Ho Finyella Litlhoko Tsa Kotulo ka Thabo
1 E, ena ke nako ea kotulo. Joale re se re fihlile qetellong ea tsamaiso ea lintho, ’me joalokaha Jesu a boletse ho se seng sa litšoantšo tsa hae, “Kotulo ke qetello ea tsamaiso ea lintho.” (Matt. 13:39, NW) Ho Johanne 5:17, Jesu o itse: “Ntate o sa sebetsa le joale, le ’na kea sebetsa.” Mosebetsing ona oa kotulo, batho ba Jehova ha baa tšoareha boboleling ba litaba tse molemo tsa ’Muso feela empa hape ba tšoarehile ka ho aha libaka tsa borapeli. Hona joale ho feta leha e le neng pele, ho hlokahala Liholo tsa ’Muso. Ka thabo, Jehova o ’nile a susumelletsa bahlanka ba hae ba tšepahalang ho ithaopela ho sebelisa tsebo ea bona kahong ea Liholo tsa ’Muso. Hase feela hore ba sebetsa ka thata empa ba boetse ba bonahatsa moea oa thabo.
2 Hona joale ho joaloka mehleng ea Nehemia ha Baiseraele ba ne ba tšoarehile ba haha lerako la Jerusalema. Nehemia 4:6 e re “ha e le sechaba, se ne se rata ho sebetsa.” Boemo boo bo botle ba pelo bo ne bo susumetsoa ke eng? Kae-kae ho Nehemia 8:10 rea bolelloa: “Hobane thabo ea Jehova ke matla a lōna.” Ka sebele re na le mabaka ’ohle a ho ba basebetsi ba thabileng. Re na le tlhohonolofatso ea Jehova. Re na le moea oa Jehova, ’me thabo ke karolo ea litholoana tsa moea oo.—Ba-Gal. 5:22.
3 Likomiti tsa Kaho tsa Lebatooa: Litlaleho tse tsoang tšimong ea lefatše lohle li bontša hore ‘masimo a soeufalletse kotulo.’ (Joh. 4:35) O hopotse tlhoko ena, ka 1984 Mokhatlo o ile oa qala ho khetha Likomiti tsa Kaho tsa Lebatooa ho thusa liphutheho ka merero ea kaho ea Liholo tsa ’Muso, ebang ke meaho e mecha kapa e nchafatsoang. Baholo ba khethetsoeng ho sebeletsa likomiting tsena ke banna ba moea bao hangata ba nang le phihlelo e ngata litabeng tsa kaho le khoebo. Keletso ea bona e ’nile ea ipaka e le molemo, haholo-holo ha ho e-na le moea oa tšebelisano-’moho pakeng tsa bona le baena ba sebeletsang komiting ea kaho ea phutheho.
4 Liphutheho tse tharo tse ileng tsa fumana thuso ho baithaopi ba sebetsang le Komiti ea Kaho ea Lebatooa hamorao li ile tsa ngolla komiti ’me tsa bontša kananelo. Li ile tsa hlalosa: “Ka kōpo fetisetsang lerato la rōna le liteboho ho basali ba lōna, bana ba lōna, le liphutheho tsa lōna. Re ananela haholo boitelo boo ba bo etsang ba ho le kopanela le batho ba Jehova ba bangata hakana.”
5 Komiti e ’ngoe ea lebatooa e tlalehile: “Re fumane tšebelisano-’moho e ntle komiting ea kaho ea phutheho. Re tsoela pele ho ikutloa . . . hore ena ke e ’ngoe ea litšobotsi tse putsang ka ho fetisisa tsa mosebetsi oo re o etsang, e leng kamano e bang teng pakeng tsa rōna le komiti ea kaho ea phutheho.” Haufinyane tjena komiti ea kaho ea phutheho e ile ea ngola tjena molemong oa liphutheho tse peli: “Tokisetso ena e tlisetsa phutheho mahlohonolo a tsotehang. E re re qolle a mang a ’ona: e fana ka tlhokomelo ea botsebi morerong oa kaho ka komiti ea kaho, e lokisetsa hore ho be le baena ba makholo-kholo ba tšoanelehang le ba sekametseng linthong tsa moea hore ba thuse, e nolofalletsa hore morero oa kaho o phethoe ka potlako ’me phutheho e se ke ea fokola moeeng empa e matlafatse lerato la baena e mong ho e mong, e fana ka bopaki bo botle sechabeng, ’me ho molemo ka ho fetisisa, e haha sebaka se setle bakeng sa ho rorisa Jehova.”
