Simba Angurumaye awa Kondoo Mpole
KAMA ILIVYOSIMULIWA NA ENRIQUE TORRES, JR.
NILIZALIWA mwaka wa 1941 kwenye kisiwa cha Karibea cha Puerto Riko, ambapo lugha ya watu wote ni Kihispania. Wazazi wangu wa hali ya chini walikuwa wa dini ya Katoliki ya Kiroma, lakini wao wala mimi, wala dada zangu, wala ndugu yangu (aliyekufa alipokuwa angali mtoto) hatukupata mafundisho yoyote ya kidini, nasi hatukuenda kanisani mara nyingi.
Familia yetu iliondoka Puerto Riko kwenda Marekani mwaka wa 1949. Tulikaa New York City katika eneo la East Harlem liitwalo El Barrio. Tulikaa huko hadi mwaka wa 1953. Lugha ya Kiingereza ilikuwa ngumu kwangu. Kizuizi hiki kilinifanya nihisi kutofaa.
Uvutano Wenye Ukaidi
Kisha familia yetu ikahamia sehemu ya Prospect Heights ya Brooklyn. Ilikuwa wakati huu nilipoathiriwa na marika wangu niwe sehemu ya genge lao la mitaani. Baadaye nikateuliwa kuwa kiongozi wa hilo genge. Baadaye nikawa kiongozi wa genge jingine, ambalo lilihusika na kuiba magari. Pia nikawa mkusanyaji wa madeni ya kamari isiyo ya halali, kwa ajili ya wapokeaji-fedha za bahati nasibu ujiranini. Kisha, nikaendelea hadi kuvunja nyumba usiku na nilishikwa mara kadhaa kabla sijafikia umri wa miaka 15. Wakati huo nilikuwa nimeacha shule.
Nilipokuwa mwenye umri wa miaka 16, wenye mamlaka walinihamisha hadi Puerto Riko kwa miaka mitano, hiyo ikiwa sehemu ya kupunguziwa hukumu. Nilipelekwa kwa babu yangu na familia yake. Alikuwa ofisa mstaafu wa polisi aliyestahiwa sana. Hata hivyo, mwaka mmoja baadaye babu yangu alinirudisha Brooklyn kwa sababu ya kujiingiza kwangu katika vita vya ulevi, kushirikiana na watu wasio na tabia nzuri, na kuvunja nyumba usiku.
Fungu la Baba Katika Maisha Yangu
Niliporudi New York City kutoka Puerto Riko, nilikuta kuwa baba yangu alikuwa ameanza kujifunza Biblia na Mashahidi wa Yehova. Hata hivyo, maisha yangu yalielekea upande mwingine. Niliendelea kuishi maisha yasiyo ya kumhofu Mungu na kujiingiza katika matumizi mabaya ya dawa na kileo. Nikawa mshiriki wa genge la kuvunja nyumba na unyang’anyi wa kimabavu, ambao ulinifanya nitiwe mbaroni mwaka wa 1960. Nilipatikana na hatia na kuhukumiwa kifungo cha miaka mitatu gerezani.
Mwaka wa 1963, niliachiliwa kwa kifungo cha nje. Lakini punde si punde nikakamatwa tena kwa sababu ya kuvunja nyumba, nikafungwa gerezani kwa miaka miwili kwenye Kisiwa cha Rikers, katika New York City. Nikaachiliwa mwaka wa 1965. Tena, mwaka huohuo nikakamatwa kwa sababu ya kuua kimakusudi. Nilikuwa nimekuza mtazamo mkali ulio kama wa simba!
Mahakama ilinihukumu kifungo cha miaka 20 huko Dannemora, sehemu ya kaskazini ya jimbo la New York. Huko nikajiingiza katika maisha ya gerezani.
Hata hivyo, kama ilivyotajwa awali, baba yangu alikuwa akijifunza Maandiko na Mashahidi wa Yehova. Baadaye alibatizwa na kutumikia akiwa mzee katika kutaniko moja kule Harlem. Mara nyingi alinitembelea nilipokuwa kifungoni, na sikuzote aliongea nami juu ya Mungu, jina Lake, na kusudi Lake.
