Kopano ea Setereke ea “Barorisi ba Thabileng” ea 1995
1 Re na le mabaka a makae a ho thaba? Mohlomong ba ’maloa ba ile ba leka ho a thathamisa kaofela ha ’ona. Le hoja re phela lefatšeng le mofere-fere le le ke keng la tšeptjoa, re na le mabaka a mangata haholo a ho thaba. Joalokaha ho entsoe tsebiso ho Molula-Qhooa oa May 1, 1995, “Barorisi ba Thabileng” ke sehlooho se khothatsang sa likopano tsa setereke tsa 1995.
2 Re rorisa Jehova hobane o re rutile ’nete. (Esa. 54:13; Joh. 8:32) Ka lehlakoreng le leng, ka thabo re arolelana ’nete le bohle ba batlang tšireletseho le thabo. (Ezek. 9:4; Lik. 20:35) Boena ba rōna ba Bokreste le bona bo re tlisetsa thabo. Lelapa la moea le nang le lerato le tlisa khotsofalo le thabo. Ana ke a seng makae feela a mabaka a thabo ea rōna a re susumelletsang ho rorisa Jehova. Lipuo tsa kopano le lipontšo li tla lebisa tlhokomelo ea rōna mabakeng a eketsehileng a Mangolo a ho thaba mehleng ena ea qetello e likhathatso.
3 Kopano ea Matsatsi a Mararo: Na u entse litokisetso le mohiri oa hao bakeng sa ho fumana nako ea phomolo e le hore u ka ba teng ka matsatsi ’ohle a mararo a kopano? Kopano e leng haufi le uena e hokae? Tšebeletso ea Rōna ea ’Muso ea May e ile ea thathamisa matsatsi le metse bakeng sa likopano tsohle tse 30 tse leng tšimong ea lekala la Afrika Boroa. Hajoale mongoli oa phutheho ea heno o se a le file boitsebiso bo amang phutheho ea lōna. Ho phaella Senyesemaneng, ho tla ba le likopano ka Seafrikanse, Sekwanyama, Sepedi, Sepotoketsi, Sesotho, Setsonga, Setswana, Sevenda, Sexhosa, Sezulu le Puo ea Matsoho.
4 Letsatsing la pele lenaneo le tla qala ka 9:40 hoseng ’me le fele letsatsing la ho qetela hoo e ka bang ka 3:50 motšehare oa mantsiboea. Letsatsing la bobeli le la boraro, lenaneo le tla qala ka 9:30 hoseng. Batho ba tla lumelloa ho kena ka 8:00 hoseng. Ho tla lumelloa feela ba nang le likabelo tse tobileng tsa mosebetsi ho kena pele ho moo.
5 Na U Tla ba Teng?: Re khothalletsoa hore re be teng ka matsatsi ’ohle a mararo a kopano. Hobane’ng? Jehova o batla hore re be teng. Kajeno tumelo ea rōna le bophelo ba rōna ba moea li tlas’a tlhaselo e matla. Pauluse o ile a eletsa mabapi le ‘ho se ngale liphutheho tsa rōna’ nakong ea ha Bakreste ba Judea ba ne ba le tlas’a khatello e khōlō. (Ba-Heb. 3:12, 13; 10:25) Ba-Filippi ba ne ba phela “har’a moloko o senyehileng, o khopo.” Leha ho le joalo, ba ne ba ‘khanya joaloka maseli lefatšeng.’ (Ba-Fil. 2:15) Ke hobane’ng ha Bakreste baa ba lekholong la pele la lilemo ba ne ba fapane le batho ba bang? Hobane ba ile ba mamela le ho latela tataiso ea moea o halalelang o neng o ba laela ho kopana hammoho ‘ho isana ka cheseho leratong le mesebetsing e metle.’—Ba-Heb. 10:24.
6 Lefatše le ka re susumetsa hore re etse ho fapaneng, la fokolisa takatso ea rōna ea ho kopana le baena ba rōna le ho rorisa Jehova. Lehlabuleng lena re mengoa hore re ikokobeletse moea oa Jehova ’me re thabele matsatsi ’ohle a mararo a kopano. Na re lokiselitse ho ba teng le malapa ’ohle a rōna? Ho hlokahala hore re matlafatse lerato la rōna le tumelo kamehla. Jehova o lokiselitse likopano tsa selemo le selemo ho re thusa tabeng ena.