6 Iteanyeng le Komiti ea Kaho ea Lebatooa Nako e sa le Teng: Ha liphutheho li rera ho nchafatsa holo kapa morero oa kaho ea holo e ncha, baholo ba phutheho ba lokela ho iteanya le molula-setulo oa komiti ea lebatooa ha morero oo o qala. Likomiti tsa Kaho tsa Lebatooa li fuoe tataiso ke Mokhatlo, ’me baena bana ba na le phihlelo e ngata e tla thusa ho qoba likotsi ha ho rekoa setša le ha ho etsoa lipolane tsa morero oa kaho. Haeba komiti ea lebatooa e lula e tseba merero eohle e sebakeng seo e se abetsoeng, e ka lokisetsa baithaopi e le hore merero eohle e ka phethoa ntle le hore baithaopi ba litsebi ba sebelisoe ho tlōla tekano. Komiti ka ’ngoe ea Kaho ea Lebatooa e boloka lethathamo la basebetsi ’me e lokisetsa hore ho be le baithaopi tlas’a lebatooa leo e le abetsoeng.
7 Tataiso e fuoeng likomiti tsa lebatooa e akarelletsa lintho tse lokelang ho seka-sekoa ka hloko pele ho rekoa setša, joaloka melao ea lebatooa, ea lekhotla la ’masepala le la motse e laolang maemo a sa tšoaneng a amang morero oa kaho ea Holo ea ’Muso. Liphutheho li ka rua molemo ka bohlale maikutlong a baholo ba khethetsoeng ho sebeletsa Komiting ea Kaho ea Lebatooa ka ho iteanya le bona ho tloha qalong, nako e telele pele setša sefe kapa sefe se rekoa.—Liprov. 15:22.
8 Baholo ba ka iteanya le Komiti ea Kaho ea Lebatooa ba sebelisa molebeli oa potoloho. O na le lebitso, aterese, le nomoro ea thelefono ea molula-setulo oa komiti e abetsoeng ho thusa kahong ea Liholo tsa ’Muso sebakeng seo phutheho e leng ho sona.
9 Ho Reka Thepa ka Bohlale: Ka kakaretso, liphutheho li ’nile tsa reka thepa ea kaho ka bohlale. Mokhatlo ha o na lenaneo la ho reka thepa ea moaho ka har’a naha. Leha ho le joalo, nako le nako, lifeme tse ling li tsebisa liphutheho ka ho toba ka litheko tse khethehileng. Ha sena se etsahala, Mokhatlo o tla romela tsebiso ea lifeme tsena ho Likomiti tsa Kaho tsa Lebatooa. Tabeng ena Mokhatlo kapa komiti ea lebatooa ha o buelle kapa hona ho fana ka tumello ea hore na ho sebelisoe lintho tse rekisoang ke feme e itseng kapa che. Hona e mpa feela e le ho fetisetsa boitsebiso liphuthehong e le hore li ka tseba ka thepa le litheko tse boletsoeng ’me li e bapise le tse ling.
10 Baholo ba phutheho ba lokela ho bona hore thepa e rekoa ka mokhoa oa ho bapisa litheko ka hloko. Komiti ea lebatooa e ka thusa ho etseng lethathamo la lintho tse lokelang ho rekoa, ho akarelletsa le thepa e khabisang ka hare. Mohlomong komiti ka ’ngoe e tseba baithaopi ba nang le phihlelo likarolong tsena ba ka thabelang ho thusa liphutheho ho etsa lethathamo la thepa e lokelang ho rekoa. Baena ba bang ba nang le tsebo litabeng tsa khoebo ba ka sebelisoa hore ba fumane litheko tse sa tšoaneng tsa thepa. Ho lokela hore ho iteanngoe le lifeme tse ’maloa bakeng sa ho khetha theko e molemohali ha ho ntse ho batloa thepa ea boleng bo loketseng. Le hoja ka linako tse ling ho fanoa ka thepa kapa litšebeletso tse itseng “ka tefo,” baholo ba tlameha ho hlahlobisisa litaba tsena ka hloko, kaha ka linako tse ling ho ameha litšenyehelo tse potelletseng. Kaha ho sebelisoa matlotlo a nehetsoeng, ho sebelisana ’moho le Komiti ea Kaho ea Lebatooa ho tla tiisa hore matlotlo ana a sebelisoa ka bohlale.
