Hakikisha Kwamba Unarudi
1 “Kwa muda wa miaka miwili iliyopita, nimesoma [kitabu Creation] mara nne na ninaendelea kuvutiwa na kina cha utafiti, utaalamu, na habari zilizotiwa ndani katika kukitayarisha. Tafadhali endeleeni kukitangaza. Kitabu hicho chapaswa kiwe mikononi mwa kila mtu ulimwenguni. Hilo likitendeka, uchambuzi na mvurugo wote kuhusu asili yetu na imani za kutokuamini kuwako kwa Mungu zingekoma mara hiyo.” Ndivyo alivyoandika wakili mmoja asiyefanya kazi wakati wote, kama ilivyoripotiwa katika Amkeni! la Aprili 22, 1992, ukurasa 32, Kiingereza.
2 Kukiwa na pendekezo zuri kama hilo kwa kichapo hicho, je! sisi sote hatupaswi kutaka kutoa utegemezo wa moyo wote kwa kuwatolea watu wengi wanaopendezwa kitabu Creation kwa kadiri iwezekanavyo? Basi, ni lazima tuhakikishe kufanya ziara za kurudia ili kuchochea kupendezwa kunakoendelea katika kichapo hicho chenye kutokeza.
3 Wengi wetu hatujajifunza kwa kina nadharia nyingi zinazotolewa na wanamageuzi. Hata hivyo, si lazima tujifunze hizo ili kuandalia watu wenye mioyo minyoofu uthibitisho mwingi kwamba fundisho la mageuzi ni njia nyingine tu inayotumiwa na Shetani ili kumshushia heshima Muumba wa ainabinadamu, Yehova Mungu. Usisite kurudi kwa hofu kwamba huenda ukashindwa kujibu baadhi ya maswali magumu ambayo huenda wenye nyumba wakauliza. Kichapo chenyewe kinatoa habari nyingi zinazothibitisha kila elezo kinalotoa.
4 Isitoshe, kuanzia sura ya 16 na kuendelea hadi sura ya 20 kuna habari nyingi zinazoshughulika na mafundisho ya msingi ya Maandiko kuhusu asili ya ainabinadamu, kusudi la Mungu kwa dunia hii na mwanadamu, na mambo ya kuchagua yanayokabili ainabinadamu leo. Kwa hiyo kuna habari nyingi nzuri inayopatikana ya kufanya ziara za kurudia.
5 Ukihisi kama unasita kuhusu kufanya ziara za kurudia kwa baadhi ya wale uliowaangushia vitabu, labda unaweza kwenda na mtu fulani kundini mwenye ujuzi zaidi au anayejua zaidi kuhusu fundisho la mageuzi. Huyo anaweza kuwa ndugu au dada mwenye umri wa kwenda shule ambaye ametakiwa atumie wakati fulani shuleni akijifunza somo hilo na hivyo anafahamu zaidi nadharia za kisasa za mageuzi. Kwa upande mwingine, huenda kukawa na mtu fulani kundini ambaye hapo mbeleni aliamini mageuzi lakini sasa amejifunza kweli ya Biblia na sasa aweza kuwa msaada mkubwa katika kukanusha mafundisho bandia ya mageuzi.
6 Usisite kuelekeza fikira kwenye sura ya 19 ya kitabu Creation na kutumia tumaini la Biblia kwa ajili ya wakati ujao kuwa msingi wa ziara yako ya kurudia. Sura hiyo ina habari nyingi inayoweza kutumiwa kutia mtu moyo aelekeze fikira kwenye ahadi za Biblia kwa ajili ya wakati ujao. Labda unaweza kutumia sehemu inayoanza katika ukurasa 236 kwenye kichwa kidogo “Dunia Yageuzwa,” ikifuatwa na “Mwisho wa Umaskini” na “Hakuna Magonjwa Tena, Hakuna Kifo Tena” kwenye kurasa 238-9.
7 Kichapo hicho kizuri kimesaidia watu wengi kupata barabara inayoelekeza kwenye uhai. Huenda tukaweza kusaidia wengine bado kwa kuwatia moyo wasome na kufikiria yale ambayo kitabu Creation husema kwa habari ya uhai na jinsi ulivyoanza.