7 Khutlela Lapeng ka Letlotlo: U ka rua molemo joang kopanong? Karabo ka bokhutšoanyane ke “ho tsepamisa mohopolo.” Sena ha se bonolo mokhatlong oa kajeno oa batho ba lulang ba tšohile, ba phathahaneng. Bacha ba mahlaha-hlaha ba ka ’na ba fumana ho le thata ho tsepamisa mohopolo, empa ke phephetso eo kaofela ha rōna re tobanang le eona ha re le kopanong ea setereke. Re tla fumana ho le bonolo ho tsepamisa mohopolo haeba re lokisetsa esale pele. Ipotse, ‘Sehlooho sa kopano se re’ng?’ Thuisa ka sona! ‘Ke ea teng ka lebaka lefe, hona ke tla be ke etsa eng ka matsatsi ao a mararo? Na ke tla sebelisa nako eohle ea mantsiboea bakeng sa boikhathollo, kapa ke tla sebelisa nako e ngata bakeng sa ho phomola le ho ikhopotsa lintlha tsa sehlooho tsa kopano?’
8 Sehlooho sa Molula-Qhooa oa July 15, 1984, “Na Ua Thuisa kapa U Lora U Ntse U Shebile?” se ile sa fana ka litlhahiso tse ’maloa tabeng ea ho rua molemo sebokeng ’me sa phetha ka ho re: “Ho khalemela kelello mohlomong ke ntlha ea bohlokoa haholo.” Ha sebui se qala, hangata re mamela ka hloko, empa mohlomong hare ho puo, re lumella mohopolo oa rōna ho “khelekhetha.” Re ka thibela see joang?
9 Ho loketse hore ho ka phetoa litlhahiso tse ileng tsa fanoa nakong e fetileng hobane lia sebetsa. Haeba ho khoneha, leka ho phomola ka ho lekaneng bosiu bo bong le bo bong. Hase kamehla sena se leng bonolo kaha ho ka ’na ha ama ho tsamaea sebaka se selelele, ’me haeba u lula sebakeng se hiriloeng, u ka ’na ua se robale kapele kapa ho phomola ka mokhoa oo u neng u tla etsa ka oona ha u le lapeng. Hangata ho lokisetsa hantle ho tla u fa nako e hlokahalang ea phomolo.
10 Ho ngola lintlha ka mokhoa o bonolo ho ipakile ho thusa hore motho a tsepamise mohopolo. Haeba u leka ho ngola boitsebiso bo bongata haholo, u ka ’na ua lahleheloa ka ho felletseng ke lintlha tse ling tsa bohlokoa. E le tlhahiso, ngola lintlha ka sepheo sa ho phetela seithuti sa Bibele kapa motho ea sa khoneng ho tsoha liphateng kakaretso ea lenaneo. Le hoja u sa nahana ka motho ea itseng ka ho toba, u tla ba le lebaka la ho ngola lintlha, ’me ka mor’a kopano u ka ’na ua fumana menyetla ea ho bua ka lintlha tse khōlō tsa lenaneo ha u paka ka mokhoa o sa reroang ho litho tse sa lumelang tsa lelapa. Ka ho ngola lintlha le ho arolelana le ba bang seo u se utloileng, u ke ke ua lebala boitsebiso kapele. Ho bua ka taba ho e etsa hore e lule kelellong.
11 Le hoja ho ke ke ha hlola ho lokisetsoa lijo, ho sa ntse ho e-na le litšenyehelo tse ngata tabeng ea ho hira libaka tsa kopano, tseo hangata li akarelletsang chelete e eketsehileng bakeng sa thepa ea melumo le lintho tse ling. Litšenyehelo tsee li koaheloa joang? Ka menehelo ea rōna ea boithatelo, ebang ke chelete kapa cheke e ka lefuoang ho “Watch Tower Convention.” Sena se tumellanong le Pesaleme ea 96:8 le 2 Likronike 31:12.