11 Bolokang ho Khabisoa ha Kaho ea Holo ea ’Muso ho le Bonolo: Le hoja mohlomong phutheho e bokelletse chelete e lekaneng hoo e ka akarelletsang litšobotsi tse ling tse ka thōko ho sa hlokahale hore e kōpe kalimo ea chelete, ho lokela hore ho nahaneloe ho sebelisa mekhoa e tloaelehileng ea ho khabisa le ho aha moaho o itekanetseng. Sena se etsa hore ho be le lichelete tse eketsehileng tse ka sebelisoang mesebetsing e meng ea puso ea Molimo. (omSU leq. 61; 2 Ba-Kor. 8:14) Kaha ba bangata ba ithaopela ho sebetsa mererong ea kaho ea Liholo tsa ’Muso, basebetsi ba ka ’na ba ikutloa ba imelitsoe ka mosebetsi haeba ba kōptjoa ho aha meaho e majaba-jaba e bakang litšenyehelo tse ngata. Le hoja e le tlamo ho ba le thepa e ntle ea molumo, lisebelisoa tsa molumo tse majaba-jaba tse nang le litšobotsi tse eketsehileng hangata li baka litšenyehelo ebile ha li hlokahale. Litaba tse joalo li lokela ho nahaneloa ka hloko pele li akarelletsoa morerong oa kaho. Komiti ea Kaho ea Lebatooa e ka tlatsetsa hamolemo ka ho thusa ho etsa liqeto tse leka-lekaneng mabapi le ho khabisoa ha kaho.
12 Liphutheho tse ngata li ahile Liholo tse ncha tsa ’Muso ka ho sebelisa lichelete tseo li li alimileng ho ba kopanelang le phutheho. Ka linako tse ling Holo ea ’Muso e ’nile ea rekisoa, ’me chelete e fumanoeng ha e rekisoa e bile e lekaneng bakeng sa ho hlokomela litšenyehelo tsa kaho ea holo e ncha le e khōloanyane. Leha ho le joalo, liphutheho tse ling li tlameha ho fumana thuso e eketsehileng ea lichelete. Mohlomong li ka iteanya le Mokhatlo ho fumana hore na li ka fumana kalimo ea chelete, ’me li latele litaelo tse fuoeng baholo lengolong la December 23, 1991. Pele baholo ba kōpa kalimo ea chelete ho Mokhatlo, ba lokela ho etsa phuputso phuthehong ea bona ho hlokomela (1) hore na ho tla nehelanoa ka bokae qalong bakeng sa ho reka setša le litšenyehelo tsa kaho, (2) hore na ba kopanelang le (li)phutheho e amehang ba ka nehelana ka bokae, le (3) hore na ho tla nehelanoa ka bokae khoeli le khoeli bakeng sa ho koahela litšenyehelo tsa phutheho tse tloaelehileng le ho buseletsa chelete leha e le efe ea kalimo e fumanoeng ho Mokhatlo. Ha ho mabitso a lokelang ho ngoloa maqetšoaneng a bokelloang ha ho etsoa phuputso ena. Ke habohlokoa hore bohle ba fane ka lipalo tse nepahetseng, ba nahanele litebello tsa bona tsa ho etsa monehelo le chelete ea kalimo ka tsela ea sebele, kaha baholo ba tla sebelisa lipalo tsena ha ba etsa liqeto tse boima molemong oa phutheho.
13 Ha morero oa kaho ea Holo ea ’Muso o se o phethiloe, ka linako tse ling ho ba le chelete e setseng. Haeba chelete ea kalimo e ne e fumanoe ho Mokhatlo, chelete leha e le efe e setseng e lokela ho romeloa ho Mokhatlo kapele-pele. Joale Mokhatlo o ka arolelana chelete eo le ba bang ba e hlokang. Chelete e setseng ha ea lokela ho bolokoa phuthehong kapa hona hore (li)phutheho e amehang e alimane ka eona ho liphutheho tse ling.
