“Mna Uhitaji wa Uvumilivu”

TUNA “uhitaji wa uvumilivu,” ikiwa tutapokea “utimizo wa ahadi.” (Waebrania 10:36, NW) Msomi mmoja wa Biblia aeleza kwamba neno la Kigiriki la “uvumilivu” ambalo mtume Paulo alitumia katika andiko hili nyakati fulani lilitumika kufafanua “uwezo wa mmea kuishi chini ya hali ngumu na zisizofaa.”

Katika milima ya Ulaya, hukua mmea wa aina hiyo hasa. Jambo lenye kushangaza ni kwamba huo huitwa ishi-milele. Bila shaka, mmea huu wa milima ya Alpine hauishi milele, lakini huo huvumilia mwaka baada ya mwaka, ukitokeza maua yenye kupendeza kila kiangazi. The New Encyclopædia Britannica yaeleza kwamba mmea huo ulipewa jina ishi-milele kwa sababu ya “ustahimilivu na udumifu wao.” (Jina la kisayansi la mimea hii ya jenasi Sempervivum humaanisha pia “ishi-milele.”)

Kile kinachofanya mmea huu wenye kudumu uwe wenye kutazamisha ni kwamba huo hukua katika mahali penye hali mbaya mno. Huo waweza kupatikana juu mno kwenye miinamo ya milima yenye upepo mwingi, ambapo halijoto zaweza kushuka sana kwa ghafula hadi digrii 35 Sentigredi kwa kipindi cha saa 24 tu. Huo waweza kutia mizizi katika mianya ya mwamba yenye mchanga mchache. Ni nini baadhi ya siri za uvumilivu wao katika hali mbaya hivyo?

Ishi-milele una majani yenye kuhifadhi maji, ambayo kwa uangalifu huweka akiba ya maji. Hili huusaidia kutumia kwa faida unyevu wote unaopatikana kutokana na mvua au theluji inayoyeyuka. Isitoshe, huo hukua kwa vichala ambavyo huunganisha nguvu zavyo ili kupata mshiko thabiti kwenye utegemezo wao wa mwamba. Kwa kutia mizizi katika mianya, huo hupata ulinzi kutokana na hali-hewa, hata ingawa huenda kukawa na mchanga mchache. Kwa maneno mengine, huo huendelea kusalimika kwa kutumia faida kadiri uwezavyo.

Kwa kusema kiroho, huenda tukajipata katika hali zenye kujaribu ubora wa uvumilivu wetu. Ni nini kitatusaidia kuvumilia chini ya jaribu? Kama mmea ishi-milele, twaweza kuhifadhi maji yenye kutoa uhai ya Neno la Mungu na kushirikiana kwa ukaribu na Wakristo wa kweli ili tupate utegemezo na ulinzi. Zaidi ya yote, kama ua hilo la alpine, ni lazima tushikilie kwa uthabiti “mwamba” wetu, Yehova, na vilevile Neno lake na tengenezo lake.—2 Samweli 22:3.

Kwa kweli, mmea ishi-milele ni kikumbusha chenye kuvutia kwamba, hata katika mazingira mabaya, twaweza kuvumilia ikiwa twatumia kwa faida maandalizi yanayopatikana. Yehova atuhakikishia kwamba uvumilivu wa aina hiyo utatufanya ‘tuzirithi ahadi,’ ambazo zitamaanisha kihalisi kuishi milele.—Waebrania 6:12; Mathayo 25:46.