Latella Thahasello Eohle Molemong oa ba Bang
1 Re lokela ho falimehela ho latella thahasello eohle eo re e fumanang tšimong. Ba bang ba nahana hore ho bohlokoa ho etsa leeto la ho boela haeba motho a nkile sengoliloeng. Leha ho le joalo, sena ha sea nepahala. Neng le neng ha motho a bontša esita le thahasello e fokolang molaetseng oa ’Muso, re batla ho etsa sohle seo re ka se khonang molemong oa motho eo. Kahoo re etsa maeto a ho boela ka sepheo sa ho hlaolela thahasello ea motho le ho qala thuto ea Bibele. Ena ke pakane ea rōna esita leha re sa siea sengoliloeng. See se ka etsoa joang?
2 Haeba nakong e fetileng u ne u bua ka ngatafalo ea mathata a lenyalo kajeno ’me u ile ua siea buka ea “Phela ka ho sa Feleng,” u ka qala moqoqo ka tsela ena:
◼ “Ketelong ea ka e fetileng, re buisane ka lenyalo le keletso e sebetsang ea Bibele e ka re thusang ho fumana thabo e khōloanyane. Na hase ’nete hore esita le malapeng a molemohali, mathata aa hlaha nako le nako? [Emela karabo.] Bibele e re fa keletso e ntle haholo e ka re thusang ho rarolla mathata likamanong tsa lelapa. Lelapa le ka hlohonolofatsoa ka ho ithuta Bibele hammoho.” Phetla leqepheng la 246, ebe u bua ka serapa sa 23. Bala Johanne 17:3, ’me u ithaopele ho thusa lelapa hore le qale ho ithuta Bibele lapeng.
3 Haeba u ile ua bua ka bana le hore ba hloka koetliso, u ka ’na ua ntšetsa pele moqoqo ka tsela ena:
◼ “Nakong e fetileng re buisane ka koetliso ea moea eo bana ba e hlokang le kamoo batsoali ba ka ba thusang. Batsoali ba bangata bao ke buisaneng le bona ba makatsoa ke boitšoaro bo bobe ba bacha ba bangata hakana kajeno. U ikutloa joang ka . . . ? [Bolela mohlala oa boitšoaro bo bobe boo bacha ba atisang ho bo etsa sebakeng sa lōna. Emela karabo.] E re ke u bontše e ’ngoe ea likeletso tse sebetsang tse fanoang ke Bibele.” Phetla serapeng sa 22 leqepheng la 246 bukeng ea Phela ka ho sa Feleng, bua ka ntlha ea sehlooho, ebe u bala Ba-Efese 6:4. Bontša hore ha e le hantle bana ba bangata ba batla taeo le tataiso. Ha batsoali ba khothalletse ho fana ka eona, bana ba thaba haholoanyane ’me ba bontša tlhompho haholoanyane boitšoarong ba bona. Hlalosa kamoo re ithutang Bibele le bana ba rōna.
4 Haeba taba eo le neng le buisana ka eona e ne e le lefatše la Paradeise, u ka ’na ua bua sena ho tsosa thahasello:
◼ “Re ile ra sheba tse ling tsa litšoantšo tse leng bukeng ena tse bontšang hore lefatše le tla ba joang ha Molimo a le fetola paradeise. Le ke ke la re tsoela molemo haeba re ke ke ra le thabela hammoho le baratuoa ba rōna. Na ha ho joalo?” Emela karabo. Ebe u phetla leqepheng la 162 bukeng ea Phela ka ho sa Feleng. Bala Tšenolo 21:3, 4, ebe u hlalosa kamoo baratuoa ba rōna ba ka bang le rōna kamehla. Haeba karabelo e le ntle, bala Johanne 5:28, 29 ho bontša hore bafu ba tla phela hape. Supa sekoahelong sa buka ebe u re: “Ruri ke ’nete—re ka phela ka ho sa feleng Paradeiseng lefatšeng!” Lokisetsa ketelo e ’ngoe bakeng sa ho bua ka hore na ke hobane’ng ha re tseba hore e haufi.
5 Morero oa sehlooho oa leeto la ho boela ke ho thusa batho ba thahasellang hore ba rue molemo molaetseng oa ’Muso. Batho ba bangata ba hloka ho khothalletsoa hore ba be le takatso ea lintho tsa moea. Lebisa tlhokomelo ea bona lintlheng tse tobileng tse nang le bohlokoa bo sebetsang tse ka hare ho lingoliloeng, u hatella kamoo li ka ba thusang hore ba utloisise Bibele hamolemo. Maeto a ho boela a finyellang lipakane tsena a tla thusa ba bang hore ba ithuele molemo ka tsela e molemo ka ho fetisisa.