12 Barorisi ba Thabileng ba Hlompha Jehova ka Boitšoaro ba Bomolimo: Selemong se fetileng United States ho ile ha amoheloa litlhaloso tse ntle ka boitšoaro ba rōna tse boletsoeng ke basebetsi ba hotele le ba sebetsang libakeng tsa kopano. Mookameli e mong oa hotele o ile a re: “Kamehla re thabela ho amohela Lipaki hobane li na le mamello le tšebelisano-’moho ’me li hlokomela bana ba tsona.” Motsamaisi e mong oa hotele o ile a bolela hore ho bonahala Lipaki li thabile ’me li hlophisehile haholoanyane ho feta lihlopha tse ling. Esita le hoja kopano ea rōna e ne e le e khōlō ka ho fetisisa sebakeng sena, o ile a re: “Re ba le litletlebo le mathata a fokolang ho feta a bang teng ho lihlopha tse nyenyane haholo ho tsona.”
13 Mosebetsi e mong oa hotele a ile a bolela phatlalatsa hore kopano e neng e sa tsoa tšoaroa pele ho ea rōna e ile ea baka tšenyo e khōlō, esita le bosholu, le hoja basebetsi bohle ba hotele ba ne ba le teng. Empa ha a bua ka kopano ea rōna, o ile a tsoela pele ho re: “Ha ho hlokahale hore re tšoenyehe ka seo ho Lipaki. . . . Ha li le teng, ho hlokahala feela hore ho be le motho a le mong kapa ba babeli ba bolokang thepa e sebetsa ’me ba ba teng feela bakeng sa ho lokisa mechine.”
14 Re lakatsa eka litlaleho tsohle tse amohetsoeng li ne li ka tšoana le tsena, empa ka masoabi, ha ho joalo. Molula-setulo e mong oa kopano o ile a re: “Ka mor’a mananeo, bacha ba bangata ba khobokana ka bongata sebakeng sa ho amohela baeti [hoteleng] ho fihlela bosiu haholo, ba tšehela holimo le ho tlatsa lerata. Sena se tšoenya baeti ba bang . . . , ba bonahalang ba halefisoa ke sena. Bacha ba bang ba matha liphasejeng, ba khahlela mamati ha ba etelana ’me ba buela holimo ka har’a likamore.”
15 Bothata bo bong bo ’nileng ba ba teng ka lilemo tse ngata ke palo e khōlō ea baena ba qoqang liphasejeng le kantle ho holo nakong ea mananeo. Kopanong e ’ngoe selemong se fetileng, ho ile ha fumanoa lengolo le tsoang ho seithuti sa Bibele ka har’a lebokose la monehelo. Le ne le re: “Ha ke e-s’o ka ke nyarosoa le ho tšosoa hakana ke lerata, ho feresela, ho qoqa le boitšoaro bo sa lokelang liphasejeng nakong eo lipuo li ntseng li tsoela pele . . . Ha ke e-s’o be Paki, ke mpa ke le motho ea ithutang tšabo ea bomolimo le tlhompho.” Ka sebele, le ea mong oa rōna a ke ke a batla ho fana ka maikutlo a hore ha re ananele litokisetso tsa Jehova.
16 Re lokela ho ipotsa ka linako tsohle: ‘Ke emela mang, hona ke hobane’ng ha ke tlile kopanong ena?’ Bomoea ba rōna le boinehelo ba bomolimo li bonahala puong ea rōna, boitšoarong le kananelong ea litokisetso tsa moea. (Jak. 3:13; 1 Pet. 2:2, 3, 12) Baena ba mamelletseng thibelo ka lilemo tse ngata ho hlokomeloa hore hangata ba mamelisisa haholoanyane likopanong le ho bontša tlhompho, ha ba ee holimo le tlaase, ba ameha ka ho feletseng lipuong le lipontšong.
17 Moaparo oa Hao le Boitlhopho li Fetisa Molaetsa: Ho 1 Samuele 16:7, re hopotsoa hore “motho o talima tšobotsi, empa Jehova eena o talima pelo.” Ka hona, hangata batho ba re ahlola ka ponahalo ea rōna. Moaparo oa rōna le boitlhopho bo hlokomeloa haholo, haholo-holo ha re le kopanong ea borapeli le taeo ka bophelo ba Bokreste. Haeba u mocha ea kenang sekolo kapa haeba mosebetsi oa hao oa boipheliso o etsa hore u amane le batho ba latelang litaele tsa lefatše, e ka ’na ea e-ba phephetso ho tšoarella litekanyetsong tsa Bokreste tsa moaparo o itekanetseng.