14 Ho Lekanyetsa Litšenyehelo le Mekhoa ea ho Boloka Tlaleho ea Lichelete: Pele ho qaloa morero oa kaho ea Holo ea ’Muso, ho lokela hore ho lekanyetsoe litšenyehelo tsa kaho ka hloko pele ho etsoa kōpo ea ho qetela ea kalimo ea chelete. Sena se thibela hore bahoeletsi ba jarisoe mojaro o boima empa o sa hlokahale oa ho buseletsa chelete. Hape, sena se etsa hore chelete e Letlōleng la Mokhatlo la Liholo tsa ’Muso e lule e le teng bakeng sa liphutheho tse ling tse nang le tlhokahalo e potlakileng ea ho aha Holo ea ’Muso e ntlafalitsoeng. (Ba-Fil. 4:5) Kaha ba sebeletsang komiting ea lebatooa ba na le phihlelo e khōlō tabeng ena, litekanyetso tse joalo e lokela ho ba tse nepahetseng ho isa bohōleng bo itseng. Le hoja litšenyehelo tse sa lebelloang li ka ’na tsa baka litšenyehelo tse tlōlisang, litekanyetso tse batlang li nepahetse li ka etsoa ka ho reroa hantle le ho hlahlobisisoa hantle ha lintho tse khōlō tse amehang litšenyehelong, ka hona sena se ka thibela hore ho akarelletsoe litšenyehelo tse phahameng ha ho lekanyetsoa litheko.
15 Morero oa kaho ea Liholo tsa ’Muso o akarelletsa ho sebelisoa ha chelete e ngata haholo ke phutheho. Baholo ba tlameha ho bona hore lichelete li tšoaroa ka mokhoa o bontšang boikarabelo. Ho hlokahala hore ho bolokoe litlaleho tse nepahetseng tsa lichelete, ’me (li)phutheho e lokela ho fuoa litlaleho tse hlakileng khoeli le khoeli. Molebeli ea okamelang o lokela ho bona hore letlōle la kaho le litlaleho tsohle tsa lichelete tse amanang le lona lia hlahlobjoa ka makhetlo a mane ka selemo, ka likhoeli tse tšoanang le tseo litlaleho tsa lichelete tsa phutheho li hlahlobjoang ka tsona ka linako tsohle. Phutheho e tlameha ho fana ka tumello e akaretsang ea morero ka mor’a ho tsebisoa ka botlalo litaba tse qaqileng le tekanyetso ea litšenyehelo. (kmSU 8/84 leq. 3) Ka mor’a moo, kamohelo ea litefello tsohle e lokela ho etsoa ka mokhoa o loketseng pele chelete leha e le efe e lefshoa. Ha morero o se o phethiloe, ho lokela hore ho be le tlaleho e hlakileng ea chelete eohle e sebelisitsoeng. Ha Likomiti tsa Kaho tsa Lebatooa li sa hlokomele lichelete kopi ea taba ena e akaretsang e lokela ho ameloa Komiti ea Kaho ea Lebatooa kaha sena se tla thusa baena bana ho etsa litekanyetso tse nepahetseng ha ba thusa liphutheho tse ling tse rerang ho qalisa morero oa kaho.
16 Se Finyelletsoeng: Hona joale ho na le Likomiti tsa Kaho tsa Lebatooa tse 24 tse tlas’a tlhokomelo ea lekala la Afrika Boroa. Li tlaleha hore selemo le selemo ho ahoa Liholo tsa ’Muso tse ncha tse ka bang 24 ’me ho boetse ho etsoa mesebetsi e meng ea ho nchafatsa. Likomiti tsa Kaho tsa Lebatooa li boetse tsa thusa Mokhatlo ka merero ea kaho ea mahae a baromuoa, polokelo ea thepa e Durban, le ntlo ea polokelo e Holong ea Kopano e Eikenhof. Boo ke bopaki ba bonngoe le moea oa boithaopo o bonahatsoang ke batho ba ratang Jehova le baena ba bona.—Joh. 13:34, 35.
