21) Ho ithuta Lentsoe la Molimo le ho bolela litaba tse molemo ho u thusa hore u matlafale ‘tumelong e halalelang ka ho fetisisa’—e leng lithuto tsa Bokreste. E le hore u lule leratong la Molimo, u lokela ho rapela ka “moea o halalelang,” kapa u susumetsoe ke oona. Hore u fumane moputso oa bophelo bo sa feleng, u boetse u lokela ho bontša tumelo sehlabelong sa thekollo sa Jesu Kreste.—1 Johanne 4:10.
3. Ke hobane’ng ha ba bang e se e se Lipaki Tsa Jehova?
3 Ba bang bao pele ba neng ba e-na le tumelo ha baa lula leratong la Molimo. Kahobane ba khethile ho tsamaea tseleng ea boetsalibe, ha e sa le Lipaki Tsa Jehova. U ka etsa joang hore u se ke ua etsahalloa ke seo? Ho nahana ka lintlha tse latelang ho ka ’na ha u thusa hore u qobe ho etsa sebe ’me u ipoloke leratong la Molimo.
Bontša Hore U Rata Molimo
4. Ho mamela Molimo ho bohlokoa hakae?
4 Bontša hore u rata Molimo ka ho mo mamela. (Matheu 22:37) Moapostola Johanne o ile a ngola a re: “Etsoe se boleloang ke lerato la Molimo ke sena, re boloke litaelo tsa hae; leha ho le joalo litaelo tsa hae ha li boima.” (1 Johanne 5:3) Ho tloaela ho mamela Molimo ho ka u matlafatsa hore u hanele moleko ebile ho ka u tlisetsa thabo. Mopesaleme o itse: “Ho thaba motho ea sa kang a tsamaea keletsong ea ba khopo, . . . empa o thabela molao oa Jehova.”—Pesaleme ea 1:1, 2.
5. Ho rata Jehova ho tla u susumelletsa hore u etse’ng?
5 Ho rata Jehova ho tla u susumelletsa hore u qobe ho etsa sebe se tebileng se ka tlisang thohako lebitsong la hae. Agure o ile a rapela a re: “U se ke ua mpha bofutsana kapa maruo. E-re ke je lijo tseo ke li behetsoeng, e le hore ke se ke ka khora eaba kea u latola ’me ke re: ‘Jehova ke mang?’ le hore ke se ke ka futsaneha eaba kea utsoa ’me ke rohaka lebitso la Molimo oa ka.” (Liproverbia 30:1, 8, 9) Ikemisetse hore u se ke ua “rohaka lebitso la Molimo” ka ho etsa hore a nyefoloe. Ho e-na le hoo, kamehla u loanele ho etsa lintho tse mo tlotlisang.—Pesaleme ea 86:12.
6. Ho ka etsahala’ng haeba u ka etsa sebe ka boomo?
6 Kamehla rapela Ntate oa hao ea lerato oa leholimo hore a u thuse ho hanela moleko oa ho etsa sebe. (Matheu 6:13; Baroma 12:12) Tsoela pele u latela keletso ea Molimo e le hore lithapelo tsa hao li se ke tsa sitisoa. (1 Petrose 3:7) Haeba u ka etsa sebe ka boomo, liphello tsa sona li ka ba bohloko, hobane ka tsela ea tšoantšetso, Jehova o thibela bafetoheli hore ba se ke ba mo atamela joalokaha eka ke ka leru e le hore lithapelo tsa bona li se ke tsa fihla ho eena. (Lillo tsa Jeremia 3:42-44) Kahoo ikokobetse, ’me u rapele hore u se etse letho le tla u thibela ho atamela Molimo ka thapelo.—2 Bakorinthe 13:7.
Bontša Hore U Rata Mora oa Molimo
7, 8. Ho ela keletso ea Jesu hloko ho ka thusa motho joang hore a furalle tsela ea boetsalibe?
7 Bontša hore u rata Jesu Kreste ka ho mamela litaelo tsa hae, hobane seo se tla u thusa ho furalla tsela ea boetsalibe. Jesu o itse: “Haeba le boloka litaelo tsa ka, le tla lula leratong la ka, feela joalokaha ke bolokile litaelo tsa Ntate ’me ke lula leratong la hae.” (Johanne 15:10) Ho phela ka mantsoe aa a Jesu ho ka u thusa joang hore u lule leratong la Molimo?
