Imani Yenye Moyo Mkuu ya Ndugu Zetu Warwanda
MAPEMA katika 1994 ulimwengu uliduwazwa wakati ripoti za maangamizi makubwa zilipozuka kutoka nchi ya Kiafrika ya Rwanda. Vita katili ya wenyewe kwa wenyewe ilikuwa imelipuka—ikiwa kilele cha uadui wa karne nyingi.
Wakikabiliwa na ukosefu mkubwa kabisa wa sheria na utaratibu, wale Mashahidi wa Yehova zaidi ya 2,000 katika Rwanda walilazimika kukimbia kwa ajili ya uhai wao. Karibu 1,300 walipata himaya katika kambi za wakimbizi karibu-karibu na Zaire na Tanzania, lakini wengine hawakuweza kutoroka kwa wakati. Tunasikitika kuripoti kwamba ndugu na dada zetu karibu 400—watu wazima na watoto pia, wote wakiwa raia bila shaka—wamekufa katika jeuri yenye kichaa. Wakristo ulimwenguni pote waomboleza kupoteza washika-ukamilifu wa maadili hawa wenye moyo mkuu nao wapata faraja katika ahadi ya Biblia ya ufufuo.—Yohana 11:25.
Ndugu na dada Warwanda waliookoka waliendeleaje? Wazee walitumwa kutoka nchi mbalimbali kuchunguza mambo yalivyo hasa. Ripoti moja ilisema kwamba ndugu Warwanda wamekabili hali hiyo “kwa heshima nyingi na moyo mkuu.” Kwa kielelezo, ombi la kwanza la akina ndugu lilikuwa fasihi ya Biblia. ‘Wanaonekana kujali zaidi juu ya kupokea chakula cha kiroho kuliko msaada wa vitu vya kimwili, wajapohitaji sana vitu vingi,’ ripoti hiyo yamalizia. Na ingawa hali za kambini ni mbaya sana, ‘mahali safi zaidi ni pale ndugu zetu wanaishi.’
Watch Tower Society imefanya fedha zipatikane za kununua chakula, mablanketi, mavazi, viatu, na dawa. Ndugu zetu katika Ufaransa walichanga kwa ukarimu, na kufikia mapema Juni, karibu tani mbili za vifaa zilikuwa zimesafirishwa kwa ndugu zetu Warwanda wenye uhitaji.
Si ajabu kwamba hali hizi zimetoa ushahidi mzuri. Watazamaji wameguswa moyo na uhakika wa kwamba ndugu zetu Warwanda walipokea msaada kama huo na utegemezo kutoka kwa Mashahidi wenzao, na imewezekana kushiriki msaada huu pamoja na wengine. Wengine wamesema kwamba ni Mashahidi peke yao katika kambi waliotembelewa na washiriki wa dini yao!
Hali mbaya ya ndugu zetu Warwanda zatukumbusha kwamba katika hizi “siku za mwisho,” watu watakuwa “wakali” na “wajeuri.” (2 Timotheo 3:1-5; Today’s English Version) Na ingawa Yehova hawaahidi watu wake ulinzi wa kimuujiza kutokana na hali za hatari zionekanazo, yeye aahidi kulinda salama hali yao ya kiroho na uhusiano pamoja naye, na katika utawala wa Mileani wa Kristo, kuwafufua wale wanaokufa sasa. (Zaburi 91:1-10) Sala zetu kwamba Yehova awategemeze na kuwasaidia ndugu zetu Warwanda waokokaji katika wakati huu wenye majaribu na ziendelee kutolewa kwa niaba yao.—Zaburi 46:1.