17 Ba Bang ba re Shebile: Moapostola Pauluse o itse: “Re pepesitsoe pel’a lefatše, le pel’a mangeloi, le pel’a batho.” (1 Ba-Kor. 4:9) Kajeno Bakreste ba pooaneng, ’me sena se bonahala haholo-holo nakong ea kaho ea Liholo tsa ’Muso. Batho ba hlokomela mosebetsi o ntseng o etsoa le moea oa thabo oa basebetsi. Ka baka leo, likoranta tsa litaba li hatisa lihlooho tse khōlō tse kang tse reng: “Lipaki tsa Jehova: Mosebetsi oa Tsona oa Phethoa,” “Ka Moea oa ’Nete oa ho Thusa,” le “Li Phomotse ka Letsatsi la Boraro.”
18 Bonngoe ba basebetsi ba baithaopi bo ’nile ba makatsa batho ba shebelletseng. Ho baahisani ba leng ka boroa ho Johannesburg ho ile ha bonahala eka “basali le bana” ba aha Holo e ncha ea ’Muso motseng oa bona. Ba ne ba na le lipelaelo mabapi le hore na Lipaki li tla phetha morero oa tsona oa kaho kapa che. Empa kapele-pele ba ile ba fetola maikutlo ha ba bona Holo e ntle ea ’Muso e phahama ka mor’a nako e khutšoanyane haholo.
19 Koranta e ’ngoe ea litaba Natala e ile ea re ka morero oa kaho o ileng oa etsoa ke phutheho ea sebaka seo: ‘Holo ea ’Muso e ntle e ahiloeng ka setene se setle, ntle ho tefo! E, ebang ua lumela kapa che, mosebetsi o boima le boinehelo bo hlokang boithati ba phutheho ea Lipaki tsa Jehova e Toti li ile tsa bonahala ka mafelo-beke a fetang 10 ha li ikahela holo e ncha e le hore li ka hlokomela manane a tsona a ntseng a phahama ka potlako.’
20 Phutheho e ’ngoe e Ulundi e ile ea bontša kananelo ho Komiti ea Kaho ea Lebatooa ’me ea re: “Re ke ke ra khona ho lokolisa kamoo re ikutloang ka teng ka seo le re etselitseng sona lengolong lena. . . . Re hlokometse hore lihlopha le batšehetsi ba tsona ba ne ba sa ahe Holo ena bakeng sa Phutheho ea Ulundi feela. Empa haholo-holo ba ne ba e ahela Jehova. Boleng le mosebetsi o entsoeng holong ena e ntle li finyelletsoe ke tšusumetso eo.”
21 Sengoli se seng sa koranta ea litaba se hlalositse: “Roma ha ea ahoa ka letsatsi le le leng, joalokaha polelo e ’ngoe ea khale e bolela, empa phutheho ea sebaka sena ea Lipaki tsa Jehova e sa tsoa shanofatsa khopolo-taba eo ka ho aha Holo e ncha ea ’Muso.” Sengoli se seng se ile sa hlalosa morero oa kaho ea Holo ea ’Muso e sebakeng seo ’me sa re: “Ho ka ’na ha bonahala eka sena ke ntho feela eo u ’nileng oa e utloa, empa se etsahetse hona mona. . . . Seo batho ba bangata ba se nkang e le mohlolo o moholo, Lipaki tsa Jehova li se nka e le mokhoa o tloaelehileng. . . . Le hoja mohlomong li sa rate ho ikhantša ka katleho ea tsona, moea oa tsona le tšebelisano-’moho li behela ba bangata mohlala oo ba lokelang ho o latela.”
22 Texas, U.S.A. motho e mong eo e seng Paki o ile a ngolla koranta ea litaba ka mor’a ho bona o mong oa merero ea kaho e ahiloeng ka potlako: “Ke ile ka shebella ke maketse ha moaho oona o ntse o hōla ka pel’a mahlo a ka. Batho ba ne ba o hloele setha, ka ntle le ka hare. . . . Ho ne ho se na lerata, mahlapa, kapa khethollo e itseng. Ha u le hōle ho ne ho bonahala eka bohle ba laoloa ke letsoho le sa bonahaleng. Mohlomong ho joalo. Ke sa ntse ke makalitsoe ke hore ke ntho ea sebele.” O ile a phetha lengolo la hae ka ho re: “Ha ba tla lapeng la hao, hase hore ba batla ho u khathatsa. Ba mpa feela ba batla ho arolelana lerato la bona le thabo ea bona le e mong le e mong. Mohlomong ho hlokahala feela hore re ba mamele. Kea tseba hore ’na ke tla ba mamela. Hobane seo ke se boneng mafelo-bekeng a fetileng se ne se tšoana le leseli le khanyang lefatšeng le lefifi, ’me kajeno, ba heso, re hloka karolo e itseng ea leseli le lerato leo.”