8 Ho ela mantsoe a Jesu hloko ho ka u thusa hore u khomarele melao-motheo e lokileng ea boitšoaro. Molao oo Molimo a neng a o file Baiseraele o ne o re: “U se ke ua feba.” (Exoda 20:14) Empa Jesu o ile a senola molao-motheo oa taelo eo ka ho re: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Matheu 5:27, 28) Moapostola Petrose o ile a re ba bang phuthehong ea lekholong la pele la lilemo ba ne ba e-na le “mahlo a tletseng bofebe” ’me ‘ba ne ba eka meea e sa tsitsang.’ (2 Petrose 2:14) Leha ho le joalo, ho fapana le bona, u ka qoba libe tse amanang le ho kopanela liphate haeba u rata Molimo le Kreste ebile u ba mamela ’me u ikemiselitse ho sireletsa kamano ea hao le bona.
Lumella Moea oa Jehova Hore o U Tataise
9. Ke eng e ka etsahalang ka moea o halalelang haeba motho a ne a ka phehella ho etsa sebe?
9 Rapella moea oa Molimo o halalelang, ’me u o lumelle hore o u tataise. (Luka 11:13; Bagalata 5:19-25) Haeba u ka phehella ho etsa sebe, Molimo a ka ’na a tlosa moea oa hae ho uena. Ka mor’a hore Davida a etse sebe le Bathe-sheba, o ile a kōpa Molimo a re: “U se ke ua ntahlela hōle le sefahleho sa hao; u se ke ua tlosa moea oa hao o halalelang ho ’na.” (Pesaleme ea 51:11) Moea oa Molimo o ile oa tloha ho Morena Saule kahobane e ne e le moetsalibe ea sa bontšeng pako. Saule o ile a etsa sebe ka ho nyehela sehlabelo sa secheso, le ka ho se felise ka ho feletseng mohlape oa likhutšoane le oa likhomo hammoho le morena oa Baamaleke. Ka mor’a moo Jehova o ile a tlosa moea oa hae o halalelang ho Saule.—1 Samuele 13:1-14; 15:1-35; 16:14-23.
10. Ke hobane’ng ha u lokela ho qoba esita le ho nahana feela ka taba ea ho tloaela ho etsa sebe?
10 Qoba esita le ho nahana feela ka taba ea ho tloaela ho etsa sebe. Moapostola Pauluse o ile a ngola: “Haeba re tloaela ho etsa sebe ka boomo ka mor’a hore re amohele tsebo e nepahetseng ea ’nete, ha ho sa na sehlabelo leha e le sefe se setseng bakeng sa libe.” (Baheberu 10:26-31) E ne e ka ba ntho e bohloko hakaakang haeba u ne u ka tloaela ho etsa sebe ka boomo joalo!
Bontša Lerato la Sebele ho ba Bang
11, 12. Lerato le tlhompho li ka thibela motho joang ho etsa boitšoaro bo bobe ba ho kopanela liphate?
11 Ho rata batho ba bang ho tla u thibela hore u se ke ua etsa boitšoaro bo bobe ba ho kopanela liphate. (Matheu 22:39) Lerato le joalo le tla u susumelletsa ho sireletsa pelo ea hao e le hore e se ke ea u eka hore u hape lerato la molekane oa motho e mong. Ho etsa joalo ho ka lebisa sebeng sa bofebe. (Liproverbia 4:23; Jeremia 4:14; 17:9, 10) Etsisa Jobo ea lokileng, ea sa kang a itumella hore a khahloe ke mosali leha e le ofe eo e neng e se oa hae.—Jobo 31:1.
12 Ho hlompha khalalelo ea lenyalo ho ka u thusa hore u se ke ua etsa sebe se tebileng. Molimo o ne a rerile hore lenyalo le hlomphehang le ho kopanela liphate e be mokhoa oa ho hlahisa bophelo. (Genese 1:26-28) Hopola hore morero oa litho tsa botona le botšehali ke ho hlahisa bophelo, e leng ntho e halalelang. Lihlola le bafebi ba hlompholla Molimo, ba nyelisa ketso ea ho kopanela liphate, ha ba hlomphe khalalelo ea lenyalo ebile ba siteloa ’mele ea bona. (1 Bakorinthe 6:18) Empa ho rata Molimo le moahelani hammoho le ho mamela Molimo ho tla thibela motho ho kopanela boitšoarong bo ka fellang ka hore a khaoloe ka phuthehong ea Bokreste.