18 Litekanyetso tsa moaparo le boitlhopho lia fapana lefatšeng lohle. Bakreste ba lebelletsoe ho apara liaparo tse itekanetseng, tse hlophehileng hantle. Ke mang ea lokelang ho etsa qeto ka see? Batsoali ba lokela ho tiisa hore bana ba bona ba lilemong tsa bocha ha ba apare joaloka bacha ba lefatše ba leng sekolong. Ho fanoe ka tataiso e molemo e re thusang ho etsa liqeto tse utloahalang tabeng ena e amang maikutlo. Re khothalletsa hore le hlahlobe sehlooho sa Tsoha! ea February 8, 1987, “Liaparo li Bolela Eng ho Uena?” Ho hlokometsoe eng ho tse ling tsa likopano tsa rōna selemong se fetileng?
19 Ka mor’a e ’ngoe ea Likopano tsa Setereke tsa “Tšabo ea Bomolimo,” re ile ra amohela sena se hlokometsoeng: “Baena le bo-khaitseli ba ntlafalitse haholo moaparong oa bona, boitlhophong le boitšoarong kopanong selemong sena. . . . Leha ho le joalo, ho sa ntse ho e-na le maemo a mang le mekhoa e hlokang hore e ntlafatsoe ka ho eketsehileng.” Ka mor’a kopano e ’ngoe ho ile ha tlalehoa hore ho hlokometsoe moaparo o sa itekanelang. Tlaleho e ile ea bolela hore moaparo oa ba bang o ne o khopisa ba bang. Batho ba bang ba kantle ba neng ba le teng le bona ba ile ba hlokomela moaparo o sa itekanelang. Liaparo tsa ba bang li ne li bonaletsa haholo ebile e le tse tlenyang haholo.
20 Baena ba bangata le bo-khaitseli ba apara liaparo tse itekanetseng, tse hlomphehang ha ba le libakeng tsa kopano. Leha ho le joalo, hamorao, lihoteleng kapa libakeng tsa ho jela, baena ba bang le bo-khaitseli, ba ntse ba qhoaetse libeche tsa bona, ba ne ba apere “likipa tse se nang matsoho, libokate tsa khale, marikhoe a makhutšoanyane haholo, le . . . liaparo tsa feshene tse sa lokelang batho ba Molimo.” Haeba baholo ba hlokomela hore ba bang ba na le tšekamelo ea ho apara ka tsela ena nakong ea boikhathollo, e ka ba ho loketseng ho fana ka keletso e mosa empa e le matla pele ho kopano hore moaparo o joalo ha o-oa lokela, haholo-holo ho ba tlileng kopanong ea Bokreste. Ka kōpo hlahloba lintlha tsena tse tataisang tse boletsoeng ka holimo tsa boitšoaro le moaparo le liithuti tsa hao tsa Bibele tse tla ba teng kopanong.
21 Lihotele: Selemo le selemo ho etsoa boiteko bo boholo ho fana ka marobalo ka litheko tse theotsoeng e le hore tabeng ea lichelete re se be moroalo ho leha e le mang. Ka kōpo hopolang hore le be le mamello le mosa ha le sebetsana le basebetsi ba hotele. E ka ’na eaba re khathalitsoe ke leeto ’me mohlomong ba lieha ho re thusa, empa mamello ea hao e tla hlokomeleha. Re boetse re tlameha ho hopola ho fana ka chelete ea mpho bakeng sa tšebeletso ho latela tloaelo.—Awake! ea June 22, 1986.
22 Lik’hamera le Thepa ea ho Rekota: Ho loketse ho fana ka likhopotso tse mosa ka lik’hamera le thepa ea ho rekota. Ka kōpo hopola, haeba u rera ho sebelisa lik’hamera, lik’hamera tsa video tse jarehang, kapa mofuta leha e le ofe oa thepa ea ho rekota, bontša ho nahanela ba pel’a hao. Ho ea holimo le tlaase nakong ea mananeo kapa esita le ho rekota u le moo u lutseng teng ho ka sitisa ba bang. Ha ho thepa leha e le efe ea ho rekota e lokelang ho hokelloa tsamaisong ea motlakase kapa ea molumo, ’me thepa e joalo ha e-ea lokela ho koala tsela. Hore na u rera ho nka litšoantšo kapa ho rekota likarolo tsa lenaneo ka k’hamera ea video e jarehang kapa mochine oa ho rekota lik’hasete ke taba ea botho. Litšoantšo le lintho tse rekotiloeng li ka etsa hore ho hopoloe liketsahalo tse thabisang ha li mameloa hamorao. Thepa eohle e joalo e lokela ho sebelisoa ka tsela e nahanelang, ka tsela e ke keng ea sitisa ba bang kapa ea u thibela ho rua molemo o feletseng lenaneong. Ha u khutlela hae, na u tla ba le nako ea ho mamela se rekotiloeng? U ka ’na ua fumana hore ho ngola lintlha feela ho lekane.