23 Thuso e Lerato ea Baithaopi: Ka sebele baithaopi ba likete, ho akarelletsa le basebetsi ba litsebi ba thusang kahong ea Liholo tsa ’Muso, ba lokela ho babatsoa. Hore ba etse sena ba sa fumane puseletso ea litšenyehelo tsa bona bakeng sa boiteko ba bona ke bopaki ba hore ba sebelisoa ke moea oa Jehova. (Lik. 20:35; 1 Joh. 4:12, 13, 21) Basebetsi bana ba thabileng ba finyella ho hongata setšeng sa kaho.
24 Basebetsi ba bangata ba tšoanelehang ba nehelana ka nako ea bona le tsebo bakeng sa ho thusa ha ho rekoa setša, moaho, kaho le boenjinere, mokhabiso, ho khabisa jarete, ho ntlafatsa tikoloho, ho reka thepa, ho pheha, ho laola sephethe-phethe, polokeho, joalo-joalo. Baena ba nehelana ka thepa ea bona hore e sebelisoe mererong ena. E tlameha ebe see se thabisa Ntate oa rōna, Jehova, hakaakang ha a bona ba sebelisa matlotlo a bona le matla a bona ka tsela e lerato joalo!—Bapisa le 1 Ba-Thessalonika 2:6-9 le 2 Ba-Thessalonika 3:8b.
25 Ho Hlokahala Baithaopi ba Eketsehileng: Likomiti tsa Kaho tsa Lebatooa li tlaleha hore ho hlokahala baithaopi ba bangata ka ho eketsehileng. Ena ke tšebeletso e hlokahalang ea ho tšehetsa lithahasello tsa ’Muso. (1 Ba-Kor. 15:58) Ho hlokahala basebetsi ba litsebi, hammoho le baena ba bang ba hōlileng tsebong ba nang le litšoaneleho tsa moea le hoja e se litsebi tsa kaho. Haeba ua tšoaneleha, na u ka etsa liphetoho tse itseng e le hore u ka khona ho ithaopa? (Esa. 6:8) Ka mohlala, baholo ba bang kapa bahlanka ba sebeletsang ba ka ’na ba khona ho thusa kahong ea Liholo tsa ’Muso ka mafelo-beke a le mang kapa a mabeli. Ba ka ’na ba fumana koetliso e le hore ba ka jara boikarabelo bo eketsehileng, hangata e le mafapheng a sa amaneng le kaho. Sena se ka thusa baena ba sebetsang ka thata ho hlokomela merero ena.
26 Likomiti tsa Kaho tsa Lebatooa le likomiti tsa kaho tsa phutheho li lokisetsa baithaopi e le hore ba ka ba setšeng sa kaho ha thuso ea bona e hlokahala. Ka mehla baithaopi bana ba batla ho tšepahalla lentsoe la bona ’me ba boloke litokisetso tse joalo ka botšepehi, ba etse hore ‘E ea bona e be E.’ (Matt. 5:37) Ha ntho e ’ngoe e sa lebelloang e ba sitisa ho etsa sena, ka potlako ba tsebisa molebeli ea ikarabellang. Baithaopi ba khutlela liphuthehong tsa habo bona le malapeng a bona kapele kamoo ho ka khonehang ’me ha ba hlōlehe ho kopanela libokeng le tšebeletsong ea tšimo ho sa hlokahale. Ba leng setšeng sa kaho ea Holo ea ’Muso ke bao (1) e leng baithaopi ba lumelletsoeng ba abetsoeng ka ho khetheha ke lihlooho tsa lefapha hore ba be teng le (2) ba tsoang liphuthehong tse sebakeng seo ho ahoang Holo ea ’Muso ho sona bakeng sa ho sebetsa joaloka basebetsi ba tloaelehileng ba se nang tsebo e khethehileng. Ba bang ba khothalletsoa ho tšehetsa tšebeletso ea tšimo le liboka liphuthehong tsa bona.