13. Motho ea itšoereng hampe o “senya lintho tsa bohlokoa” joang?
13 Re lokela ho thibela maikutlo a boetsalibe e le hore re se ke ra bakela baratuoa ba rōna masisa-pelo. Liproverbia 29:3 e re: “Ea bang le setsoalle le matekatse o senya lintho tsa bohlokoa.” Motho ea febang a sa bontše pako o senya kamano ea hae le Molimo ’me o senya maqhama a lelapa. Mosali oa hae o na le mabaka a ho hlala. (Matheu 19:9) Ho sa tsotellehe hore na mofosi ke monna kapa mosali, ho senyeha ha lenyalo ho ka tlisa masisa-pelo a maholo ho molekane ea se nang molato, bana le batho ba bang. Na ha u lumele hore ho tseba tšenyo e bakoang ke boitšoaro bo bobe ho lokela ho re susumelletsa ho hanela moleko oa ho kopanela boitšoarong bo joalo?
14. Ke lintho life tseo re ka ithutang tsona mabapi le boitšoaro bo bobe ho Liproverbia 6:30-35?
14 ’Nete ea hore ha ho letho le ka lefuoang ho lokisa phoso e bakiloeng ke bofebe e lokela ho susumelletsa motho hore a qobe ketso ena ea boithati bo feteletseng. Liproverbia 6:30-35 e bontša hore le hoja batho ba ka utloela lesholu bohloko ha le utsoa hobane le lapile, ba nyonya motho ea febang hobane sepheo sa hae se sebe. “O felisa moea [kapa, bophelo ba] hae.” Tlas’a Molao oa Moshe, o ne a tla bolaoa. (Levitike 20:10) Motho ea febang o bakela batho ba bang masisa-pelo e le hore feela a khotsofatse takatso ea hae e mpe, ’me motho ea febang a sa bontše pako ha a lule leratong la Molimo empa oa lelekoa ka phuthehong ea Bokreste e hloekileng.
E-ba le Letsoalo le Hloekileng
15. Letsoalo le tšoailoeng “joalokaha eka ke ka tšepe e chesang e tšoaeang” le tšoana le eng?
15 Hore re lule leratong la Molimo, ha rea lokela ho lumella hore matsoalo a rōna a thatafatsoe ke sebe. Ho hlakile hore, ha rea lokela ho amohela litekanyetso tse hlephileng tsa lefatše tsa boitšoaro, ’me re lokela ho ba hlokolosi litabeng tse kang metsoalle eo re e khethang, lintho tseo re li balang le boithabiso. Pauluse o ile a lemosa: “Linakong tsa morao ba bang ba tla oa tumelong, ba ela hloko lipolelo tse bululetsoeng tse khelosang le lithuto tsa bademona, ka boikaketsi ba batho ba buang mashano, ba tšoailoe matsoalong a bona joalokaha eka ke ka tšepe e chesang e tšoaeang.” (1 Timothea 4:1, 2) Letsoalo le tšoailoeng “joalokaha eka ke ka tšepe e chesang e tšoaeang” le tšoana le khoo e shoeleng e sa utloeng letho. Letsoalo le joalo le ke ke la hlola le re lemosa hore re qobe bakoenehi le maemo a ka ’nang a etsa hore re khelohe tumelong.
16. Ke hobane’ng ha e le habohlokoa ho ba le letsoalo le hloekileng?
16 Ho pholoha ha rōna ho itšetlehile ka hore re be le letsoalo le hloekileng. (1 Petrose 3:21) Ka lebaka la tumelo ea rōna maling a tšolotsoeng a Jesu, matsoalo a rōna a hloekisitsoe mesebetsing e shoeleng, “e le hore re ka etsetsa Molimo ea phelang tšebeletso e halalelang.” (Baheberu 9:13, 14) Haeba re etsa sebe ka boomo, matsoalo a rōna a tla silafala ’me re ke ke ra hlola re e-ba batho ba hloekileng ba tšoanelehelang ho etsa tšebeletso ea Molimo. (Tite 1:15) Empa ka thuso ea Jehova, re ka ba le matsoalo a hloekileng.