23 Litulo: Na u ile ua hlokomela ntlafatso e entsoeng tabeng ea ho boloka litulo Kopanong ea Setereke ea “Tšabo ea Bomolimo” ea 1994? Ho na le khatelo-pele e entsoeng, empa re ntse re hloka ho ela hloko khopotso ena: LITULO LI KA BOLOKELOA FEELA LITHO TSE HAUFI TSA LELAPA LA HAO LE MOTHO LEHA E LE OFE EO U TSAMAEANG LE EENA KOLOING EA HAO. Re moo joaloka baeti ba Mokhatlo. Sebaka seo se hiriloe ka menehelo ea boithatelo. Na ke ho bontšang lerato le ho nahanela ho boloka setulo seo re sa tiiseheng haeba ho na le ea tla lula ho sona? Re masoabi hore ebe re ke ke ra khona ho ba le likamore tse khethehileng bakeng sa ba nang le mathata a amanang le tikoloho, joaloka ho kulisoa ke lintho tse itseng.
24 Kopano ka ’ngoe e etsa tokisetso bakeng sa ba nang le litlhoko tse khethehileng, joaloka ba hōlileng le ba holofetseng. Ka kōpo tiisang hore ha le lule ho se seng sa litulo tsena haeba le sa amehe. Hape, falimehelang ho thusa ba nang le litlhoko tse khethehileng hore ba fumane setulo haeba ba sa tsamaee le motho ea ikarabellang ka ho ba hlokomela.
25 Ho Hlokomela Litlhoko Tsa Hao Tsa Lijo Kopanong: Joalokaha u tseba, Tšebeletso ea Rōna ea ’Muso ea July 1995 e ile ea etsa tsebiso ena: “Ho qala ka September 1995 likopano tsa potoloho le matsatsi a kopano a khethehileng le Likopanong tsa Setereke tsa ‘Barorisi ba Thabileng’ bofelong ba selemo, ho ke ke ha e-ba le lijo. E mong le e mong o lokela ho itlela le lijo le se nooang.” Eaba kenyelletso ea Tšebeletso ea Rōna ea ’Muso ea September 1995 e hlalosa lebaka leo phetoho ena e entsoeng ka lona ’me ea fana ka litlhahiso tse ntle tsa kamoo e mong le e mong a ka hlokomelang litlhoko tsa hae tsa lijo le se nooang kopanong. Ho tla ba molemo hore bohle ba hlahlobe kenyelletso ka bobona ’me ba buisane ka eona le liithuti tsa bona tsa Bibele ha li lokisetsa ho ea kopanong. Ke habohlokoa hore liithuti tsa Bibele li tsebisoe hore bohle ba leng kopanong ba lokela ho itlela le lijo tsa bona le se nooang. Ka kōpo re le hopotsa hape hore ba tlileng kopanong ha baa lokela ho tla ka litofo tsa khase kapa liporaema-setofo libakeng tseo ba fihletseng ho tsona kapa sebakeng sa kopano kaha li ka baka kotsi ea mollo. Re khothalletsa bohle hore ka pelo eohle ba mamele kōpo ena. Bahlokomeli libakeng tsa kopano le ba lebetseng libaka tsa marobalo tsa likolo ba tla bontša ho tiea tabeng ena.
