VIJANA HUULIZA
Ninaweza Kukabilianaje na Mkazo wa Kuvunjika kwa Uhusiano?
Steven anasema hivi: “Uhusiano na rafiki yangu wa kike ulipovunjika, nilipoteza kabisa usawaziko wa kihisia. Nilikuwa na maumivu makali ya kihisia ambayo sikuwa nimewahi kuhisi katika maisha yangu.”
Umewahi kukabili hali kama hiyo? Ikiwa ndivyo, makala hii inaweza kukusaidia.
Unakuwa na hisia gani?
Wote wawili huumia uhusiano unapovunjika.
Ikiwa wewe ndiye uliyeamua kuvunja uhusiano, labda unaweza kuelewa hisia za Jasmine, aliyesema hivi, “Kutambua kwamba nimemuumiza mtu ambaye nilimjali kulisumbua sana dhamiri yangu na nisingependa kuhisi hivyo tena.”
Kama rafiki yako ndiye aliyeamua kuvunja uhusiano, labda unaweza kuelewa kwa nini hali hiyo inaitwa nusu-kufa. Msichana anayeitwa Janet anasema hivi: “Nilipitia hatua zote za kuhuzunika kutia ndani kutoikubali hali hiyo, kukasirika, kutarajia uhusiano utarudi tena, kushuka moyo, na mwishowe—karibu na mwaka mmoja hivi—niliikubali hali yangu.”
Jambo kuu: Kuvunjika kwa uhusiano kunaweza kukufanya uvunjike moyo na kupoteza tumaini. Kama mwandishi wa Biblia alivyosema: “Roho iliyopondeka huikausha mifupa.”—Methali 17:22.
Unaweza kufanya nini?
Zungumza na mtu mzima unayemtumaini. Biblia inasema hivi: “Rafiki wa kweli anapenda nyakati zote, naye ni ndugu aliyezaliwa kwa ajili ya wakati wa taabu.” (Methali 17:17) Kummiminia hisia zako mzazi au rafiki mkomavu kunaweza kukusaidia kuona mambo kihalisi.
“Kwa miezi mingi nilijitenga na wengine na sikumweleza mtu yeyote hisia zangu. Hata hivyo marafiki wanaweza kusaidia kupona kihisia. Ni wakati tu nilipoamua kueleza hisia zangu ndipo nilipopata nafuu kwa kadiri fulani.”—Janet.
Jifunze kutokana na mambo yaliyotokea. Methali nyingine ya Biblia inasema hivi: “Jipatie hekima, jipatie uelewaji.” (Methali 4:5) Mambo yasiyopendeza tunayokabili yanaweza kutufundisha mambo mengi na jinsi ya kukabiliana na mambo yanayovunja moyo.
“Baada ya kuvunjika kwa uhusiano, rafiki yangu aliniuliza hivi, ‘Umejifunza nini kutokana na uhusiano huo, na unaweza jinsi gani kutumia mambo uliyojifunza utakapoanzisha urafiki na mtu mwingine wakati ujao?’”—Steven.
Sali. Biblia inasema hivi: “Mtupie Yehova mzigo wako, naye mwenyewe atakutegemeza.” (Zaburi 55:22) Sala inaweza kukusaidia kukabiliana na huzuni na kuwa na maoni tofauti kuhusu kuvunjika kwa uhusiano wenu.
“Sali kwa ukawaida. Yehova anaelewa maumivu yako na anajua hali yako vizuri zaidi kuliko unavyoijua.”—Marcia.
Wasaidie watu wengine. Biblia inasema hivi: “Mkiendelea kuangalia, si faida za kibinafsi za mambo yenu wenyewe tu, bali pia faida za kibinafsi za wengine.” (Wafilipi 2:4) Kadiri unavyowasaidia wengine, ndivyo utakavyoweza kuwa na mtazamo unaofaa kuhusu kuvunjika kwa uhusiano.
“Kuvunjika kwa uhusiano ni kama mwisho wa dunia, na kunaumiza sana kuliko maumivu ya kupigwa. Lakini nimetambua maumivu hayo hupoa na hatimaye mtu huhisi vizuri. Nilipaswa kuruhusu muda upite ili niweze kupona.”—Evelyn.