Litsela Tse Ling Tsa ho Qoba Boitšoaro bo sa Lokang
17. Ho ‘latela Jehova ka ho feletseng’ ho na le molemo ofe?
17 ‘Latela Jehova ka ho feletseng,’ joaloka Kalebe oa Iseraele ea boholo-holo. (Deuteronoma 1:34-36) Etsa seo Molimo a se hlokang ho uena, ’me le ka mohla u se ke ua nahana ka ho jela “tafoleng ea bademona.” (1 Bakorinthe 10:21) Furalla bokoenehi. E-ja ka kananelo lijo tsa moea tse fumanehang feela tafoleng ea Jehova, ’me u ke ke ua khelosoa ke mesuoe ea bohata kapa makhotla a moea a khopo. (Baefese 6:12; Juda 3, 4) Tsepamisa mohopolo linthong tsa moea, tse kang ho ithuta Bibele, ho ba teng libokeng le tšebeletso ea tšimo. Ka sebele u tla thaba haeba u latela Jehova ka ho feletseng ’me u etsa ho hongata mosebetsing oa Morena.—1 Bakorinthe 15:58.
18. Ho tšaba Jehova ho tla ama boitšoaro ba hao joang?
18 Ikemisetse ho ‘etsetsa Molimo tšebeletso e halalelang ka tšabo ea bomolimo le tšabo e nang le tlhompho.’ (Baheberu 12:28) Ho tšaba Jehova ka tsela e nang le tlhompho ho tla u susumelletsa hore u furalle ntho leha e le efe e sa lokang. Ho tla u thusa hore u itšoare ka tsela e lumellanang le keletso eo Petrose a ileng a e fa batlotsuoa-’moho le eena: “Haeba le ipiletsa ho Ntate ea ahlolang ka ho hloka leeme ho ea ka mosebetsi oa e mong le e mong, le itšoare ka tšabo nakong ea ho lula ha lōna ka bojaki.”—1 Petrose 1:17.
19. Ke hobane’ng ha u lokela ho sebelisa kamehla lintho tseo u ithutang tsona Lentsoeng la Molimo?
19 Kamehla sebelisa seo u ithutang sona Lentsoeng la Molimo. Sena se tla u thusa ho qoba ho etsa sebe se tebileng hobane u tla ba har’a “bao ka tšebeliso, matla a bona a ho lemoha a koetliselitsoeng ho khetholla se nepahetseng le se fosahetseng.” (Baheberu 5:14) Ho e-na le ho se tsotelle seo u se buang le ho se tsotelle boitšoaro ba hao, falimeha e le hore u tsamaee joaloka motho ea bohlale, u “ithekele nako e loketseng” matsatsing ana a khopo. ‘Tsoela pele ho lemoha seo thato ea Jehova e leng sona,’ ’me u ’ne u e phethe.—Baefese 5:15-17; 2 Petrose 3:17.
20. Ke hobane’ng ha re lokela ho qoba ho chacheha ka mohono?
20 Qoba ka ho feletseng ho chacheha ka mohono—e leng ho lakatsa ka meharo lintho tsa batho ba bang. O mong oa Melao e Leshome o re: “U se ke ua lakatsa [“chachehela ka mohono,” New International Version] ntlo ea oa heno. U se ke ua lakatsa mosali oa oa heno, leha e le lekhoba la hae kapa lekhabunyane la hae kapa poho ea hae kapa esele ea hae kapa ntho leha e le efe ea oa heno.” (Exoda 20:17) Molao ona o ne o sireletsa ntlo ea motho, mosali oa hae, bahlanka, liphoofolo le lintho tse ling. Empa mantsoe a Jesu a reng ho chacheha ka mohono ho silafatsa motho a bohlokoa ka ho fetisisa.—Mareka 7:20-23.
21, 22. Ke mehato efe eo Mokreste a ka e nkang e le hore a qobe ho etsa sebe?