26 Bakeng sa ho hatisa lintlha tse ling, u tla batla ho hopola lintho tseo ho ileng ha etsoa tlhahiso ea hore li ka nkuoa bakeng sa khefu ea motšehare: lijo tse bobebe, tse bonolo le tse nang le phepo tse tšoanang le tse nkuoang ke batho hangata ha ba e-ea mosebetsing oa boipheliso, joaloka li-sandwich, mangangajane, matokomane, lintho tse bakiloeng le litholoana. Lintho tse nooang li ka akarelletsa kofi, lino-mapholi, lijuse kapa metsi a tšetsoeng ka har’a lintho tse sa pshatleheng kapa flaske. Haeba ho hlokahala li-cooler tse nyenyane, lia amoheloa haeba li tla kena tlas’a setulo sa hao. Leha ho le joalo, ha ho li-cooler tse khōlō tse sebelisoang lipikiniking, joala, kapa lintho tseo ho tšeloang ho tsona tse entsoeng ka khalase tse lokelang ho tlisoa libakeng tsa kopano. Re lokela ho qoba ho ja nakong ea mananeo. Sena se ka bontša ho se hlomphe lijo tsa moea tseo re li fuoang.
27 Tlhokomeliso e eketsehileng ke hore ha hoa lokela ho pheheloa litlelaseng tsa sekolo ntle leha li e-na le kichene bakeng sa hona. Ho hotle ho nka ka ho teba taba ea hore nako e fanoeng bakeng sa khefu ea motšehare e etselitsoe hore re je lijo tse bonolo le ho thabela botsoalle ba puso ea Molimo hammoho le baena ba rōna le bo-khaitseli. Joaloka batho ba Jehova, re hlokomela hore lijo tsa moea likopanong ke tsa bohlokoa haholo ha li bapisoa le lintho tse bonahalang, ’me re lokela ho rera ka ho loketseng.
28 Likopano tsa Setereke tsa “Barorisi ba Thabileng” li tla qala ka la 24 November, 1995. Na u se u qetile ho lokisetsa, hona na u se u loketse ho thabela matsatsi a mararo a botsoalle bo thabileng le lintho tse ntle tsa moea hona joale? Ke thapelo ea rōna e tiileng hore Jehova a hlohonolofatse boiteko ba hao ba ho ba teng kopanong lehlabuleng lena le baena ba hao le bo-khaitseli ha re ntse re hlahloba kamoo re ka bang barorisi ba thabileng ba Jehova kateng.
[Lebokose le leqepheng la 10]
Likhopotso Tsa Kopano ea Setereke
Kolobetso: Ba eang kolobetsong ba lokela ho lula litulong tse khethehileng tseo ba li lokiselitsoeng pele lenaneo le qala hoseng ha letsatsi la bobeli. Ho hlokometsoe hore ba bang ba apara liaparo tse se nang seriti le tse hlomphollang ketsahalo ena. E mong le e mong ea rerang ho kolobetsoa o lokela ho tla le liaparo tse hlomphehang tsa ho kena metsing le thaole. Ka mor’a puo ea kolobetso le thapelo tse tla etsoa ke sebui, molula-setulo oa lenaneo o tla fana ka litaelo tse khutšoanyane ho ba eang kolobetsong ebe joale o bolela pina. Ka mor’a hore ho binoe mola oa ho qetela, bahlokomeli ba tla lebisa ba eang kolobetsong sebakeng sa qoeliso. Kaha kolobetso pontšong ea boinehelo ba motho ke taba ea lekunutu le ea botho pakeng tsa motho ka mong le Jehova, ha ho na tokisetso ea ho bitsoang likolobetso tsa balekane tseo ho tsona ba babeli ba eang kolobetsong ba hakanang kapa ba tšoaranang ka matsoho nakong eo ba kolobetsoang.
Libeche: Ka kōpo qhoaela beche ea 1995 kopanong leha u e-ea kapa u khutla sebakeng sa kopano. Hangata sena se re nolofaletsa ho fana ka bopaki bo botle ha re ntse re tsamaea. U lokela ho iphumanela libeche le likoahelo ka phutheho ea heno, kaha li ke ke tsa fumaneha kopanong. Hopola ho nka karete ea hao ea Advance Medical Directive/Release e nakong. Litho tsa lelapa la Bethele le bo-pula-maliboho le bona ba lokela ho nka likarete tsa bona tsa boitsebahatso.
