Mpango Wetu wa Kugawanya Vichapo Uliorahisishwa

¹ Mpango uliorahisishwa wa kugawanya vichapo bila malipo sasa umetumika kwa miezi tisa hivi. Je, mpango huu umefanikiwa? Ripoti za utumishi wa shambani zaonyesha ongezeko la kuangushwa kwa vichapo vya aina fulani. Mamilioni ya watu wanapewa fursa ya ‘kuja kuchukua maji ya uhai bure.’—Ufu. 22:17.

² Hata hivyo, hatuwajibiki, wala si tamaa yetu, kutoa vichapo bila busara kwa mtu yeyote tu atakayevikubali. Kama tutumiavyo mali zetu za kimwili kwa hekima, kila mhubiri ana daraka la kutumia kwa hekima vichapo ambavyo anapokea bila malipo kutoka kwa Sosaiti kupitia kutaniko lao. Kwa kuwa Sosaiti inawapa wahubiri vichapo bila malipo bila shaka haimaanishi kwamba hakuna gharama inayotumika katika kuvitokeza na kuvigawanya. Wote wanapaswa kuthamini hasa umuhimu wa vichapo vyetu katika kusaidia watu wenye mioyo ya haki wanapotafuta ujuzi sahihi kumhusu Yehova Mungu na Mwana wake Yesu Kristo.—Yn. 17:3.

³ Sosaiti inawezaje kuandalia watu vichapo bila malipo? Gharama zisizoepukika za kuvitokeza na kuvigawanya zalipiwa kwa michango. Watumishi wa Yehova waliojiweka wakfu ndio chanzo cha tegemezo hilo. Mashahidi wa Yehova hawajangoja watu wa umma wategemeze kazi hii yenye uharaka zaidi ya kutangaza Ufalme. Hatujapata kamwe kuhusika katika kufanya harambee, wala hatuhusiki sasa. Hata hivyo, michango midogo kutoka kwa watu wenye kupendezwa kwelikweli na watu wenye kuthamini tunaokutana nao shambani inathaminiwa.