Wakaribishe Kwa Uchangamfu!

1. Ni tukio gani linalotupa nafasi nzuri sana ya kutoa ushahidi, na kwa nini?

¹ Hakuna tukio linalotupa nafasi nzuri zaidi ya kutoa ushahidi kama Ukumbusho wa kila mwaka wa kifo cha Yesu. Fikiria hili: Mwaka huu, zaidi ya wageni milioni kumi wanatarajiwa kuhudhuria Ukumbusho na kusikiliza kuhusu mambo mawili yaliyoonyesha upendo mkubwa zaidi unaotokana na fidia. (Yoh. 3:16; 15:13) Watajifunza kuhusu baraka wanazoweza kupata kwa sababu ya zawadi ya Yehova. (Isa. 65:21-23) Hata hivyo, si msemaji peke yake atakayetoa ushahidi katika tukio hilo. Wote watakaohudhuria watakuwa na nafasi ya kutoa ushahidi wenye nguvu kwa kuwakaribisha wageni kwa shauku na uchangamfu.—Rom. 15:7.

2. Tunaweza kuwakaribishaje wageni kwa uchangamfu?

² Badala tu ya kutafuta kiti chako na kuketi huku ukingoja kimya programu ianze, kwa nini usichukue hatua ya kwanza kujitambulisha kwa wale walioketi karibu nawe? Huenda wageni wakawa na wasiwasi na wasijue la kufanya. Kutabasamu kwa uchangamfu na kuwasalimu kirafiki kunaweza kuwasaidia sana watulie. Ili kujua ikiwa mtu fulani amehudhuria kwa sababu alipokea mwaliko, huenda ukamuuliza iwapo hii ni mara yake ya kwanza kuhudhuria mojawapo ya mikutano yetu au ikiwa anamjua yeyote kutanikoni. Labda unaweza kumwomba aketi karibu nawe na mtumie pamoja Biblia na kitabu cha wimbo. Ikiwa Jumba la Ufalme litatumiwa, huenda ikawezekana kumwonyesha kifupi sehemu mbalimbali za Jumba hilo. Baada ya hotuba, uwe tayari kujibu maswali yake. Ikiwa ni lazima kutaniko lenu liondoke haraka ili kutaniko lingine litumie Jumba hilo, unaweza kusema: “Ningependa kujua maoni yako kuhusu programu hii. Je, kuna njia yoyote ninayoweza kuwasiliana nawe?” Kisha fanya mipango ya kuwasiliana naye wakati mwingine. Wazee wangependa hasa kuwa chonjo kuwatia moyo wahubiri waliohudhuria ambao hawatendi.

3. Kwa nini ni muhimu tuchukue hatua ya kwanza kuwakaribisha wageni kwa uchangamfu kwenye Ukumbusho?

³ Kwa wageni wengi, itakuwa mara yao ya kwanza kujionea shangwe, amani, na umoja wa paradiso ya kiroho tunayofurahia tukiwa watu wa Yehova. (Zab. 29:11; Isa. 11:6-9; 65:13, 14) Wageni hao watakumbuka nini baada ya kuhudhuria Ukumbusho? Itategemea jinsi tulivyowakaribisha.