27 Mokhoa oa ho Ithaopa: Motho o ithaopa joang? Ka December 1991 sehlopha ka seng sa baholo se ile sa romeloa liforomo tsa Kingdom Hall Construction Worker Questionnaire. Liforomo tsena lia fumaneha ha basebetsi ba tšoanelehang ba li kōpa. Ha ho hlokahala liforomo tse eketsehileng, baholo ba li fumana ho molebeli oa potoloho. Baholo ba fuoe litaelo tse qaqileng mabapi le baithaopi ba hlokahalang le litšoaneleho tse tlamehang ho finyelloa.
28 Haeba u lakatsa ho ithaopela ho thusa kahong ea Liholo tsa ’Muso sebakeng sa heno ’me u le mohlanka ea sebeletsang kapa moholo kapa u le Mokreste ea behang mohlala o motle ea nang le tsebo ea mosebetsi o itseng, u ka kōpa e ’ngoe ea liforomo ho baholo phuthehong ea heno. Khutlisetsa foromo e tlatsitsoeng ho baholo. Ba tla kenyelletsa litlhaloso tsa bona ’me ba e nehe molebeli oa potoloho, ’me eena o tla tlatsa foromo eo ebe o e romela ho Komiti ea Kaho ea Lebatooa. Haeba maemo a hao a botho a u lumella ’me u tšoaneleha hore u ka ithaopa, u tla fumana mahlohonolo a maholo ha u bona thabo ea baena le bo-khaitseli ba hao ha morero oa kaho ea Holo ea bona ea ’Muso o phethoa, thorisong ea Jehova.
29 Bohle ba ka Thusa: Ba sa khoneng ho ithaopa le bona ba etsa tšebeletso ea bohlokoa. Ba thusa ka ho hlokomela litlhoko tsa phutheho ha ba bang ba ntse ba sebeletsa morerong oa kaho ea Liholo tsa ’Muso. Ke tlamo hore baithaopi ba bang ba be sieo libokeng ka linako tse itseng phuthehong ea habo bona ha ba ntse ba thusa liphutheho tse ling ka lerato kahong ea Holo ea ’Muso.
30 Hape, ha ho ahoa Holo ea ’Muso sebakeng se haufi, bahoeletsi ba leng phuthehong ea heno bao e seng liahi ba ka ’na ba fumana monyetla oa ho thusa joaloka basebetsi ba tloaelehileng. Basebetsi bana ha ba tlatse liforomo tsa lipotso tsa baithaopi. Tlhokahalo ena ea tsebisoa, ’me ho etsoa litokisetso ka baholo ba leng (li)phuthehong e amehang morerong oa kaho le baholo ba leng liphuthehong tsa boahisani ka lekhetlo le le leng.
31 Kaofela ha rōna re na le monyetla oa ho etsa menehelo ea lichelete e tšehetsang Letlōle la Mokhatlo la Liholo tsa ’Muso ha maemo a rōna a re lumella. Ho tloha ha Letlōle la Mokhatlo la Liholo tsa ’Muso le thehoa ka January 1990, lichelete li ’nile tsa fumaneha, le ho tsoa linaheng tse ling, bakeng sa ho thusa ka kaho ea Liholo tse ncha tsa ’Muso tse 33 tšimong ea lekala la Afrika Boroa. Liholo tsena li ka sebelisoa ke liphutheho tse 44. Liphutheho tse ngata li ka be li hlōlehile ho fumana libaka tse ntle joalo tsa liboka hoja e se ka lerato la boena le bonahetseng ka ho tšehetsa ha lōna Letlōle la Mokhatlo la Liholo tsa ’Muso ka seatla se bulehileng.
32 Letlōle la Mokhatlo la Liholo tsa ’Muso le fana ka likalimo tsa chelete bakeng sa ho thusa kahong ea Liholo tse ncha tsa ’Muso. Kaha chelete e buseletsoa hammoho le tsoala, chelete ena e alingoa liphutheho tse ling tse hlokang. Ho na le melemo ea ho iteanya le Mokhatlo bakeng sa kōpo ea kalimo ea chelete pele le batla tšehetso ea lichelete femeng e itseng ea khoebo.
