Julisha Ukweli Kuhusu Yesu
1 Wakristo watiwa-mafuta, wakisaidiwa na kondoo wengine, “[wana] kazi ya kutoa ushahidi kumhusu Yesu.” (Ufu. 12:17) Hii ni kazi muhimu, kwa kuwa wokovu utapatikana tu kupitia yeye.—Yoh. 17:3; Mdo. 4:12.
2 ‘Ndiye Njia, Kweli, na Uhai’: “Mimi ndiyo njia na kweli na uhai. Hakuna ajaye kwa Baba ila kupitia mimi.” (Yoh. 14:6) Tunaweza kumfikia Mungu kwa sala na kuwa na uhusiano mzuri Naye kupitia Yesu tu, ambaye ndiye ile “njia.” (Yoh. 15:16) Yesu ndiye “kweli” kwa kuwa alitimiza unabii mbalimbali na mambo mengine yaliyomo katika Maandiko ya Kiebrania. (Yoh. 1:17; Kol. 2:16, 17) Kwa kweli, kusudi kuu la unabii wa kweli ni kujulisha zaidi daraka kuu la Yesu katika kutimizwa kwa kusudi la Mungu. (Ufu. 19:10) Zaidi ya hayo, Yesu ni “uhai.” Ili kupata zawadi ya uhai wa milele, lazima watu wote wadhihirishe imani katika dhabihu yake ya fidia.—Yoh. 3:16, 36; Ebr. 2:9.
3 Ndiye Kichwa na Mfalme Anayetawala: Pia lazima watu watambue mamlaka kuu zaidi ambayo Yehova amempa Mwanaye. Yesu amewekwa kuwa Mfalme wa Ufalme wa Mungu, ‘na mataifa watamtii.’ (Mwa. 49:10) Kwa kuongezea, Yehova amemweka awe Kichwa cha kutaniko. (Efe. 1:22, 23) Twahitaji kusaidia wanafunzi wetu wa Biblia waelewe jinsi Yesu anavyoliongoza kutaniko na kumtumia “mtumwa mwaminifu na mwenye busara” kuandaa ‘chakula cha kiroho kwa wakati ufaao.’—Mt. 24:45-47.
4 Kuhani wa Cheo cha Juu Mwenye Rehema: Kwa kuwa Yesu alipatwa na majaribu na kuteseka alipokuwa mwanadamu, yeye “aweza kuja kusaidia wale wanaotiwa kwenye jaribu.” (Ebr. 2:17, 18) Wanadamu wasiokamilika hufurahi sana kujua kwamba Yesu huwahurumia kwa sababu ya udhaifu wao na kuwaombea kwa fadhili! (Rom. 8:34) Kupitia dhabihu ya Yesu na huduma zake akiwa Kuhani wa Cheo cha Juu, twaweza kumfikia Yehova “kwa uhuru wa usemi” ili tuweze kupokea “msaada katika wakati ufaao.”—Ebr. 4:15, 16.
5 Jitihada zetu za kuwajulisha wengine kweli kuhusu Yesu na ziwachochee wamtii na kumtumikia pamoja nasi.—Yoh. 14:15, 21.