Kujenga Imani Katika Muumba wa Wanadamu
1 Watu walio wengi wamefikia mkataa fulani juu ya asili ya uhai. Inasikitisha kwamba, watu wengi wameshawishiwa vibaya kukubali mageuzi kuwa jibu. Kitabu Creation kinachunguza kindani pande zote mbili za suala hilo na chatoa uthibitisho wenye kusisimua wa kuunga mkono Biblia. Twaweza kusaidiaje watu wenye moyo mweupe ambao wameonyesha nia ya kusikiliza? Ni kwa kufanya ziara za kurudia. Tunaporudi, ni vizuri sikuzote kuwa na jambo hususa akilini la kusema ambalo litajenga imani katika Yehova akiwa Muumba wetu.
2 Ikiwa mtu alionyesha imani katika Biblia, mfikio huu waweza kuwa na matokeo kwa kuanzisha mazungumzo:
◼ “Isaya 45:18 hutoa elezo lenye nguvu juu ya asili ya ulimwengu mzima; ningependa kujua unalofikiria juu yalo. [Soma na uruhusu elezo.] Yehova ajijulisha mwenyewe kuwa Muumba wa mbingu na dunia. Vipi juu ya uhai katika dunia hii? Isaya 42:5 humpa sifa yote kwa jambo hilo pia. [Soma.] Ikiwa yale Biblia husema ni kweli, mageuzi lazima yawe uongo. Je! wahisi kwamba waweza kuitibari Biblia?” Rejezea sura ya 17 ya kitabu Creation, na uonyeshe sababu zaidi za kuamini Yehova kuwa Muumba.
3 Unaweza kuanza mazungumzo yako ukisema hivi:
◼ “Katika ziara yangu iliyopita, swali lilitokezwa, Wakati ujao wa mwanadamu na dunia ni nini? Angalia jinsi kitabu nilichokuachia kinavyojibu swali hilo.” Fungua kurasa 234-5 za kitabu Creation na umtie moyo asome mafungu 6 na 7. Kupendezwa zaidi kukionyeshwa, unaweza kuuliza: “Unafikiri, ni mabadiliko gani makubwa, yatakayofanyika duniani?” Ikifaa, jambo hili laweza kuzungumziwa wakati huo au katika ziara yako itakayofuata kwa kuendelea na mafungu mengine katika sura hii hii ya kitabu Creation.
4 Ikiwa uliangusha kitabu “Kuokolewa” katika Kiswahili ungeweza kuanza ziara ya kurudia kwa kusema:
◼ “Wanadamu wameteseka kwa maumivu na huzuni nyingi sana kwa sababu ya ufisadi na uovu. Yehova, Muumba wa dunia hii, ameahidi kwamba hali hizi zitakoma atakapotekeleza hukumu juu ya mfumo huu mwovu wa mambo. Ni maisha ya aina gani yanayowangoja waokokaji wa hukumu hii?” Fungua sura ya 4, ukurasa 30, na baada ya kuelekeza fikira kwenye kichwa onyesha habari iliyo katika fungu la 5 kwenye ukurasa wa 32. Unganisha andiko la Ufunuo 21:3, 4 na la Luka 23:42, 43 pamoja na picha iliyoko kwenye ukurasa 33. Tumia habari iliyoko katika mafungu 13-15, kurasa 36, 37 ili kuonyesha zaidi baraka za mfumo mpya.
5 Wahubiri wenye ustadi wamekuja kujua kwamba ni vema kuratibu nyakati zilizowekwa kwa ajili ya ziara za kurudia. Kuwa na mipango hususa ya kazi hii kutatusaidia tufuatie kupendezwa kwa bidii. Chunguza wakati ukufaao wewe na watu wanaoishi kwenye eneo hilo. Kwa kushiriki kwako kwa ukawaida katika kazi hii, utapata shangwe katika kutimiza amri ya ‘kufanya wanafunzi.’—Mt. 28:19, 20.