Marobalo: Re kōpa tšebelisano-’moho ea e mong le e mong ea sebelisang tokisetso ea bolulo e entsoeng ke kopano. Bangoli ba phutheho ba lokela ho tiisa hore Liforomo tsa Kōpo ea Kamore li romeloa kapele atereseng e loketseng ea kopano. Haeba u ke ke ua hlola u sebelisa tokisetso ea bolulo e entsoeng ke Lefapha la Tokisetso ea Marobalo, u lokela hore hang-hang u tsebise mong’a ntlo kapa hotele le ba Lefapha la Tokisetso ea Marobalo la kopano e le hore kamore e ka abeloa motho e mong. Re khothalletsa baena bohle ba leng metseng e meholo kapa litoropong tseo likopano li tlang ho tšoareloa teng, ho amohela ba tlileng kopanong ba bangata ka hohle kamoo ho ka khonehang malapeng a bona. Likopanong tse ling ho ntse ho e-ba thata ka ho eketsehileng ho fumana bolulo bakeng sa ba bangata ba tlileng kopanong. Rea hlokomela hore malapa a mangata ha a na sebaka se seholo sa marobalo, leha ho le joalo, re khothalletsa malapa ho bula mahae a ’ona ho ba tlileng kopanong.
Likoloeana Tsa Bana (Liprema): Libakeng tse ngata, likoloeana tsa bana ha lia lumelloa moo ho kopaneng batho ba bangata. Lefapha la Mollo le khothalletsa hore likoloeana tsena li se ke tsa kena ka holong ebe li behoa liphasejeng le litselaneng tsa holo kapa pakeng tsa mela ea litulo. Kaha letšoele le leholo la batho le ka baka tšubuhlellano, likoloeana tsa bana li ka ba kotsi e seng feela ho bana empa le ho motho ofe le ofe eo li ka mo khopang. Kahoo ka kōpo se keng la kena le tsona ka holong ea kopano. Leha ho le joalo, litulo tsa masea kapa tseo a behoang ho tsona ka koloing li lumelletsoe, kaha li ka faselletsoa litulong haufi le batsoali. Tšebelisano-’moho ea hao tabeng ena e-ea ananeloa.
Tšebeletso ea Boithaopo: Na u ka behella nako e itseng ka thōko kopanong bakeng sa ho thusa lefapheng le leng? Ho sebeletsa baena ba rōna, esita le haeba e le ka lihora tse seng kae feela, e ka ba ho thusang haholo le ho tlisang khotsofalo e khōlō. Haeba u ka khona ho thusa, ka kōpo itlhahise Lefapheng la Tšebeletso ea Boithaopo kopanong. Bana ba lilemo tse ka tlaase ho 16 le bona ba ka etsa tlatsetso e ntle ka ho sebetsa tlas’a tataiso ea motsoali kapa motho e mong e moholo ea nang le boikarabelo.
Tlhokomeliso: Ka ho falimehela mathata a ka ’nang a hlaha, re ka ipoloka mathateng a sa hlokahaleng. Hangata masholu le batho ba bolotsana ba tla senyetsa batho ba leng hōle le tikoloho ea lehae la bona. Tiisa hore koloi ea hao e notletsoe ka linako tsohle, ’me le ka mohla u se siee letho le bonahalang le ka lekang motho hore a thuhe le ho kena. Masholu le litsotsi li rata lipokano tse khōlō. E ke ke ea e-ba bohlale ho siea lintho leha e le life tsa bohlokoa setulong. U ke ke ua tiisa hore e mong le e mong ea pel’a hao ke Mokreste. Ke hobane’ng ha u ka ba hohela ka ntho leha e le efe? Ho amohetsoe litlaleho tsa batho ba kantle ba ileng ba leka ho hohella bana hore ba tlohe sebakeng sa kopano. LULA U BONA BANA BA HAO KA LINAKO TSOHLE.
Lithelevishene tse fumanehang libakeng tse ling hangata li bontša lifilimi tse litšila, tsa bootsoa. Hlokomela leraba lena, ’me u se lumelle bana ho shebella thelevishene ba sa behoa leihlo libakeng tsena.
Ka kōpo u se ke ua founela batsamaisi ba mehaho ea kopano u botsa boitsebiso mabapi le litaba leha e le life tsa kopano. Haeba boitsebiso bo sa fumanehe ho baholo, ka kōpo ngolla Komiti ea Kopano ka mor’a ho fumana aterese ho mongoli oa phutheho.