Ingawa hivyo, nilipokuwa gerezani Dannemora, nikawa sehemu ya kikundi cha wala-riba, ambao walitoa mkopo ili wapate riba kubwa ya kupita kiasi. Wakati huu, katika 1971, ghasia ilizuka katika gereza jingine, Attica Correctional Facility, katika Jimbo la New York. Ghasia hiyo ilikuwa kichwa kikuu kwenye magazeti na kusikika ulimwenguni pote katika redio na televisheni. Baada ya ghasia hiyo, ili kuzuia jambo hilohilo lisitokee Dannemora, msimamizi wa gereza aliona kwamba ilimbidi ateue wafungwa ambao huenda wakawa na uvutano mbaya kwa wafungwa wengine. Aliwatenga hao katika vyumba vingine vya pekee.
Kati ya wafungwa 2,200, ni wafungwa 200 hivi waliotengwa. Kuchujwa zaidi kulifanya wengine wapigwe vikali. Kuongezea hilo, ikiwa sehemu ya ile iliyobandikwa jina “hatua za kurekebisha tabia,” dawa zilitiwa kwenye chakula.
Hii haikuwa mara ya kwanza kupelekwa sehemu iliyotengwa kwa sababu ya tabia fidhuli. Hata hivyo, hii ilikuwa mara ya kwanza kwangu kuwa mhasiriwa wa ukatili huo, nikaathirika sana. Nilitiwa pingu mikononi na miguuni, na kupigwa sana nyakati mbalimbali na walinzi. Pia ilinilazimu kuvumilia matukano ya kijamii kwa sababu ya taifa nililotoka. Kwa sababu ya kutwezwa na mapigo hayo, nilisusia chakula nikawa nala tu kidogo wakati huo wa kutengwa kwangu, ambako kuliisha baada ya miezi mitatu hivi. Nikapoteza karibu kilo 20.
Baba yangu alipotaka kujua kwa nini nadhoofika kiafya, alipuuzwa na maofisa wa gereza. Hiyo ilinifanya nikose tumaini, nikaanza kuandikia wanasiasa ili nipate msaada wa kutendwa huko kusiko kwa haki.
Baba yangu aliwaendea mara nyingi waandishi wa habari kwa sababu ya kutwezwa, na kutia dawa kwenye chakula cha wafungwa katika sehemu ya vyumba vya pekee. Ni gazeti moja tu, Amsterdam News, lililoandika makala iliyozungumzia hali hizo zenye kusikitisha. Baba yangu alimwendea Mkuu wa Urekebishaji wa Tabia, katika Albany, New York, pindi mbalimbali naye sikuzote aliambiwa kwamba nilikuwa katika sehemu ya kawaida. Ripoti yangu kuhusu hali za wafungwa gerezani ilipuuzwa. Nikazidi kukata tamaa kuliko wakati mwingine wowote, kwa kuwa yaelekea sikupata msaada mahali popote.
Ndipo nikakumbuka baadhi ya mambo ambayo baba yangu alikuwa ameniambia. Niliamua kumwomba Mungu msaada.
Namgeukia Mungu
Kabla ya kusali, nilikumbuka kitia-moyo cha daima cha baba yangu, nisali si kwa Yesu bali kwa Baba ya Yesu, ambaye jina lake ni Yehova. Nilisujudu sakafuni kwenye seli na kumweleza nasikitikia mwendo wa maisha ambao nilikuwa nimechagua, ambao ulifanya nikatumia zaidi ya nusu ya maisha yangu gerezani. Niliomba dua kwa Yehova anisaidie nitoke katika hali hii kwa sababu sasa nilitambua kwamba yeye pekee ndiye aliyekuwa na uwezo wa kunikomboa kutoka katika mashaka haya.
Sijui nilisali kwa muda gani, lakini nilisema juu ya maisha yangu ya zamani na kumwomba Yehova kwa bidii nikitubu ili anisamehe. Niliahidi kwamba ningejaribu kujifunza mengi juu yake. Muda mrefu haukupita, nikaachiliwa kutoka katika kifungo hicho cha upweke kilichokuwa kama gereza la chini ya ardhi hadi kwenye gereza la kawaida. Hiyo ilikomesha kususia kwangu chakula.
Ili kutenda kupatana na ahadi yangu ya kujifunza juu ya Yehova, nilianza kusoma New World Translation of the Holy Scriptures. Mojawapo ya mambo yaliyonipendeza kuhusu tafsiri hii ya Biblia, lilikuwa jalada lake la kijani-kibichi. Ilinivutia kwa sababu nguo za gerezani, seli, kuta, na korido zote zilikuwa za rangi ya kijivu, kijivu chenye kuhuzunisha. Baadaye, kwa kushangaza, rangi ya vitu vyote hivyo ilibadilishwa ikawa ya kijani kilichokolea. Rangi hii ilikubaliwa na Idara ya Marekebisho baada ya maasi ya gereza la Attica.