21 E-ba hlokolosi hore takatso e se ke ea u lebisa sebeng. Morutuoa Jakobo o ile a ngola: “E mong le e mong o lekoa ke ho huloa le ho ekoa ke takatso ea hae. Joale takatso, ha e emere, e tsoala sebe; sebe, le sona, ha se phethehile, se hlahisa lefu.” (Jakobo 1:14, 15) Ka mohlala, haeba motho a ne a kile a e-ba le bothata ba ho noa, a ka ’na a etsa qeto ea ho se be le joala lelapeng la hae. Mokreste a ka ’na a fetola sebaka seo a sebeletsang ho sona kapa a batla mosebetsi o mong, e le hore a qobe motho oa bong bo fapaneng ea ka ’nang a mo kenya molekong.—Liproverbia 6:23-28.
22 U se ke ua nka esita le bohato ba pele feela ba ho etsa sebe. Ho bapala ka maikutlo a motho e mong a lerato le ho nahana ka boitšoaro bo bobe ho ka lebisa bohloleng kapa bofebeng. Ho bua leshanonyana le sa reng letho ho ka etsa hore motho a be sebete sa ho bua leshano le kotsi ’me ho ka etsa hore a be le mokhoa o mobe oa ho tloaela ho bua leshano. Ho utsoa lintho tse nyenyane ho ka etsa hore letsoalo la motho le che hoo a ka qalang ho utsoa lintho tse khōlō. Ho lumella monahano oa bokoenehi esita le hanyenyane feela ho ka qetella ho entse hore motho e hle e be mokoenehi.—Liproverbia 11:9; Tšenolo 21:8.
Ho Thoe’ng Haeba U Entse Sebe?
23, 24. Ke khothatso efe eo re ka e fumanang ho 2 Likronike 6:29, 30 le ho Liproverbia 28:13?
23 Ha ho motho ea phethahetseng. (Moeklesia 7:20) Empa haeba u entse sebe se tebileng, u ka khothatsoa ke thapelo eo Morena Solomone a ileng a e etsa ha ho ne ho neheloa tempele ea Jehova. Solomone o ile a rapela Molimo a re: “Thapelo leha e le efe, kōpo leha e le efe ea mohau e ka etsoang ke motho leha e le ofe kapa sechaba sohle sa hao sa Iseraele, kahobane e mong le e mong o tseba lefu la hae le bohloko ba hae; ha a otlollela liatla ntlong ena, joale e se eka u ka utloa u le maholimong, sebaka sa bolulo ba hao, ’me u tšoarele ’me u fe e mong le e mong ho ea ka litsela tsohle tsa hae, hobane u tseba pelo ea hae (etsoe ke uena feela ea tsebang lipelo tsa bara ba moloko oa batho hantle).”—2 Likronike 6:29, 30.
24 Ka sebele Molimo o tseba pelo ebile oa tšoarela. Liproverbia 28:13 e re: “Ea koahelang litlōlo tsa hae a ke ke a atleha, empa ea li bolelang ’me a li tlohela o tla bontšoa mohau.” Haeba motho a bontša pako ka ho bolela libe tsa hae ebile a li tlohela, Molimo a ka mo hauhela. Empa, haeba u fokola moeeng, ke eng hape e ka u thusang hore u lule leratong la Molimo?
U ka Araba Joang?
• Ke joang re ka ipolokang leratong la Molimo?
• Ho rata Molimo le Kreste ho ka re thusa joang hore re furalle tsela ea boetsalibe?
• Ke hobane’ng ha lerato la sebele bakeng sa batho ba bang le lokela ho re thibela ho etsa boitšoaro bo bobe ba ho kopanela liphate?
• Litsela tse ling tsa ho qoba boitšoaro bo sa lokang ke life?
[Setšoantšo se leqepheng la 21]
Juda o bontša kamoo re ka ipolokang leratong la Molimo kateng
[Setšoantšo se leqepheng la 23]
Ho senyeha ha lenyalo ho ka bakela molekane ea se nang molato le bana masisa-pelo
[Setšoantšo se leqepheng la 24]
Joaloka Kalebe, na u ikemiselitse ho ‘latela Jehova ka ho feletseng’?
[Setšoantšo se leqepheng la 25]
Kamehla rapella thuso ea ho hanela moleko