33 Lipolelo tsa Kananelo: Ha Holo ea eona ea ’Muso e ncha e phethoa, phutheho e Newcastle e itse lengolong le neng le ea ho Mokhatlo: “Re leboha Jehova haholo ’me re lakatsa ho le leboha haholo ka ho re alima chelete bakeng sa Holo ea rōna ea ’Muso le thuso eohle eo re e fuoeng.”
34 Phutheho e ’ngoe e bontšitse kananelo bakeng sa thuso e lerato e ileng ea etsoa molemong oa eona, ea re: “Re lakatsa ho le bolella liteboho tsa rōna tse khōlō bakeng sa thuso ea Letlōle la Mokhatlo la Liholo tsa ’Muso. Ka ntle ho lona kaho ea holo [ea rōna] e ne e tla ba boima haholoanyane ’me e liehe ka nako e teletsana. Ka sebele bohlale ba Jehova boa bonahala tokisetsong ena.”
35 Phutheho ea Knysna e ngotse: “Re thabela ho le tlalehela hore qetellong Holo ea rōna ea ’Muso e se e phethiloe. Re bile le litlhaloso tse ngata tse khothatsang le litakaletso tse molemo ka holo ena e ncha ’me re se re ’nile ra tšoarela liboka tse ’maloa ka har’a eona. Rea hlokomela hore ka ntle ho moea oa Jehova le thuso [ea Mokhatlo] ea lichelete re ka be re sa ka ra khona ho finyella sena, ’me re leboha haholo.”
36 Litlhaloso tsena tse buang ka mosa o motle o ileng oa bontšoa ke baena le bo-khaitseli li tsoa Lebowa-Kgomo: “Qalong chelete e bokelletsoeng e ne e fokola haholo. Eaba Moena T— o fana ka puo phuthehong ’me ho eona a hatisa hore ba ke ke ba khona ho aha Holo ea ’Muso ka lisente tse 10. Ka mor’a moo menehelo e ile ea kena hamolemonyana ho isa bohōleng ba hore qetellong [re] bokelle chelete e etsang R15000,00. Joale Mokhatlo o ile oa re thusa ka chelete ea kalimo e ileng ea [re] nolofalletsa ho aha Holo ena ea ’Muso.— Baahisani ba ne ba maketse ha ba bona batho kaofela ba sebetsa hammoho ho akarelletsa le merabe eohle. — Ha e le mona Holo ea ’Muso e se e phethiloe, e hlahelletse joaloka sebaka se setle sa borapeli bakeng sa Lipaki tsa Jehova mona Lebowa-Kgomo.”
37 Mosebetsi o Larileng ka Pele: E, kaofela ha rōna re na le lebaka le utloahalang la ho thaba ha re finyella litlhoko tsa kotulo. Re lokela ho ba le moea oa tšebelisano-’moho—ho sebetsa ’moho le ho tšehetsa ka botlalo mosebetsi ona o hlokahalang. (Pes. 133:1) Re thabile hakaakang hore ebe ho na le banna ba khethiloeng ke mokhatlo o hlophisitsoeng oa Jehova ba etellang pele litabeng tsa moea le kahong ea meaho e hlokahalang! Pauluse o ile a ipiletsa ho Bafilippi, a re: “Le ke le phethise thabo ea ka, ka ho ba le khopolo e le ’ngoe, le lerato le le leng.” (Ba-Fil. 2:2) Ka sebele, re na le mabaka ’ohle a ho thaba, kaha re fuoe letlotlo la litaba tse molemo tsa ’Muso o hlomiloeng tse lokelang ho “boleloa lefatšeng lohle leo ho ahiloeng ho lona bakeng sa bopaki ho lichaba tsohle” pele bofelo bo fihla. (Matt. 24:14, NW) Ho ema ha rōna re tiile ka lehlakoreng la ’Muso oo le ho sebeletsa lithahasello tsa oona ka botšepehi ho thabisa Jehova pelo. “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.” (Liprov. 27:11) Re na le tokelo e tsotehang hakaakang ea ho sebetsa hammoho le Jesu Kreste le ho kopanela ka thabo le eena mosebetsing oa Jehova!