Pia nilianza kusoma magazeti ya Mnara wa Mlinzi na Amkeni!, ambayo baba yangu alikuwa amepanga niletewe. Kusoma mambo yaliyoonwa ya Mashahidi wa Yehova wengi, ambao walikuwa gerezani kwa sababu ya kushikilia imani yao na ambao walipitia mambo mengi zaidi yangu, kulinigusa moyo sana. Hao hawakuwa wamefanya uhalifu wowote lakini waliteseka isivyo haki kwa kuwa waaminifu kwa Mungu. Nami, kwa upande mwingine, nilistahili adhabu niliyopata. Baada ya kusoma mambo haya yaliyoonwa, moyo wangu uliguswa, na nikatiwa moyo kujifunza mengi juu ya Yehova na watu wake.
Hatimaye, baada ya mwaka mmoja, nikaenda kwenye baraza la kifungo cha nje. Kesi yangu ilipitiwa, kutia ndani masaibu yangu katika ile sehemu ya vyumba vya pekee. Nilifurahi kujua kwamba nilikuwa niachiliwe kwa kifungo cha nje katika 1972.
Majuma mawili baada ya kuachiliwa kwangu, nilikwenda kwenye Jumba la Ufalme la mahali hapo la Mashahidi wa Yehova, katika Spanish Harlem. Lakini bado nilihisi sistahili kushirikiana na watu wa Yehova. Na bado nilikuwa na mengi ya kujifunza juu ya Yehova, tengenezo lake, na watu wake. Pia nilihitaji wakati wa kujirekebisha kulingana na jamii baada ya kutumia wakati mwingi sana gerezani.
Kwa kusikitisha, sikuweza kuacha njia zangu za zamani. Nikarudia dawa za kulevya, uhalifu, na maisha yasiyompendeza Mungu. Hatimaye, hiyo ikanifanya nipate hukumu nyingine ya gereza ya miaka 15. Hata hivyo, nahisi kwamba lazima Yehova awe aliona uzuri fulani katika moyo wangu, kwa kuwa hakukata tamaa kunihusu. Naweza kukuambia tu kwamba uwe gerezani au la, Yehova hawaachi au kukata tamaa kamwe kuhusu wale ambao wana mwelekeo wa kujifunza juu yake.
Kujifunza Biblia Katika Jela
Wakati huu, huko gerezani Dannemora, nilitumia fursa ya kuwepo kwa Funzo la Biblia la kila juma lililoongozwa na mhudumu mmoja wa Mashahidi wa Yehova. Baadaye, nilihamishwa hadi Mid-Orange Correctional Facility, gereza la ulinzi wa kiasi sehemu ya kaskazini ya jimbo la New York. Hilo lilikuwa badiliko kutoka katika gereza la ulinzi mkali huko Dannemora.
Baada ya miaka miwili katika Mid-Orange Correctional Facility, nilianza kushiriki kwa ukawaida katika Funzo la Biblia ambalo mfungwa mwenzangu alikuwa nalo, ambalo lilikubaliwa na wakuu wa gereza. Mama yake, ambaye alikuwa mmoja wa Mashahidi wa Yehova, alikuwa amefanya mpango awe na funzo hilo. Mwishowe, kwa kuendelea kutwaa ujuzi, nilianza kutumia kanuni za Biblia, ambazo hatimaye ziliongoza kwenye maendeleo ya kiroho.
Baada ya kunyimwa kifungo cha nje mara saba, nilipewa kifungo cha nje baada ya mara ya nane. Sababu zilizotolewa kwa katazo la kifungo cha nje kabla ya hapo ni “mwelekeo wangu wa kufanya uhalifu.” Niliachiliwa baada ya kifungo cha miaka 8 kati ya ile hukumu ya miaka 15.
Hatimaye Kuachiliwa Kutoka Kwenye Giza
Nilipoachiliwa, nilikengeushwa tena, na nikarudia kifupi dawa za kulevya. Pia nilikuwa nikiishi na mwanamke bila kufunga ndoa kisheria. Hiyo ilianza mwaka wa 1972. Hata hivyo, mwaka wa 1983, nilianza tena funzo langu la Biblia pamoja na Mashahidi wa Yehova. Wakati huu, nilianza kuhudhuria mikutano ya Kikristo kwa ukawaida. Hata hivyo, kabla ya kujifunza na kuhudhuria mikutano, niliacha kabisa kutumia dawa za kulevya na kuvuta sigareti.
Hata hivyo, kinyume cha sheria za Mungu kuhusu ndoa, bado nilikuwa nikiishi na kimada wangu. Hiyo ilisumbua dhamiri yangu, kwa hiyo nikajaribu kumfanya akubali funzo la Biblia, ili tuhalalishe uhusiano wetu kwa kufunga ndoa. Lakini alisema kwamba Biblia ni kitabu kilichoandikwa na wanaume ili kutiisha wanawake na kwamba ndoa haikuwa ya lazima.
Nilitambua kwamba singeweza kuendelea kuishi katika uhusiano wenye ukosefu wa adili na mwanamke ambaye hakustahi sheria za Mungu juu ya ndoa. Hivyo basi, nilikomesha uhusiano wetu na kuhamia Brooklyn. Nilijua kwamba singeweza kuongea na wengine juu ya Mungu na makusudi yake ikiwa mambo yangu hayakupatana na sheria zake.
Nikiwa huru kutoka katika mambo yote yasiyo ya Kimaandiko na nikiwa nimejifunza Biblia kwa miaka mitatu, nikiwa na dhamiri njema nikaweka maisha yangu wakfu ili nifanye mapenzi ya Mungu na kuonyesha wakfu huo kwa ubatizo kwenye mkusanyiko mmoja wa Mashahidi wa Yehova. Ahadi niliyokuwa nimetoa ya kumjua Mungu ambaye jina lake baba yangu alilitaja sikuzote, ni jambo ambalo sijasikitika kufanya. Na ahadi yangu kwa Yehova katika magereza ya chini ya ardhi kule Dannemora ndiyo nitakayofanya jitihada kuishikilia hadi atakapoleta baraka nyingi ambazo ameahidi katika Neno lake.
Kutazamia Paradiso
Natazamia sana wakati ambapo Yehova atageuza dunia hii yote iwe paradiso yenye kupendeza. (Zaburi 37:11, 29; Luka 23:43) Pia natazamia ahadi nyingine ya Mungu—ufufuo wa wafu ili wapate fursa ya kuishi duniani milele. (Yohana 5:28, 29; Matendo 24:15) Huo utakuwa wakati mzuri ajabu kama nini kukaribisha wapendwa waliokufa warudi kutoka makaburini, kutia ndani baba yangu, ndugu yangu mdogo, na wengine niliowajua waliokufa mapema! Sikuzote mimi hufikiria tumaini hili, nalo hunijaza shangwe. Shangwe nyingine niliyo nayo sasa ni kwamba dada zangu wawili na baadhi ya watoto wao wameweka maisha zao wakfu kwa Yehova na wamebatizwa.
Sasa, ninapoeleza wengine imani yangu na kushiriki mambo yangu yaliyoonwa, nashukuru kuwajulisha maneno yenye kufariji ya mtunga-zaburi, yaliyorekodiwa kwenye Zaburi 72:12-14: “Atamkomboa mhitaji aliapo, na mtu aliyeonewa iwapo hana msaidizi. Atamhurumia aliye dhaifu na maskini, na nafsi za wahitaji ataziokoa. Atawakomboa nafsi zao na kuonewa na udhalimu, na damu yao ina thamani machoni pake.”
Subira ya Yehova kwangu imenichangamsha moyo na kuniwezesha kujifunza na kukuza tabia anazotaka watu wake wawe nazo—si wakatili kama simba, bali wenye amani, wenye fadhili, wenye sifa za tabia pole kama kondoo. Hiyo ni lazima, kwa kuwa Neno la Mungu husema, “huwapa wanyenyekevu [“Wapole”, NW] neema.”—Mithali 3:34.
[Blabu katika ukurasa wa 12]
“Nikakamatwa tena kwa sababu ya kuvunja nyumba, nikafungwa gerezani kwa miaka miwili kwenye Kisiwa cha Rikers, katika New York City. Nikaachiliwa mwaka wa 1965. Tena, mwaka huohuo nikakamatwa kwa sababu ya kuua kimakusudi. Nilikuwa nimekuza mtazamo mkali ulio kama wa simba!”
[Picha katika ukurasa wa13]
Siku niliyobatizwa